Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME MARCH 2015

 MME ANDIKOT N̄WED NNYỊN ẸBỤP ẸTE . . .

Ndi Easter Edi Usọrọ Mme Christian?

Ndi Easter Edi Usọrọ Mme Christian?

Encyclopædia Britannica ọdọhọ ke Easter edi “akpan usọrọ emi mme Christian ẹdade ẹti Ediset ke N̄kpa Jesus Christ.” Edi ndi Easter edi usọrọ mme Christian?

Edieke owo oyomde ndidiọn̄ọ m̀mê n̄kpọ edi akpanikọ, enye esinen̄ede odụn̄ọde n̄kpọ oro. Kpasụk ntre, man ifiọk m̀mê Easter edi usọrọ mme Christian, ana itịm idụn̄ọde ise se ẹsinamde ke ini Easter.

Akpa kan̄a, Jesus ọkọdọhọ mbet esie ẹsiti n̄kpa imọ, idịghe ediset ke n̄kpa imọ. Apostle Paul okokot edinam emi “udia mbubreyo Ọbọn̄.”—1 Corinth 11:20; Luke 22:19, 20.

Encyclopædia Britannica ọdọhọ ke ediwak n̄kpọ emi ẹsinamde ke ini Easter inyeneke n̄kpọ ndomokiet ndinam ye ediset ke n̄kpa Jesus, edi ke mbon eset ẹketọn̄ọ mme n̄kpọ emi. Ke uwụtn̄kpọ, yak ineme iban̄a nsenunen ye oyot emi ẹdade ke ediwak ebiet nte akpan idiọn̄ọ Easter. Kop se The Encyclopedia of Religion etịn̄de aban̄a emi: “Nsenunen oro ada aban̄a obufa uwem emi esetde ọwọrọ ke nsen.” N̄wed emi ọdọhọ ke sia oyot esimande ata ediwak nditọ, ke enye ada aban̄a ini utọ emi isọn̄ esifọnde n̄kpọ etieti.

Prọfesọ Philippe Walter etịn̄ nte ẹkesan̄ade ẹmen nsenunen ye oyot ẹdisịn ke usọrọ Easter. Enye ọkọdọhọ ke emi ọkọtọn̄ọ ke ini mme Christian ẹkeyomde ndinam mme okpono ndem ẹkabade ẹdi mme Christian. Ntre, mmọ ẹkekere ke se mmimọ ikpepde ọyọsọp an̄wan̄a mme okpono ndem emi edieke idọhọde ke ediset ke n̄kpa Jesus onyụn̄ etie nte usọrọ mmọ emi aban̄ade nte ini etuep esibede man ini utọ edi. Walter ọdọhọ ke ntem ke ẹkeda usọrọ mme okpono ndem ẹdisịn ye eke mme Christian man ata ediwak owo ẹkabade ẹdi Christian.

Utọ n̄kpọ emi ikedehedei itịbe ke eyo mme apostle, sia Bible ọdọhọ ke mmọ ẹketie nte “ukpan” emi mîyakke mme okpono ndem ẹbụrọde ido ukpono Christ. (2 Thessalonica 2:7) Apostle Paul ama akam odụri mme Christian utọn̄ ete ke imọ ima inyọn̄, ke “mme owo ẹyedaha ẹda . . . ẹtịn̄ ukwan̄ ikọ man ẹdụri mme mbet ẹnọ idemmọ.” (Utom 20:29, 30) N̄ko, apostle John ama ewet ete ke ndusụk owo ẹtọtọn̄ọ ndida mme Christian ntụn usụn̄ ke eyo esie. (1 John 2:18, 26) Ntre ke ẹketọn̄ọ nsịtnsịt ndida ido mme okpono ndem ndisịn ke ido ukpono Christ.

“Ẹkûdian idem utịn̄e utịn̄e ye mmọ eke mînịmke ke akpanikọ.”—2 Corinth 6:14

Ndusụk owo ẹkere ke idiọkke ndinam ndusụk n̄kpọ emi ẹsinamde ke Easter sia emi anam mme okpono ndem ẹtịm ẹfiọk n̄kpọ ẹban̄a ediset ke n̄kpa Jesus. Apostle Paul ikpekenyịmeke utọ n̄kpọ oro. Kpa ye oro mme okpono ndem ẹkeyọhọde kpukpru ebiet emi enye akakade ke mme obio emi mbon Rome ẹkekarade, enye ikanamke se mmọ ẹkesinamde man mme owo ẹnen̄ede ẹfiọk n̄kpọ ẹban̄a Jesus. Edi enye ọkọdọhọ mme Christian ete: “Ẹkûdian idem utịn̄e utịn̄e ye mmọ eke mînịmke ke akpanikọ. Koro nso ebuana ke edinen ido enyene ye ukwan̄ido? Mîdịghe nso ebuana ke un̄wana enyene ye ekịm? ‘Ke ntre ẹwọn̄ọ ke otu mmọ, ẹnyụn̄ ẹdian̄ade ẹda,’ Jehovah ọdọhọ, ‘ẹkûnyụn̄ ẹtụk n̄kpọ ndek.’”—2 Corinth 6:14, 17.

Nso ke nneme emi owụt? Owụt ke Easter idịghe usọrọ mme Christian.

Kpep N̄kpọ En̄wen

MME MBỤME BIBLE ORO ẸBỌRỌDE

Nso ke Bible Etịn̄ Aban̄a Easter?

Se nte n̄kpọ 5 emi ẹsinamde ke ini Easter ọkọtọn̄ọde.

ENYỌN̄-UKPEME

Jesus Ekeset ke N̄kpa man Ikpodu Uwem!

Kere nte edidude uwem ke nsinsi, ubọhọ ufen, ukopke ubiak, unyụn̄ ufụhọke.