Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME SEPTEMBER 2015

 IBUOTIKỌ MAGAZINE EMI | MMANIE ẸDI MME NTIENSE JEHOVAH?

Nso ke Mme Ntiense Jehovah Ẹnịm ke Akpanikọ?

Nso ke Mme Ntiense Jehovah Ẹnịm ke Akpanikọ?

Mme Ntiense Jehovah ẹnịm ke “Abasi ọkọnọ odudu spirit ẹda ẹwet ofụri N̄wed Abasi, ndien [ke] enye ọfọn” ke kpukpru usụn̄. (2 Timothy 3:16) Bible ke nnyịn isida ikpep n̄kpọ iban̄a Andibot nnyịn. Kpa enye ke isida ikpep nte ikpodude eti uwem.

Bible ọdọhọ ete: “Mme owo [ẹkpekam ẹfiọk] ẹte ke afo, emi enyịn̄ fo edide Jehovah, afo ikpọn̄ edi Ata Edikon̄ ke ofụri isọn̄.” (Psalm 83:18) Ntre, Jehovah Abasi ikpọn̄-ikpọn̄ ke nnyịn ituak ibuot inọ. Ndien sia idide Mme Ntiense esie, imesinam mme owo ẹfiọk enyịn̄ esie.—Isaiah 43:10-12.

Nnyịn idi mme Christian, ntre nnyịn inịm ke Jesus “Eyen Abasi” * ama edi isọn̄ emi onyụn̄ akabade edi Messiah. (John 1:34, 41; 4:25, 26) Ke Jesus ama akakpa, Abasi ama anam enye eset ọnyọn̄ heaven. (1 Corinth 15:3, 4) Nte ini akade, enye ama akabade edi Edidem Obio Ubọn̄ Abasi. (Ediyarade 11:15) Obio Ubọn̄ oro edi ukara emi edinamde isọn̄ emi akabade edi Paradise. (Daniel 2:44) Bible ọdọhọ ke “mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”—Psalm 37:11, 29.

““Ke ini mmọ ẹkotde Bible, esitie mmọ nte Abasi etịn̄ ikọ ọnọ mmọ. Ini ekededi emi mmọ ẹnyenede mfịna, mmọ ẹsidụn̄ọde Ikọ Abasi man ẹfiọk nte idisan̄ade ikọk mfịna oro. . . . Mmọ ẹnịm ke Ikọ Abasi osụk enyenyene uwem.”—Ikọ Benjamin Cherayath, oku Ufọkabasi Catholic, ke n̄wedmbụk n̄kpọntịbe Germany emi ẹkotde Münsterländische Volkszeitung

Mme Ntiense Jehovah ẹnịm ke item Bible osụk enyenyene ufọn ọnọ mme owo mfịn. (Isaiah 48:17, 18) Ntre, nnyịn imesida mme item emi idu uwem. Ke uwụtn̄kpọ, sia Bible ọdọhọde ikûnam n̄kpọ ekededi emi ekemede ndisabade nnyịn idem ye ekikere, nnyịn isin̄wọn̄ke sika isinyụn̄ idaha ibọk man ifre uwa. (2 Corinth 7:1) Nnyịn n̄ko isinamke mme n̄kpọ oro Bible ọdọhọde ikûnam, utọ nte ukpammịn, use, efịbe, ye inọ.—1 Corinth 6:9-11.

^ ikp. 5 Bible okot Jesus n̄ko “ikpọn̄-ikpọn̄ edibon Eyen Abasi” sia enye ekedi ata akpa owo emi Jehovah okobotde ke idemesie.—John 3:18; Colossae 1:13-15.

Kpep N̄kpọ En̄wen

Nso ke Mme Ntiense Jehovah Ẹnịm?

Se akpan n̄kpọ 15 emi nnyịn inịmde mi.

Ndi Mme Ntiense Jehovah Ẹkere ke Ufọkabasi Mmimọ Ọfọn Akan?

Ndi Jesus ọkọdọhọ ke kpukpru ufọkabasi ẹdida isịm edinyan̄a?