Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  No. 1 2017

 IBUOTIKỌ MAGAZINE EMI | NTE OKPOKOTDE BIBLE MAN ENEN̄EDE ADIA UFỌN

Nso Idinam Enenem Fi Ndikot Bible?

Nso Idinam Enenem Fi Ndikot Bible?

Ndi esinenem fi ndikot Bible? Mîdịghe ndi esifefek fi? Ekeme ndidi etiene nte esikotde. Yak ineme se ekemede ndinam man esinen̄ede enem fi ndikot Bible.

Mek Bible emi ẹkabarede ọfọn. Edieke okotde n̄wed emi ọdọn̄ọde mme ikọ emi mîn̄wan̄ake fi, idinemke fi ndikot. Ntre, yom Bible emi ẹkabarede ke mmemmem usụn̄ man se okotde ọsọp an̄wan̄a fi. Edi kụt ete ke Bible emi okotde enen. *

Da kọmputa m̀mê fon kot. Mfịn, Bible odu ke nsio nsio usụn̄, idịghe ke n̄wed kpọt. Ẹkeme ndikot ndusụk Bible ke Intanet, ẹnyụn̄ ẹkeme ndision̄o ndusụk ndọn̄ ke kọmputa, fon, m̀mê tablet. Ndusụk Bible ẹnyene mme n̄kpọ emi ẹsinamde emem utom ndikụt mme itie Bible en̄wen oro ẹtịn̄de n̄kpọ ẹban̄a se ẹkotde oro m̀mê nte ẹkabarede ufan̄ikọ oro ke mme Bible en̄wen. Omonyụn̄ ekeme ndikpan̄ utọn̄ n̄kop Bible emi ẹkotde-kot ẹdọn̄ ke n̄kpọ. Ediwak owo ẹsima ndikpan̄ utọn̄ n̄kop nte ẹkotde Bible ke ini mmọ ẹsịnede ke moto, ẹyetde ọfọn̄, m̀mê ẹnamde n̄kpọ eken oro mînamke uyom. Mek enye emi ọfọnde ye afo.

Nyene mme n̄kpọ emi ẹdinamde se okotde an̄wan̄a fi. Enyene mme n̄kpọ emi ẹkemede ndinam se okotde ke Bible enen̄ede an̄wan̄a fi. Ke uwụtn̄kpọ, n̄wed emi mme map obio Bible ẹdude ẹkeme ndin̄wam fi ọfiọk mme itie emi mme obio oro okotde aban̄a ẹkedude. Ndusụk ibuotikọ, utọ nte mbon oro ẹdude ke magazine emi m̀mê mbon  oro ẹdude ke “Se Bible Ekpepde” ke jw.org/efi ẹkeme ndin̄wam fi enen̄ede ọfiọk se Bible ekpepde.

Kot ke nsio nsio usụn̄. Edieke etiede nte edikakak fi nditọn̄ọ ke Genesis n̄kot nsịm Ediyarade, emekeme nditọn̄ọ ye n̄wed Bible emi amade akan. Edieke oyomde ndifiọk n̄kpọ mban̄a ndusụk mbon oro ẹtịn̄de ẹban̄a ke Bible, emekeme ndimek mme n̄wed Bible oro ẹtịn̄de n̄kpọ ẹban̄a mmọ. Ekebe oro “ Kpep N̄kpọ Ban̄a Mbon Emi Ẹsiakde ke Bible” owụt usụn̄ iba oro ekemede ndimek ndikot Bible. Emekeme ndinyụn̄ mmek akpan n̄kpọ kiet oro oyomde ndikot mban̄a, mîdịghe okot nte n̄kpọ eketịbede ke adiana ke adiana. Usụn̄ ekededi ke otu emi osụk ọfọfọn ndida ntọn̄ọ ndikot Bible.

^ ikp. 4 Ediwak owo ẹma Edisana N̄wed Abasi—Edikabade Eke Obufa Ererimbot sia ẹkabade enye ọfọn. Bible emi enen, enem ndikot, onyụn̄ ọsọp an̄wan̄a owo. Mme Ntiense Jehovah ẹsio Bible emi, ndien enye odu ke se ibede usem 130. Emekeme ndika ikpehe Intanet nnyịn jw.org/efi n̄kosio, mîdịghe esịn JW Library ke fon m̀mê tablet fo man esisio Bible do okot. Emekeme n̄ko ndidọhọ Mme Ntiense Jehovah ẹmen Bible ẹsọk fi ke ufọk.