Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  December 2015

 MME ANDIKOT N̄WED NNYỊN ẸBỤP ẸTE . . .

Nso Idiọk ye Mme N̄kpọ Oro Ẹsinamde ke Ini Christmas?

Nso Idiọk ye Mme N̄kpọ Oro Ẹsinamde ke Ini Christmas?

Ebịghi ẹketọn̄ọ ndidọhọ ke Christmas edi usọrọ emi mme Christian ẹsidade ẹti usen emana Jesus. Edi ediwak n̄kpọ emi ẹsinamde ke ini Christmas anam ikere m̀mê ẹkesasan̄a didie ẹtọn̄ọ ndisinam utọ n̄kpọ ntem ke usọrọ emi ẹdọhọde ke edi usọrọ usen emana Jesus.

Da Father Christmas ke uwụtn̄kpọ. Ẹdọhọ ke ẹkenam Father Christmas (emi esisịnede ndatndat ọfọn̄, enyene afia ntan̄ebek, onyụn̄ osio ndyọ) ẹnọ kọmpeni mmịn ke North America ke 1931 man ediwak owo ẹdep mmịn mmọ ke ini Christmas. N̄kpọ nte isua 20 ke oro ebede, ndusụk mbon Brazil ẹkekabade ẹyom mme owo ẹma Grandpa Indian utu ke Father Christmas. Edi mme owo ẹkesụk ẹma Father Christmas. Ẹma ẹma tutu edi se Prọfesọ Carlos E. Fantinati ọdọhọde ke ẹma Father Christmas ẹkan Jesus, nsekeyen oro ẹkam ẹnamde usọrọ emi ẹnọ; ndien ke nte Father Christmas akakabarede edi idiọn̄ọ Christmas edi oro. Edi ndi Father Christmas edi n̄kukụre n̄kpọ emi anamde Christmas ọdiọk? Ẹyak ineme esisịt iban̄a akpa mme Christian man ifiọk ibọrọ mbụme emi.

Encyclopedia Britannica ọdọhọ ke akpa mme Christian ikesinịmke usọrọ usen emana owo ndomokiet, edide eke mbon oro ẹkewotde ke ntak Ikọ Abasi m̀mê eke Jesus. Ntak-a? Sia mmọ ẹkeda usọrọ emi nte usọrọ mme-okpono-ndem. Ke nditịm ntịn̄, Bible isiakke usen emi Jesus akamanade.

N̄kpọ nte isua 300 ke mme apostle ẹma ẹkekpan̄a, Ufọkabasi Catholic ẹma ẹtọn̄ọ ndisidia Christmas kpa ye oro edide akpa mme Christian ikesinamke usọrọ usen emana. Ufọkabasi Catholic ẹkeyom uwọrọiso. Ntre mmọ ẹma ẹsio n̄kpọ ẹdi man mme owo ẹfre ẹban̄a nte mbon Rome ẹsikponode abasi ẹnyụn̄ ẹnamde usọrọ abasi utịn mmọ. Kpukpru isua, ọtọn̄ọde ke December 17 esịm January 1, n̄wed emi ẹkotde Christmas in America, emi Penne L. Restad ewetde ọdọhọ ke “ediwak mbon Rome ẹma ẹsinam ndia, ẹbre mbre, ẹsịn usọrọ, ẹsan̄a ẹkanade obio, ẹnyụn̄ ẹnam mme n̄kpọ ntre ke ini ẹkponode mme abasi mmọ.” Ndien ke December 25, mbon Rome ẹma ẹsinam usọrọ ẹnọ abasi utịn emi mmọ ẹkekponode. Ufọkabasi Catholic ẹma ẹmen usọrọ Christmas ẹnịm ke usen oro man ẹnam ediwak mbon Rome ẹkabade ẹnam usọrọ usen emana Jesus utu ke ndinam usọrọ abasi utịn mmọ. Edi n̄wed kiet emi aban̄ade Christmas ọdọhọ ke mbon Rome ẹkesụk ẹnanam se mmọ ẹkesinamde ke ini usọrọ emi.

Omokụt do ke nte Christmas ọkọtọn̄ọde ifọnke. Stephen Nissenbaum ọkọdọhọ ke n̄wed esie emi ẹkotde The Battle for Christmas ke Christmas edi “usọrọ mme okpono ndem emi ẹnamde etie nte edi eke mme Christian.” Ntre, Christmas inọhọ Abasi ye Jesus Christ Eyen esie ubọn̄. Ndi ekpri n̄kpọ edi oro? Bible ọdọhọ ete: “Nso ebuana ke edinen ido enyene ye ukwan̄ido? Mîdịghe nso ebuana ke un̄wana enyene ye ekịm?” (2 Corinth 6:14) Christmas etie nte n̄kọk eto emi akwan̄ade, ndien “owo ikemeke ndinen̄ede se ikwan̄ade.”—Ecclesiastes 1:15.