Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

Kpebe Mbuọtidem Mmọ

 Ibuot Edịp ye Ita

He Learned Forgiveness From the Master

He Learned Forgiveness From the Master

1. Anaedi ini ewe ekedi ndiọkn̄kan ini ke uwem Peter?

PETER idifreke ini oro enyịn esie okodụkde ye enyịn Jesus. Ndi nte Jesus okowụkde enyịn ese enye ama anam enye ekere ke imọ imokpu m̀mê imesuene Jesus? Nnyịn inen̄ekede ifiọk; n̄kukụre se N̄wed Abasi ọdọhọde edi ke ‘Ọbọn̄ ama ọwọn̄ọde ese Peter.’ (Luke 22:61) Ini kiet oro Jesus ekesede Peter do ama anam Peter ọfiọk adan̄a nte imọ ikeduede. Enye ama ọfiọk ke imọ imanam n̄kpọ oro Jesus ọkọdọhọde ke imọ iyanam, kpa n̄kpọ oro enye ọkọsọn̄ọde etịn̄ ke imọ idinamke tutu amama, oro edi, ndikan̄ Eteufọk esie. Esịt ama enen̄ede ọduọ Peter, ndien ekeme ndidi emi ekedi ndiọkn̄kan ini ke uwem esie.

2. Nso ke Peter ekenyene ndikpep, ndien didie ke ikeme ndibọ ufọn nto mbụk esie?

2 Emi ikọwọrọke ke eke Peter ama okụre. Sia Peter ekenen̄erede enyene mbuọtidem, enye okosụk enyenyene ifet ndinen̄ede ndudue esie, nnyụn̄ n̄kpep ndinam kiet ke otu akakan n̄kpọ oro Jesus ekekpepde mme owo. N̄kpọ oro ekedi edifen nnọ owo. Oyom kpukpru nnyịn ikpep ndifen nnọ owo. Ntre ẹyak ise nte Peter ekekpepde ndifen nnọ owo.

Eren Emi Ekenyenede Ekese Ndikpep

3, 4. (a) Nso ke Peter okobụp Jesus, ndien anaedi enye ekekere nso? (b) Nso ke Jesus eketịn̄ ndiwụt ke Peter ama ekpebe edu mbon eyo esie?

3 Ke ini Peter okodude ke Capernaum, obio emana esie, ke n̄kpọ nte ọfiọn̄ itiokiet ko ke edem, enye ama obụp Jesus ete: “Ọbọn̄, ikafan̄ ke eyenete mi edinam mi idiọkn̄kpọ ndien ami mfen nnọ enye? Tutu esịm utịm ikatiaba?” Peter ekekere ke imọ imanam etieti. Koro mme adaiso ido ukpono eyo esie ẹkekpep ke ẹkpefen ẹnọ owo utịm ikata kpọt! Jesus ọkọbọrọ ete: “Idịghe, Tutu esịm utịm ikatiaba, edi, Tutu esịm utịm ike-ata ye efịteba.”—Matt. 18:21, 22.

4 Ndi Jesus ọkọdọhọ Peter esitịn̄ enyịn ewet ibat idiọkn̄kpọ oro owo anamde enye enịm? Baba; utu ke oro, Jesus ndikọdọhọ Peter ke akpakam edi utịm ike 77 utu ke utịm ike 7, okowụt ke owo inịmke  ibat ini emi ẹkpefende ẹnọ owo. (1 Cor. 13:4, 5) Jesus okowụt ke Peter ekekere n̄kpọ nte mbon eyo esie emi ẹkesọn̄de esịt mîkonyụn̄ imaha ndisifen nnọ owo, emi ẹkesinịmde ibat ndudue oro owo anamde mmọ. Edi mbon oro ẹyomde ndifen nnọ owo nte Abasi esifende, ikpenịmke-nịm ibat ini oro ẹkpefende owo.Kot  1 John 1:7-9.

5. Ini ewe ke isinen̄ede ifiọk ke ọfọn ẹfen ẹnọ owo?

5 Peter ikafan̄ake se Jesus eketịn̄de. Edi ndi se Jesus ekekpepde enye ama enen̄ede esịm enye esịt? Ndusụk ini, nnyịn isifiọk ke ọfọn ẹfen ẹnọ owo ke ini nnyịn inen̄erede iyom ẹfen ẹnọ nnyịn. Ntre, ẹyak ifiak ikeneme mme n̄kpọ oro ẹketịbede mbemiso Jesus akpade. Ke ini afanikọn̄ oro, Peter ama anam ekese n̄kpọ emi akanade Eteufọk esie efen enye.

Jesus Ama Efen Peter Ediwak Ini

6. Peter akanam n̄kpọ didie ke ini Jesus okodomode ndikpep mme apostle esie nsụhọdeidem, edi Jesus akanam n̄kpọ didie ye enye?

6 Usen oro ekedi ata akpan usen—akpatre okoneyo oro Jesus okodude uwem nte owo ke isọn̄. Jesus okosụk enyenyene ekese n̄kpọ ndikpep mme apostle esie—utọ nte nsụhọdeidem. Jesus ama enịm uwụtn̄kpọ ọnọ mmọ ke ndisụhọde idem nyet mmọ ukot, kpa utom emi ata usụhọde ofụn ekesinamde. Ke akpa, Peter ikamaha se Jesus akanamde oro. Enye ikenyịmeke Jesus eyet imọ ukot. Ekem enye ama ọdọhọ Jesus okûyet imọ ukot kpọt, edi eyet imọ ubọk ye ibuot n̄ko! Jesus ikayatke esịt, edi ama ada ini asian enye ntak oro imọ iyetde mmọ ukot ye se oro ọwọrọde.—John 13:1-17.

7, 8. (a) Mme n̄kpọ ewe ke Peter akafiak anam emi akpakanamde Jesus ayat esịt? (b) Didie ke Jesus okowụt ke imesima ndifen nnọ owo?

7 Esisịt ini ke oro ebede, Peter ama afiak anam n̄kpọ oro akpakanamde Jesus ayat esịt. Peter ama etiene mme apostle eken eneni m̀mê anie ke otu mmimọ idi andikpon n̄kan, ndien emi okowụt ke mmọ ẹma ẹtan̄ idem. Kpa ye oro, Jesus ama enen̄ede mmọ ke ima ima usụn̄ onyụn̄ otoro mmọ ke se mmọ ẹkenamde ọfọn, oro edi, ndika iso nsọn̄ọ nda ye Eteufọk mmọ. Edi enye ama ọdọhọ ke kpukpru mmọ ẹyefehe ẹkpọn̄ imọ. Peter ama ọbọrọ ke imọ idikpọn̄ke enye, idem edieke anade ikpa. Edi Jesus ama ọdọhọ ke Peter ayakan̄ imọ utịm ikata okoneyo oro mbemiso ekikọ ọkpọk utịm ikaba. Ekem Peter ọdọhọ ke se Jesus etịn̄de iditịbeke onyụn̄ anam inua ke imọ iyọsọn̄ọ ida idem ọkpọkọm kpukpru mme apostle eken ẹdọduọn̄ọ!—Matt. 26:31-35; Mark 14:27-31; Luke 22:24-28; John 13:36-38.

8 Ndi Jesus ama ayat esịt ye Peter ndien? Ke nditịm ntịn̄, ke ofụri ini afanikọn̄ emi, Jesus okosụk okokụt nti n̄kpọ ke idem mme anana-mfọnmma  apostle esie. Enye ama ọfiọk ke Peter oyokpu imọ, edi ama ọdọhọ enye ete: “Mmanam n̄kpeubọk mban̄a fi nte mbuọtidem fo okûmem; ndien afo n̄ko, ke ini editọn̄ọde ntak ọsọn̄ idem, sọn̄ọ nditọete fo idem.” (Luke 22:32) Ntem, Jesus ama owụt ke imọ imọfiọk ke Peter ayakabade esịt onyụn̄ afiak ọtọn̄ọ ndinam n̄kpọ Abasi ke ofụri esịt. Emi owụt ke Jesus ama esima ndifen nnọ owo.

9, 10. (a) Okoyom ẹnen̄ede Peter ke nso ke In̄wan̄ Gethsemane? (b) Se ikọwọrọde Peter ekeme nditi nnyịn nso?

9 Ekem, ke In̄wan̄ Gethsemane, ama oyom ẹnen̄ede Peter ediwak ini. Jesus ama ọdọhọ enye ye James ye John ẹdu ke ukpeme ke adan̄aemi imọ ibọn̄de akam. Esịt ama enen̄ede etịmede Jesus, enye ama onyụn̄ oyom un̄wam; edi Peter ye mbon eken ẹma ẹde ediwak ini. Jesus ama etịn̄ ikọ emi okowụtde ke imọfiọk nte etiede mmọ ke idem ye nte ke imọ imefen inọ mmọ, ete: “Ke akpanikọ, spirit enyịme, edi obụkidem ememem.”—Mark 14:32-41.

10 Ikebịghike, otu mbon ntịme emi ẹkekamade nsadan̄ ikan̄, akan̄kan̄, ye okpoyon̄ ẹma ẹdisịm. Akana mmọ ẹnam n̄kpọ ye mbufiọk ẹnyụn̄ ẹdu ke ukpeme. Edi Peter ama obụmede osio akan̄kan̄ esie ekpi Malchus, ofụn akwa oku, utọn̄ esịbe. Jesus ama ada sụn̄sụn̄ ido enen̄ede Peter, ọkọk unan oro, onyụn̄ ọdọhọ ke afai ifọnke, ndien mme anditiene Enye ke ẹnanam item emi tutu esịm mfịn. (Matt. 26:47-55; Luke 22:47-51; John 18:10, 11) Peter ama ananam ekese n̄kpọ oro okoyomde Eteufọk esie efen ọnọ enye. Se ikọwọrọde Peter ekeme nditi nnyịn ke kpukpru nnyịn imesinam idiọkn̄kpọ ediwak ini. (Kot James 3:2.) Anie ke otu nnyịn mîsiyomke Abasi efen ọnọ imọ kpukpru usen? Edi afanikọn̄ Peter ikokụreke kan̄a okoneyo oro. Se ikakam idiọkde ikan oro ke ekedi ke iso.

Akakan Ndudue Oro Peter Akanamde

11, 12. (a) Didie ke Peter okowụt ke imenyene uko ke ẹma ẹkemụm Jesus? (b) Didie ke se Peter akanamde okowụt ke enye ikekemeke ndikpa nnọ Jesus nte ọkọdọhọde?

11 Jesus ama ọdọhọ otu mbon ntịme oro ẹyak mme apostle imọ ẹnyọn̄ọ edieke edide imọ ke mmọ ẹyom. Peter ikekemeke ndinyan̄a ke ini okokụtde nte otu mbon ntịme oro ẹbọpde Jesus. Ekem enye ama etiene mme apostle eken efehe.

12 Etie nte Peter ye John ẹma ẹtuak ẹda ẹkpere ufọk Annas akani Akwa Oku, ebiet emi ẹkebemde iso ẹda Jesus ẹka man ẹkebụp mbụme. Ke ini ẹkedade Jesus ẹwọrọ do, Peter ye John ẹma ẹtiene “nsannsan.” (Matt. 26:58; John 18:12, 13) Peter ikedịghe mbe. Ekpedi enye ikenyeneke uko, enye ikpeketieneke mbon oro ẹkemụmde Jesus. Otu mbon ntịme oro ẹma ẹkama n̄kpọ en̄wan, ndien Peter ama ọnọnọ owo mmọ kiet unan. Kpa ye oro, enye ikenyeneke uko  ikem ndisọn̄ọ nda ye Jesus nte enye ọkọdọhọde, oro edi, ke iyakpa ye Jesus edieke anade ikpa.—Mark 14:31.

13. Nso idi n̄kukụre usụn̄ nditịm ntiene Christ?

13 Ediwak owo mfịn ẹdomo nditiene Christ “nsannsan” nte Peter eketienede, mbak mme owo ẹdifiọk. Edi nte Peter ke idemesie ekewetde ke ukperedem, n̄kukụre usụn̄ nditịm ntiene Christ edi ndisọn̄ọ nyịre ye Enye nte ikekeme, ikpebede uwụtn̄kpọ Esie ke kpukpru se inamde, inamke n̄kpọ m̀mê nso itịbe.—Kot 1 Peter 2:21.

14. Peter okodu ke m̀mọ̀n̄ ke ini ẹkekpede ikpe Jesus?

14 Peter ama etiene Jesus ndịbe ndịbe tutu edisịm inuaotop akwa ufọk kiet ke Jerusalem. Ekedi ufọk Caiaphas, akwa oku emi ekenyenede n̄kpọ onyụn̄ okopde odudu. Ẹma ẹsiwak ndibọp utọ ufọk oro nsịn okụre nnyụn̄ nsịn inuaotop ke iso. Owo ikayakke Peter ebe odụk ke ini enye ekesịmde inuaotop oro. John emi ama ekebebe odụk, emi okonyụn̄ ọdiọn̄ọde akwa oku, ama edi ediben̄e ekpeme inuaotop ete ayak Peter ebe odụk. Etie nte Peter ikodụhe ye John, ikonyụn̄ idomoke ndibe ndụk esịt ufọk n̄kada Eteufọk esie ke n̄kan̄. Enye okodu ke okụre, ke ebiet emi ndusụk ifịn ye mme asan̄autom ẹkewebede ikan̄ ke ntak etuep okoneyo oro, ese nte mme ntiense nsu oro ẹkedide ndidori Jesus ikọ ẹdide ẹdodụk, ẹwọwọrọ ke esịt ufọk oro ẹkekpede ikpe Jesus.—Mark 14:54-57; John 18:15, 16, 18.

15, 16. Tịn̄ nte Peter akakan̄de Jesus utịm ikata nte Jesus ọkọdọhọde.

15 Un̄wana ikan̄ oro ama anam ofụn an̄wan oro akayakde Peter ebe odụk okụt Peter ọfọn. Enye ama ọfiọk Peter. Eyenan̄wan oro ama ọdọhọ enye ete: “Afo, nde, okodu ye Jesus eyen Galilee!” Sia ẹkemende Peter ke ndueidem, enye ama akan̄ ke imọ ifiọkke Jesus, ke imọ ikam ifiọkke se eyenan̄wan oro etịn̄de aban̄a. Enye ama adaha akada ekpere inuaotop mbak mme owo ẹdikụt enye, edi eyenan̄wan en̄wen ama okụt enye onyụn̄ ọdọhọ ete: “Owo emi okodu ye Jesus eyen Nazareth.” Peter ama ọn̄wọn̄ọ ete: “Mfiọkke owo emi!” (Matt. 26:69-72; Mark 14:66-68) Ekeme ndidi ke ini Peter akakan̄de Jesus ọyọhọ utịm ikaba emi ke enye okokop nte ekikọ ọkpọkde, edi se iketịbede ikayakke enye eti se Jesus eketịn̄de ke hour ifan̄ oro ẹkebede.

16 Ke esisịt ini ama ekebe, Peter okosụk ododomo ke mbrenyịn ndidịbe mbak mme owo ẹdikụt imọ. Edi otuowo oro ẹkedade ke okụre ẹma ẹsan̄a ẹkpere. Kiet ke otu mmọ ekedi iman Malchus, ofụn emi Peter ekesịbede utọn̄. Enye ama ọdọhọ Peter ete: “Nte n̄kekwe fi ye enye ke in̄wan̄ mfri?” Peter ama odomo ndinam mmọ ẹnịm ke idịghe imọ ke mmọ ẹkekụt. Ntre enye ama ọn̄wọn̄ọ n̄kpọ, ekeme ndidi ama ọdọhọ ọdiọk ọnọ imọ edieke edide isosu. Ọyọhọ utịm ikata ekedi oro Peter akakan̄de Ọbọn̄. M̀mê ikọ emi ọwọwọrọ enye ke inua ama, ekikọ ama ọkpọk—ọyọhọ utịm ikaba emi Peter okokopde  ekikọ ọkpọkde okoneyo oro ekedi oro.—John 18:26, 27; Mark 14:71, 72.

“Ọbọn̄ ọwọn̄ọde ese Peter”

17, 18. (a) Nso ke Peter akanam ke ini enye ekedide edifiọk ke ima inen̄ede idue Eteufọk imọ? (b) Ekeme ndidi Peter ekekere nso?

17 Ndondo oro ke ẹkeda Jesus ẹwọrọ ẹdi etehe oro asakde iso ese okụre. Nte iketịn̄de ke ntọn̄ọ, ini oro ke enyịn esie okodụk ye enyịn Peter. Enyịn ama an̄wan̄a Peter, enye ama edifiọk ke imọ ima inen̄ede idue Eteufọk imọ. Peter ama ọkpọn̄ okụre oro, esịt onyụn̄ enen̄ede obiom enye. Enye ama asan̄a odụk obio ke ini ọfiọn̄ ọkọtọn̄ọde ndisop. Mmọn̄eyet asiaha enye ke enyịn, enye eti kpukpru se iketịbede, ndien enye ofụhọ onyụn̄ atua etieti.—Mark 14:72; Luke 22:61, 62.

18 Ke ini owo anamde utọ akamba ndudue oro, esidi mmemmem n̄kpọ enye ndikere ke owo idifenke inọ imọ tutu amama. Anaedi Peter ama ekere ntre. Edi ndi ntre ke ekedi?

Ndi idiọkn̄kpọ Peter Ama Akan Se Ẹkpefende?

19. Eketie Peter didie ke idem ke ini enye ekerede aban̄a ndudue esie, edi isan̄a didie ifiọk ke enye ikọduọkke idotenyịn?

19 Ọsọsọn̄ ndifiọk nte n̄kpọ emi akabiakde Peter eketre ke ini enye okokụtde se ẹkenamde Jesus ke eyo ama ekesiere. Anaedi enye ama enen̄ede ọduọhọ idemesie ke ini ẹkewotde Jesus uwemeyo oro, ke ẹma ẹketụhọde enye ke ediwak hour! Anaedi ama esibiak Peter kpukpru ini oro enye eketide ke ima itiene inam Eteufọk imọ okop ubiak ke usen n̄kpa esie. Peter ikọduọkke idotenyịn okposụkedi emi enye ekenen̄erede ofụhọ. Ifiọk emi sia mbụk oro ọdọhọ ke ikebịghike enye ama afiak akadiana ye mme mbet eken. (Luke 24:33) Eyịghe idụhe ke kpukpru mme apostle ẹma ẹtua n̄kpọfiọk ẹban̄a nte mmọ ẹkenamde n̄kpọ ke okoneyo afanikọn̄ oro, ẹnyụn̄ ẹdọn̄ kiet eken esịt.

20. Nso ke ikeme ndikpep nto kiet ke otu mfọnn̄kan n̄kpọ oro Peter akanamde?

20 Emi edi kiet ke otu mfọnn̄kan n̄kpọ oro Peter akanamde. Ke ini asan̄autom Abasi ọduọde, se idide akpan n̄kpọ ikan edi ukeme ofụri esịt oro enye esịnde ndidaha nda, nnyụn̄ nnen̄ede mme n̄kpọ, idịghe adan̄a nte idiọkn̄kpọ esie okokponde. (Kot Mme N̄ke 24:16.) Peter ama owụt ke imenyene ata mbuọtidem ke ndika n̄kosop idem ye nditọete esie okposụkedi emi enye ekenen̄erede ofụhọ. Ke ini owo  enen̄erede ofụhọ, ekeme ndidọn̄ enye ndisidu ikpọn̄, edi ifọnke enye anam oro. (N̄ke 18:1) Ọfọn isịk ikpere nditọete nnyịn man mmọ ẹn̄wam nnyịn ifiak isịn idem inam n̄kpọ Abasi.—Heb. 10:24, 25.

21. Nso ke Peter okokop sia okodude ye nditọete esie?

21 Sia Peter okodude ye mme apostle eken, enye ama etiene okop mbụk oro akakpade owo idem nte ke owo ikekwe okpo Jesus ke udi. Enye ye John ẹma ẹfehe ẹka udi oro ẹkebụkde Jesus, oro ẹma ẹkekpat itiat ẹberi. John ekebem iso ekesịm, sia etie nte enye ekedi akparawa. Enye ama emen̄e ndibe ndụk ke ini okokụtde ke udi ana in̄wan̄. Edi Peter ikemen̄eke. Okposụkedi emi ibifịk akababade enye ke ntak itọk, enye ama ebe odụk inikiet inikiet. Udi akana ukpọk!—John 20:3-9.

22. Nso ikanam Peter okûfụhọ okûnyụn̄ enyene aba eyịghe?

22 Ndi Peter ama enịm ke ẹma ẹnam Jesus eset? Ikenịmke ke nsonso oro, idem ke ini mme anam-akpanikọ iban ẹkedọhọde ke mme angel ẹma ẹwụt mmimọ idem ẹnyụn̄ ẹsian mmimọ ke ẹma ẹnam Jesus eset. (Luke 23:55–24:11) Edi etisịm mbubreyo, Peter ikofụhọke aba, ikonyụn̄ inyeneke aba eyịghe. Jesus eset, edidi okopodudu spirit! Enye ama owụt kpukpru mme apostle esie idem. Edi enyene n̄kpọ oro enye ekebemde iso anam. Mme apostle ẹkedọhọ usen oro ẹte: “Ke akpanikọ, Ọbọn̄ ama eset, ama onyụn̄ owụt Simon idem!” (Luke 24:34) Kpasụk ntre, apostle Paul ama ewet ke ukperedem aban̄a n̄wọrọnda usen oro ete ke Jesus “ama owụt Cephas idem, ekem owụt mbet duopeba.” (1 Cor. 15:5) Cephas ye Simon ẹsụk ẹdi enyịn̄ Peter. Etie nte Jesus okowụt Peter idem usen oro ke ini enye okodude ikpọn̄.

Peter ama anam ekese n̄kpọ oro okoyomde Eteufọk esie efen ọnọ enye. Anie ke otu nnyịn mîsiyomke Abasi efen ọnọ imọ kpukpru usen?

23. Ntak emi oyomde mme Christian oro ẹnamde idiọkn̄kpọ mfịn ẹti se iketịbede inọ Peter?

23 Bible isianke nnyịn se Jesus ye Peter ẹkenemede ke mmọ ẹma ẹkefiak ẹsobo. N̄kukụre se ikemede ndikere edi nte idem akaduaide Peter ndikụt edima Ọbọn̄ esie afiakde odu uwem, ye ifet emi enye ekenyenede ndikpe Ọbọn̄ ubọk nnyụn̄ n̄wụt ke imakabade esịt. Enye ama enen̄ede oyom Jesus efen ọnọ imọ. Imenen̄ede inịm ke Jesus ama efen ọnọ enye ke ofụri esịt. Oyom mme Christian oro ẹnamde idiọkn̄kpọ mfịn ẹti se iketịbede inọ Peter. Nnyịn ikpekereke ke Abasi idifenke inọ nnyịn tutu amama. Jesus enen̄ede ebiet Ete esie emi ‘esifende ọnọ owo ke akamba usụn̄.’—Isa. 55:7.

N̄kpọ En̄wen Oro Owụtde ke Jesus Ama Efen Peter

24, 25. (a) Tịn̄ nte n̄kpọ eketiede okoneyo oro Peter akakade ọkọ ke Inyan̄ Galilee? (b) Peter akanam n̄kpọ didie aban̄a utịben̄kpọ oro Jesus akanamde usenubọk oro?

24 Jesus ama ọdọhọ mme apostle esie ẹka Galilee, ke mmọ ẹyesobo ye imọ do. Ke ini mmọ ẹkesịmde do, Peter ama aka ọkọ ke  Inyan̄ Galilee. Ediwak mbon eken ẹma ẹtiene enye ẹka. Peter ama afiak okụt idemesie ke inyan̄ emi enye ekesikọde iyak. Uyom ubom, uyom awawa, ye iyịre ikedịghe esen n̄kpọ inọ enye. Mmọ ikomụmke iyak ndomokiet okoneyo oro.—Matt. 26:32; John 21:1-3.

Peter ama ọfrọ ke ubom odụk mmọn̄ ọwọk aka mbenesụk

25 Ke n̄kpọusen, owo ama ada ke mbenesụk ọdọhọ mmọ ẹduọk iyịre ke n̄kan̄ eken. Mmọ ẹma ẹnam ntre, ẹnyụn̄ ẹmụm iyak 153! Peter ama ọfiọk owo oro. Enye ama ọfrọ ke ubom odụk mmọn̄ ọwọk aka mbenesụk. Jesus ama ọnọ mmọ uyo ye iyak emi enye ọkọfọpde ke ikan̄ ukan̄ ke esụk. Enye okowụk ntịn̄enyịn ke Peter.—John 21:4-14.

26, 27. (a) Nso ifet ke Jesus ọkọnọ Peter utịm ikata? (b) Nso ke Jesus akanam ndiwụt ke imọ imefen Peter ke ofụri esịt?

 26 Jesus ama obụp Peter m̀mê enye ama imọ “akan mmọ emi”—ndien anaedi enye eketịn̄ aban̄a ediwak iyak oro mmọ ẹkemụmde. Ndi Peter ama ama ọkọ akan Jesus? Kpa nte Peter akakan̄de Jesus utịm ikata, Jesus ama ọnọ enye ifet utịm ikata ke iso mme mbet eken ndiwụt ke imama imọ. Ke ini Peter eketịn̄de ke imama enye, Jesus ama asian enye nte enye okpowụtde ima oro: ke ndinịm n̄kpọ Abasi nte ebeiso n̄kpọ ke uwem esie ye ke ndibọk, n̄kpeme, nnyụn̄ nsọn̄ọ mme erọn̄ Christ idem, kpa mme anditiene Christ oro ẹnamde akpanikọ.—Luke 22:32; John 21:15-17.

27 Ntem, Jesus ama owụt ke imọ ye Ete imọ ikosụk ikokụt nti n̄kpọ ke idem Peter. Ẹma ẹnọ Peter akamba ifetutom ke esop oro Christ adade usụn̄. Emi enen̄ede owụt ke Jesus ama efen ọnọ Peter ke ofụri esịt! Ke akpanikọ, mbọm oro Jesus okowụtde Peter ama enen̄ede otụk enye, enye ama onyụn̄ ekpep n̄kpọ oto ndudue esie.

28. Nso iwụt ke Peter ama odu uwem ekekem ye enyịn̄ oro Jesus ọkọnọde enye?

28 Peter ama ọsọn̄ọ ada anam utom oro ẹkenọde enye ke ediwak isua. Mbemiso Jesus akpade, enye ama owụk Peter ete ọsọn̄ọ nditọete esie idem; ndien enye ama anam oro. Peter ama ọfọn ido onyụn̄ eme ime nte enye ekekpemede onyụn̄ ọbọkde mme anditiene Christ. Simon ama edidu uwem ekekem ye enyịn̄ oro Jesus ọkọnọde enye—oro edi, Peter, m̀mê Itiat—sia enye akakabarede edi owo emi enyenede iwụk, ọsọn̄de idem, oro ẹkekemede ndiberi edem, onyụn̄ esịnde udọn̄ ọnọ mbon en̄wen ke esop. Ndinem leta iba oro Peter ekewetde ndida nnọ ndima nditọete esie nsịnudọn̄, emi ẹkekabarede ẹdi mme n̄wed Bible, ẹnen̄ede ẹsọn̄ọ emi. Mme leta oro ẹwụt n̄ko ke Peter ikefreke se Jesus ekekpepde enye aban̄a edifen nnọ owo.—Kot 1 Peter 3:8, 9; 4:8.

29. Didie ke ikeme ndikpebe mbuọtidem Peter nnyụn̄ n̄kpebe Eteufọk esie emi esituade owo mbọm?

29 Nnyịn ikpakam itiene ikpep n̄kpọ ito emi! Ndi imesiben̄e Abasi kpukpru usen ite efen ediwak ndudue nnyịn? Ndi imesinyịme ke ẹfen ẹnọ nnyịn, inyụn̄ inịm ke emi ekeme ndinam nnyịn isana? Ndien ndi nnyịn n̄ko imesifen inọ mbon en̄wen? Edieke inamde ntre, ọwọrọ ke imekpebe mbuọtidem Peter inyụn̄ ikpebe Eteufọk esie emi esituade owo mbọm.