Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JANUARY 2015

 BIBLE OKPỤHỌDE MME OWO

Bible Ama Ọbọrọ Mme Mbụme Mi

Bible Ama Ọbọrọ Mme Mbụme Mi
  • ISUA AKAMANADE: 1987

  • EBIET OTODE: AZERBAIJAN

  • UBON MMỌ: ETE—OWO MUSLIM; EKA—OWO UFỌKABASI MME JEW

NTE UWEM MI EKETIEDE:

N̄kamana ke Baku ke Azerbaijan. Idi iban iba ndien ami ndi udun̄wan. Ete mi ekedi owo muslim, ndien eka mi ekesika ufọkabasi mme Jew. Ete ye eka mi ẹma ẹma kiet eken ikesinyụn̄ ifịnake idem iban̄a nte mmimọ ikade nsio nsio ufọkabasi. Eka mi ama esibere ye ete mi ke ini utreudia mbon muslim emi ẹkotde Ramadan, ete mi onyụn̄ ebere ye eka mi ke ini enye enịmde usọrọ Passover. Ima inyene Koran, Torah, ye Bible ke ufọk nnyịn.

N̄kabat idemmi nte owo muslim. Okposụkedi emi n̄kenịmde ke Abasi do, enyene mme n̄kpọ oro ẹkesifịnade mi. Mma nsikere ntak emi Abasi okobotde owo nnyụn̄ n̄kere m̀mê nso ikpedi ufọn uwem emi edieke owo ọkpọbọde ufen ofụri eyouwem esie ndien afiak ọkọbọ ke hell ke nsinsi. Sia ẹdọhọde ke kpukpru se itịbede ẹdi uduak Abasi, mma nsikere m̀mê esinenem Abasi nditie nse nte mme owo ẹbọde ufen.

Ke ini n̄kedide isua 12, mma ntọn̄ọ ndibọn̄ akam emi ẹkotde namaz. Mbon muslim ẹsibọn̄ akam emi ikotion ke usen. Ini oro ke ete mi ọkọnọ mi ye adiahaeka mi ika ufọkn̄wed mme Jew. Mma n̄kpep ediwak n̄kpọ do, esịnede usem Hebrew ye nte Torah ọdọhọde ẹdu uwem. Kpukpru usen mbemiso itọn̄ọde ukpepn̄kpọ, ima isibọn̄ akam mme Jew. Ntre, n̄kesibọn̄ akam mbon muslim ke ufọk, ndien ke ufọkn̄wed mbọn̄ akam mme Jew.

Mma nnen̄ede nyom eke ọkpọbọrọde mme mbụme mi. Ntre, mma nsibụp mme andikpep nnyịn ke ufọkn̄wed nte: “Ntak emi Abasi okobotde owo? Abasi ese didie ete mi emi edide owo muslim? Enye edi eti owo, ntre nso inam ẹdọhọ ke enye isanake ke enyịn Abasi? Ntak emi Abasi okobotde enye?” Ibọrọ oro mmọ ẹkenọde mi ikenyeneke ibuot.

NTE BIBLE OKOKPỤHỌREDE UWEM MI:

Enyene se iketịbede ke 2002 emi akanamde ntre ndinịm ke Abasi do. Urua kiet kpọt ke ima ikọwọrọ ikodụn̄ ke Germany, ete mi ama ọduọ akpauben̄ onyụn̄ osụhọ. Mma nsibọn̄ akam ke ata ediwak  isua nte n̄kpọ okûnam owo ndomokiet ke ubon nnyịn. Sia n̄kenịmde ke Abasi ikpọn̄ ekeme ndinịm owo uwem, mma n̄kpe enye ubọk kpukpru usen nte okûyak ete mi akpa. Mma n̄kere ke enye iditreke ndinam eben̄e ekpri eyen nte ami, edi ete mi ama osụk akpa.

Ama abiak mi nte Abasi akayakde ete mi akpa. Mma n̄kere ke anaedi n̄kọbọn̄ke akam oro ọfọn mîdịghe edi ke Abasi idụhe. Ibuot ama oyon̄ mi tutu n̄kemeke aba ndibọn̄ akam mbon muslim oro n̄kesibọn̄de. Ufọkabasi en̄wen ikonyụn̄ idọn̄ke mi, ndien nte ini akade mma mbiere ke Abasi idụhe.

Ke ọfiọn̄ itiokiet ama ekebe, Mme Ntiense Jehovah ẹma ẹdi edem nnyịn. Sia nnyịn mîkabatke mme Christian ke n̄kpọ, ami ye adiahaeka mi ima idọhọ ke imọn̄ iwụt mmọ ke se mmọ ẹnịmde inenke. Ima ibụp mmọ m̀mê nso inam mme Christian ẹsituak ibuot ẹnọ Jesus, cross, Mary, ye ndisọi mbiet ke ini edide Ibet Duop ọdọhọ owo okûnam utọ n̄kpọ oro. Mme Ntiense oro ẹma ẹda Bible ẹwụt nnyịn ke Abasi ọdọhọ ata mme Christian ẹkûtuak ibuot unọ ndisọi mbiet, afiak ọdọhọ ẹsibọn̄ akam ẹnọ imọ ikpọn̄-ikpọn̄. Idem ama akpa mi etieti ndikop emi.

Ekem ima ibụp mmọ ite: “Nso kaban̄a ukpepn̄kpọ Abasi-Ita-ke-Kiet? Edieke Jesus edide Abasi, enye akanam didie edidụn̄ ke isọn̄, mme owo ẹkenyụn̄ ẹsan̄a didie ẹwot enye?” Mmọ ẹma ẹfiak ẹda Bible ẹwụt nnyịn ke Jesus idịghe Abasi inyụn̄ idịghe n̄ka ye Abasi. Mme Ntiense emi ẹma ẹdọhọ ke se inamde mmimọ ikûnịm ukpepn̄kpọ Abasi-Ita-ke-Kiet edi oro. Idem ama akpa mi, mma nnyụn̄ n̄kere m̀mê nso utọ mme Christian idi emi.

Edi n̄kosụk n̄kekere ntak emi mme owo ẹsikpade ye ntak emi Abasi ayakde mme owo ẹbọ ufen. Mme Ntiense emi ẹma ẹwụt mi n̄wed emi ẹkotde Ifiọk Oro Adade Osịm Nsinsi Uwem. * Ibọrọ mbụme mi ama odu ke n̄wed emi. Ntre, ẹma ẹda n̄wed emi ẹkpep mi Bible.

Ini ekededi oro ntiede ye mmọ n̄kpep n̄kpọ, mma nsikụt nte Bible ọbọrọde mbụme mi. Mma ndifiọk ke Abasi ekere Jehovah. (Psalm 83:18) Ata akpan edu esie edi ima. (1 John 4:8) Enye okobot mme owo man mmọ ẹditiene ẹkop inem uwem. Nte ini akakade, mma ndifiọk ke okposụkedi emi Abasi ayakde utụk ye ufịk ẹdu, enye enen̄ede asua utọ n̄kpọ emi ndien ibịghike ọmọn̄ osio mmọ efep ke nsinsi. Mma n̄kpep ke nsọn̄ibuot Adam ye Eve ada ofụri afanikọn̄ emi edi. (Rome 5:12) Kiet ke otu mmọ edi n̄kpa, emi akadade edima ete mi. Edi Abasi eyetre emi ke obufa ererimbot emi enye edinamde mme akpan̄kpa ẹset.—Utom 24:15.

Bible ama ọbọrọ mme mbụme mi. Mma mfiak ntọn̄ọ ndinịm ke Abasi odu. Nte n̄kọtọn̄ọde ndimehe ye Mme Ntiense Jehovah, mma ndikụt ke mmọ ẹdu ke ofụri ererimbot. Nte mmọ ẹdianade kiet ẹnyụn̄ ẹmade kiet eken ama enem mi. (John 13:34, 35) Se n̄kekpepde mban̄a Jehovah ama anam nyom ndinam n̄kpọ esie. Ntre, mma mbiere ndikabade ndi Ntiense Jehovah. Mma nna baptism ke January 8, 2005.

UFỌN ORO MBỌDE:

Se n̄kekpepde ke Bible ama okpụhọde uwem mi. Nte Bible anamde ata ediwak n̄kpọ an̄wan̄a mi anam esịt ana mi sụn̄. Esịt enem mi ndifiọk ke nyafiak n̄kụt ete mi ke ini Abasi edinamde mme owo ẹset. Idotenyịn emi ọsọn̄ọ mi idem.—John 5:28, 29.

Isua itiokiet edi emi tọn̄ọ n̄kọdọ ebe. Ndọ nnyịn enem etieti sia Jonathan ebe mi edi ata owo Abasi. Ami ye enye imokụt ke se Bible etịn̄de aban̄a Abasi esịne ifiọk onyụn̄ an̄wan̄a owo. Idụhe n̄wed emi etiede nte Bible. Ntak edi emi esinemde nnyịn ndinam mme owo ẹfiọk se inịmde ye se Abasi edinamde inọ mme owo ke ini iso. Mmọfiọk ndien ke Mme Ntiense Jehovah ẹdi ata mme Christian.

^ ikp. eki. 15 Mme Ntiense Jehovah ẹkesio, edi owo imịn̄ke aba.

Kpep N̄kpọ En̄wen

Ntak Emi Abasi Okobotde Isọn̄ Emi?

Bible etịn̄ ntak emi Abasi okobotde isọn̄ emi, ini emi ufen editrede, ye nte isọn̄ emi editiede ke ini iso ye mbon oro ẹdidun̄de ke isọn̄ ini oro.