Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME NOVEMBER 2015

 IBUOTIKỌ MAGAZINE EMI | DIDIE KE ABASI ESE EKỌN̄?

Nte Abasi Esede Ekọn̄ Mfịn

Nte Abasi Esede Ekọn̄ Mfịn

Ẹfịk mme owo mfịn. Ediwak mmọ ẹsiseme ẹnọ Abasi ẹte anyan̄a mmimọ, edi mmọ ẹsikere m̀mê mmimọ iyọbọhọ utọ ufịk emi tutu ama. Ndi Abasi esikop eseme mmọ? Nso kaban̄a mbon oro ẹn̄wanade ekọn̄ man ẹbọhọ ufen? Ndi Abasi ama se mmọ ẹnamde emi?

Armageddon edi ekọn̄ emi editrede kpukpru ekọn̄

Fiọk ete ke Abasi okụt ofụri ufen emi mme owo ẹbọde ke ererimbot emi, ndien enye aduak nditre ufen. (Psalm 72:13, 14) Abasi ọn̄wọn̄ọ ke iyanam mbon emi ẹkụtde ukụt ẹnyene nduọkodudu. Ini ewe ke enye edinam emi? “Ke ediyarade Ọbọn̄ Jesus emi editode heaven edi ye mme okopodudu angel esie . . . nte enye adade usiene ọsọk mmọ eke mîfiọkke Abasi ye mmọ eke mîsụkke ibuot inọ eti mbụk Ọbọn̄ nnyịn Jesus.” (2 Thessalonica 1:7, 8) Emi edidi ke ini iso, ke ini “ekọn̄ akwa usen Abasi Ata Ọkpọsọn̄,” emi ẹkotde n̄ko Armageddon.—Ediyarade 16:14, 16.

Ke ekọn̄ Armageddon, Abasi edida Jesus Christ Eyen esie ye mme angel in̄wana ye mme idiọkowo; ididaha mme owo. Udịmekọn̄ heaven emi ẹyetre kpukpru ufịk.—Isaiah 11:4; Ediyarade 19:11-16.

Tutu esịm emi, nte Abasi esede ekọn̄ ikpụhọkede. Enye osụk adada ekọn̄ nte eti usụn̄ nditre ufịk ye idiọkido. Edi nte ekedide toto ke eset, Abasi kpọt enyene unen ndibiere m̀mê ini ewe ke ẹkpen̄wana ekọn̄, m̀mê mmanie ẹkpenyụn̄ ẹtiene ẹn̄wana. Nte ima ikokokụt, Abasi ebebiere ke Jesus Christ Eyen imọ edin̄wana ekọn̄ emi imọ ididade itre idiọkido inyụn̄ isio usiene  inọ mbon oro ẹfịkde. Ẹdin̄wana ekọn̄ emi ke ini iso. Emi ọwọrọ ke Abasi imaha mme ekọn̄ oro ẹn̄wanade mfịn, inamke n̄kpọ m̀mê nso inam ẹn̄wana.

Ke uwụtn̄kpọ: Yak idọhọ ke akpan ye udọ ẹn̄wana ke ini ete mmọ mîdụhe ke ufọk. Mmọ ẹtre en̄wan oro kan̄a ẹnyụn̄ ẹkot ete mmọ ke fon ẹtịn̄ se itịbede. Udọ ọdọhọ ke akpan ọkọtọn̄ọ en̄wan, akpan ọdọhọ ke udọ ekebem iso oyom imọ ikọ. Akpan oyom ete ada ye imọ; udọ ekere ke akpakam ada ye imọ. Edi ke ete mmọ ama okokop oto mmọ mbiba, enye ọdọhọ mmọ ẹkûn̄wana aba; yak ẹbet imọ inyọn̄ idi. Mmọ ẹnyụn̄ ẹtre en̄wan kan̄a. Edi ibịghike mmọ ẹfiak ẹtọn̄ọ en̄wan. Ke ini ete mmọ ọnyọn̄de edisịm ufọk, enye ayat esịt ye mmọ mbiba onyụn̄ ọnọ mmọ ufen sia mmọ mîkokopke uyo esie.

Mfịn, mme owo ẹsiben̄e Abasi ẹte ada ye mmimọ ke ekọn̄. Edi Abasi idaha ye owo ndomokiet ke ekọn̄ oro ẹn̄wanade mfịn. Enye ọdọhọ ke Bible ete: “Ẹkûda idiọk ẹsio owo usiene idiọk,” afiak ọdọhọ ete, “Ẹkûsio usiene ẹnọ idem mbufo.” (Rome 12:17, 19) Enye ọdọhọ yak mme owo ẹnyene ime ẹbet imọ, ke imọ iyan̄wana inọ mmọ ke Armageddon. (Psalm 37:7) Esiyat Abasi ke ini mme owo ẹtan̄de idem ẹdaha ẹken̄wana ekọn̄ utu ke nditie mbet enye edin̄wana ọnọ mmọ. Ntem, Abasi oyowụt iyatesịt esie ke Armageddon. Enye eyetre kpukpru utọk oro mme idụt ẹnyenede onyụn̄ anam “ekọn̄ etre tutu esịm utịt isọn̄.” (Psalm 46:9; Isaiah 34:2) Armageddon edi ekọn̄ emi editrede kpukpru ekọn̄.

Kiet ke otu n̄kpọ oro Obio Ubọn̄ Abasi edinamde edi nditre ekọn̄. Obio Ubọn̄ emi ke Jesus eketịn̄ aban̄a ke ini enye ọkọbọn̄de akam ete: “Yak obio ubọn̄ fo edi. Yak uduak fo ada itie, nte edide ke heaven, yak edi ke isọn̄ kpasụk ntre.” (Matthew 6:10) Idịghe ekọn̄ kpọt ke Obio Ubọn̄ Abasi editre, eyetre n̄ko idiọkido emi esinamde ẹn̄wana ekọn̄. * (Psalm 37:9, 10, 14, 15) Imosụk ise mme mbet Jesus ẹtiede-tie ẹbet mme edidiọn̄ Obio Ubọn̄ Abasi.—2 Peter 3:13.

Edi idibet ebịghi didie mbemiso Obio Ubọn̄ Abasi etre kpukpru ufen, ufịk, ye idiọkido? Nte mme prọfesi Bible ẹsude owụt ke nnyịn idu uwem ke “mme akpatre usen” ererimbot emi. (2 Timothy 3:1-5) * Ibịghike Obio Ubọn̄ Abasi eyemen ekọn̄ Armageddon edi man ererimbot Satan emi ekpesịm utịt ndien.

Nte ima iketetịn̄, mbon emi “mîsụkke ibuot inọ eti mbụk Ọbọn̄ nnyịn Jesus” ke ekọn̄ emi ediwot. (2 Thessalonica 1:8) Edi ti ete ke isinemke Abasi ndikụt mme owo ẹkpade, ekpededi mme idiọkowo. (Ezekiel 33:11) Sia “enye mîyomke baba owo kiet atak” ke ekọn̄ emi, enye okụt ete ke “ẹkwọrọ eti mbụk” emi aban̄ade Ọbọn̄ nnyịn Jesus “ke ofụri isọn̄ nte ntiense ẹnọ kpukpru mme idụt” mbemiso utịt edi. (2 Peter 3:8, 9; Matthew 24:14; 1 Timothy 2:3, 4) Ukwọrọikọ Mme Ntiense Jehovah anam mme owo ẹdidiọn̄ọ Abasi, ẹsụk ibuot ẹnọ eti mbụk emi aban̄ade Jesus, ẹnyụn̄ ẹtie ẹbet ini emi ekọn̄ mîdidụhe aba.

^ ikp. 9 Obio Ubọn̄ Abasi oyosio n̄kpa emi edide asua nnyịn efep. Nte ikụtde ke page 16 ke Enyọn̄-Ukpeme emi, Abasi ayanam mme owo ẹset, esịnede ediwak mbon oro ekọn̄ owotde toto ke eset.

^ ikp. 10 Edieke oyomde ndifiọk n̄kpọ en̄wen mban̄a mme akpatre usen, mbọk kot ibuot 9 ke n̄wed Mme Ntiense Jehovah emi Nso ke Bible Enen̄ede Ekpep?

Kpep N̄kpọ En̄wen

Owo Emi Edide Ntak Ekọn̄ ye Ufen

Didie ke Bible owụt ke Satan emi ẹkesiode ke heaven ẹduọk ke isọn̄ akada ekọn̄ ye mfịna edi ke ofụri ererimbot?

Ntak Emi Mbufo Mîsin̄wanake Ekọn̄?

Mme owo ẹdọdiọn̄ọ ke Mme Ntiense Jehovah isin̄wanake ekọn̄. Kot man ọdiọn̄ọ ntak emi isịnde ndin̄wana ekọn̄.