MME NTIENSE JEHOVAH ke Georgia ẹnen̄ede ẹsịn idem ẹkwọrọ ikọ, ndien Jehovah ke ọdiọn̄ utom mmọ. Mmọ ndisịn idem n̄kwọrọ ikọ ntem anam eti mbụk ekpere ndisịm kpukpru ebiet ke Georgia.

Enyọn̄: Nditọete ke ẹben̄e idem ndikọkwọrọ ikọ ke Ushguli emi odude ke enyọn̄ akamba obot

Isua ifan̄ emi, mme asuanetop ye mme asiakusụn̄ ẹnen̄ede ẹsịn idem ẹkwọrọ ikọ ke mme ebiet oro owo mîsisọpke ikwọrọ ikọ. Mmọ ẹkwọrọ ikọ ke mme ikpọ obot,  obio-in̄wan̄, ye ke n̄kpri obio. Moto emi ọsọn̄de idem, m̀mê ekpri bọs emi awatde ke urụk ikpọn̄ ke mmọ ẹsida ẹsịm do.

Nditọete ke ẹkwọrọ ikọ ke Svaneti

Ọtọn̄ọde ke 2009, n̄kọk itieutom Georgia ẹsinam kpukpru esop ke idụt oro ẹdiọn̄ọ mme efakutom oro owo mîbahakede inọ esop kan̄a. Mmọ ẹsidọhọ mme asuanetop ẹka ẹkekwọrọ ikọ ke mme efakutom emi. Man ẹkeme ndinam emi, nditọete ẹkenyene ndiyak ediwak n̄kpọ atak mmọ.

Ana ye Temuri Bliadze

Esisịt ini ke Temuri ye Ana Bliadze ẹma ẹkedọ ndọ, mmọ ẹma ẹkop ke ẹnen̄ede ẹyom mme asuanetop ẹkekwọrọ ikọ ke n̄kan̄ Ajaria emi etiede obot obot. Ikebịghike mmọ ẹkedep isọn̄ ndida mbọp ufọk mmọ. Edi, idahaemi se mmọ ẹkekopde emi ama anam mmọ ẹkere ndinen̄ede nsịn idem n̄kwọrọ ikọ.

Mmọ ẹma ẹka ebiet emi ẹkekwọrọ ikọ ke urua kiet. Temuri etịn̄ nte n̄kpọ eketiede ke akpa ini emi mmọ ẹkekade do. Enye ọdọhọ ete: “Mme asuanetop emi ẹdude do ẹsisan̄a ata anyan usụn̄ man ẹkekwọrọ ikọ ke n̄kpri obio-in̄wan̄ do. Nnyịn ima inyene moto emi ọsọn̄de idem, inyụn̄ ikere ke moto emi eyenen̄ede ọfọn ye nditọete do.”

Ana an̄wan esie ọdọhọ ete: “Ikememke utom nnyịn ndikpọn̄ obio nnyịn sia ima inen̄ede ima esop ye ubon nnyịn. Edi Jehovah ama ọdiọn̄ nnyịn.” Temuri ye Ana ẹn̄wam otu kiet emi odude ke Keda ke Ajaria ke se ibede isua ita idahaemi.

Mme Asiakusụn̄ Ẹnam N̄kpọ ye Eti Ibuot

Enyene mbon emi ẹkedide mme akpan asiakusụn̄ ibio ini. Mmọ ẹma ẹnen̄ede ẹn̄wam ẹkwọrọ ikọ ke mme obio-in̄wan̄ emi ẹnen̄erede oyom usụn̄. Edi, ke ini emi ẹkedọhọde mmọ ẹdi akpan asiakusụn̄ ama okokụre, mmọ ẹma ẹsụhọde ẹtie ke mme efakutom emi ẹkenọde mmọ man ẹka iso ẹn̄wam mbon emi mmọ ẹsikpepde Bible.

 Ke uwụtn̄kpọ, ẹkenọ nditọete iban iba emi ẹkerede Khatuna ẹkekwọrọ ikọ ke Manglisi. Manglisi ama eye etieti. Mme Ntiense Jehovah ikodụhe ke obio emi. Ndikwọrọ ikọ do ama ẹnen̄ede ẹnem nditọete iban iba emi. Mmọ ẹma ẹkpep owo 9 Bible ke akpa ọfiọn̄ emi mmọ ẹkesịmde do, ẹkpep owo 12 ke ọyọhọ ọfiọn̄ iba, ẹkpep owo 15 ke ọyọhọ ọfiọn̄ ita, ekem ẹkpep owo 18 ke ọyọhọ ọfiọn̄ inan̄. Ntre mmọ ẹma ẹbiere ndisụhọde ntie ke Manglisi, man ẹka iso ẹn̄wam nditọ ukpepn̄kpọ Bible mmọ.

Akana mmọ ẹyom n̄kpọ ẹnam man ẹkpekeme ndise mban̄a idem mmọ. Ediwak mbon emi ẹsidide Manglisi ẹsima udia emi ẹdade mfri eto emi etiede nte eto ofụm ẹnam, sia ẹdọhọ ke mfri emi ọfọn owo ke idem. Ntre, nditọete iban emi ẹma ẹsitan̄ nsek mfri eto oro ẹkenam udia oro, ẹmen ẹkenyam ke urua. Edi, owo ama edinọ mmọ n̄kpọ en̄wen emi mmọ ẹkedade ẹn̄wana okụk.

 Usen kiet, n̄wan emi mmọ ẹsikpepde Bible ama emen nditọ unen ọsọk mmọ. Enye ama ọdọhọ mmọ ke eka unen imọ kiet ekesịn nsen ke ebiet emi imọ mîdiọn̄ọke, ọkụbọ do obot nditọ emen ọnyọn̄ edi ufọk. Eyenan̄wan oro okoyom ndinọ mbon emi ẹsikpepde enye Bible unen emi enye mîkodorike enyịn ndinyene mi. Sia kiet ke otu nditọete iban emi ama ọkọdọdiọn̄ọ nte ẹsibọkde unen, mmọ ẹma ẹbiere ndinam ekpri ufọkunen.

Kiet ke otu nditọete iban emi ọkọdọhọ ete: “Jehovah, nditọete, ye nditọ ukpepn̄kpọ Bible nnyịn, ẹma ẹn̄wam nnyịn ikeme ndidu ke Manglisi ke isua ition.” Idahaemi, imenyene ekpri otu ke Manglisi.

Khatuna Kharebashvili ye Khatuna Tsulaia ke Manglisi

Mme Asiakusụn̄ Ẹkpep Usem En̄wen

Ke isua ifan̄ emi, ediwak owo ẹto nsio nsio idụt ẹdidụn̄ ke Georgia. Ediwak mme asiakusụn̄ ẹma ẹdikụt ke imenyene mbon en̄wen emi anade ikwọrọ ikọ inọ. Ntre mmọ ẹma ẹtọn̄ọ ndikpep nsio nsio usem, utọ nte Arabic, Azerbaijani, Chinese, Ikọmbakara, Kurdish, Persian, ye Turkish.

Ediwak mme asiakusụn̄ ẹma ẹwọrọ ẹka mme esop ye mme otu emi ẹsemde usem esenidụt, mbon eken ẹwọrọ ẹka ẹbiet emi ẹnen̄erede ẹyom mme ọkwọrọ ikọ ke idụt en̄wen. Giorgi ye Gela ẹkedi isua edịp ye ifan̄ kpọt ke ini mmọ ẹkewọrọde ẹka idụt emi ekperede Georgia. Giorgi ọdọhọ ete: “Ikoyom ndida ofụri uwem nnyịn nnam n̄kpọ Jehovah, ndikọwọrọ n̄ka idụt en̄wen ama an̄wam nnyịn ikeme ndinam emi.”

Kop se Gela eketịn̄de mi aban̄a ini emi enye okodude do: “Ndidi ebiowo ke utọ efakutom oro ekpep mi ediwak n̄kpọ. Idụhe se inemde nte Jehovah ndida owo n̄n̄wam mme erọn̄ esie.”​—⁠John 21:⁠17.

 Giorgi n̄ko ama ọdọhọ ete: “Nnyịn ima inen̄ede isịn idem inam utom nnyịn inyụn̄ ikereke ndifiak nnyọn̄, kpa ye oro ediwak n̄kpọ akafịnade nnyịn. Ikonyụn̄ ida nte ke ikanam se akpanade inam.”

Eyenete en̄wen emi ekerede Gela ama aka Turkey ọkọkwọrọ ikọ ke isua ifan̄. Enye ọdọhọ ete: “N̄kọfiọkke ndisem usem obio oro ke nsonso oro, ntem ukwọrọikọ ikenen̄ekede inem mi. Edi ke ini n̄kọfiọkde ndisem usem oro, ama esinem mi nditịn̄ ikọ ye nditọete ye mme owo ke efakutom, ndien emi ama anam esịt enen̄ede enem mi.”

Nino anam utom usiakusụn̄ ke Istanbul ke Turkey ebe isua duop idahaemi. Kop se enye etịn̄de aban̄a nte etiede imọ ke idem mi: “Jehovah ama an̄wam mi toto ke akpa usen emi n̄kọwọrọde n̄ka do. Ndinam utom usiakusụn̄ ke idụt en̄wen ayanam fi etiene okụt se afo esikotde ke N̄wedisua nnyịn.