Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JANUARY 2015

Ndi Akpana Isibọn̄ Akam Inọ Jesus?

Ndi Akpana Isibọn̄ Akam Inọ Jesus?

ANAM-NDỤNỌDE kiet ama osion̄o mme uyen ke nsio nsio ufọkabasi obụp m̀mê mmọ ẹnịm ke Jesus esibọrọ akam. Nditọ emi ẹma ẹwak ẹbe owo 800. Mbon oro ẹkedọhọde ke imenịm ke Jesus esibọrọ akam ẹma ẹbe owo 480. Edi enyene eyen kiet emi ọkọsọhide enyịn̄ Jesus ewet “Abasi” ke kpukpru ebiet oro ẹkewetde Jesus ke ndụn̄ọde oro.

Afo ekere didie? Ndi akpana isibọn̄ akam inọ Jesus m̀mê Abasi? * Man ifiọk ibọrọ mbụme emi, ẹyak ibem iso ineme nte Jesus ekekpepde mbet esie ẹsibọn̄ akam.

JESUS ỌKỌDỌHỌ ISIBỌN̄ AKAM INỌ ANIE?

Jesus ama ekpep nnyịn owo emi ikpesibọn̄de akam inọ onyụn̄ ananam owụt.

Jesus ekesibọn̄ akam ọnọ Ete esie eke heaven, ndien enye oyom nnyịn inam kpa ntre

SE ENYE EKEKPEPDE: Ke ini kiet ke otu mbet Jesus ọkọdọhọde enye ekpep mmimọ ndibọn̄ akam, Jesus ọkọbọrọ ete: “Ini ekededi eke mbufo ẹbọn̄de akam, ẹdọhọ ẹte, ‘Ete.’” (Luke 11:1, 2) N̄ko, ke ukwọroikọ oro Jesus ọkọkwọrọde ke obot, enye ama ọdọhọ mbon oro ẹkekpan̄de utọn̄ ẹnọ enye ẹsibọn̄ akam. Enye ọkọdọhọ ete: “Bọn̄ akam nọ Ete fo.” Enye ama ọdọhọ mmọ n̄ko ete: “Ete mbufo ọfiọk mme n̄kpọ emi mbufo ẹyomde idem mbemiso mbufo ẹben̄ede enye.” (Matthew 6:6, 8) Ke okoneyo oro ekesierede usen emi ẹkewotde Jesus, enye ama ọdọhọ mbet esie ete: “Edieke mbufo ẹben̄ede Ete n̄kpọ ekededi enye ọyọnọ mbufo ke enyịn̄ mi.” (John 16:23) Ntem, Jesus ekekpep nnyịn ete isibọn̄ akam inọ Jehovah Abasi, emi edide Ete esie ye Ete nnyịn.—John 20:17.

NTE ENYE AKANAMDE EMI OWỤT: Kpa nte Jesus ekekpepde mme owo, enye ke idemesie ọkọbọn̄ akam ete: “Mmotoro fi an̄wan̄wa, Ete, Ọbọn̄ enyọn̄ ye isọn̄.” (Luke 10:21) Isan̄ en̄wen “Jesus [ama] emenede enyịn esie ese enyọn̄ onyụn̄ ọdọhọ ete: ‘Ete, mmọkọm fi koro afo okopde akam mi.’” (John 11:41) Ndien mbemiso Jesus ọduọkde akpatre ibifịk, enye ama ọbọn̄ akam ete: “Ete, mmayak spirit mi nsịn fi ke ubọk.” (Luke 23:46) Jesus ekesibọn̄ akam ọnọ Ete esie eke heaven, kpa “Ọbọn̄ enyọn̄ ye isọn̄,” ndien enye oyom kpukpru nnyịn inam kpa ntre. (Matthew 11:25; 26:41, 42; 1 John 2:6) Ndi akpa mme Christian ẹma ẹsinam ntem n̄ko?

AKPA MME CHRISTIAN ẸKESIBỌN̄ AKAM ẸNỌ ANIE?

Urua ifan̄ ke Jesus ama akafiak ọnyọn̄ heaven, ẹma ẹkọbọ ẹnyụn̄ ẹfịna mbet esie etieti. (Utom 4:18) Mmọ ẹma ẹbọn̄ akam ẹyom un̄wam, edi mmọ ẹkebọn̄ akam emi ẹnọ anie? Bible ọdọhọ ke mmọ ẹma “ẹmenede uyo mmọ ye esịt kiet ẹdọhọ Abasi” aka iso an̄wam mmimọ. Ndien mmọ ẹkenam emi “ke enyịn̄ edisana asan̄autom [esie] Jesus.” (Utom 4:24, 30) Ọwọrọ mbet Jesus ẹma ẹnam se Jesus ọkọdọhọde mmọ ẹsinam ke ini ẹbọn̄de akam. Mmọ ẹkesibọn̄ akam ẹnọ Abasi, ibọn̄ke inọ Jesus.

Ediwak isua ke ukperedem, apostle Paul ama etịn̄ nte imọ ye mbet eken ikesibọn̄de akam. Kop se enye ekewetde mi ọnọ mme Christian nte enye: “Nnyịn imesikọm Abasi kpa Ete Ọbọn̄ nnyịn Jesus Christ kpukpru ini ke ini ibọn̄de akam iban̄a mbufo.” (Colossae 1:3) Paul ama ewet n̄ko ọnọ mme Christian aban̄a ‘ndinọ Abasi ye Ete nnyịn ekọm kpukpru ini mban̄a kpukpru n̄kpọ ke enyịn̄ Ọbọn̄ nnyịn Jesus  Christ.’ (Ephesus 5:20) Emi owụt ke enye okoyom mmọ ‘ẹsinọ Abasi ye Ete nnyịn ekọm kpukpru ini ẹban̄a kpukpru n̄kpọ,’ edi ẹnam emi ke enyịn̄ Jesus.—Colossae 3:17.

Ukem nte akpa mme Christian, nnyịn imekeme ndiwụt ke imama Jesus ke ndinam se enye ọkọdọhọde isinam ke ini ibọn̄de akam. (John 14:15) Edieke ibọn̄de akam inọ Ete nnyịn eke heaven ikpọn̄-ikpọn̄, ikọ Psalm 116:1, 2 oyosu nnyịn ke idem: “Mmama, koro Jehovah okopde uyo mi . . . Ami nyonyụn̄ nseme n̄kot enye ke ofụri usen uwem mi.” *

^ ikp. eki. 3 Bible ọdọhọ ke Abasi ye Jesus idịghe n̄ka. Edieke oyomde ndifiọk n̄kpọ en̄wen mban̄a emi, mbọk kot ibuot 4 ke n̄wed Mme Ntiense Jehovah emi Nso ke Bible Enen̄ede Ekpep?

^ ikp. eki. 11 Edieke iyomde Abasi okop akam nnyịn, ana inam ofụri se ikekeme man idu uwem nte enye ọdọhọde. Edieke oyomde ndifiọk n̄kpọ en̄wen mban̄a emi, mbọk kot ibuot 17 ke n̄wed emi Nso ke Bible Enen̄ede Ekpep?

Kpep N̄kpọ En̄wen

Ndi Abasi Ayan̄wam Mi Edieke Mbọn̄de Akam?

Ndi mfịna nnyịn ebehe Abasi?