Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME MAY 2015

 IBUOTIKỌ MAGAZINE EMI

Ndi Utịt Ekpere?

Ndi Utịt Ekpere?

Ndi Abasi ayayak mme owo ẹka iso ẹkara kiet eken ẹnyụn̄ ẹbiat isọn̄ emi? Ihih. Nte ima ikokụt, Abasi ayanam n̄kpọ man ofụri ufen oro mme owo ẹbọde etre. Abasi emi okobotde owo ye isọn̄ emi idụn̄de mi oyom fi ọfiọk ke ini emi imọ idinamde emi ekpere. Didie ke enye anam ifiọk akpan n̄kpọ emi?

Kere ban̄a uwụtn̄kpọ emi ise: Edieke okpoyomde ndika ebiet emi mûdiọn̄ọke, ekeme ndidi okpobụp owo emi ọdiọn̄ọde ebiet oro nte edisan̄ade ikesịm do. Owo oro eyeteme fi usụn̄ onyụn̄ etịn̄ mme n̄kpọ emi edikụtde mbemiso esịmde ebiet emi akade. Ke ini okụtde mme n̄kpọ oro enye ọkọdọhọde ke oyokụt, esịt eyenem fi sia ọmọdiọn̄ọ ke imọn̄ isesịm ebiet oro ikade. Kpasụk ntre, Abasi ọnọ nnyịn Bible, ndien Bible ama etetịn̄ nte n̄kpọ editiede ke ererimbot. Nte nnyịn ikụtde mme n̄kpọ oro Bible eketịn̄de do, nnyịn imenịm ke idu uwem ke utịt ini.

Bible ama etetịn̄ ke ini eyedi emi ererimbot edidiọkde akan nte akanam edide, ndien ke emi ediwụt ke utịt ekpere. Nte n̄kpọ editiede ke ofụri ererimbot ye nte mme owo ẹdidude uwem ayanam ini emi okpụhọde ye ini efen ekededi ke mbụk ubonowo. Ẹyak ineme ndusụk n̄kpọ oro Bible ọkọdọhọde ke ẹyetịbe.

1. IKPỌ MFỊNA KE OFỤRI ERERIMBOT Prọfesi oro odude ke Matthew ibuot 24 ama asiak nsio nsio n̄kpọ emi ẹditịbede ke isọn̄ emi onyụn̄ ọdọhọ ke mme n̄kpọ emi ẹdidi idiọn̄ọ “akpatre ini editịm n̄kpọ emi,” emi edidade esịm utịt. (Ufan̄ikọ 3, 14) Ekọn̄, akan̄, unyekisọn̄ ke nsio nsio ebiet, ubiatibet nditọt, unana ima, ye mme etubom ufọkabasi ndibian̄a ikọt mmọ, ẹsịne ke otu mme n̄kpọ oro Jesus ọkọdọhọde ke ẹyetịbe. (Ufan̄ikọ 6-26) Imọfiọk ke ẹkeme ndidọhọ ke mme n̄kpọ emi ẹma ẹsitetịbe. Edi Bible ọkọdọhọ ke nte utịt ekperede, ke kpukpru mmọ ẹditịbe ke ukem ini. Mme n̄kpọ emi ẹditịbe ke ini idiọn̄ọ ita oro ẹtienede mi ẹditịbede n̄ko.

2. NTE MME OWO ẸDUDE UWEM Bible ọkọdọhọ ke edu uwem mme owo edidọdiọn̄ idiọk ke “mme akpatre usen” emi ẹdidade ẹsịm utịt. Enye ọdọhọ ete: “Mme owo ẹyedi mme ama idem, mme ama okụk, ẹkohode idem, ẹseri iseri, ẹsụn̄i isụn̄i, ẹsọn̄ ibuot ye ete ye eka, ẹnana esịtekọm, inyeneke nsọn̄ọnda, inyeneke ndammana ima, inyịmeke ndidụk ediomi ekededi, mbon edidọk, ẹnana mfara ke idem, ẹtie obom obom, imaha eti ido, mme andida owo nnọ, ẹsọn̄ ibuot, ẹkohode idem, ẹma unọ idem inemesịt utu ke ndima Abasi.” (2 Timothy 3:1-4) Imọdiọn̄ọ ke mme owo ikponoke ekemmọ owo; idịghe mfịn ke emi ọkọtọn̄ọ. Edi emi ekenyene ndisọn̄ ubọk ke “mme akpatre usen” tutu Bible ọdọhọ ke ini oro edidi “ndiọkeyo emi ọsọn̄de ndiyọ.” Ndi omokụt nte mme owo ẹtiede ntem mfịn?

3. KE ẸBIAT ISỌN̄ EMI Bible ọdọhọ ke Abasi ‘oyosobo mbon oro ẹbiatde isọn̄.’ (Ediyarade 11:18) Didie ke mme owo ẹbiat isọn̄? Kop se Bible eketịn̄de mi aban̄a eyo Noah: “Isọn̄ abiara ke enyịn ata Abasi, afai onyụn̄ ọyọhọ ke isọn̄. Ntre Abasi ese isọn̄, ndien sese! enye amabiara.” Ndien Abasi ama ọdọhọ ke imọ imọn̄ isobo mme idiọkowo. (Genesis 6:11-13) Ndi omokụt ke afai ọyọyọhọ isọn̄ emi? N̄ko, idahaemi mme owo ẹkeme ndibiat isọn̄ emi tutu edi se owo mîkemeke ndidụn̄ aba. Mmọ ẹnyene n̄kpọekọn̄ emi ẹkemede ndida nsobo kpukpru owo ke isọn̄ emi mfep. Edi enyene usụn̄ en̄wen emi mme owo ẹbiatde isọn̄. Mme n̄kpọ emi ẹnamde owo, unam, ye eto ẹka iso edu uwem, utọ nte ofụm ye mmọn̄, ẹtọn̄ọ ndibiara ke ntak idiọk usụn̄ oro mme owo ẹnamde n̄kpọ ke isọn̄ emi Abasi ọkọnọde nnyịn mi.

 Kere ise, ‘Ke isua 100 emi ẹkebede, ndi mme owo ẹma ẹnyene n̄kpọ emi ẹkemede ndida nsobo ofụri ererimbot?’ Edi idahaemi mmọ ẹnyene ikpọ n̄kpọekọn̄, ke ẹnyụn̄ ẹbiat isọn̄ nnyịn emi. Etie nte mbufa n̄kpọ emi ntaifiọk ẹsion̄ode ẹdi awak tutu owo ikemeke aba ndifiọk ofụri se ẹsidade mmọ ẹnam. Edi Abasi idiyakke mme owo ẹnam se mmọ ẹmama ke isọn̄ emi. Enye idiyakke ẹbiat isọn̄ emi ofụri ofụri. Enye oyosobo mbon oro ẹbiatde isọn̄. Se enye ọn̄wọn̄ọde edi emi.

4. KE ẸKWỌRỌ IKỌ KE OFỤRI ERERIMBOT N̄kpọ en̄wen oro esịnede ke idiọn̄ọ utịt ini emi Jesus ọkọnọde edi ndikwọrọ ikọ ke usụn̄ oro akanam owo mîkwọrọke. Enye ọkọdọhọ ete: “Ẹyenyụn̄ ẹkwọrọ eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” (Matthew 24:14) Ukwọrọikọ oro ẹtịn̄de ẹban̄a mi enen̄ede okpụhọde ye nte mme ufọkabasi ẹsikwọrọde ikọ ke ediwak isua emi ẹbede. Bible ọkọdọhọ ke ẹdikwọrọ “eti mbụk obio ubọn̄” Abasi ke mme akpatre usen. Ndi ọmọdiọn̄ọ ufọkabasi ekededi emi ẹsikwọrọde Obio Ubọn̄ Abasi? Idem ọkpọkọm omokụt mbon emi etiede nte ẹsikwọrọ etop emi, ndi mmọ ẹdu ke obio mbufo kpọt, mîdịghe ndi mmọ ẹkwọrọ eti mbụk emi ke “ke ofụri isọn̄ nte ntiense ẹnọ kpukpru mme idụt”?

Ke ẹkwọrọ Obio Ubọn̄ Abasi ke ofụri ererimbot ke ata ediwak usem

Se ẹdọn̄de ke ikpehe Intanet emi www.jw.org aban̄a “eti mbụk obio ubọn̄.” Ẹdọn̄ mme n̄wed ebe usem 700 ke ikpehe Intanet emi. Ndi ọmọdiọn̄ọ n̄kpọ en̄wen emi mme owo ẹnamde emi anamde mme owo ke ofụri ererimbot ẹkop eti mbụk Obio Ubọn̄ Abasi? Idem mbemiso ẹkesiode Intanet ẹdi, ẹma ẹdọdiọn̄ọ Mme Ntiense Jehovah nte mbon emi ẹsikwọrọde eti mbụk Obio Ubọn̄ Abasi ke kpukpru ebiet. Ọtọn̄ọde ke 1939, ẹwet mme ikọ emi “Ọnọ Ntọt Obio Ubọn̄ Jehovah” ke edem kpukpru Enyọn̄-Ukpeme emi ẹsiode. N̄wed kiet emi aban̄ade ufọkabasi ye ido ukpono ọdọhọ ke idụhe mbon emi ẹsịnde idem ẹkwọrọ ikọ ke ofụri ererimbot nte Mme Ntiense Jehovah. Eti mbụk emi mmọ ẹsikwọrọde edi ke Obio Ubọn̄ Abasi ọmọn̄ adada utịt edi.

ATA AKPAN INI KE MBỤK UBONOWO

Imeneme n̄kpọ inan̄ emi Bible ọkọdọhọde ke mmọ ke ẹdida ẹfiọk ke utịt ekpere. Ndi amada enyịn fo okụt mmọ kiet kiet? Ke se ibede isua 100 idahaemi, magazine emi ke anam mme owo  ẹfiọk se ikade iso ke ererimbot man mmọ ẹkụt ke utịt ekpere. Edi ndusụk owo isụk inịmke ke utịt ekpere. Mmọ ẹdọhọ ke n̄kpọ idiọkke ke ererimbot emi nte mme owo ẹdọhọde. Mmọ ẹdọhọ ke mme owo ndikeme nditie ke ebiet ekededi ke ererimbot n̄kụt nnyụn̄ n̄kop se ikade iso ke nsio nsio ebiet anam etie nte ererimbot emi ọdiọk idahaemi akan nte ekesidide. Edi ediwak n̄kpọ ẹwụt ke akananam n̄kpọ itiehe ntem ke ererimbot.

Ndusụk mme anam-ndụn̄ọde ẹdọhọ ke n̄kpọ ọmọn̄ etịbe emi edikpụhọrede kpukpru n̄kpọ ke isọn̄ emi. Ke uwụtn̄kpọ, ke 2014, ntaifiọk ẹkedọhọ ke enyene mme n̄kpọ emi ẹkemede ndinam owo okûdụn̄ aba ke isọn̄ emi. Mmọ ẹkedọhọ ẹte: ‘Ke ima iketịm idụn̄ọde mme n̄kpọ emi, imokụt ke se ntaifiọk ẹsion̄ode ẹdi ẹkeme ndisobo ubonowo edieke nnyịn mîkpemeke.’ Ediwak owo ẹnen̄ede ẹnịm ke nnyịn idu ke ata akpan ini ke mbụk ubonowo. Mme andisio magazine emi ye ediwak mbon oro ẹsikotde enye ẹnịm ke ofụri esịt ẹte ke nnyịn idu uwem ke mme akpatre usen ye nte ke utịt ekpere. Edi kûyak se iditịbede anam fi ndịk; kam nenem esịt. Ntak idọhọde ntre? Sia afo emekeme ndibọhọ.