Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  No. 6 2017

Jesus Eketie Didie?

Jesus Eketie Didie?

Idụhe owo ndomokiet emi enyenede ata ndise Jesus sia enye ikọdọhọke ẹdrọ ndise imọ ẹnịm m̀mê ẹkap iso imọ ke itiat. Kpa ye oro, ediwak owo ẹdrọ ndise Jesus ke ata ediwak isua emi ebede.

Edi mbon emi ẹdrọde ndise Jesus mi idiọn̄ọke nte enye eketiede. Mme owo ẹsidrọ ndise emi ẹtiene se mmọ ẹnịmde ke akpanikọ, ido obio mmọ, ye se mbon oro ẹyomde ndise emi ẹmade. Edi utọ ndise emi ekeme ndinam mme owo ẹkûnen̄ede ẹfiọk utọ owo emi Jesus ekedide ye se enye ekekpepde.

Ndusụk owo ẹsidrọ Jesus nte owo emi etiede n̄kehede n̄kehede, onyụn̄ enyenede anyan idet ye ekpri ntan̄ebek m̀mê owo emi etiede mbọm mbọm. Mbon en̄wen ẹdrọ enye nte angel emi un̄wana ayamade akanade enye ibuot, m̀mê owo emi mîmaha ndidian idem ye mbon en̄wen. Ndi nte Jesus eketiede edi oro? Idinam didie idiọn̄ọ? Usụn̄ kiet edi ndidụn̄ọde se Jesus eketịn̄de. Emi ekeme ndin̄wam nnyịn ifiọk nte Jesus eketiede ye nte ikpadade enye.

AFO “AMA EBEN̄E IKPỌKIDEM ỌNỌ MI”

Jesus eketịn̄ ikọ emi ke akam oro enye ọkọbọn̄de ke ini emi enye akanade baptism. (Mme Hebrew 10:5; Matthew 3:13-17) Idem oro Abasi ọkọnọde enye eketie didie? N̄kpọ nte isua 30 mbemiso ini oro, angel Gabriel ọkọdọhọ Mary ete: “Afo oyoyomo onyụn̄ aman eyeneren. . . . Eyen oro edimanade edikere edisana, Eyen Abasi.” (Luke 1:31, 35) Ntre, Jesus ama ọfọn ama kpa nte Adam ọkọfọnde ama ke ini Abasi okobotde enye. (Luke 3:38; 1 Corinth 15:45) Anaedi Jesus ekedi ata ediye akparawa, ndien ekeme ndidi enye ama ebiet eka esie, Mary, emi ekedide eyen Jew.

Jesus ama esitiene mme Jew enịm ntan̄ebek, ikwatke ntan̄ebek nte mbon Rome ẹkesinamde. Owo emi ekesinịmde ibio ibio ntan̄ebek ini oro ama esinyene uku, ẹma ẹsinyụn̄ ẹkpono enye. Jesus ama esifat idet ye ntan̄ebek esie man okûkpokpon ukaha. Mbon emi ẹkedide Nazirite kpọt, utọ nte Samson, mîkesifatke idet mmọ.—Numbers 6:5; Judges 13:5.

Jesus ekedi anamusọ eto tutu enye esịm isua 30, edi enye ikenyeneke mme masịn emi mbon oro ẹnamde utọ utom oro mfịn ẹnyenede. (Mark 6:3) Ntre, anaedi enye ama enen̄ede okop idem. Ke uwụtn̄kpọ, Bible ọdọhọ ke enye ama ada ikpọn̄ “ebịn kpukpru [mme anyam enan̄ ye erọn̄] osion̄o ke temple, onyụn̄ an̄wan̄a okụk mme okpụhọ okụk ọduọn̄ọ onyụn̄ onụk mme okpokoro mmọ ọduọn̄ọ.” (John 2:14-17) Owo emi mînyeneke odudu ikemeke ndinam utọ n̄kpọ oro. Jesus ama ada idem oro Abasi ọkọnọde enye anam uduak Abasi. Enye ọkọdọhọ ete: “Nnyene nditan̄a eti mbụk obio ubọn̄ Abasi nnọ mme obio en̄wen n̄ko, koro ẹkesio mi ẹdọn̄ ẹte ndinam emi.” (Luke 4:43) Owo emi mîsọn̄ke idem ikpekemeke ndisan̄a ke ofụri Palestine n̄kwọrọ ikọ.

“ẸTIENE MI, . . . NDIEN NYỌNỌ MBUFO NDUỌKODUDU”

Anaedi nte Jesus ekenịmde iso etịn̄ ikọ emi ye nte enye ekesitiede ufan ufan akanam mbon oro “ẹkpade utom ẹnyụn̄ ẹbiomde ndodobi mbiomo” ẹnyịme nditiene enye. (Matthew 11:28-30) Nte Jesus  ọkọfọnde ido onyụn̄ enemde itie akanam mbon oro ẹkesikpan̄de utọn̄ ẹnọ enye ẹnyene nduọkodudu. N̄kpri nditọ n̄ko ẹma ẹsima ndisan̄a n̄kpere enye. Bible ọdọhọ ete: “Enye emen nditọ oro akama ke ubọk esie.”—Mark 10:13-16.

Kpa ye oro Jesus ọkọbọde ufen etieti mbemiso ẹwotde enye, enye iketiehe mbọm mbọm. Ke uwụtn̄kpọ, Jesus ama etiene anam ndọ kiet ke Cana enem ke ini enye akanamde mmọn̄ akabade eti wine. (John 2:1-11) Enye n̄ko ama esikpep mme owo n̄kpọ emi mmọ mîkọsọpke ifre.—Matthew 9:9-13; John 12:1-8.

Se Jesus ekekpepde ama anam mbon oro ẹkekpan̄de utọn̄ ẹnọ enye ẹnyene idotenyịn ndidu uwem ke nsinsi. (John 11:25, 26; 17:3) Ke ini mbet Jesus 70 ẹkenyọn̄de ẹditịn̄ nte n̄kpọ eketiede ke ukwọrọikọ ẹnọ enye, esịt ama enem Jesus etieti, enye ama onyụn̄ ọdọhọ mmọ ete: “Ẹdara koro ẹma ẹwet enyịn̄ mbufo ke heaven.”—Luke 10:20, 21.

“MBUFO INYENEKE NDINAM NTRE”

Ikpọ owo ufọkabasi ke eyo Jesus ẹma ẹsinam nsio nsio n̄kpọ man mme owo ẹkpono mmọ sia mmọ ẹkeyom ukpono ke mbrenyịn. (Numbers 15:38-40; Matthew 23:5-7) Edi Jesus iketiehe ntre, enye ọkọdọhọ mme mbet esie ẹkûtie ukara ukara. (Luke 22:25, 26) Jesus ama akam odụri mmọ utọn̄ ete: “Ẹkpeme idem ye mme scribe emi ẹmade ndisịne ewụra nsan̄a n̄kanade ẹnyụn̄ ẹmade ekọm ke an̄waurua.”—Mark 12:38.

Jesus ikesisioho-sio idem inyan ke otuowo, ndusụk ini mme owo ikesikam idiọn̄ọke m̀mê anie edi Jesus ke otuowo. (John 7:10, 11) Owo ikonyụn̄ isọpke idiọn̄ọ enye ke ini enye odude ye mbet esie 11. Ntre, Judas emi akadade Jesus ọnọ akada ntịminua anam mbon ntịme oro ẹdiọn̄ọ Jesus.—Mark 14:44, 45.

Okposụkedi emi nnyịn mînen̄ekede idiọn̄ọ nte Jesus eketiede, se Bible etịn̄de aban̄a enye owụt ke enye iketiehe nte ediwak owo ẹsidrọde enye. Edi enyene n̄kpọ emi edide akpan n̄kpọ akan nte Jesus eketiede, oro edi, nte nnyịn idade enye mfịn.

“AYAK ESISỊT ERERIMBOT IDIKWE MI ABA”

Jesus akakpa ke usen emi enye eketịn̄de ikọ emi, kpa usen oro ke ẹkebụk enye. (John 14:19) Enye akakpa man afak ediwak owo. (Matthew 20:28) Abasi ama anam enye eset edidu “uwem ke spirit” ke ọyọhọ usen ita onyụn̄ ‘anam enye owụt ndusụk mbet esie idem.’ (1 Peter 3:18; Utom 10:40) Jesus eketie didie ke ini enye okowụtde mbet esie idem? Enye iketiehe nte ekesitiede sia mme mbet esie ikọsọpke idiọn̄ọ enye. Mary Magdalene ekekere ke enye edi ekpeme-in̄wan̄, ndien mbet esie iba emi ẹkesan̄ade ẹka Emmaus ẹkekere ke enye edi esenowo.—Luke 24:13-18; John 20:1, 14, 15.

Didie ke ikpada Jesus mfịn? Ke se ikande isua 60 ama ekebe tọn̄ọ Jesus akakpa, apostle John ama okụt Jesus ke n̄kukụt. John ikekwe nte Jesus ọkọn̄ọde ke cross. Utu ke oro, enye okokụt Jesus nte “Edidem ndidem ye Ọbọn̄ mbọn̄,” Edidem Obio Ubọn̄ Abasi emi edikande mme demon ye ndiọi owo ke mîbịghike, onyụn̄ anam nti owo ẹdu uwem ke nsinsi.—Ediyarade 19:16; 21:3, 4.