Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  April 2015

 BIBLE OKPỤHỌDE MME OWO

Mbụme Ita Okokpụhọde Uwem Mi

Mbụme Ita Okokpụhọde Uwem Mi
  • ISUA AKAMANADE: 1949

  • EBIET OTODE: UNITED STATES

  • SE ENYE OKOYOMDE: OKOYOM NDIFIỌK SE AKPADADE UWEM ESIE ANAM

NTE UWEM MI EKETIEDE:

N̄kokpon ke Ancram, ekpri obio kiet ke New York ke United States. Ediwak owo do ẹkesibọk ufene man ẹnyene mmọn̄eba. Enan̄ ama esiwak akan owo ke obio oro.

Ufọkabasi kiet kpọt okodu ke ofụri obio oro, enye ke kpukpru nnyịn ikesinyụn̄ ika. Ke usenubọk Sunday, ete ete mi ama esisọk ikpatukot ọnọ mi, ndien mma nsimen ekpri afia Bible emi eka ete mi ọkọnọde mi ndaha ederi nditọwọn̄ (Sunday school). Ẹma ẹkpep mi ye nditọeka mi ndisisịn idem nnam utom, ndisikpono owo, ndisin̄wam owo, ndisinyụn̄ n̄kọm Abasi ke se enye anamde ọnọ nnyịn.

Ke mma n̄kokpon owo, mma n̄kpọn̄ ufọk n̄kanam utom nte andikpep ke ufọkn̄wed. Enyene ediwak n̄kpọ emi akafịnade mi aban̄a Abasi ye uwem emi idude mi. Ndusụk nditọwọn̄ oro n̄kesikpepde n̄kpọ ẹma ẹnen̄ede ẹdiọn̄ọ n̄wed, mbon eken ikọdiọn̄ọke, edi ẹma ẹsisịn idem ẹnam utom. Ndusụk mmọ ẹma ẹbiomo ndo, mbon eken ikenyeneke mfịna ndomokiet. N̄kpọ emi ama esifịna mi, ndien mma nsikere ke se Abasi anamde emi ifọnke. Ndusụk ini, mme ete ye eka nditọ oro ẹbiomode ndo ẹma ẹsidọhọ ẹte: “Nte Abasi onyụn̄ oyomde eyen mi etie edi oro.” Mma nsikere ntak emi Abasi akpayakde ndusụk nditọwọn̄ ẹbọ ufen ntem ke ini edide mmọ inamke idiọkn̄kpọ ndomokiet.

Mma nsinyụn̄ n̄kere m̀mê nso ke n̄kpenen̄ede nda uwem mi nnam sia n̄kedịghe aba eyenọwọn̄. Ẹkebọk mi ke ata eti ufọk, mma n̄ka eti ufọkn̄wed, nnyụn̄ nnam utom emi mmade. Edi n̄kosụk mfiọkke se n̄kpadade isua ifan̄ emi osụhọde ke uwem mi nnam. Mma mfiọk ke mmekeme ndidọ ebe, nnyene eti ufọk ye nditọ, nnyụn̄ n̄ka iso nnam utom tutu n̄kpọn̄ utom, ndien nte ini akade ẹmen mi ẹka itie emi ẹsisede ẹban̄a mbonusọn̄. Mma n̄kere m̀mê n̄kukụre se idude ke uwem edi emi.

NTE BIBLE OKOKPỤHỌREDE UWEM MI:

Isan̄ kiet ke ini ndaeyo, ami ye mme andikpep ifan̄ ima ika ikese nsio nsio itie ke Europe. Ima ika ikpọ ufọkabasi nte Westminster Abbey, Notre-Dame de Paris, ye Vatican, inyụn̄ ika n̄kpri  ufọkabasi eken. Mma mbụp mme mbụme oro akafịnade mi ke kpukpru itie oro ikakade. Ke ima ikafiak inyọn̄ Sloatsburg ke New York, mma n̄ka nsio nsio ufọkabasi. Edi idụhe ufọkabasi ndomokiet emi ekenen̄erede ọbọrọ mbụme mi.

Usen kiet, eyen ufọkn̄wed mi emi edide isua 12 ama edibụp mi mbụme ita. Akpa, eyenan̄wan emi ama obụp mi m̀mê mmọdiọn̄ọ ke imọ idi Ntiense Jehovah. Mma ndọhọ ke mmọdiọn̄ọ. Ọyọhọ iba, enye ama obụp m̀mê n̄kpama ndifiọk n̄kpọ mban̄a Mme Ntiense Jehovah. Mma ndọhọ ke n̄kpama. Ọyọhọ ita, enye ama obụp mi ebiet emi ndụn̄de. Ke ini n̄kasiakde ebiet oro ndụn̄de, ima idikụt ke imodụn̄ ikpere. N̄kọfiọkke ke mbụme oro ekpri eyen emi obụpde mi mi oyokpụhọde uwem mi ke nsinsi.

Ikebịghike, enye ama awat enan̄ukwak esie edi ufọk mi onyụn̄ editọn̄ọ ndikpep mi Bible. Mma mbụp enye mme mbụme oro ikpọ owo ke nsio nsio ufọkabasi mîkekemeke ndibọrọ mi. Enye ama owụt mi kpukpru ibọrọ mbụme emi ke Bible mi. N̄kọdiọn̄ọke ke ibọrọ mbụme emi esịne ke Bible!

Se n̄kekpepde ke Bible ama enen̄ede enem mi. Ama akpa mi idem ndifiọk ke 1 John 5:19 ọdọhọ ke “ofụri ererimbot esịne ke idak odudu andidiọk.” Mma ndikụt ke idịghe Abasi anam ibọ ofụri ufen emi ibọde mi, ke Satan anam, ndien ke Abasi oyosio kpukpru mfịna emi efep. (Ediyarade 21:3, 4) Mma ndikụt ke Bible enen̄ede esịne ifiọk edieke ẹnamde enye an̄wan̄a owo. Okposụkedi emi owo emi ekekpepde mi n̄kpọ ekedide isua 12, mma n̄kụt ke akpanikọ osụk edi akpanikọ, inamke n̄kpọ m̀mê anie itịn̄.

Mma nyom ndifiọk m̀mê Mme Ntiense ẹsinam se mmọ ẹkwọrọde. Ke uwụtn̄kpọ, ekpri eyenan̄wan oro ọkọdọhọ ke ata mme Christian ẹsinyene nti edu, utọ nte anyanime ye mfọnido. (Galatia 5:22, 23) Mma nyom ndidomo enye nse m̀mê enye enyene mme edu emi. Ntre, mma n̄kokoi nnyọn̄ utom ke idiọk ini ke usen oro isikpepde n̄kpọ. N̄koyom ndise m̀mê enye eyenyene ime etie ebet mi. Ndien edieke enye ebetde, m̀mê enye ayayat esịt nte nnyọn̄de ndi ke idiọk ini. Ke ini n̄watde n̄kesịm, mma n̄kụt enye etiede ke esa ufọk mi. Enye ama efehe ebịne mi edidọhọ ete: “Ufọk ke n̄kosụk nyom ndika emi n̄kọdọhọ ẹka mi okot ufọkibọk ye mme bodisi obụp m̀mê ẹkụt fi sia afo esibabak ọnyọn̄ edi man idikpep n̄kpọ. Mma n̄kere m̀mê enyene se itịbede!”

Isan̄ en̄wen, mma mbụp enye mbụme emi n̄kekerede ke eyenọwọn̄ isua 12 idikemeke ndibọrọ. N̄koyom ndise m̀mê enye editịn̄ se ededi oro odụkde enye ibuot. Ke mma n̄kobụp enye mbụme emi, enye ama ese mi onyụn̄ ọdọhọ ete: “Mbụme enye emi ọsọn̄ etieti. Yak n̄wet, mma nsịm ufọk n̄kobụp ete ye eka mi.” Ke ini enye ekedide ndikpep mi n̄kpọ usen en̄wen, enye ama ọnọ mi Enyọn̄-Ukpeme oro ọkọbọrọde mbụme oro n̄kobụpde. Se ikanamde nnen̄ede mma Mme Ntiense edi nte mme n̄wed mmọ ọkọbọrọde kpukpru mbụme mi ndien kpukpru ibọrọ oro okoto Bible. Mma n̄ka iso n̄kpep n̄kpọ ye ekpri eyenan̄wan emi, ndien ke isua kiet ebede, mma nna baptism nnyụn̄ n̄kabade ndi Ntiense Jehovah. *

UFỌN ORO MBỌDE:

Ke mma n̄kenyene ibọrọ nnọ kpukpru mbụme mi, ama ọdọn̄ mi nditịn̄ se n̄kpepde nnọ mbon en̄wen. (Matthew 12:35) Ke ntọn̄ọ, mbonufọk nnyịn ẹma ẹkọbọ mi. Edi nte ini akade, mmọ ikafịnake mi aba. Mbemiso eka mi akpade, enye ama ọtọn̄ọ ndikpep Bible. Okposụkedi emi enye mîkanaha baptism mbemiso enye akpade, mmenịm ke enye ama ebiere ndinam n̄kpọ Jehovah.

Ke 1978, Ntiense Jehovah emi ekekerede Elias Kazan ama ọdọ mi. Ke 1981, ẹma ẹkot nnyịn ẹte idinam utom ke Bethel ke United States. * Edi ke ima ikanam utom do isua inan̄ kpọt, ebe mi ama akpa. Kpa ye oro ebe mi akakpade, mma n̄ka iso nnam utom ke Bethel, ndien emi ikayakke n̄kere mfịna mi n̄kaha, ama onyụn̄ anam esịt ana mi sụn̄.

Ke 2006, Richard Eldred emi edide owo ubon Bethel ama ọdọ mi. Nnyịn mbiba ke isụk inam utom ke Bethel. Mbụme ita emi ekpri eyenan̄wan oro okobụpde mi do ama anam n̄kpep n̄kpọ mban̄a Abasi, ndien emi anam nnyene ibọrọ mbụme oro n̄koyomde nnyụn̄ mfiọk se n̄kpadade uwem mi nnam.

^ ikp. eki. 16 Eyenan̄wan emi ye nditọeka esie ẹma ẹn̄wam mme andikpep mmọ ition ẹkpep Bible ẹnyụn̄ ẹtọn̄ọ ndikpono Jehovah.

^ ikp. eki. 18 “Bethel” ọwọrọ “Ufọk Abasi.” Ndien se Mme Ntiense Jehovah ẹsikotde ọfis mmọ ke idụt kiet kiet edi oro. (Genesis 28:17, 19) Mbonubon Bethel ẹnam nsio nsio utom ndida n̄n̄wam ke utom unọ ukpep emi Mme Ntiense Jehovah ẹnamde.