Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME DECEMBER 2015

 IBUOTIKỌ MAGAZINE EMI | BIBLE EKEME NDIN̄WAN̄A FI

Se Idinamde Bible An̄wan̄a Fi

Se Idinamde Bible An̄wan̄a Fi

Kere nte akade obio emi akanam mûkaha. Nte mme owo ẹnamde n̄kpọ do etie fi esen esen. Udia ye okụk mmọ inyụn̄ in̄wan̄ake fi. Utọ uwem oro ekeme ndikak fi.

Ekeme nditie fi ntre ke idem akpa ini emi okotde Bible. Nte afo okotde aban̄a nte mme owo ẹkesiwakde ọfọn̄ ke ini n̄kpọ etịbede, udia emi ẹkotde manna, okụk emi ẹkotde drachma, m̀mê idụt emi ẹkotde Philistia, kpukpru emi ẹkeme nditie fi esen esen. (Exodus 16:31; Joshua 13:2; 2 Samuel 3:31; Luke 15:9) Ndien emi ekeme nditịmede fi. Kpa nte okpoyomde owo an̄wam fi ke ini akade idụt emi akanam mûkaha, etie nte akpama owo anam mme n̄kpọ emi mîn̄wan̄ake fi ke Bible an̄wan̄a fi.

NTE ẸKENAMDE IKỌ ABASI AN̄WAN̄A MME OWO KE ESET

Toto ke ini emi ẹketọn̄ọde ndiwet Bible n̄kpọ nte isua 1,500 mbemiso Christ, ẹma ẹsinam Ikọ Abasi an̄wan̄a mme owo. Ke uwụtn̄kpọ, Moses emi ekedide akpa owo emi akadade nditọ Israel usụn̄, ama anam se ẹkewetde ke ibet Abasi an̄wan̄a mmọ.—Deuteronomy 1:5.

N̄kpọ nte isua 1,000 ke oro ebede, mbon oro ẹkesikpepde mme owo Ikọ Abasi ẹkesụk ẹdodu. Ke isua 455 mbemiso Christ, ediwak mme Jew, esịnede nditọwọn̄, ẹma ẹsop idem ke an̄wa obio ke Jerusalem. Mbon oro ẹkesikpepde mme owo Bible ẹma ‘ẹkot N̄wed Abasi uyo ọwọrọ.’ Edi mmọ iketreke do. “Mmọ [ẹma] ẹka iso ndinam se ẹkotde an̄wan̄a” mme owo.—Nehemiah 8:1-8.

Isua 500 ke oro ebede, Jesus Christ ama anam ukem utom oro. Ke nditịm ntịn̄, mme owo ẹkediọn̄ọ enye nte andikpep. (John 13:13) Enye ama esikpep otuowo n̄kpọ, onyụn̄ ekpep owo kiet kiet. Isan̄ kiet, enye ama ọdọk obot okosụhọde etie do ekpep akwa otuowo ediwak n̄kpọ, ndien “idem [ama] akpa otuowo aban̄a usụn̄ nte enye ekpepde owo n̄kpọ.” (Matthew 5:1, 2; 7:28) Ke isua 33 eyo Jesus, enye ama eneme nneme ye mbet esie iba ke ini mmọ ẹsan̄ade ke usụn̄ ẹka obio emi ekperede Jerusalem onyụn̄ ‘atat N̄wed Abasi ọnọ mmọ,’ oro edi, anam Ikọ Abasi an̄wan̄a mmọ.—Luke 24:13-15, 27, 32.

Mme mbet Jesus n̄ko ẹma ẹsikpep mme owo Ikọ Abasi. Isan̄ kiet, akwa owo emi otode Ethiopia ama okot itie kiet ke N̄wed Abasi. Mbet kiet emi ekerede Philip ama asan̄a ekpere enye onyụn̄ obụp enye ete: “Nte afo emetịm ọfiọk se afo okotde?” Owo Ethiopia oro ama ọbọrọ enye ete: “N̄keme didie ndifiọk ke owo mîtemeke mi?” Ndien Philip ama anam se itien̄wed oro ọwọrọde an̄wan̄a enye.—Utom 8:27-35.

NTE ẸNAMDE BIBLE AN̄WAN̄A MME OWO MFỊN

Kpa nte ẹkesikpepde mme owo Bible ke eset, Mme Ntiense Jehovah ke ẹkpep mme owo Bible mfịn ke idụt 239 ke ofụri ererimbot. (Matthew 28:19, 20) Kpukpru urua, mmọ ẹsin̄wam se ibede owo miliọn usụkkiet ẹkpep Bible. Ediwak mbon emi ẹkpepde Bible mi idịghe mme Christian. Ukpepn̄kpọ emi edi ke mfọn, ẹnyụn̄ ẹkeme ndinịm enye ke ufọk owo m̀mê ke ebiet en̄wen emi owo oro amade. Mmọ ẹsinyụn̄ ẹda fon m̀mê Intanet ẹkpep ndusụk owo Bible.

Mbọk yom usụn̄ sobo ye Ntiense Jehovah ekededi man ọfiọk nte ekemede nditiene n̄kpep Bible. Edieke enyịmede ndikpep Bible, oyokụt ke Bible ekeme ndin̄wan̄a owo. Eyedifiọk n̄ko ke Bible “ọfọn ndida nnọ ukpep, nsua nnọ owo, nnen̄ede mme n̄kpọ, nnọ ntụnọ ke edinen ido” man afo “etịm odot, eben̄e idem ọyọhọ ọyọhọ ndinam eti utom ekededi.”—2 Timothy 3:16, 17.

 

Kpep N̄kpọ En̄wen

Ntak Emi Ekpekpepde Bible?

Bible anam ediwak miliọn owo ke ofụri ererimbot ẹfiọk ibọrọ mbụme emi afịnade ata ediwak owo. Ndi akpama nditiene mfiọk?

Ẹsikpep Owo Bible Didie?

Mme owo ke ofụri ererimbot ẹdiọn̄ọ ke Mme Ntiense Jehovah ẹsikpep owo Bible ke mfọn. Se nte mmọ ẹsinamde.

Ke Ẹkpep Mme Owo Bible ke Ofụri Ererimbot

Kot man okụt ibọrọ mbụme itiaita oro ẹsiwakde ndibụp mban̄a nte nnyịn isikpepde mme owo Bible.