Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME FEBRUARY 2015

 BIBLE OKPỤHỌDE MME OWO

Mma Mma Nte Bible Ọkọbọrọde Mme Mbụme Mi

Mma Mma Nte Bible Ọkọbọrọde Mme Mbụme Mi
  • ISUA AKAMANADE: 1948

  • EBIET OTODE: HUNGARY

  • SE ENYE OKOYOMDE: OKOYOM IBỌRỌ MME MBỤME EMI ẸSIFỊNADE EDIWAK OWO

NTE UWEM MI EKETIEDE:

N̄kamana ke Székesfehérvár ke Hungary. Akwa obio emi odu ebe isua 1,000 idahaemi. Edi nsụk nteti nte udiana ekọn̄ ererimbot akabiatde obio emi.

N̄kodụn̄ ye eka eka ye ete eka mi ini n̄kedide ata ekpri eyenọwọn̄. Nsụk nteti mmọ, akpan akpan eka eka mi emi ekekerede Elisabeth. Enye ama ekpep mi ndisibuọt idem ye Abasi. Ọtọn̄ọde ke ini emi n̄kedide isua ita, mma nsitiene enye mbọn̄ Akam Ọbọn̄ kpukpru mbubreyo. Edi mma n̄kpere ndisịm isua 30 mbemiso akam oro an̄wan̄ade mi.

Ete ye eka mi ẹkesinam utom okoneyo ye uwemeyo man ẹkpenyene okụk ẹdep ediye ufọk. Ntre, eka eka ye ete eka mi ẹkemen mi ẹkama tọn̄ọ ini ndide ata ekpri. Edi ọyọhọ Saturday iba ke kpukpru ọfiọn̄, kpukpru owo ke ufọk nnyịn, esịnede ete ye eka mi, ima isitie ntre idia udia. Ama esinem mi etieti.

Ke 1958, ete ye eka mi ẹma ẹdep ufọk oro mmọ ẹkeyomde. Esịt ama enem mi etieti ndifiak n̄kodụn̄ ye mmọ. Edi ọfiọn̄ itiokiet ke oro ebede, n̄kpọ mmọn̄eyet ama etịbe. Kansa ama owot ete mi.

Enyịn ama anan mi. Nsụk nteti nte n̄kọbọn̄de akam nte: “O Abasi, mma mben̄e fi nte anyan̄a ete mi. Mmoyom enye etieti. Ntak emi mûkokopke akam mi?” Mma nnen̄ede nyom ndifiọk ebiet emi ete mi odude. Mma n̄kere m̀mê enye akpaka heaven mîdịghe m̀mê esie akam okụre ke nsinsi nsinsi. Ama esidọn̄ mi ndikpetie nte nditọwọn̄ eken emi ẹnyenede ete.

Ke ata ediwak isua, iwakke usen emi mmen̄kesikaha udi ete mi. Mma nsitọn̄ọ edọn̄ ke udi esie mbọn̄ akam nte: “Abasi mbọk, nyom ndidiọn̄ọ ebiet mi ete mi odude.” Mma mben̄e enye n̄ko nte anam mfiọk ntak emi nnyịn idude uwem.

Ke ini n̄kedide isua 13, mma mbiere ndikpep usem German. N̄kekere ke sia edide ẹwet ediwak nti n̄wed ke usem German, ke edieke n̄kpepde usem German ke nyenyene ibọrọ mbụme mi. Ke 1967, mma ntọn̄ọ ndikpep usem  emi ke Jena, emi okodude ke East Germany. Mma nsịn idem n̄kot mme n̄wed emi ntaifiọk Germany ẹkewetde, akpan akpan mme n̄wed oro ẹban̄ade ntak emi idude uwem. Okposụkedi emi n̄kekpepde n̄kpọ ke mme n̄wed oro, ndomo mmọ kiet ikọbọrọke mbụme mi. Mma n̄ka iso ndọhọ Abasi anam n̄kụt ibọrọ mbụme mi.

NTE BIBLE OKOKPỤHỌREDE UWEM MI:

Ke 1970, mma mfiak nnyọn̄ Hungary. Do ke n̄kokụt eyenan̄wan emi n̄kọdọde nte ini akade. Enye ekekere Rose. Ini oro mbon Communist ẹkekara Hungary. Esisịt ini ke ami ye Rose ima ikọdọ ndọ, ima ifehe ika Austria. Ikaduak ndidi ima isịm Austria, nnyịn ito do ikodụn̄ ke Sydney ke Australia. Eyeneka eka mi okodụn̄ do.

Ikebịghike mma nnyene utom ke Austria. Usen kiet, owo itieutom nnyịn ama ọdọhọ ke Bible ekeme ndibọrọ kpukpru mbụme oro n̄kenyenede. Enye ama ọnọ mi mme n̄wed emi ẹsidade ẹkpep Bible. Mma nsọsọp n̄kot mme n̄wed oro nnyụn̄ nyom en̄wen. Sia n̄wed oro ẹkedide n̄wed Mme Ntiense Jehovah, mma n̄wet mmọ nte ẹnọ mme n̄wed en̄wen ẹsọk mi.

Ke usen emi ndọ nnyịn ọkọyọhọde isua kiet, Ntiense emi edide eyen Austria ama edi edem nnyịn. Akparawa emi ekemen mme n̄wed oro n̄koyomde ada ọsọk mi. Enye ama ọdọhọ m̀mê n̄kpama ndikpep Bible. Mma nnyịme. Sia ekenen̄erede ọdọn̄ mi ndikpep n̄kpọ, n̄kesikpep n̄kpọ ikaba ke urua, ndien ukpepn̄kpọ nnyịn ekesidi n̄kpọ nte hour inan̄!

Se Mme Ntiense Jehovah ẹkekpepde mi ama enem mi tutu. Eketie mi nte n̄kpọ ndap ke ini mmọ ẹkewụtde mi enyịn̄ Abasi, Jehovah, ke Bible usem Hungarian mi. Ke ofụri isua 27 oro n̄kesikade ufọkabasi, akanam n̄kopke ẹsiakde enyịn̄ Abasi. Mma mma nte Bible ọkọbọrọde mme mbụme mi. Se Bible etịn̄de esịne ifiọk onyụn̄ an̄wan̄a owo. Ke uwụtn̄kpọ, mma n̄kpep ke mme akpan̄kpa ifiọkke baba n̄kpọ kiet; ke etie nte mmọ ẹdede. (Ecclesiastes 9:5, 10; John 11:11-15) Mma n̄kpep n̄ko ke Abasi ayanam obufa ererimbot emi ‘n̄kpa mîdidụhe aba.’ (Ediyarade 21:3, 4) Mmodori enyịn ndifiak n̄kụt ete mi, sia ke obufa ererimbot oro, mme owo “ẹyeset ke n̄kpa.”—Utom 24:15.

N̄wan mi ama etiene mi ekpep Bible ke ofụri esịt. Ima inen̄ede isịn idem tutu ikụre n̄wed oro akanade ikpep ke ọfiọn̄ iba! Ima isidụk kpukpru mbono esop Mme Ntiense Jehovah ke Ufọkmbono Obio Ubọn̄ mmọ. Ama enem nnyịn etieti nte Mme Ntiense ẹmade kiet eken, ẹsin̄wamde mme owo, ẹnyụn̄ ẹdianade kiet ẹnam n̄kpọ Abasi.—John 13:34, 35.

Ke 1976, ẹma ẹnyịme ami ye n̄wan mi idụk Australia. Ima isọsọp iyom Mme Ntiense Jehovah do. Mme Ntiense oro ẹkedude dọ ẹma ẹfọn ido etieti ye nnyịn. Ke 1978, ima ikabade idi Mme Ntiense Jehovah.

UFỌN ORO MBỌDE:

Mmenyene ibọrọ mme mbụme oro ẹkefịnade mi toto ke uyen. Ndisan̄a n̄kpere Jehovah Abasi anam n̄kụt n̄ko ke idụhe Ete emi ọfọnde nte enye. (James 4:8) Ndien enem mi tutu ndifiọk ke nyafiak n̄kụt ata ete mi ke obufa ererimbot oro edide.—John 5:28, 29.

Ke 1989, ami ye n̄wan mi ima ibiere ndifiak nnyọn̄ Hungary n̄ketịn̄ se nnyịn ikpepde ke Bible nnọ mme ufan nnyịn, mbonubon nnyịn, ye mbon en̄wen emi idisobode. Imekpep ata ediwak owo Bible. Ndien mbon emi ẹtienede nnyịn ẹkpono Jehovah ke otu emi ẹbe owo 70. Edima eka mi esịne kpa do.

Mma mbọn̄ akam isua 17 nyom ibọrọ mbụme mi. Isua 39 ẹbe idahaemi tọn̄ọ Bible ọkọbọrọ mme mbụme mi. Idahaemi nsụk mbọbọn̄ akam, edi ndidọhọ: “Edima Ete mi ke heaven, sọsọn̄ọ nte ọbọrọde akam oro n̄kesibọn̄de toto ke uyen.”

Kpep N̄kpọ En̄wen

Ndi Imekeme Ndikop Inem Uwem?

Nnyịn imekeme ndikere m̀mê owo osụk ekeme ndikop inem uwem ke utọ ererimbot emi afanikọn̄ ọyọhọde ntem.