Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME MARCH 2015

 IBUOTIKỌ IKPAEDEM | DIDIE KE JESUS ANYAN̄A NNYỊN?

Nso ke Jesus Ndikakpa Nnyụn̄ Nset Ekeme Ndinam Nnọ Fi?

Nso ke Jesus Ndikakpa Nnyụn̄ Nset Ekeme Ndinam Nnọ Fi?

“Buọt idem ye Ọbọn̄ Jesus ndien ẹyenyan̄a fi.”—Utom 16:31.

Apostle Paul ye Silas ẹketịn̄ ikọ emi ẹnọ ekpeme ufọk-n̄kpọkọbi kiet ke Philippi emi odude ke Macedonia. Nso ke ikọ mmọ ọkọwọrọ? Edieke iyomde ndifiọk nte ndibuọt idem ke Jesus ekemede ndinam owo enyene edinyan̄a, ana ibem iso ifiọk ntak emi nnyịn isikpade. Se se Bible ekpepde mi.

Abasi ikoyomke owo akpa

“Jehovah Abasi ada owo oro edisịn ke in̄wan̄ Eden ete ọdiọn̄ onyụn̄ ekpeme enye. Jehovah Abasi onyụn̄ owụk owo oro ete: ‘Dia kpukpru mfri eto in̄wan̄ yụhọ. Edi amaedi mfri eto ifiọk eti ye idiọk, kûdia, koro ke usen eke afo adiade afo ayakpa n̄kpa.’”—Genesis 2:15-17.

Abasi ekesịn akpa ete nnyịn, Adam, ke In̄wan̄ Eden. In̄wan̄ oro ekedi ata ediye Paradise. Ediwak unam, eto, ye ikọn̄ ẹma ẹdu n̄ko, ndien Adam ama ekeme ndidia mfri eto eke enye amama. Edi enyene eto kiet emi Jehovah Abasi ọkọdọhọde Adam okûdia, ke edieke enye adiade eto oro ke enye ayakpa.

Ndi se Abasi eketịn̄de emi ama an̄wan̄a Adam? Adam ama ọfiọk se n̄kpa edide sia enye ama esikụt mme unam ẹkpade. Edieke Abasi okobotde Adam yak odu uwem ekem enye akpa, Abasi ndidọhọ enye okûdia mfri oro mbak edikpa ikpọwọrọke n̄kpọ ndomokiet. Edi Adam ama ọfiọk ke edieke imọ ikopde uyo Abasi mînyụn̄ idiaha mfri eto oro, ke imọ iyodu uwem ke nsinsi—imọ idikpaha.

Ndusụk owo ẹdọhọ ke mfri eto oro ekedi ebuana erenowo ye n̄wan, edi emi idịghe akpanikọ. N̄kọ Jehovah akakam ọdọhọ Adam ye Eve an̄wan esie “ẹtọt ẹnyụn̄ ẹwak ẹnyụn̄ ẹyọhọ ke isọn̄ ẹnyụn̄ ẹkan enye.” (Genesis 1:28) Ata ata eto ke Abasi ọkọdọhọ mmọ ẹkûdia mfri esie. Jehovah okokot eto oro “eto ifiọk eti ye idiọk” sia eto oro akada aban̄a unen emi Abasi enyenede ndibiere se idide eti ye idiọk nnọ mme owo. Nditre ndidia mfri eto oro okpokowụt ke Adam okop item onyụn̄ ama Enye emi okobotde enye onyụn̄ ọnọde enye kpukpru se enye oyomde.

 Adam akakpa ke ntak emi enye ọkọsọn̄de ibuot ye Abasi

Abasi ama “ọdọhọ Adam ete: ‘Koro [akadiade] mfri eto emi n̄kowụkde fi nte, “Kûdia,” . . . ke ibibiak iso fo ke afo edidia udia tutu afo afiak ke ntan, sia ẹkesiode fi do. Koro afo edide ntan, oyonyụn̄ afiak ke ntan.’”—Genesis 3:17, 19.

Adam ama adia mfri eto emi Abasi ọkọdọhọde enye okûdia. Idịghe ekpri idiọkn̄kpọ ekedi oro. Enye okokokoi ọsọn̄ ibuot ye Abasi inyụn̄ idaha ofụri se Jehovah akanamde ọnọ enye ke n̄kpọ. Enye ndidia mfri oro okowụt ke enye esịn Jehovah onyụn̄ emek ndida ke idem, ndien emi akasan̄a ye ediwak afanikọn̄.

Nte ini akakade, Adam ama akpa kpa nte Jehovah ọkọdọhọde. Abasi akada “ntan isọn̄” obot Adam, ama onyụn̄ ọdọhọ ke enye ‘ayafiak ke ntan.’ Ke Adam ama akakpa, enye ikoforoke n̄kpọ en̄wen ikonyụn̄ ikaha ikodu uwem ke ebiet en̄wen. Enye okonyụn̄ etie nte ntan emi Abasi akadade obot enye; uwem ndomokiet ikodụhe enye ke idem.—Genesis 2:7; Ecclesiastes 9:5, 10.

Nnyịn ikpa sia kpukpru nnyịn ito Adam

“Idiọkn̄kpọ [okoto] owo kiet odụk ererimbot, n̄kpa onyụn̄ [oto] ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.”—Rome 5:12.

Idiọkn̄kpọ Adam akasan̄a ye ediwak afanikọn̄, ndien tutu esịm emi nnyịn ke ibọbọ ufen idiọkn̄kpọ oro. Idịghe uwem isua 70 m̀mê 80 akatak Adam ke ini enye akanamde idiọkn̄kpọ, nsinsi uwem akatak enye. N̄ko, ke enye ama akanam idiọkn̄kpọ, enye ikọfọnke ima aba, ntre n̄kukụre se enye akayakde ọnọ kpukpru nditọ esie ekedi idiọkn̄kpọ ye n̄kpa.

Kpukpru nnyịn ito Adam, ntre ikadada idiọkn̄kpọ imana. Emi anam isinam idiọkn̄kpọ, isidọn̄ọ, isinyụn̄ ikpa. Paul ama etịn̄ nte idaha nnyịn ọdiọkde eketre. Enye ọkọdọhọ ete: “Ami ndi obụkidem, emi ẹkenyamde ẹsịn ke idak idiọkn̄kpọ. Owo nditaha nte ami! Anie edinyan̄a mi osio ke ikpọkidem n̄kpa emi?” Paul ama ọbọrọ mbụme esie oro: “Mmọkọm Abasi ke Jesus Christ Ọbọn̄ nnyịn!”—Rome 7:14, 24, 25.

 Jesus akakpa man nnyịn ikpodu uwem ke nsinsi

“Ete okosio Eyen esie ọdọn̄ nte Andinyan̄a ererimbot.”—1 John 4:14.

Jehovah Abasi ama anam ndutịm man ibọhọ kpukpru se idiọkn̄kpọ adade edi. Ndien sia ekpedide owo ama akpa enye isetke aba, ndutịm oro Abasi akanamde mi ama anam ibọhọ emi n̄ko. Ntak idọhọde ntre? Abasi ọkọdọn̄ edima Eyen esie oto heaven edimana nte mfọnmma owo ukem nte Adam. Edi Jesus iketiehe nte Adam sia enye “ikanamke idiọkn̄kpọ.” (1 Peter 2:22) Sia Jesus ekedide mfọnmma owo mîkonyụn̄ inamke idiọkn̄kpọ ndomokiet, ikpakanaha enye akpa.

Edi Jehovah ama ayak mme asua Jesus ẹwot enye. Ke ọyọhọ usen ita, Jehovah ama anam enye eset nte spirit man enye ekpekeme ndifiak nnyọn̄ heaven. Do ke Jesus ọkọnọ Abasi ekọmurua mfọnmma uwem esie emi enye akawade man ẹnyene se Adam akayakde atak enye ye nditọ esie. Jehovah ama enyịme uwa oro, ndien emi anam mbon oro ẹbuọtde idem ye Jesus ẹkeme ndinyene nsinsi uwem.—Rome 3:23, 24; 1 John 2:2.

Ntem ke Jesus akafiak anam inyene se Adam akayakde atak. Enye akakpa man nnyịn ikpodu uwem ke nsinsi. Bible ọdọhọ ke ‘Jesus akakpa man oto ke mfọnido Abasi oro owo mîdotke, enye akpatabi n̄kpa ke ibuot kpukpru owo.’—Mme Hebrew 2:9.

Jehovah ndikọnọ Jesus edikpa anam ifiọk ediwak n̄kpọ iban̄a Enye. Sia Abasi esinamde se inende kpukpru ini, enye ama okụt ke idụhe owo ke ison̄ emi ekemede ndikpa mfak nnyịn sia idụhe eke ọfọnde ama. Edi sia enye edide Abasi ima ye mbọm, enye ama ayak Eyen esie edikpa afak nnyịn, kpa ye oro akatakde enye n̄kpọ akamba akamba.—Rome 5:6-8.

Abasi ama anam Jesus eset, enye oyonyụn̄ anam mbon en̄wen n̄ko ẹset

“Ẹma ẹnam Christ eset ke n̄kpa, nte akpa mbun̄wụm ke otu mbon oro ẹdede ke n̄kpa. Koro kpa nte n̄kpa otode owo, ediset mme akpan̄kpa oto owo n̄ko. Koro kpa nte otode ke Adam kpukpru owo ẹkpan̄a, kpasụk ntre ke Christ ẹyenam kpukpru owo ẹdu uwem.”—1 Corinth 15:20-22.

Imọfiọk ke Jesus ama odu uwem ke isọn̄ emi onyụn̄ akpa, edi nso ikpanam inịm ke enye ama eset? N̄kpọ kiet emi enen̄erede anam inịm edi ke enye ama owụt ediwak owo idem ke enye ama ekeset. Enye okowụt mmọ idem ke nsio nsio itie. Isan̄ kiet, enye ama owụt se ibede owo 500 idem. Apostle Paul ama etịn̄ aban̄a emi ke leta oro enye ekewetde ọnọ ẹsọk mbon Corinth, onyụn̄ ọdọhọ ke ndusụk mbon oro Jesus okowụtde idem ẹkesụk ẹdodu tutu esịm ini oro, ndien emi owụt ke mmọ ẹma ẹkeme nditịn̄ se mmọ ẹkekụtde.—1 Corinth 15:3-8.

Ke ini Paul ọkọdọhọde mmọ ke Christ edi “akpa mbun̄wụm” ke otu mbon oro ẹnamde ẹset, ikọ esie ọkọwọrọ ke ẹyenam mbon en̄wen ẹset nte ini akade. Jesus ke idemesie ama ọdọhọ ke ini ke edi emi “kpukpru mme andidu ke udi editi” ẹdiwọn̄ọde idi.—John 5:28, 29.

 Edieke iyomde ndidu uwem ke nsinsi, ana ibuọt idem ye Jesus

“Abasi ama enen̄ede ama ererimbot tutu enye ọnọ ikpọn̄-ikpọn̄ edibon Eyen esie, man owo ekededi eke ọbuọtde idem ye enye okûtak edi enyene nsinsi uwem.”—John 3:16.

Akpa n̄wed Bible etịn̄ nte n̄kpa akasan̄ade odụk ererimbot ye se ikanamde mme owo ẹtre ndidu ke Paradise. Akpatre n̄wed Bible etịn̄ nte Abasi edisiode n̄kpa ifep inyụn̄ inam isọn̄ emi afiak edi Paradise. Ini oro ke mme owo ẹdikop inem uwem ke nsinsi. Ediyarade 21:4 ọdọhọ ke ‘n̄kpa ididụhe aba,’ ndien ufan̄ikọ 5 owụt ke se ẹtịn̄de emi edi ofụri akpanikọ. Enye ọdọhọ ete: “Ikọ emi edi akpanikọ ye se ẹkemede ndibuọt idem.” Jehovah enen̄ede ekeme ndinam kpukpru se enye ọn̄wọn̄ọde.

Ndi emenịm ke se ẹtịn̄de emi “edi akpanikọ ye se ẹkemede ndibuọt idem”? Edieke edide ntre, kpep n̄kpọ ban̄a Jesus Christ nyụn̄ buọt idem ye enye. Edieke anamde emi, eyenem Jehovah esịt. Enye eyenen̄ede ọdiọn̄ fi, afo oyonyụn̄ odori enyịn ndidu uwem ke nsinsi ke Paradise ke isọn̄, emi ‘n̄kpa mîdidụhe aba, mfụhọ m̀mê ntuan̄a m̀mê ubiak mîdinyụn̄ idụhe aba.’

Kpep N̄kpọ En̄wen

Nso ke Bible Enen̄ede Ekpep?

Ufak—Akakan Enọ Abasi