Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME FEBRUARY 2015

 NNEME

Ntak Ekpekpepde Bible?

Ntak Ekpekpepde Bible?

Mbiet nneme emi ke Mme Ntiense Jehovah ẹsineme ye owo. Ẹyak ida ke Ntiense emi ekerede Ben osobo ye ufan kiet emi ekerede James onyụn̄ ọtọn̄ọ nneme ye enye.

SE BIBLE ETỊN̄DE ABAN̄A ESET ENEN

James: Ete, n̄kereke ke nyenyene ini nneme emi sia nsikaha ufọkabasi.

Ben: Mmama nte anamde mfiọk oro. Ọmọdiọn̄ọ ke mma mfre ndisiak enyịn̄ mi nnọ fi. Nsikere Ben. Afo ekere didie?

James: N̄kere James.

Ben: Enem mi etieti ndisobo ye afo.

James: Enem mi n̄ko.

Ben: Mbọk kûyat esịt, yak mbụp ise, Ndi ama esika ufọkabasi ini ekedide eyenọwọn̄?

James: Ih mma nsika, edi ke ini n̄kpọn̄de ufọk n̄ka ufọkn̄wed ntaifiọk, mma ntre ufọkabasi.

Ben: Hmm. Nso ke afo ekekpep ke ufọkn̄wed?

James: N̄kekpep ukpepn̄kpọ obot ye mbụkeset. Mmama mbụkeset etieti sia enye anam ndiọn̄ọ se iketịbede ke eset.

Ben: Mbụkeset esinem etieti. Anaedi ọmọfiọk ke mbụkeset esịne n̄ko ke Bible. Ndi Bible esịne ke otu n̄wed oro okokotde?

James: Ihih. Mmọdiọn̄ọ ke Bible edi eti n̄wed, edi akanam n̄kereke ke enye ekeme ndin̄wam nnyịn ifiọk se iketịbede ke eset.

Ben: Etie mi nte afo emesima ndikop ekikere mbon en̄wen, ntre edieke enyịmede, mmọn̄ nda minit ifan̄ n̄wụt fi mme n̄kpọ ke Bible emi ẹwụtde ke se Bible etịn̄de aban̄a eset enen.

James: Ikpọdiọkke, edi nnyeneke Bible.

Ben: Mfịna idụhe. Mmọn̄ nda Bible mi n̄wụt fi. Akpa itie edi 1 Chronicle ibuot 29, ufan̄ikọ 26 ye 27. Itien̄wed oro ọdọhọ ntem ete: “Ndien David eyen Jesse akara ofụri Israel; ndien enye akakara Israel isua aba. Enye akara isua itiaba ke Hebron, onyụn̄ akara isua edịp ye duopeta ke Jerusalem.”

James: Inam didie ifiọk ke se ẹtịn̄de emi enen?

Ben: Enyene ini emi ndusụk owo mîkenịmke se Bible etịn̄de aban̄a Edidem David sia mmọ ẹkedọhọ ke utọ owo oro ikodụhe.

James: Mbọk m̀mê akpanikọ! Nso ikpanam mmọ ẹtịn̄ utọ ikọ oro?

Ben: Ke ẹsiode Bible ẹfep, n̄kpọ ikenen̄ekede idu ndiwụt ke odu owo emi ẹkekotde David. Edi ke 1993, mme ọdọkisọn̄ nyom n̄kpọeset ẹma ẹdọk isọn̄ ẹkesio itiat eset oro ẹkewetde ikọ emi ẹkabarede “Ufọk David.”

James: Se etịn̄de emi enem mi tutu.

Ben: Owo en̄wen emi ẹkedọhọde ke utọ owo oro ikodụhe edi Pontius Pilate emi akakarade ke eyo Jesus. Ẹsiak enyịn̄ esie mi ke Luke ibuot 3, ufan̄ikọ 1, ye enyịn̄ mbon en̄wen oro ẹkekarade ini oro.

 James: Mmokụt ntre. Itie oro ọdọhọ ‘ke Pontius Pilate ekedi andikara Judea, Herod edi andikara n̄kann̄kụk Galilee.’

Ben: Sọsọn̄ọ. Ke ediwak isua, ndusụk mme anam-ndụn̄ọde ẹkedọhọ ke utọ owo oro ẹkotde Pontius Pilate ikodụhe. Edi ke isua 50 emi ẹkebede, ẹma ẹkụt itiat ke Ufọt Ufọt Edem Usiahautịn emi ẹkekapde enyịn̄ Pontius Pilate.

James: Hmm. Akanam n̄kopke kpukpru emi.

Ben: Ọwọrọ Abasi anam oro nan̄a.

James: Ke nditịn̄ akpanikọ, mmama Bible sia enye enem ndikot, edi n̄kereke ke enye enyene ufọn ke eyo nnyịn emi. Mmọdiọn̄ọ ke Bible etịn̄ ndusụk n̄kpọ emi ẹketịbede ke eset, edi n̄kereke ke Bible enyene ufọn ọnọ nnyịn.

EBỊGHI ẸKEWET BIBLE EDI ENYE OSỤK ENYENYENE UFỌN

Ben: Ediwak owo ẹkere ntre n̄ko. Edi ami n̄kereke ntre. Se inamde ndọhọ ntre edi ke mme akpan n̄kpọ oro nnyịn mme owo iyomde man ika iso idu uwem ikpụhọkede toto ke editọn̄ọ. Ke uwụtn̄kpọ, imoyom udia, ọfọn̄, ye itie udakibuot. Nnyịn n̄ko imesima ndineme nneme ye mme owo nnyụn̄ n̄kop inemesịt ye ubon nnyịn. Ndi idịghe ntre?

James: Ntre ke edi.

Ben: Bible ekeme ndin̄wam nnyịn ke kpukpru emi. Kpa ye oro edide ebịghi ẹkewet Bible, enye osụk enyenyene ufọn ọnọ nnyịn.

James: Nso inam ọdọhọ ntre?

Ben: Bible ọdọn̄ọ nti item emi ẹkemede ndin̄wam nnyịn mfịn nte ẹken̄wamde mme owo ke ini emi ẹkewetde enye.

Bible ọdọn̄ọ nti item emi ẹkemede ndin̄wam nnyịn mfịn nte ẹken̄wamde mme owo ke ini emi ẹkewetde enye

James: Didie?

Ben: Bible ekeme ndin̄wam nnyịn idiọn̄ọ nte ikpesede okụk, se ikpanamde man ubon nnyịn ẹkop inemesịt, ye nte ikpedide nti ufan. Bible eteme nnyịn se ikpanamde man se inamde ọwọrọ usụn̄. Ke uwụtn̄kpọ, n̄kọ ọmọfiọk ke imemke utom ndidi eti ebe ye eti ete ke ererimbot emi?

James: Enye oro idịghe se ẹtetịn̄. Mmọdọ ndọ isua kiet idahaemi, edi idịghe kpukpru ini ke ami ye n̄wan mi isinyene uyo kiet ke n̄kpọ.

Ben: Nte ndọ etiede edi oro. Edi Bible ekeme ndin̄wam nnyịn ke afan̄ emi. Da Ephesus ibuot 5 ke uwụtn̄kpọ. Yak ikot ufan̄ikọ 22, 23, ye 28. Mbọk kot itie oro ise.

James: Ọfọn. Ufan̄ikọ 22 ye 23 ọdọhọ ete: “Yak iban ẹsụk ibuot ẹnọ mme ebe mmọ nte ẹnam ẹnọ Ọbọn̄, koro ebe edide ibuot ọnọ n̄wan esie kpa nte Christ n̄ko edide ibuot ọnọ esop, ke emi enye edide andinyan̄a idem emi.” Ndien ufan̄ikọ 28 ọdọhọ ete: “Ntem ke mme ebe ẹkpema iban mmọ nte idem mmọ. Owo eke amade n̄wan esie ama idemesie.”

Ben: Sọsọn̄ọ. Ndi ukereke ke edieke n̄wan ye ebe ẹnamde item emi ke ndọ mmọ eyenem?

James: Etie ntre. Edi imemke nte etịn̄de oro.

Ben: Imọfiọk ke idụhe eke ọfọnde ama. Ke ibuot n̄wed oro ikokotde do, enyene ufan̄ikọ emi ọdọhọde nnyịn inyene ibuot. * Ebe ye n̄wan emi ẹnyenede ibuot ẹsinyịme n̄kpọ ẹnọ kiet eken ndusụk ini. Ami ye n̄wan mi imokụt ke Bible an̄wam nnyịn ke afan̄ oro.

James: Ikọ ke etịn̄ oro!

Ben: Mme Ntiense Jehovah ẹnyene ikpehe Intanet emi ẹtịn̄de mme n̄kpọ emi ẹkemede ndinam ndọ ọfọn, ubon ẹnyụn̄ ẹkop inemesịt. Edieke enyịmede, n̄kpama ndida minit ifan̄ n̄wụt fi ndusụk se idude do.

James: Mfịna idụhe. Ka iso.

Ben: Ọfọn. Ikpehe Intanet oro edi www.jw.org/efi. Se nte akpa page esie etiede mi.

James: Mmama mme ndise emi.

Ben: Mmọ ẹwụt nte nnyịn ikwọrọde ikọ ke ofụri ererimbot. Ah, imesịm ebiet ikoyomde!  Ẹkot ikpehe enye emi “Se Idin̄wamde Ebe ye N̄wan ye Mme Ete ye Eka.” Ke ibuotikọ emi, oyokụt ediwak n̄kpri ibuotikọ emi ẹnemede nte ẹkpesede ẹban̄a nsio nsio mfịna ke ubon. Ndi enyene eke amade ke otu emi?

James: Ih, enye emi, “Ndikọk Mme Mfịna ke Ndọ Fo.” N̄kere ke emi ayan̄wam mi.

Ben: Ẹtịn̄ n̄kpọ inan̄ emi akpanamde man esikọk mfịna ke ndọ fo. Mbọk kot itie emi ise.

James: “Nneme, ukpono, ye ima ẹnam ndọ ọfọn.” Hmm, mmama se ẹtịn̄de emi.

Ben: Sọsọn̄ọ. Omokụt itie N̄wed Abasi emi, fịk ke ọmọn̄ okụbọde ọnọ fi.

James: Ọfọn, n̄kọ Ephesus 5:33. Itie oro ọdọhọ ete: “Yak owo mbufo kiet kiet enen̄ede ama n̄wan esie nte enye amade idem esie; ke n̄kan̄ eken, yak n̄wan enen̄ede okpono ebe esie.”

Ben: Omokụt do ke ana n̄wan ye ebe ẹnọ kiet eken se mmọ ẹyomde.

James: In̄wan̄ake mi-o!

Ben: Ọfọn, n̄kọ ebe esiyom n̄wan okpokpono imọ? N̄wan esinyụn̄ oyom ebe etetịn̄ onyụn̄ owowụt kpukpru ini ke imama imọ. Idịghe ntre?

James: Ntre ke edi.

Ben: Edieke ebe esinamde n̄kpọ ndiwụt ke imama n̄wan imọ, ndi oro idinamke emem n̄wan esie utom ndikpono enye?

James: Ayanam.

Ben: Omokụt do ke okposụkedi emi ẹkewetde itie Bible emi n̄kpọ nte isua 2,000 emi ẹkebede, ke enye etịn̄ se n̄wan ye ebe ẹsiyomde onyụn̄ eteme mmọ se mmọ ẹkpenamde man ẹkop inem ndọ mmọ.

James: Ntịn̄ akpanikọ, n̄kọdiọn̄ọke ke Bible enyene ufọn ntem.

Ben: Enem mi esịt ndikop oro. N̄kpama ndifiak nsobo ye afo man ineme ekpri ibuotikọ emi “N̄kpọ Inan̄ Oro Ẹn̄wamde Ndikọk Mfịna.” Enye esịne ke akamba ibuotikọ oro isụk inemede mi ke ikpehe Intanet nnyịn. *

James: Mbọk amanam etieti. Ami ye n̄wan mi iyokot, ekem afo edi yak ineme.

^ ikp. eki. 63 Edieke oyomde ndifiọk n̄kpọ en̄wen mban̄a emi, mbọk kot ibuot 14 ke n̄wed Mme Ntiense Jehovah emi Nso ke Bible Enen̄ede Ekpep?

Kpep N̄kpọ En̄wen

Didie ke Mme Edumbet Bible Ẹn̄wam Nnyịn?

Jesus ama etịn̄ ntak emi iyomde ndausụn̄ onyụn̄ etịn̄ edumbet iba emi okponde akan.

Ntak Emi Ekpekpepde Bible?

Bible anam ediwak miliọn owo ke ofụri ererimbot ẹfiọk ibọrọ mbụme emi afịnade ata ediwak owo. Ndi akpama nditiene mfiọk?