Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  February 2015

Mme Mbụme Bible Oro Ẹbọrọde

Mme Mbụme Bible Oro Ẹbọrọde

Ndi oyodu ini emi ukara kiet kpọt edidude ke ofụri ererimbot?

Didie ke ukara kiet ekeme ndinam ofụri ererimbot ẹdiana kiet? Isaiah 32:1, 17; 54:13

Kere nte n̄kpọ ọkpọfọnde edieke ukara kiet kpọt okpodude ke ofụri ererimbot. Mfịn, ediwak owo ẹbọ ufen ke ntak emi mmọ ẹnen̄erede ẹbuene, ke ini mbon en̄wen ẹnen̄erede ẹnyene n̄kpọ. Edieke owo emi enyenede esịtmbọm akpakarade ofụri ererimbot, enye akpanam kpukpru owo ẹnyene se inanade mmọ. Ndi emekere ke mme owo ẹkeme ndinam utọ ukara emi odu?—Kot Jeremiah 10:23.

Tọn̄ọ ẹkebot owo, nsio nsio ukara oro ẹdude inamke ata ediwak n̄kpọ emi akpanade mmọ ẹnam ẹnọ mme owo, akpan akpan mme ubuene. Ndusụk ukara ẹbak ibak etieti. (Ecclesiastes 4:1; 8:9) Edi Ata Ọkpọsọn̄ Abasi ọn̄wọn̄ọ ndinam ukara esie ada itie kpukpru mme ukara emi. Ndien owo emi edikarade eyenen̄ede ese aban̄a mme owo.—Kot Isaiah 11:4; Daniel 2:44.

Nso ke Obio Ubọn̄ Abasi edinam?

Jehovah Abasi emek owo emi enen̄erede odot ndikara ofụri ererimbot. Jesus Eyen esie edi owo oro. (Luke 1:31-33) Ekesinenem Jesus ndin̄wam mme owo ke ini enye okodude mi ke isọn̄. Ndien sia enye edide Edidem Obio Ubọn̄ Abasi, enye ayanam mme owo ke ofụri ererimbot ẹdiana kiet oyonyụn̄ etre ofụri ufen oro ibọde mi.—Kot Psalm 72:8, 12-14.

Ndi kpukpru owo ẹyenyịme Jesus akara mmimọ? Ihih. Edi Jehovah ke enyene ime. (2 Peter 3:9) Enye ke ọnọ mme owo ini ndinyịme Jesus akara mmọ. Ibịghike Jesus ọmọn̄ osio mme idiọkowo efep ke isọn̄ emi onyụn̄ anam emem ye ifụre odu ke ofụri ererimbot.—Kot Micah 4:3, 4.