Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Kpebe Mbuọtidem Mmọ

Introduction

Introduction

“Ẹdi mme andikpebe mbon oro otode ke mbuọtidem ye ime mmọ ẹbọ mme un̄wọn̄ọ ẹnyene.”—MME HEBREW 6:12.

1, 2. Didie ke esenyịn oro asan̄ade-san̄a akada mbon oro ẹtịn̄de ẹban̄a ke Bible, ndien ntak emi ọkpọfọnde inam ufan ye mmọ?

“ENYE eketịn̄ aban̄a mbon emi ẹsiakde ke Bible nte n̄kpọ eke mmọ ẹma ẹkededi ufan ye enye ebịghi.” Se eyenete an̄wan kiet eketịn̄de edi oro ke ama okokop utịn̄ikọ akamba eyenete emi edide esenyịn oro asan̄ade-san̄a. Enye ama enen, sia esenyịn oro ama ekpep Ikọ Abasi ke idemesie ke ediwak isua onyụn̄ ọnọ mbon en̄wen ukpep tutu iren ye iban emi Bible etịn̄de nte ẹkenyenede mbuọtidem ẹdikabade ẹtie nte mme ufan emi enye ekenyenede toto ke ini uyen.

2 Ndi ikpọfọnke inam ufan ye ediwak mbon oro Bible etịn̄de aban̄a mi? Ndi emesida mmọ nte mme ufan fo? Kere nte ekpetiede fi ke idem ndisan̄a kiet nneme nneme ye mmọ, nnyụn̄ nda ini mmehe ye utọ owo nte Noah, Abraham, Ruth, Elijah, ye Esther. Kere utọ owo emi mmọ ẹkpenamde fi edi, ọkọrọ ye nti item ye nsịnudọn̄ emi mmọ ẹkpesinọde fi!—Kot Mme N̄ke 13:20.

3. (a) Didie ke ikeme ndibọ ufọn ke ndikpep mban̄a mme anam-akpanikọ iren ye iban oro ẹtịn̄de ẹban̄a ke Bible? (b) Mme mbụme ewe ke idineme?

3 Imọfiọk ke iyanam ufan ye mme anam-akpanikọ iren ye iban oro ke ini ẹdinamde ‘ndinen owo ẹset ke n̄kpa.’ (Utom 24:15) Edi, idem idahaemi, imekeme ndibọ ufọn ke ini ikpepde iban̄a mmọ. Didie? Apostle Paul ọbọrọ ete: “Ẹdi mme andikpebe mbon oro otode ke mbuọtidem ye ime mmọ ẹbọ mme un̄wọn̄ọ ẹnyene.” (Heb. 6:12) Nte ikpepde iban̄a iren ye iban oro ẹkenyenede mbuọtidem mi, yak ikere iban̄a mbụme ifan̄ emi ikọ Paul oro anamde mme owo ẹbụp, oro edi, Nso idi mbuọtidem, ndien ntak emi anade inyene enye? Idinam didie ikpebe mme anam-akpanikọ asan̄autom Abasi eke eset emi?

Se Mbuọtidem Edide ye Ntak Anade Inyene Enye

4. Mme owo ẹdọhọ ke mbuọtidem edi nso, ndien ntak emi mmọ mînenke?

4 Mbuọtidem edi edu emi mme owo ẹmade etieti, emi iren ye iban oro idinemede iban̄a ke n̄wed emi mîkadaha mfefere mfefere. Edi etie nte ediwak owo mfịn idaha mbuọtidem ke akpan n̄kpọ, ẹnyụn̄ ẹdọhọ ke enye edi ndinịm n̄kpọ nnan nnan. Mmọ inenke. Mbuọtidem idịghe ndinịm n̄kpọ nnan nnan, idịghe ikpîkpu ekikere, inyụn̄ idịghe ndinịm n̄kpọ emi mînyeneke nsọn̄ọ.  Ndinịm n̄kpọ nnan nnan esisesịn owo ke mfịna. Ekikere ekeme ndidụk owo ibuot, ekem afiak ọwọrọ; ndinịm ke Abasi odu ye unana ndinyene se ẹdade ẹsọn̄ọ inyeneke ufọn sia “mme demon n̄ko ẹnịm ke akpanikọ ẹnyụn̄ ẹnyek.”—Jas. 2:19.

5, 6. (a) Mbuọtidem nnyịn esịne ewe n̄kpọ iba emi enyịn mîkwe? (b) Mbuọtidem nnyịn ekpenyene nsọn̄ọ nte nso? Nam an̄wan̄a.

5 Ata mbuọtidem enen̄ede okpụhọde ye se mme owo ẹtịn̄de oro. Ti ke Bible etịn̄ se mbuọtidem edide. (Kot Mme Hebrew 11:1.) Paul ọkọdọhọ ke mbuọtidem esịne n̄kpọ iba emi nnyịn mîkemeke ndikụt. Akpa, enye esịne mme n̄kpọ oro ẹdude idahaemi, emi “enyịn mîkwe.” Nnyịn ikemeke ndikụt se idude ke heaven, utọ nte Jehovah Abasi, Eyen esie, ye Obio Ubọn̄ oro akarade ke heaven idahaemi. Ọyọhọ iba, mbuọtidem esịne “se ẹtiede ẹbet,” oro edi, mme n̄kpọ oro mîtịbeke kan̄a. Nnyịn ikwe kan̄a obufa ererimbot emi Obio Ubọn̄ Abasi edidade edi. Ndi emi ọwọrọ ke mbuọtidem ye idotenyịn oro inyenede ke mme utọ n̄kpọ oro inyeneke nsọn̄ọ?

6 Baba-o! Paul ọkọdọhọ ke ata mbuọtidem enyene nsọn̄ọ. Ke ini enye ọkọdohọde ke mbuọtidem edi “idotenyịn oro enyenede nsọn̄ọ,” enye eketịn̄ ikọ emi ekemede n̄ko ndikabade nte “n̄wed isọn̄.” Edieke owo oyomde ndinọ fi isọn̄, enye ekeme ndinọ fi n̄wed isọn̄ oro onyụn̄ ọdọhọ, “Se isọn̄ fo mi.” Edi oro iwọrọke ke n̄wed oro edi isọn̄. Ikọ esie ọwọrọ ke sia ibet ukara enyịmede n̄wed oro, ke afo emenyene unen ndida isọn̄ oro. Ukem ntre, mme n̄kpọ emi ẹnamde inyene mbuọtidem ẹnen̄ede ẹnyene nsọn̄ọ.

7. Ata mbuọtidem esịne nso?

7 Mmọdo, ata mbuọtidem esịne ndiyak se iketịbede ke ini edem anam inen̄ede inịm Jehovah Abasi ke akpanikọ. Mbuọtidem anam ifiọk ke Jehovah edi edima Ete nnyịn, onyụn̄ anam inịm ke mme un̄wọn̄ọ esie iditreke-tre ndisu. Edi ata mbuọtidem ikụreke ke oro. Ukem nte odu-uwem n̄kpọ, ana ẹbọbọk mbuọtidem mbak edikpa. Ana owo anam n̄kpọ owụt ke imenyene mbuọtidem, mîdịghe ntre mbuọtidem oro ayakpa.—Jas. 2:26.

8. Ntak emi mbuọtidem edide akpan n̄kpọ?

8 Ntak emi mbuọtidem edide akpan n̄kpọ? Paul ama ọnọ ibọrọ emi esịnede ifiọk. (Kot Mme Hebrew 11:6.) Nnyịn ikemeke ndikpere Jehovah, m̀mê ndinem enye esịt edieke nnyịn mînyeneke mbuọtidem. Ntre ana inyene mbuọtidem man idu uwem nte Ete nnyịn eke heaven Jehovah okoyomde mme owo ye mme angel ẹdu, oro edi, ndikpere nnyụn̄ nnọ enye ubọn̄.

9. Nso ke Jehovah anam ndiwụt ke enye ọfiọk ke oyom nnyịn inyene mbuọtidem?

9 Jehovah ọfiọk ke oyom inyene mbuọtidem, oro anam enye ọnọ nnyịn uwụtn̄kpọ  emi edikpepde nnyịn nte ikpasan̄ade inyene ata mbuọtidem. Enye ọnọ nnyịn iren emi ẹnamde akpanikọ, emi ẹdade usụn̄ ke esop esie. Ikọ esie ọdọhọ ete: “Ẹkpebe mbuọtidem mmọ.” (Heb. 13:7) Enye ọnọ nnyịn mbon en̄wen n̄ko. Paul ama ewet aban̄a “akwa otu ntiense,” kpa iren ye iban emi ẹkenyenede ata mbuọtidem ke eset, ẹkenyụn̄ ẹnịmde eti uwụtn̄kpọ ẹnọ nnyịn. (Heb. 12:1) Edi idịghe kpukpru mmọ ke Paul akasiak ke Mme Hebrew ibuot 11. Bible ọdọn̄ọ mbụk akpanikọ oro aban̄ade iren ye iban, n̄kpri ye ikpọ, emi ẹkenyenede nsio nsio mfịna. Kpukpru mmọ ẹma ẹnyene mbuọtidem, ẹnyụn̄ ẹnyene ekese ndikpep nnyịn emi idude uwem ke eyo unana mbuọtidem emi.

Didie ke Ikeme Ndikpebe Mbuọtidem Mbon En̄wen?

10. Didie ke ukpepn̄kpọ idem nnyịn ekeme ndinam ikpebe mme anam-akpanikọ iren ye iban ke Bible?

10 Ukemeke ndikpebe owo edieke mûtịmke use nte enye esinamde n̄kpọ. Nte okotde n̄wed emi, oyokụt ke ẹma ẹnen̄ede ẹnam ndụn̄ọde man ẹn̄wam fi etịm ọfiọk utọ mbon oro iren ye iban mbuọtidem emi ẹkedide. Ntak mûnamke ndụn̄ọde efen efen ke ini okotde n̄wed emi? Ke ini ekpepde n̄kpọ ke idemfo, da mme n̄kpọ emi esidade anam ndụn̄ọde kpep Bible. Nte etiede ekere aban̄a mbụk Bible oro okotde, domo ndida enyịn ikike n̄kụt mme n̄kpọ oro ẹketịbede. Nam nte odu do, domo ndikop ufuọn̄ n̄kpọ ye uyom oro ẹnamde nyụn̄ kụt se ikade iso. Ke akande oro, domo ndifiọk nte n̄kpọ eketiede ye mbon oro ẹtịn̄de ẹban̄a ke mbụk oro. Edieke etiede fi ke idem nte eketiede mme anam-akpanikọ iren ye iban oro, afo eyetịm ọfiọk ke mmọ ẹkedi owo nte afo, eyetịm emehe ye mmọ—ekeme ndikam ntie fi nte ke ebịghi ekedi ufan ye ndusụk mmọ.

11, 12. (a) Nso idin̄wam fi etetịm emehe ye Abram ye Sarai? (b) Nso idin̄wam fi ọbọ ufọn oto uwụtn̄kpọ Hannah, Elijah, ye Samuel?

11 Ama etịm emehe ye mmọ, oyoyom ndikpebe mmọ. Ke uwụtn̄kpọ, yak idọhọ ke esop Abasi ẹnọ fi obufa utom, ndien ke afo ke ekere m̀mê edinam didie. Kûfre ke esop Jehovah ọdọhọ itat utom ukwọrọikọ nnyịn. Ekeme ndidi ẹdọhọ fi aka ebiet emi ẹnen̄erede ẹyom mme ọkwọrọikọ, mîdịghe ẹdọhọ odomo ndikwọrọ ikọ ke usụn̄ oro mûsumaha m̀mê usụn̄ oro mûmeheke. Nte ọbọn̄de akam ekere m̀mê edinam didie, ndi ikpọfọnke etie ekere uwụtn̄kpọ oro Abram ekenịmde? Enye ye Sarai ẹma ẹnyịme ndikpọn̄ inem uwem ke Ur, ndien ẹma ẹnen̄ede ẹdiọn̄ mmọ ke ntak oro. Ke ini ekpebede mmọ, editie fi nte ke ememehe ye mmọ akan nte ekemehede.

12 Ukem ntre, nso ke akpanam edieke owo fo mîyakke fi ọbọ emem, anamde  kpukpru n̄kpọ odorode fi, idem anamde fi oyom ndifiak mme mbono esop? Edieke etiede ekere nte Hannah akakande mfịna emi Peninnah ọkọnọde enye, ọyọfiọk se akpanamde, ndien oro ekeme ndinam Hannah enen̄ede etie nte edima ufan fo. N̄ko-n̄ko, edieke idem ememde fi ke ntak emi ekerede ke imọ iwọrọke n̄kpọ, ekeme ndidi eyetetịm emehe ye Elijah ke ini ekpepde aban̄a se ikọwọrọde enye, ye nte Jehovah ọkọdọn̄de enye esịt. Ekeme ndidi mme uyen emi ndiọi nditọ ufọkn̄wed mmọ ẹyịrede ẹte ẹnam oburobụt ido ẹyedọdiọn̄ ẹmehe ye Samuel ke ini mmọ ẹkpepde ẹban̄a nte enye okodude uwem kpa ye ndiọi uwụtn̄kpọ nditọ Eli ke tent utuakibuot.

13. Ndi ndikpebe mbuọtidem mbon oro ẹtịn̄de ẹban̄a ke Bible ọwọrọ ke ukemeke ndinam n̄kpọ ke idemfo? Nam an̄wan̄a.

13 Ndi ndikpebe mbuọtidem mbon oro ẹtịn̄de ẹban̄a ke Bible ọwọrọ ke ukemeke ndinam n̄kpọ ke idemfo, ke onyụn̄ anam se mbon en̄wen ẹkenamde? Iwọrọke! Ti ke Ikọ Jehovah esịn udọn̄ ọnọ nnyịn ete ikpebe mbon oro ẹkenyenede mbuọtidem. (1 Cor. 4:16; 11:1; 2 Thess. 3:7, 9) Ke adianade do, ndusụk mbon emi idikpepde iban̄a ẹkekpebe mbuọtidem mbon oro ẹkebemde mmọ isọ ẹdu. Ke uwụtn̄kpọ, iyokụt ke Ibuot 17 ke n̄wed emi ke etie nte Mary akafiak etịn̄ se Hannah eketịn̄de, emi ọwọrọde ke enye ekekpebe uwụtn̄kpọ Hannah. Ndi oro ọwọrọ ke Mary ikenen̄ekede inyene mbuọtidem? Baba! Utu ke oro, uwụtn̄kpọ Hannah ama an̄wam enye etetịm enyene mbuọtidem emi akanamde enye enyene eti enyịn̄ ye Jehovah Abasi.

14, 15. Nso idi ndusụk n̄kpọ oro ẹdọn̄de ke n̄wed emi, ndien didie ke ikeme ndida enye nnam n̄kpọ?

14 Ẹsio n̄wed emi man ada anam mbuọtidem fo etetịm ọsọn̄. Se ẹkewetde ke ibuotikọ oro, “Kpebe Mbuọtidem Mmọ,” ke Enyọn̄-Ukpeme ọtọn̄ọde ke 2008 esịm 2013 ke ẹfiak ẹsion̄o ẹwet. Edi ẹdọn̄ mbufa n̄kpọ. Ẹdọn̄ mme mbụme oro ẹdidade ẹneme se idude ke ibuot kiet kiet. Ẹdọn̄ ata ndiye mbufa ndise ke n̄wed emi, ẹnyụn̄ ẹnam mme ndise oro ẹkedude ke Enyọn̄-Ukpeme oro ẹkemịn̄de ibuotikọ emi ẹkponi ẹnyụn̄ ẹnen̄ede ẹye. Ẹdọn̄ n̄kpọ en̄wen emi ẹnyenede ufọn, utọ nte ndise obio ye ini oro se ẹbụkde ẹketịbede. Ẹsio n̄wed Kpebe Mbuọtidem Mmọ man ẹda ẹnịm ukpepn̄kpọ idemowo, ukpepn̄kpọ ubon, ye ukpepn̄kpọ Bible esop. Mme ubon ẹkeme ndisitie kiet n̄kot mme mbụk emi n̄kop inem.

15 N̄wed emi akpakam an̄wam fi ekpebe mbuọtidem mme anam-akpanikọ asan̄autom Jehovah eke eset. Enye akpakam an̄wam fi anam mbuọtidem fo etetịm ọsọn̄ nte osụk asan̄ade ekpere Ete fo eke heaven, Jehovah!