Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Kpebe Mbuọtidem Mmọ

 Ibuot iba

He “Walked With the True God”

He “Walked With the True God”

1, 2. Nso utom ke Noah ye ubon esie ẹkenam, ndien mme mfịna ewe ke mmọ ẹkesobo?

NOAH adaha ada enen̄ede isịn onyụn̄ enen̄ede esịp. Se nte enye etiede ke akamba obukpọk ọduọk odudu esisịt, ekem emenede enyịn ese akaka ubom esie. Itai ke etebe, uyom n̄kpọ emi ẹkọn̄de iyakke owo okop n̄kpọ. Noah etie do okụt nte nditọ esie ẹsịnde idem ẹnam utom ke nsio nsio ikpehe ke ubom oro. Nditọ esie ye iban mmọ ye edima an̄wan esie ẹtiene enye ẹnam utom emi ke ediwak isua idahaemi. Utom aka anyan, edi se isụhọde ke okpokpon!

2 Mme mbọhọidụn̄ mmọ ẹkekere ke kpukpru mmọ ẹdi nditen̄. Nte mmọ ẹsụk ẹdomode ndikọn̄ ubom oro n̄kụre, mme owo ẹnen̄ede ẹsak se ikpanamde mmọ ẹkere ke ukwọ ọmọn̄ edifụk ofụri isọn̄. Etie mmọ nte se Noah ọdọhọde mmọ iditịbeke tutu amama! Mmọ inịmke ke owo akpada ofụri uwem esie ye eke ubon esie anam utọ nditen̄ n̄kpọ emi. Edi Jehovah Abasi Noah isehe Noah ntre.

3. Didie ke Noah akasan̄a ye ata Abasi?

3 Ikọ Abasi ọdọhọ ete: “Noah . . . asan̄a ye ata Abasi.” (Kot Genesis 6:9.) Nso ke emi ọwọrọ? Emi iwọrọke ke Abasi okodu mi ke isọn̄, inyụn̄ iwọrọke ke Noah akaka akasan̄a ye Abasi ke heaven. Utu ke oro, ikọ emi ọwọrọ ke Noah ama enen̄ede okop uyo Abasi onyụn̄ enen̄ede ama Abasi tutu etie nte n̄kpọ eke enye asan̄ade ye Jehovah kpa nte ufan esisan̄ade ye ufan. Ediwak isua ke ukperedem, Bible ama etịn̄ ke mbuọtidem Noah ama “obiom ererimbot ikpe.” (Heb. 11:7) Didie? Nso ke ikeme ndikpep nto mbuọtidem Noah?

Edinen Owo ke Idiọk Ererimbot

4, 5. Ke eyo Noah, nso ikanam ererimbot enen̄ede abiara?

4 Mbon eyo Noah ẹma ẹdiọk ẹbe nde. Mme owo ẹkenyụn̄ ẹdiọk ntre ke eyo ete ete esie, Enoch, kpa edinen owo en̄wen emi  akasan̄ade ye Abasi. Enoch ama ọdọdọhọ ke Abasi oyosobo mme idiọkowo ke ererimbot. Edi ererimbot ama ọdiọk akan oro ke eyo Noah. Ke nditịm ntịn̄, Jehovah ọkọdọhọ ke isọn̄ abiara, afai onyụn̄ ọyọhọ kpukpru ebiet. (Gen. 5:22; 6:11; Jude 14, 15) Nso ikanam ererimbot abiara ntre?

5 Mme angel ẹma ẹtọn̄ọ afanikọn̄ ke heaven. Owo mmọ kiet ama ọsọsọn̄ ibuot ye Jehovah, onyụn̄ akabade Satan kpa Devil ke ini okodoride Abasi ikọ onyụn̄ anamde Adam ye Eve ẹnam idiọkn̄kpọ. Ke eyo Noah, ndusụk angel ikenyimeke aba ndisụk ibuot nnọ ukara Jehovah. Mmọ ẹma ẹkpọn̄ ebietidụn̄ mmọ ke heaven ẹdi isọn̄, ẹdiforo owo, ẹnyụn̄ ẹdọ ndiye iban. Mme atan̄idem ndiọi angel emi ẹkekere ẹban̄a idemmọ kpọt; mmọ ẹkebiat ererimbot oro.—Gen. 6:1, 2; Jude 6, 7.

6. Nso afanikọn̄ ke mme Nephilim ẹkeda ẹdi ke ererimbot, ndien nso ke Jehovah ekebiere ndinam?

6 N̄kpọ en̄wen edi nte ke mme angel oro ẹma ẹbon nditọ emi ẹkekponide ẹkenyụn̄ ẹnyenede odudu etieti. Bible okot nditọ emi mme Nephilim, emi ọwọrọde, “mbon oro ẹsinamde mbon en̄wen ẹduọn̄ọ.” Sia mme Nephilim ẹkedide mbon afai, mmọ ẹma ẹnam afai ọyọhọ ererimbot. Andibot ama okụt nte “idiọkn̄kpọ owo awakde ke isọn̄ ndien kpukpru n̄kpọ ke ekikere esịt owo ẹsụk ẹdi idiọk kpukpru ini.” Ntre enye ama ebiere ke isua 120 ete ibe, iyosobo idiọk ererimbot oro ifep.—Kot Genesis 6:3-5.

7. Nso ke akana Noah ye n̄wan esie ẹnam mbak ndiọi owo ẹdibiat nditọ mmọ?

7 Kere nte okpodomode ndibọk nditọ ke utọ ererimbot oro!  Edi Noah ama ọbọk esie. Enye ọkọdọ eti an̄wan. Ke enye ama ekesịm isua 500, n̄wan esie ama aman nditọiren ita ọnọ enye. Mmọ ẹkekere Shem, Ham, ye Japheth. * Akana Noah adiana ye n̄wan esie ekpeme nditọ mmọ mbak ndiọi owo ẹdibiat mmọ. N̄kpri nditọiren ẹsimama ndise “n̄kpọsọn̄ irenowo” emi “ẹwọrọde etop,” ndien mme Nephilim ẹkedi mme utọ owo emi. Imọfiọk n̄ko ke Noah ye n̄wan esie ikpekemeke ndinam nditọ mmọ ẹkûkop n̄kpọ ndomokiet ẹban̄a ndiọi owo emi, edi mmọ ẹma ẹkpep nditọ mmọ nti n̄kpọ ẹban̄a Jehovah Abasi emi asuade kpukpru orụk idiọkn̄kpọ. Mmọ ẹkenyene ndinam nditọ mmọ ẹfiọk ke esịt ama ayat Jehovah ndikụt nte nsọn̄ibuot ye afai ẹyọhọde ererimbot.—Gen. 6:6.

Noah ye n̄wan esie ikayakke ndiọi owo ẹbiat nditọ mmọ

8. Didie ke mme ete ye eka ẹkeme ndikpebe uwụtn̄kpọ Noah ye n̄wan esie?

8 Se ikọwọrọde Noah ye n̄wan esie ekeme ndin̄wan̄a mme ete ye eka mfịn sia ererimbot nnyịn onyụn̄ ọyọhọ ye afai ye nsọn̄ibuot. Mme uyen ẹwak etieti mfịn ke n̄ka ntịme ke ediwak obio. Ediwak n̄kpọmbre nditọwọn̄ oro ẹsion̄ode ẹdi mfịn ẹsisịn udọn̄ ẹnọ afai ye nsọn̄ibuot. Ndusụk ete ye eka ẹsinam se mmọ ẹkekeme man nditọ mmọ ẹditiene ẹma afai. Mmọ ẹsikpep nditọ mmọ ke Jehovah edi Abasi emem, ndien ke enye oyosobo kpukpru mbon afai usen kiet. (Ps. 11:5; 37:10, 11) Okposụkedi emi ererimbot enen̄erede ọdiọk, mme ete ye eka ẹsụk ẹkeme ndikpep nditọ mmọ ẹnam se inende! Noah ye n̄wan esie ẹma ẹnam oro. Nditọ mmọ ẹma ẹkponi ẹkabade nti owo, ẹdọ nti iban emi ẹkenyụn̄ ẹmade Jehovah Abasi ukem nte mmọ.

“Kọn̄ Ubom Nọ Idemfo”

9, 10. (a) Nso ke Jehovah ọkọdọhọ Noah anam emi okokpụhọrede uwem esie? (b) Nso ikanam Jehovah ọdọhọ Noah ọkọn̄ ubom, ndien enye ọkọdọhọ ke ubom oro editie didie?

9 Usen kiet, n̄kpọ ama etịbe emi okokpụhọrede uwem Noah ofụri ofụri. Jehovah ama ọdọhọ edima asan̄autom esie emi ke imọn̄ isobo ererimbot oro. Abasi ọkọdọhọ Noah ete: “Da eto gopher kọn̄ ubom nọ idemfo.”—Gen. 6:14.

10 Ubom emi ikedịghe nsụn̄ikan̄ nte ndusụk owo ẹkerede. Enye ikenyeneke ediwak n̄kpọ oro ẹsidude ke nsụn̄ikan̄. Enye ekedi ata akamba ekebe. Jehovah ama asian Noah nte ubom oro edikponde iketre, ye nte enye editiede, onyụn̄ ọdọhọ Noah eyet itai ke esịt ye ke edem. Abasi ama etịn̄ ntak oro imọ ikọdọhọde Noah anam oro, ete: “Ami mmọn̄ nnam ukwọ mmọn̄ edep ke isọn̄ . . . Kpukpru se idude ke isọn̄ ẹyekpan̄a.” Nte ededi, Jehovah ama  ọdọhọ Noah ete: “Afo enyene ndidụk ubom oro, afo ye nditọiren fo ye n̄wan fo ye iban nditọiren fo.” Enye ama ọdọhọ Noah atan̄ kpukpru orụk unam ọdọn̄ ke ubom oro. Se ededi oro mîdụhe ke esịt ubom oro ayatak ke Ukwọ.—Gen. 6:17-20.

Noah ye ubon esie ẹma ẹdiana kiet ẹnam se Abasi ọkọdọhọde mmọ

11, 12. Nso akwa utom ke Noah ekenyene ndinam, ndien didie ke enye akanam utom emi?

11 Emi ikedịghe ekpri utom! Noah ekenyene ndikọn̄ ata akamba ubom emi ekedide ikpat 437 ke uniọn̄, ikpat 73 ke ubom, ye ikpat 44 ke ukon̄. Akananam owo ikọn̄ke ubom oro okponde ntre. Ndi Noah ama esịn ndinam utom emi onyụn̄ ọdọhọ ke okpon akan imọ? Mîdịghe, ndi enye okonyụn̄ ọkọn̄ ubom oro nte edimemde enye utom utu ke ndinam nte Abasi eketemede? Bible ọbọrọ ete: “Noah anam kpukpru se Abasi eketemede enye. Enye anam kpa ntre.”—Gen. 6:22.

12 Utom emi ama ada ata anyan ini, ekeme ndidi ama esịm isua 40 m̀mê 50. Mmọ ẹkenyene ndikek eto, nsiak, n̄kpok, ndiọn̄ nte ẹyomde, nnyụn̄ n̄kọn̄. Akana ẹkọn̄ ubom oro enyọn̄ ita, ẹdọn̄ mme ubet, ẹnyụn̄ ẹsịn usụn̄ ke mben. Etie nte ẹma ẹdọn̄ window ke ubom emi ẹnyụn̄ ẹnam ọkọm okon̄ man mmọn̄ ewet ọduọhọ.—Gen. 6:14-16.

13. Ewe utom ke Noah akanam oro okokponde akan ukọn̄ ubom, ndien didie ke mme owo ẹkenam n̄kpọ?

13 Utom ubom oro ama aka anyan nte isua ekebede. Imekere ke esịt ama enen̄ede enem Noah ndikụt ofụri ubon esie ẹnamde utom oro ye esịt kiet. Noah ama enyene utom en̄wen emi akakam okponde akan ukọn̄ ubom oro. Bible ọdọhọ ke Noah ekedi “ọkwọrọ edinen ido.” (Kot 2 Peter 2:5.) Enye ama ẹsịn ifịk anam mme owo ẹfiọk ke Abasi ọmọn̄ osobo idiọk ererimbot oro. Mmọ ẹkenam n̄kpọ didie? Nte ini akakade, Jesus Christ ama etịn̄ ke mmọ “ikọfiọkke” se ikade iso. Enye ọkọdọhọ ke mmọ ẹma ẹsịn ibuot ẹsịn itọn̄ ẹnam mbubehe mmọ kpukpru usen—ẹdia n̄kpọ, ẹn̄wọn̄ n̄kpọ, ẹdọ ndọ—edi ikpan̄ke utọn̄ inọ Noah. (Matt. 24:37-39) Etie nte ediwak mmọ ẹkekam ẹsasak enye ye ubon esie. Ndien ekeme ndidi ndusụk mmọ ẹma ẹsisịn Noah ndịk ke idem ẹnyụn̄ ẹbiọn̄ọ enye idiọk idiọk.

Okposụkedi mbon eyo Noah ẹkekụtde nte Jehovah ọdiọn̄de Noah, mmọ ẹkesụk ẹsasak enye ikonyụn̄ imaha ndikop uyo esie

14. Nso ke mme ubon Christian mfịn ẹkpekpep ẹto Noah ye ubon esie?

14 Edi Noah ye ubon esie iketreke utom mmọ. Okposụkedi emi kpukpru mbon eyo oro ẹkekerede ke se Noah ye ubon esie ẹkesịnde idem ẹnam ekedi ata ndisịme, mmọ ẹma ẹka iso ẹnam se Abasi ọkọdọn̄de mmọ. Mme Christian mfịn ẹkeme ndikpep ekese nto Noah ye ubon esie. Nnyịn n̄ko idu uwem ke ini emi Bible okotde “mme akpatre usen” idiọk ererimbot emi. (2 Tim. 3:1) Jesus ọkọdọhọ ke eyo nnyịn edinyụn̄ etie nte eyo Noah. Edieke  mme owo mîmaha ndikop etop Obio Ubọn̄ Abasi emi nnyịn mme Christian ikwọrọde, edieke ẹkọbọde m̀mê ẹkam ẹsakde nnyịn, ọyọfọn iti se ikọwọrọde Noah. Utọ n̄kpọ emi idịghe obufa.

“Ẹka Ẹkedụk Ubom”

15. Nso iketịbe inọ Noah ke ini enye ekekperede ndisịm isua 600?

15 Ke ata ediwak isua ẹma ẹkebe, ẹma ẹkọn̄ ubom oro ẹma. Ete ye ete ete Noah ẹma ẹkpan̄a ke ini enye ekekperede ndisịm isua 600. Lamech ete esie ekebem iso akpa. * Isua ition ke Lamech ama akakpa, Methuselah ete ete Noah ama akpa n̄ko ke ini ekesịmde isua 969. Enye ebịghi uwem akan kpukpru owo oro ẹsiakde ke Bible. (Gen. 5:27) Methuselah ye Lamech ẹma ẹkụt Adam.

16, 17. (a) Nso ke ẹkedọhọ Noah ke ini enye ekesịmde isua 600? (b) Tịn̄ se Noah ye ubon esie ẹkekụtde emi mmọ mîdifreke.

16 Ke Noah ama ekesịm isua 600, Jehovah Abasi ama ọdọhọ enye ete: “Afo ye ofụri ufọk fo, ẹka ẹkedụk ubom,” onyụn̄ ọdọhọ enye atan̄ kpukpru orụk unam ọdọn̄ ke ubom. Akana enye atan̄ ndisana unam emi ẹkemede ndida nnam uwa, itiaba itiaba, ye mbon oro mîdịghe ndisana iba iba.—Gen. 7:1-3.

17 Noah ye ubon esie idifreke se mmọ ẹkekụtde tutu amama. Kere nte akpakịp nsio nsio orụk unam ẹdide ke udịm ke udịm,  ẹsasan̄a, ẹfefe, ẹnyọnyọni, ẹfọfrọ, ndusụk n̄kpri, mbon eken ikpọ. Nnyịn idiọn̄ọke nte Noah akpakasan̄ade ekpek, atap, enyịk, onụk, odụri, onyụn̄ atan̄ kpukpru mmọ ọdọn̄ ke ubom. Bible ọdọhọ ke mmọ ẹkesan̄a ke idemmọ “ẹdụk ẹtiene Noah ke esịt ubom.”—Gen. 7:9.

18, 19. (a) Didie ke ikpọbọrọ mbụme oro ndusụk owo ẹkemede ndibụp m̀mê se ẹbụkde ẹban̄a eyo Noah ama enen̄ede etịbe? (b) Didie ke usụn̄ oro Jehovah ekemekde ndinyan̄a mme unam owụt ke enye enyene ọniọn̄?

18 Ndusụk owo ẹkeme ndibụp m̀mê utọ n̄kpọ oro ama enen̄ede etịbe. Kpukpru unam oro ẹkpekeme didie ndidu ke emem ke esịt ubom oro? Edi kere ise: Ndi Andibot ofụri ekondo ikpekemeke ndinam mme unam ẹdu ke emem? Ndi enye ikpekemeke ndisụk ndusụk mmọ ide? Ti ke Jehovah Abasi okobot mme unam emi. Enye akabahade Ididuot Inyan̄ onyụn̄ anam utịn atuak ada. Ndi ekere ke ọkpọsọn̄ enye ndinam kpukpru se iketịbede ke eyo Noah? Ikpọsọn̄ke, ndien enye ama onyụn̄ anam!

19 Imọfiọk ke Abasi ekpekekeme ndinyan̄a mme unam oro ke usụn̄ en̄wen. Edi ndikayak mmọ nsịn Noah ke ubọk eti nnyịn ke Abasi ọniọn̄ okoyom owo ese aban̄a kpukpru mme odu-uwem n̄kpọ ke isọn̄. (Gen. 1:28) Ediwak ete ye eka ẹsida mbụk Noah ẹkpep nditọ mmọ ke Jehovah Abasi ama mme owo ye mme unam emi enye okobotde.

20. Nso ke Noah ye ubon esie ẹkesịn idem ẹnam urua kiet mbemiso Ukwọ?

20 Jehovah ama ọdọhọ Noah ke usen itiaba kpọt osụhọ mbemiso Ukwọ ọtọn̄ọde. Ikememke inọ mmọ nditan̄ kpukpru  inyene mmọ ọkọrọ ye udia emi mmọ ye mme unam ẹdidiade ndọn̄ ke nde ke nde ke esịt ubom ke usen ifan̄ kpọt. Anaedi n̄wan Noah ye iban nditọ esie ẹma ẹsịn idem ẹdomo ndinam esịt ubom oro ọfọn se ẹdụn̄de.

21, 22. (a) Ntak emi idem mîkpakpaha nnyịn ndifiọk ke mbon eyo Noah ikọdọn̄ke enyịn ke se iketịbede? (b) Ini ewe ke mme mbọhọidụn̄ Noah ẹketre ndisak enye ye ubon esie?

21 Nso kaban̄a mme mbọhọidụn̄ mmọ? Mmọ ikosụk “ifiọkke”—idem ke ẹma ẹkekụt ke Jehovah ke ọdiọn̄ Noah ye kpukpru se enye anamde. Mmọ ẹma ẹkụt mme unam ẹbụn̄ọde ẹdụk ubom, edi idọn̄ke enyịn. Emi ikpakpaha nnyịn idem. Mme owo mfịn ẹdu uwem kpasụk ntre, idọn̄ke enyịn ke kpukpru n̄kpọ emi ẹwụtde ke ererimbot emi ọmọn̄ ebe efep. Apostle Peter ama ọdọdọhọ ke mbon nsahi ẹyeda nsahi mmọ ẹdi, ẹnyụn̄ ẹsak mbon oro ẹkopde uyo Abasi. (Kot 2 Peter 3:3-6.) Ntre n̄ko ke mme owo ẹkesak Noah ye ubon esie.

22 Ini ewe ke mmọ eketre nsahi mmọ? Bible ọdọhọ ke ‘Jehovah ama eberi usụn̄ ubom’ ke Noah ye ubon esie ye mme unam ẹma ẹkedụk. Edieke mbon nsahi oro ẹkedude ẹkpere, anaedi se Abasi akanamde oro ama ekịbi mmọ inua. Edieke oro mîkanamke mmọ ẹkịbi inua, edịm ama edikịbi mmọ inua! Edịm ama edep tutu mmọn̄ ukwọ ọtọ ofụk ofụri ekondo kpa nte Jehovah ọkọdọhọde.—Gen. 7:16-21.

23. (a) Nnyịn isan̄a didie ifiọk ke Jehovah ikenemke esịt iban̄a n̄kpa ndiọi owo ke eyo Noah? (b) Ntak emi ọfọnde ndikpebe mbuọtidem Noah?

23 Ndi Jehovah Abasi ama enem esịt aban̄a n̄kpa mme idiọkowo oro? Ikenemke! (Ezek. 33:11) Enye ama ọnọ mmọ ifet ndikabade esịt. Edi ndi mmọ ẹkpekekeme ndikabade esịt? Nte Noah okodude uwem ọbọrọ mbụme emi. Noah ndikasan̄a ye Jehovah nnyụn̄ nnam kpukpru se ẹkedọhọde enye anam owụt ke owo ekededi ekeme ndinam se Abasi ọdọhọde nnyụn̄ mbọhọ. Ntak edi oro Bible ọdọhọde ke mbuọtidem esie ama obiom idiọk ererimbot oro ikpe; owụt ke mbon eyo esie ẹkekokoi ẹdiọk. Mbuọtidem esie akanyan̄a enye ye ofụri ufọk esie. Edieke ekpebede mbuọtidem Noah, afo n̄ko emekeme ndinyan̄a idemfo ye ofụri ufọk mbufo ọkọrọ ye mme ufan fo. Ukem nte Noah, emekeme ndisan̄a ye Jehovah Abasi nte edima Ufan onyụn̄ aka iso edi ufan esie ke nsinsi nsinsi!

^ ikp. 7 Mbon eyo oro ẹma ẹnen̄ede ẹbịghi uwem ẹkan nnyịn. Nso ikedi ntak? Etie nte odudu oro Adam ye Eve ẹkenyenede ke ini mmọ ẹkefọnde ẹma okosụk esesịne mbon eyo oro ke iyịp.

^ ikp. 15 Lamech okosio eyen esie Noah, emi ekemede ndiwọrọ “Nduọkodudu” m̀mê “Ndọn̄esịt,” onyụn̄ odọhọ ke Noah ayanam se enyịn̄ esie ọwọrọde. Emi ọwọrọ ke Noah ayanam ubonowo ẹbọhọ ufen emi ibọde ke ntak isụn̄i emi Abasi okosụn̄ide isọn̄. (Gen. 5:28, 29) Lamech ikodụhe uwem ikụt ini emi ikọ esie osude. Ekeme ndidi eka Noah, ye nditọeka esie ẹma ẹkpan̄a ke Ukwọ oro.

Kpep N̄kpọ En̄wen

ENYỌN̄-UKPEME

Abasi Ama Anyan̄a Noah “ye Owo Itiaba Efen”

Noah ye ubon esie ẹkesan̄a didie ẹbọhọ nsobo ofụri ererimbot?