Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  August 2015

 IBUOTIKỌ MAGAZINE EMI | NDI MME AKPAN̄KPA ẸKEME NDIFIAK NDU UWEM?

Nso Ikpanam Enịm ke Mme Akpan̄kpa Ẹyeset?

Nso Ikpanam Enịm ke Mme Akpan̄kpa Ẹyeset?

Ndi edi ndisịme ndikere ke mme akpan̄kpa ẹyeset? Apostle Paul ikekereke ntre. Se se Abasi ọkọdọhọde enye ewet mi: “Edieke edide ke uwem emi kpọt ke nnyịn idori enyịn ke Christ, nnyịn imenyene mbọm ikan kpukpru owo. Edi, ẹma ẹnam Christ eset ke n̄kpa, nte akpa mbun̄wụm ke otu mbon oro ẹdede ke n̄kpa.” (1 Corinth 15:19, 20) Paul ama enen̄ede enịm ke mme akpan̄kpa ẹyeset. Abasi ndikanam Jesus eset akanam enye enịm. * (Utom 17:31) Oro akanam Paul okot Jesus “akpa mbun̄wụm” sia enye edi akpa owo oro ẹkenamde eset okodu uwem ke nsinsi. Edieke ẹkotde Jesus akpa, ọwọrọ ẹyetiene ẹnam mbon en̄wen ẹset.

Job ọkọdọhọ Abasi ete: “Utom ubọk fo ọyọdọn̄ fi.”—Job 14:14, 15

Ntak en̄wen emi akpanamde enịm ke mme akpan̄kpa ẹyeset edi ke Jehovah edi Abasi akpanikọ. ‘Abasi ikemeke ndisu nsu.’ (Titus 1:2) Akananam Jehovah isụhu nsu, idinyun̄ isụhu tutu amama. Ndi Abasi ọkpọn̄wọn̄ọ ke iyanam mme owo ẹset, ananam emi owụt, ekem imaha ndinam se enye ọkọn̄wọn̄ọde? Abasi ikemeke ndinam utọ n̄kpọ oro!

Ntak emi Jehovah oyomde ndinam mme owo ẹset? Enye anam emi ke ntak ima. Job ama obụp ete: “Edieke owo akpade nte enye ekeme ndifiak ndu uwem?” Ekem enye ama adian do ete: “Afo oyokot, ndien ami nyeyere fi. Koro utom ubọk fo ọyọdọn̄ fi.” (Job 14:14, 15) Job ama enen̄ede enịm ke edieke imọ ikpade, ke ọyọdọn̄ edima Ete imọ eke heaven ndinam imọ iset. Ndi Abasi okpụhọde? Abasi ọdọhọ ete: “Ami ndi Jehovah; ami n̄kpụhọkede.” (Malachi 3:6) Osụk ọdọdọn̄ Jehovah ndinam mme akpan̄kpa ẹset ẹdidu uwem emi udọn̄ọ ye mfụhọ mîdidụhe aba. Idụhe edima ete m̀mê eka emi mîkpoyomke ndifiak n̄kụt eyen esie emi akakpade esetde edidu utọ uwem oro. Abasi iditreke ndinam emi sia  enye enyene odudu ndinam kpukpru se enye amade.—Psalm 135:6.

N̄kpa esibiak owo tutu, edi Abasi ọnọ nnyịn idotenyịn

Jehovah ọyọnọ Eyen esie odudu ndinam mme akpan̄kpa eset. Emi ayanam esịt enen̄ede enem kpukpru mbon oro ẹkopde mfụhọ ke ntak emi mbon mmọ ẹkpade. Edi Jesus ese didie ediset ke n̄kpa? Mbemiso Jesus akanamde Lazarus eset, enye ama “atua eyet” ke ini enye okụtde nte nditọeka Lazarus ye mme ufan esie ẹtuade. (John 11:35) Isan̄ en̄wen, Jesus ama osobo ye ebeakpa emi otode obio Nain. Ke ini enye okụtde ke n̄kukụre eyen esie akpa oro, “mbọm n̄wan oro [ama] anam enye, enye onyụn̄ ọdọhọ enye ete: ‘Kûtua aba.’” Kpa idahaoro, enye ama anam eyen esie eset! (Luke 7:13) Ntre, esinen̄ede abiak Jesus ndikụt mme owo ẹkpade ye nte n̄kpa anamde mme owo ẹfụhọ. Esịt eyenen̄ede enem Jesus ndinam kpukpru mbon oro ẹfụhọde ke ofụri ererimbot ẹkop inemesịt!

Ndi akanam owo fo akpa? Ekeme ndidi esikere ke owo ama akpa, esie okụre. Edi imenyene idotenyịn sia Abasi ọyọnọ Eyen esie odudu ndinam mme owo ẹset. Ti ete ke Abasi oyom fi ọdiọn̄ọ ke mme akpan̄kpa ẹyeset. Enye oyom fi odu okụt ini emi mbon fo ẹdisetde idi onyụn̄ etiene adara mmọ. Kere nte edidụn̄de ye mmọ ke nsinsi, n̄kpa idian̄akede mbufo aba!

Lionel emi iketịn̄de iban̄a ọdọhọ ete: “Nte ini akade, mma n̄kop ke Abasi ayanam mme akpan̄kpa ẹset. Ke nsonso oro, n̄kenịmke emi ke akpanikọ. Edi mma ndikụt ke se Bible ekpepde edi oro. Ntetie mbet ini emi ndifiakde n̄kụt ete-eka mi.”

Ndi akpama ndifiọk n̄kpọ en̄wen mban̄a se isụk inemede emi? Mme Ntiense Jehovah ẹyewụt fi ke Bible fo ntak emi mmimọ inịmde ke Abasi ayanam mme akpan̄kpa ẹset. *

^ ikp. 3 Man okụt mme n̄kpọ oro ẹwụtde ke Jesus ama eset, kot Enyọn̄-Ukpeme November 15, 2014, page 3-7.

^ ikp. 9 Mbọk kot ibuot 7 ke n̄wed Mme Ntiense Jehovah emi Nso ke Bible Enen̄ede Ekpep?

Kpep N̄kpọ En̄wen

ENYỌN̄-UKPEME (EKE UKPEPNKPỌ)

Nte Ekemede Ndiyọ N̄kpa An̄wan m̀mê Ebe Fo

Esinen̄ede abiak owo ebighi edieke n̄wan m̀mê ebe esie akpade. Kot man kop nte idotenyịn ediset ke n̄kpa ekemede ndidọn̄ owo esịt.