Be ka se isịnede

Be ka se isịnede

Mme Ntiense Jehovah

Mek usem Efịk

Ufak edi akakan enọ emi Abasi ọnọde nnyịn sia enye anam nnyịn idori enyịn ndidu uwem ke nsinsi

 IBUOTIKỌ MAGAZINE EMI | EWE ENỌ ỌFỌN AKAN?

Enọ Ewe Ọfọn Akan Kpukpru Enọ?

Enọ Ewe Ọfọn Akan Kpukpru Enọ?

“Kpukpru nti enọ ye kpukpru enọ eke ẹfọnde ẹma ẹto enyọn̄, koro mmọ ẹto Ete mme un̄wana ke enyọn̄ ẹsụhọde ẹdi.” (James 1:17) Itie N̄wed Abasi emi aban̄a nte Ete nnyịn eke heaven, Jehovah Abasi, atatde ubọk ọnọ nnyịn nti enọ. Edi enyene enọ Abasi emi akande kpukpru enọ eken emi enye ọnọde nnyịn. Ewe enọ edi oro? Se Jesus eketịn̄de ke John 3:16 anam idiọn̄ọ enọ oro. Ata ediwak owo ẹdiọn̄ọ se itie N̄wed Abasi emi ọdọhọde. Enye ọdọhọ ete: “Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”

Abasi ndinọ nnyịn ikpọn̄-ikpọn̄ edibon Eyen esie edi akakan enọ emi akanam ẹnọde nnyịn, sia enọ emi anam nnyịn ikeme ndiwọrọ ke ufụn idiọkn̄kpọ, usọn̄, ye n̄kpa. (Psalm 51:5; John 8:34) Idụhe se nnyịn ke idem nnyịn ikpanamde man iwọrọ ke ufụn emi. Edi Abasi anam n̄kpọ man osio nnyịn ke ufụn emi sia enye amade nnyịn. Enye ndinam ikpọn̄-ikpọn̄ edibon Eyen esie, Jesus Christ, edikpa afak nnyịn anam nnyịn idori enyịn ndidu uwem ke nsinsi. Edi nso idi ufak? Ntak emi ẹkenọde ufak? Ndien nso ke ikpanam man idia ufọn ufak emi?

Ufak edi ekọmurua emi ẹkpede man ẹfiak ẹnyene n̄kpọ emi akatakde m̀mê man ẹsio owo ke ufụn. Bible ọdọhọ ke Adam ye Eve emi ẹdide akpa ete ye eka nnyịn ẹma ẹfọn ẹma ke ini ẹkebotde mmọ, ndien Abasi okoyom mmọ ye nditọ mmọ ẹdụn̄ ke nsinsi ke Paradise. (Genesis 1:26-28) Edi kpukpru oro ama atak mmọ ke ini mmọ ẹkenamde idiọkn̄kpọ. Nso ke idiọkn̄kpọ emi akada edi? Bible ọbọrọ ete: “Idiọkn̄kpọ [okoto] owo kiet odụk ererimbot, n̄kpa onyụn̄ [oto] ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.” (Rome 5:12) Ntre, nditọ Adam ẹkedada idiọkn̄kpọ ẹmana, ndien utịp idiọkn̄kpọ edi n̄kpa.

Ke ini ẹyomde ndikpe ufak, ana se ẹkpede ekem ye se ikatakde. Ke ini Adam okokoide-koi ọsọn̄ ibuot ye Abasi, enye ama anam idiọkn̄kpọ onyụn̄ ataba mfọnmma uwem. Bible ọdọhọ ke se inamde idiọkn̄kpọ ye n̄kpa atara esịm kpukpru nditọ esie edi oro. Ntre, akana owo en̄wen emi ọfọnde ama akpa man afak nditọ Adam osio ke ufụn idiọkn̄kpọ ye n̄kpa. Se Jesus akanamde ọnọ nnyịn edi oro. (Rome 5:19; Ephesus 1:7) Abasi ndikanam Jesus edikpa afak nnyịn anam idori enyịn ndinyene n̄kpọ emi Adam ye Eve ẹkpekenamde atak nnyịn, oro edi, nsinsi uwem ke Paradise mi ke isọn̄.—Ediyarade 21:3-5.

Ufak edi akakan enọ emi Abasi ọnọde nnyịn sia enye anam nnyịn idori enyịn ndidu uwem ke nsinsi. Yak ineme n̄kpọ inan̄ emi anamde ikụt ke ufak edi mfọnn̄kan enọ. Nte ikokụtde ke udiana ibuotikọ ke magazine emi, n̄kpọ inan̄ emi ẹsinam owo ama enọ emi ẹnọde enye.

Abasi ọnọ nnyịn se idọn̄de nnyịn. Enen̄ede ọdọn̄ mme owo ndidu uwem ke nsinsi. (Ecclesiastes 3:11) Nnyịn ikemeke ndinam emi ke idem nnyịn, edi ufak ayanam ikeme ndidu uwem ke nsinsi.  Bible ọdọhọ ete: “N̄kpọ eyenutom idiọkn̄kpọ edi n̄kpa, edi enọ oro Abasi ọnọde edi nsinsi uwem ke Christ Jesus Ọbọn̄ nnyịn.”—Rome 6:23.

Abasi ọnọ nnyịn se iyomde. Idụhe owo ke isọn̄ emi ekekemede ndikpa mfak nnyịn. Bible ọdọhọ ete: “Ekọmurua ufak ukpọn̄ mmọ enen̄ede okpon tutu owo ikemeke ndikpe enye ke nsinsi.” (Psalm 49:8) Ntre, ima inen̄ede iyom owo emi edifakde nnyịn isio ke ufụn idiọkn̄kpọ ye n̄kpa. Abasi ama anam Jesus edikpa afak nnyịn osio ke ufụn oro.—Rome 3:23, 24.

Abasi ọnọ nnyịn ke nnennen ini. Bible ọdọhọ ete: “Christ [akakpa] ke ibuot nnyịn ke adan̄aemi nnyịn isụk idide mme anamidiọk.” (Rome 5:8) Sia Abasi ọkọnọde nnyịn ufak “ke adan̄aemi nnyịn isụk idide mme anamidiọk,” emi anam inịm ke Abasi enen̄ede ama nnyịn kpa ye oro nnyịn idide mme anamidiọk. Emi n̄ko anam idori enyịn ke n̄kpọ ọyọfọn ke ini iso kpa ye oro ibọde ufen mfịn ke ntak idiọkn̄kpọ.

Abasi ọnọ nnyịn ke ntak ima. Bible etịn̄ se ikanamde Abasi ọnọ Eyen esie edikpa afak nnyịn. Enye ọdọhọ ete: “Ẹkeda emi ẹwụt ima oro Abasi amade nnyịn, koro Abasi okosiode ikpọn̄-ikpọn̄ edibon Eyen esie ọdọn̄ edi ke ererimbot man nnyịn ikpenyene uwem ebe ke enye. Ima odu ke orụk usụn̄ emi, idịghe koro nnyịn ikamade Abasi, edi koro enye akamade nnyịn.”—1 John 4:9, 10.

Nso ke akpanam man owụt ke emenen̄ede ama akakan enọ oro Abasi ọnọde nnyịn mi? Ti ke se Jesus eketịn̄de ke John 3:16 owụt ke mbon oro ‘ẹbuọtde idem’ ye enye kpọt ẹdibọhọ. Bible ọdọhọ ke mbuọtidem edi “idotenyịn oro enyenede nsọn̄ọ nte ke se ẹtiede ẹbet eyedi.” (Mme Hebrew 11:1) Ana owo enen̄ede ọfiọk Ikọ Abasi man enye enịm ke se Abasi ọn̄wọn̄ọde oyosu. Ntre, mbọk da ini kpep n̄kpọ ban̄a Jehovah Abasi emi ọkọnọde Jesus edikpa afak nnyịn, nyụn̄ kpep se anade anam man etiene odu uwem ke nsinsi.

Emekeme ndikpep kpukpru emi ke ikpehe Intanet emi www.jw.org/efi. Mme Ntiense Jehovah ẹyema ndin̄wam fi. Imenịm ke edieke ekpepde n̄kpọ aban̄a akakan enọ emi onyụn̄ etienede adia ufọn esie, ke eyetiene ọdọhọ ete: “Mmọkọm Abasi ke Jesus Christ Ọbọn̄ nnyịn!”—Rome 7:25.