Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME NOVEMBER 2015

 IBUOTIKỌ MAGAZINE EMI | DIDIE KE ABASI ESE EKỌN̄?

Nte Abasi Ekesede Ekọn̄ ke Eyo Mme Apostle

Nte Abasi Ekesede Ekọn̄ ke Eyo Mme Apostle

Mbon Rome ẹma ẹfịk mme Jew emi ẹkedude ke eyo mme apostle. Ukem nte nditọ Israel, mme Jew emi ẹma ẹbọn̄ akam ediwak ini ẹte Abasi anyan̄a mmimọ. Ekem mmọ ẹma ẹkop ẹban̄a Jesus ẹnyụn̄ ẹkere m̀mê enye ekpedi Messiah oro ẹkedọhọde ke eyedi. Ediwak mmọ ‘ẹkedori enyịn ke owo emi edinyan̄a Israel’ osio ke ubọk mbon Rome oro ẹkefịkde mmọ. (Luke 24:21) Edi idotenyịn mmọ ama akpa mfụhọ. Ke isua 70 eyo mme apostle, mbonekọn̄ Rome ẹma ẹdi ẹdisobo Jerusalem ye temple esie.

Ntak emi Abasi mîkan̄wanake inọ mme Jew nte enye akan̄wanade ọnọ mme ete-ete mmọ? Mîdịghe ntak emi enye mîkọdọhọke mmọ ẹn̄wana ekọn̄ man ẹwọrọ ke ubọk mbon Rome? Ndi nte Abasi esede ekọn̄ ama okpụhọde? Ihih. Edi se ikakam ikpụhọrede edi nte enye esede mme Jew. Mmọ ẹma ẹsịn Jesus Eyen Abasi, imaha ndinyịme ke enye edi Messiah. (Utom 2:36) Ntre, mmọ ikedịghe aba ikọt Abasi.—Matthew 23:37, 38.

Abasi ikekpemeke aba mme Jew ye Isọn̄ Un̄wọn̄ọ mmọ, ikonyụn̄ idọhọke mmọ ẹka aba ekọn̄. Nte Jesus ama eketetịn̄, Abasi ikadaha aba idụt mme Jew nte ikọt esie. Enye ama emek idụt en̄wen onyụn̄ ọdiọn̄ mmọ. Idụt emi idịghe ata idụt. Bible okot enye “Israel Abasi.” (Galatia 6:16; Matthew 21:43) Esop mme Christian emi ẹyetde aran ekedi Israel Abasi emi. Oro anam ẹkedọhọ mmọ ke eyo mme apostle ẹte: “Idahaemi mbufo ẹdi ikọt Abasi.”—1 Peter 2:9, 10.

Sia mme Christian eyo mme apostle ẹkedide “ikọt Abasi,” ndi Abasi ama an̄wana ọnọ mmọ man osio mmọ ke ubọk mbon Rome? Mîdịghe ndi enye ama ọdọhọ mmọ ẹken̄wana ye mbon Rome? Ihih. Ntak-a? Nte ikokụtde ke udiana ibuotikọ, Abasi ikpọn̄ enyene unen ndibiere ini emi ẹkpen̄wanade ekọn̄. Abasi ikan̄wanake ekọn̄ inọ mme Christian eyo mme apostle, ikonyụn̄ idọhọke mmọ ẹken̄wana. Emi ọwọrọ ke eyo mme apostle ikedịghe ini Abasi ndin̄wana ekọn̄ man ẹtre idiọkido ye ufịk.

Ntre, ukem nte nditọ Israel, mme Christian eyo mme apostle emi ẹkenyene ndibet tutu ekem ini Abasi nditre idiọkido ye ufịk. Abasi ikọdọhọke mmọ ẹka ẹken̄wana ye mme asua mmọ. Se Jesus Christ okonyụn̄ ekpepde edi oro. Ke uwụtn̄kpọ, enye ikọdọhọke mme mbet esie ẹken̄wana ekọn̄, akakam ọdọhọ mmọ ete: “Ẹka iso ẹma mme asua mbufo ẹnyụn̄ ẹbọn̄ akam ẹyom ufọn mmọ eke ẹkọbọde mbufo.” (Matthew 5:44) N̄ko, Jesus ọkọdọhọ mme mbet esie ete mbon Rome ẹma ẹmen ekọn̄ ẹdi Jerusalem yak mmọ ẹkûda un̄wana edi yak ẹfehe. Se mmọ ẹkenyụn̄ ẹnamde edi oro.—Luke 21:20, 21.

Ke adianade do, Abasi ọkọdọhọ apostle Paul ewet ete: “Ẹkûsio usiene ẹnọ idem mbufo . . . koro ẹwet ẹte: ‘Jehovah ọdọhọ ete, usiene enyene mi; ami nyosio usiene.’” (Rome 12:19) Paul eketịn̄ se Abasi eketịn̄de ediwak isua ke edem ke Leviticus 19:18 ye Deuteronomy 32:35. Nte  ikokụtde ke udiana ibuotikọ, usụn̄ kiet emi Abasi ekesisiode usiene ọnọ ikọt esie ke eset ekedi ndin̄wana ye mme asua mmọ. Ikọ Paul emi owụt ke nte Abasi esede ekọn̄ ikokpụhọkede. Ke eyo mme apostle, Abasi okosụk adada ekọn̄ nte eti usụn̄ ndisio usiene nnọ mme asan̄autom esie nnyụn̄ ntre idiọkido ye ufịk. Edi, nte ekedide ke ini edem, Abasi kpọt ekesibiere m̀mê ini ewe ke ẹkpen̄wana utọ ekọn̄ oro, m̀mê mmanie ẹkpenyụn̄ ẹtiene ẹn̄wana.

Omokụt do ke Abasi ikọdọhọke mme Christian eyo mme apostle ẹn̄wana ekọn̄. Edi nso kaban̄a mfịn? Ndi Abasi enyịme mme owo ẹn̄wana ekọn̄? Mîdịghe ndi ini ekem ndien Abasi ndin̄wana ekọn̄ nnọ ikọt esie? Didie ke abasi ese ekọn̄ mfịn? Ibuotikọ oro etienede ọyọbọrọ mme mbụme emi.