Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JULY 2015

 IBUOTIKỌ MAGAZINE EMI | SE AKPANAMDE KE INI ESỊT ETỊMEREDE FI

Esịt Etịmede Ata Ediwak Owo

Esịt Etịmede Ata Ediwak Owo

“N̄kaka ndidep udia, edi n̄kukụre se n̄kokụtde ekedi inịn̄e inịn̄e uyo emi ọsọn̄de urua utịm ike-10,000 akan nte ekesidide! Eyo etisiere, udia ikodụhe aba ke kpukpru ufọkurua.”—Paul, Zimbabwe.

“Ebe mi ama okot mi etem ọdọhọ ke imọ imọn̄ ikpọn̄ nnyịn. Mma n̄kere m̀mê nso iwọrọ mi ntem, m̀mê nditọ mi ẹdinyụn̄ ẹnam didie.”—Janet, United States.

“Ke ini n̄kokopde uyom emi owụtde ke n̄kpọ ọmọn̄ etịbe, mma mfehe n̄koyom ebiet ndịbe. N̄kana ke isọn̄ ke ini rọket obomode asuana. Ubọk okosụk enyenyek mi ediwak hour ke oro ebede.”—Alona, Israel.

Nnyịn idu uwem ke “ndiọkeyo emi ọsọn̄de ndiyọ.” (2 Timothy 3:1) Ntre, ediwak owo ẹtịmede esịt ke ntak nsọn̄ọn̄kpọ, mfịna ubon, ekọn̄, idiọk udọn̄ọ, ye nsio nsio afanikọn̄, edide oto-obot m̀mê enye emi mme owo ẹdide ntak. Ediwak n̄kpọ en̄wen ẹtịmede mme owo esịt, utọ nte owo ndikere m̀mê ekpri mbufụt emi ofụtde imọ akam edi kansa, mîdịghe m̀mê ererimbot eyedi se nditọ nditọ imọ ẹdụn̄de.

Idịghe kpukpru editịmede esịt ọdiọk. Ke uwụtn̄kpọ, esịt esitịmede nnyịn esisịt mbemiso itiede udomo, inamde edinam, m̀mê ibọrọde mbụme oro ẹbụpde nnyịn man ẹda nnyịn ke utom. Ndịk esinyụn̄ anam owo ke ini enye okụtde n̄kpọ emi ekemede ndisịn enye ke mfịna. Utọ ndịk emi idiọkke sia esinam owo efehe ọbọhọ mfịna. Edi ọkpọsọn̄ ndịk m̀mê nditịmede esịt mbe ubọk ifọnke ye owo. Ndụn̄ọde oro ẹkenamde ndondo emi ye ikpọ owo 68,000 owụt ke ọkpọkọm owo etịmede esịt esisịt, ke emi ekeme nditiene nnam enye ọsọp akpa edieke emi esitịbede ke ubọk ke ubọk. Omokụt ndien ntak emi Jesus okobụpde ete: “Anie ke otu mbufo ekeme ndidian cubit kiet ke isua uwem esie ke ntak emi enye okopde editịmede esịt?” Ekem enye ama adian do ete: “Ẹtre nditịmede esịt.” (Matthew 6:25, 27) Ikeme didie ndinam emi?

Ana ida ọniọn̄ idu uwem, inen̄ede ibuọt idem ye Abasi, inyụn̄ idori enyịn ke Abasi ayanam n̄kpọ ọfọn ke ini iso. Idem ọkpọkọm n̄kpọ idiọkke ye nnyịn idahaemi, n̄kpọ ekeme nditọ ntịmede n̄kpọn̄. Ntre, ẹyak ise nte ndinam mme n̄kpọ emi an̄wamde Paul, Janet, ye Alona ẹkûnen̄ede ẹtịmede esịt.