Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  June 2015

Anie Edi Andibiọn̄ọ Christ?

Anie Edi Andibiọn̄ọ Christ?

Enyene fim emi ẹkotde Antichrist (Andibiọn̄ọ Christ).

N̄ka ikwọ kiet emi ediwak owo ẹdiọn̄ọde ẹma ẹsio kaset ye CD ikwọ emi ẹkotde Antichrist Superstar.

Friedrich Nietzsche, owo akwaifiọk emi okodude n̄kpọ nte isua 200 emi ẹkebede, okokot kiet ke otu n̄wed emi enye ekewetde The Antichrist.

Ndidem ye mbọn̄ emi ẹkedude ke ntọn̄ọ ntọn̄ọ eyo ntatenyịn ẹkesikot mme asua mmọ mme andibiọn̄ọ Christ.

Martin Luther, eyen Germany emi ekedide etubom mbon oro ẹkeyomde ẹkpụhọde se ẹkpepde ke Ufọkabasi Catholic, ọkọdọhọ ke mme pope ẹdi mme andibiọn̄ọ Christ.

SIA edide ẹda ikọ oro “andibiọn̄ọ Christ” ẹkot owo ẹnyụn̄ ẹkot nsio nsio n̄kpọ, utọ nte fim ye ikwọ, ọfọn ndibụp mbụme emi: Anie edi andibiọn̄ọ Christ? Ndi ikọ emi ebehe nnyịn mfịn? Ikọ emi “andibiọn̄ọ Christ” odu utịm ikotion ke Bible, ntre Bible edi ata nnennen itie emi ikpakade ikese m̀mê anie edi andibiọn̄ọ Christ.

ẸYARADE ENYE EMI EDIDE ANDIBIỌN̄Ọ CHRIST

Ke otu kpukpru mme andiwet Bible, apostle John kpọt ewet ikọ emi “andibiọn̄ọ Christ.” Nso ke enye eketịn̄ aban̄a andibiọn̄ọ Christ? Se se enye ekewetde mi ke akpa leta esie: “N̄kpri nditọ, akpatre ini edi emi, ndien kpa nte mbufo ẹkekopde ẹte andibiọn̄ọ Christ ke edi, ediwak mme andibiọn̄ọ Christ ẹkam ẹdodu ke emi; emi ke nnyịn ida ifiọk ite akpatre ini edi emi. Mmọ ẹketo ke otu nnyịn ẹwọn̄ọ, edi mmọ ikedịghe eke nnyịn . . . Anie edi osu nsu ke mîdịghe owo emi ọdọhọde ete ke Jesus idịghe Christ? Owo emi edi andibiọn̄ọ Christ, kpa owo emi akan̄de Ete ye Eyen.”—1 John 2:18, 19, 22.

John ama ọdiọn̄ọ ke andibiọn̄ọ Christ ẹdi kpukpru mbon oro ẹkoide-koi ẹkpep mme owo nsu ẹban̄a Jesus Christ ye se enye ekekpepde

Nso ke ikọ itien̄wed emi ekpep nnyịn? John ama etịn̄ aban̄a “ediwak mme andibiọn̄ọ Christ,” ndien emi owụt ke andibiọn̄ọ Christ idịghe owo kiet, edi ke edi otu owo. Mme owo ye esop emi Bible okotde “andibiọn̄ọ Christ” ẹsikpep mme owo nsu, ẹdọhọ ke Jesus idịghe Christ, m̀mê Messiah, inyụn̄ iyakke mme owo ẹdiọn̄ọ se Abasi ye Jesus Christ Eyen esie ẹdide. Mbon emi Bible okotde “andibiọn̄ọ Christ” ẹsidọhọ ke mmimọ idi Christ mîdịghe ke ida ke ibuot esie, edi mmọ ikpepke aba se isịnede ke Bible sia “mmọ [ẹketode] ke otu nnyịn ẹwọn̄ọ.” N̄ko, mme andibiọn̄ọ Christ ẹma ẹdodu ke ini John ekewetde akpatre leta esie, ke “akpatre ini,” eyedi ke utịt utịt ini emi mme apostle ẹkedude uwem.

Nso en̄wen ke John eketịn̄ aban̄a andibiọn̄ọ Christ? Ke ini enye etịn̄de aban̄a mme prọfet nsu, enye ọkọdọhọ ete: “Ikọ odudu spirit ekededi eke enyịmede ete Jesus Christ ama edi ke obụkidem oto Abasi, edi kpukpru ikọ odudu spirit eke mînyịmeke Jesus itoho Abasi. N̄ko-n̄ko, emi edi ikọ odudu spirit eke otode andibiọn̄ọ Christ emi mbufo ẹkekopde ke eyedi, ndien idahaemi enye ododu ke ererimbot.” (1 John 4:2, 3) Ekem, ke udiana leta esie, enye ama afiak etịn̄ ete: “Ediwak mbon abian̄a ẹmewọn̄ọ ẹdụk ererimbot, kpa mmọ emi mînyịmeke ite ke Jesus Christ ama edi ke obụkidem. Owo emi anamde emi edi andibian̄a ye andibiọn̄ọ Christ.” (2 John 7) Omokụt do ke John ama ọdiọn̄ọ ke andibiọn̄ọ Christ ẹdi kpukpru mbon oro ẹkoide-koi ẹkpep mme owo nsu ẹban̄a Jesus Christ ye se enye ekekpepde.

 “MME PRỌFET NSU” YE “OWO EMI EDIDE ABIATIBET”

Jesus ọkọdọhọ ikpeme idem ye mme prọfet nsu emi ẹfọrọde ikpa erọn̄, edi emi ẹdide ndiọi wolf

Anyan ini mbemiso John ewetde aban̄a utọ mbon abian̄a emi, Jesus Christ ama eteteme mme mbet esie ete: “Ẹkpeme idem ye mme prọfet nsu emi ẹfọrọde ikpa erọn̄ ẹdi ke ọtọ mbufo, edi emi ẹdide ndiọi wolf ke esịt esịt.” (Matthew 7:15) Apostle Paul n̄ko ama odụri mme Christian ke Thessalonica utọn̄ ete: “Ẹkûyak owo ndomokiet abian̄a mbufo ke baba usụn̄ kiet, koro enye [usen Jehovah] ididịghe ibọhọke mfiakedem ebem iso edi ndien ẹyarade owo emi edide abiatibet, kpa eyen nsobo.”—2 Thessalonica 2:3.

Ntre, ke eyo mme apostle, mme prọfet nsu ye mbon mfiakedem ẹma ẹtọtọn̄ọ ndibian̄a mme owo man ẹsuan esop mme Christian. Kpukpru mbon oro ẹkekpepde mme owo nsu ẹban̄a Jesus Christ ye se enye ekekpepde ke John okokot “andibiọn̄ọ Christ.” Paul ndikot mmọ “eyen nsobo” anam ifiọk nte Jehovah esede mmọ.

ẸKPEME IDEM YE ANDIBIỌN̄Ọ CHRIST MFỊN

Nso kaban̄a mfịn? Mme owo ye esop emi ẹdide andibiọn̄ọ Christ ẹsụk ẹsasua Christ ye ukpepn̄kpọ esie. Mmọ ẹkokoi ẹkpep mme owo nsu man mme owo ẹkûdiọn̄ọ ke Jehovah Abasi edi Ete, ndien Jesus Christ edi Eyen esie. Ntak edi oro anade ikpeme idem ye ediwak nsu emi ẹkpepde ke ufọkabasi. Ẹyak ise iba ke otu emi.

Ke ata ediwak isua, mme ufọkabasi ẹkpep mme owo ukpepn̄kpọ Abasi-Ita-ke-Kiet, ẹdọhọ ke Ete ye Eyen ẹdi owo kiet. Ntem, mmọ ẹtịmede mme owo inyụn̄ iyakke mmọ ẹdiọn̄ọ Jehovah Abasi ye Jesus Christ. Utọ ukpepn̄kpọ emi iyakke mbon eti esịt ẹkpebe Jesus Christ ẹnyụn̄ ẹsan̄a ẹkpere Abasi nte Bible ọdọhọde.—1 Corinth 11:1; James 4:8.

Mme ufọkabasi ẹdọdiọn̄ ẹtịmede mme owo sia mmọ ẹdọhọde ẹkama Bible emi ẹsion̄ode enyịn̄ Abasi, Jehovah, ẹfep. Mmọ ẹsọn̄ esịt ẹnam emi kpa ye oro mmọ ẹdiọn̄ọde ke enyịn̄ Abasi ama odu n̄kpọ nte itie 7,000 ke ata akpa Bible oro ẹkewetde. Emi anam mme owo ẹkûdiọn̄ọ utọ owo emi Abasi edide.

Edi, ndifiọk enyịn̄ Abasi, Jehovah, anam ediwak mbon oro ẹnyenede eti esịt ẹsan̄a ẹkpere Abasi. Se iketịbede inọ Richard edi emi. Enye ọdọhọ ke Mme Ntiense Jehovah ẹma ẹda Bible ẹwụt imọ ke ata Abasi ekere Jehovah. Enye adian do ete: “N̄kọdiọn̄ọke ke Abasi enyene enyịn̄, ntre ama enem mi tutu ndifiọk enyịn̄ Abasi.” Tọn̄ọ ini oro ke enye okokpụhọde man odu uwem nte Bible etemede onyụn̄ enem Jehovah esịt. Enye ọdọhọ ete: “Ndidiọn̄ọ enyịn̄ Abasi anam nsan̄a n̄kpere enye.”

Ke ata ediwak isua idahaemi, mme andibiọn̄ọ Christ iyakke ata ediwak owo ẹfiọk Abasi. Edi ndikpep Bible anam ifiọk enye emi edide andibiọn̄ọ Christ ye se ikpanamde mbak enye edibian̄a nnyịn.—John 17:17.

Kpep N̄kpọ En̄wen

MME MBỤME BIBLE ORO ẸBỌRỌDE

Ndi Bible Ekpep ke Abasi Edi Ita-ke-Kiet?

Ediwak ido ukpono ẹdọhọ ke Abasi edi ita-ke-kiet. Ndi se Bible ekpepde edi oro?

ETI MBỤK EMI OTODE ABASI!

Abasi Ekere Didie?

Bible ọdọhọ ke Abasi edi Ata Ọkpọsọn̄ m̀mê Abasi Ibom, Andibot, ye Ọbọn̄. Edi ata enyịn̄ esie odu ke Bible ebe utịm ike-7,000.