Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  July 2015

 IBUOTIKỌ MAGAZINE EMI | SE AKPANAMDE KE INI ESỊT ETỊMEREDE FI

Nditịmede Esịt Mban̄a Okụk

Nditịmede Esịt Mban̄a Okụk

Paul emi enyenede n̄wan ye nditọ iba ọdọhọ ete: “Enyene ini emi n̄kpọ ọkọsọn̄de etieti ke obio nnyịn ndien udia ama anana tutu. Ekpri udia emi okodude akakpa enan̄. Ikesida ke udịm ediwak hour man idep udia, edi ediwak ini udia ama esikụre ọkpọn̄ nnyịn. Mme owo ẹkebiet ọkpọ ayan̄, ndien idem ama esimem ndusụk owo tutu mmọ ẹduọn̄ọ ke efak. N̄kpri n̄kpọ emi ẹsidade ẹdu uwem ama ọsọn̄ urua tutu idịghe aba se ẹkemede ndidep. Ke akpatre, okụk nnyịn ikọwọrọke n̄kpọ aba. Okụk oro n̄kesịnde ke ban̄k, okụk insurance, ye okụk oro ukara ẹkenịmde ẹnọ mi—kpukpru akatatak.”

Paul

Paul ama ọdiọn̄ọ ke ana imọ ida “ata ọniọn̄” inam n̄kpọ mbak ubon imọ ẹdikpa biọn̄. (Mme N̄ke 3:21) Enye ọdọhọ ete: “Utom mi ekesidi ndisịn ikan̄ ilektrik ke ufọk, edi mma nnyịme ndinam utom ekededi oro n̄kụtde, idem ọkpọkọm owo ikpehe mi ọfọn. Ndusụk mbon oro mîkesinyeneke okụk ikpe mi ẹkesinọ mi udia m̀mê mme n̄kpọ eken. Edieke ẹnọde mi esan̄ ọsuọp inan̄, mma nsida iba nnyọn̄ ufọk nnyụn̄ nnyam iba eken. Nte ini akakade, mma nnyene nditọ unen 40. Ke ini mmọ ẹma ẹkekponi, mma nnyam mmọ ndep nditọ unen 300. Ekem, mma nda unen 50 n̄kpụhọ mbọ ekpat udia ibokpot iba. Udia emi ke ubon mi ye mme ubon en̄wen ẹkedia ke anyan ini.”

Paul ama ọdiọn̄ọ n̄ko ke idụhe se ifọnde nte owo ndibuọt idem ke Abasi. Ke ini inamde se Abasi ọdọhọde, enye esin̄wam nnyịn. Kop se Jesus eketịn̄de mi aban̄a ndinyene se idade idu uwem: “Ẹtre nditịmede esịt; koro . . . Ete mbufo ọfiọk ke mbufo ẹmeyom mme n̄kpọ emi.”—Luke 12:29-31.

Akwa asua Abasi, Satan, anam ata ediwak owo ke ererimbot emi ẹsịn ofụri esịt ye ekikere mmọ ke inyene. Mme owo ẹsitịmede esịt ẹban̄a nte mmimọ ikpenyenede emi ye oko ẹnyụn̄ ẹsịn ibuot ẹsịn itọn̄ ẹyom mme n̄kpọ emi mînen̄ekede idi akpan n̄kpọ. Ediwak owo ẹsikam ẹka ebuọt, ẹfre ke “andibọ ebuọt . . . edi ofụn andinọ ebuọt.”—Mme N̄ke 22:7.

 Ndusụk owo ẹsinam n̄kpọ emi edisịnde mmọ ke fehesan̄. Paul ọdọhọ ete: “Ediwak mbọhọidụn̄ mi ẹma ẹkpọn̄ ubon ye mme ufan mmọ ẹka ndin̄wana okụk ke idụt en̄wen. Ndusụk mmọ ikenyeneke n̄wedisan̄, ntre mmọ ikekemeke ndinyene utom. Mme bodisi ẹkesisasan̄a ẹyom mmọ, mmọ ẹkesinyụn̄ ẹna ke efak ndusụk ini. Mmọ ikenyeneke ime ibet Abasi an̄wam mmọ. Edi kpukpru nnyịn ke ubon ima ibiere ndika iso ndụn̄ ke obio nnyịn kpa ye oro okụk akananade do, ndien Abasi ama an̄wam nnyịn.”

NDINAM ITEM JESUS

Paul aka iso ete: “Jesus ọkọdọhọ ete: ‘Ẹkûtịmede esịt ẹban̄a n̄kpọn̄, koro n̄kpọn̄ eyenyene editịmede esịt esie. Afanikọn̄ usen ekem ye usen.’ Ntre n̄kesidọhọ Abasi kpukpru usen nte ‘ọnọ nnyịn udia eke ekemde nnyịn ke usen mfịn.’ Ndien enye ama ọbọrọ akam mi, kpa nte Jesus ọkọn̄wọn̄ọde. Idịghe kpukpru ini ke ikesinyene se imade. Isan̄ kiet, mmeti nte n̄kadade ke udịm nyom nditiene ndep udia, edi n̄kọdiọn̄ọke m̀mê nso utọ udia ke ẹnyam. Ke ini n̄kesịmde iso, mma n̄kụt ke edi yogurt. Mmaha yogurt. Edi yogurt edi kpa udia, ntre yogurt ke ikadia okoneyo oro. Mmọkọm Abasi etieti sia ubon mi ikanaha biọn̄ ndomo usen kiet ke ofụri ini oro n̄kpọ ọkọsọn̄de do ke obio nnyịn.” *

Abasi ọn̄wọn̄ọ ete: “Ndidehedei n̄kpọn̄ fi, ndinyụn̄ nsịnke fi.”—Mme Hebrew 13:5

“N̄kpọ inen̄ekede isọn̄ ye nnyịn idahaemi. Edi se nnyịn ikpepde ito ofụri se ikọwọrọde nnyịn edi ndibuọt idem ye Abasi. Se isinamde owo okûtịmede esịt edi oro. Jehovah * iditreke ndin̄wam nnyịn edieke nnyịn ikade iso inam uduak esie. Imokụt ke ikọ Psalm 34:8 edi ata ofụri akpanikọ: ‘Mbufo ẹtabi ẹnyụn̄ ẹse nte Jehovah ọfọnde; owo emi enyenede enye nte ebiet ubọhọ okop inemesịt.’ Edieke n̄kpọ afiakde ọsọn̄, idem idinyekke nnyịn.

God helps faithful ones to find their “bread for this day”

“Imedikụt idahaemi ke se nnyịn mme owo iyomde man idu uwem edi udia, idịghe utom m̀mê okụk. Nnyịn itetie ibet ini emi Abasi edisude un̄wọn̄ọ esie emi: ‘Uwak n̄kpasịp ẹyedu ke isọn̄.’ Kan̄a ke emi, edieke ‘inyenede se idiade ye se isịnede ye itie udakibuot, nnyịn iyoyụhọ ye mme n̄kpọ emi.’ Ikọ Bible emi ọsọn̄ọ nnyịn idem: ‘Ẹkûyak usụn̄ uwem mbufo asan̄a ye ima okụk, edi ẹyụhọ ye se mbufo ẹnyenede. Koro enye ọdọhọde ete: “Ndidehedei n̄kpọn̄ fi, ndinyụn̄ nsịnke fi.” Ntre nnyịn imekeme ndinen̄ede nnyene uko ndọhọ nte: “Jehovah edi andin̄wam mi; ndifeheke ndịk.”’” *

Owo emi mînyeneke ata mbuọtidem ikemeke ‘ndisan̄a ye Abasi’ nte Paul ye ubon esie ẹsan̄ade. (Genesis 6:9) Edide okụk anana nnyịn idahaemi m̀mê ayanana ke ini iso, imekeme ndikpep ediwak n̄kpọ nto nte Paul ọkọbuọtde idem ye Abasi okonyụn̄ anamde n̄kpọ ye ọniọn̄.

Edi nso ke ikpanam edieke ediwak mfịna ke ubon nnyịn anamde esịt etịmede nnyịn?

Kpep N̄kpọ En̄wen

ẸDEMEDE!

N̄kpọ Ita Emi Owo Mîkemeke Ndidep

Ama enyene okụk, emekeme ndidep se ededi oro oyomde, edi odu n̄kpọ emi owo mîkemeke ndidep.