Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JANUARY 2015

Ndi Ama Ọfiọk?

Ndi Ama Ọfiọk?

Mmanie ke Bible okot eunuch?

Ndise mbon Assyria emi owụtde eunuch

Ndusụk ini, ẹsikot owo emi ẹsiode enye osio eunuch. Ke eyo Bible, ufen oro ẹkesinọde ndusụk owo ekedi ndisio mmọ osio. Ẹma ẹsinyụn̄ ẹsio ifụn ye mbon oro ẹmụmde ke ekọn̄ osio. Mbon en̄wen oro ẹkesisiode osio ẹkedi iren emi ẹkpemede iban edidem. Ke uwụtn̄kpọ, Hegai ye Shaashgaz emi Bible okotde eunuch edidem ẹkedi mme andikpeme iban Ahasuerus edidem Persia emi ẹdọhọde ke enye ekedi Xerxes I.—Esther 2:3, 14.

Edi idịghe kpukpru mbon oro ẹkotde eunuch ke ẹkesisio osio. Ndusụk mme anam-ndụn̄ọde mban̄a Bible ẹdọhọ ke ẹma ẹsikot owo emi anamde utom ke okụre edidem eunuch n̄ko. Etie nte utọ eunuch emi ke Ebed-melech ufan Jeremiah ekedi. Ukem oro ye owo Ethiopia emi Bible mîsiakke enyịn̄, emi Philip ọkọkwọrọde ikọ ọnọ. Etie nte Ebed-melech ekedi akwa owo ke okụre edidem sia enye ekesidu ye Edidem Zedekiah. (Jeremiah 38:7, 8) Ndien Bible ọdọhọ ke owo Ethiopia emi ekesisede aban̄a ofụri inyene ọbọn̄ an̄wan Ethiopia mi “akaka Jerusalem ndikatuak ibuot nnọ Abasi.”—Utom 8:27.

Ntak emi mme ekpemerọn̄ ke eyo Bible ẹkesibaharede erọn̄ ye ebot?

Ke ini Jesus eketịn̄de aban̄a ini ikpe oro edidide, enye ọkọdọhọ ete: “Ke ini Eyen owo edidide ke ubọn̄ esie, . . . enye [ayabahade] mme owo kiet ye eken, kpa nte ekpemerọn̄ abaharede erọn̄ ye ebot.” (Matthew 25:31, 32) Ntak emi mme ekpemerọn̄ ẹkesibaharede erọn̄ ye ebot?

Mme ekpemerọn̄ ẹma ẹsiyak erọn̄ ye ebot ẹsan̄a ntre uwemeyo ẹta mbiet. Edi ke okoneyo, mmọ ẹma ẹsiyom ẹbiet ẹdọn̄ mmọ mbak idiọk unam, inọ, m̀mê tuep. (Genesis 30:32, 33; 31:38-40) Ẹkesidọn̄ erọn̄ ye ebot nsio nsio mbak ebot edituak erọn̄ owot, akpan akpan uman erọn̄ ye eyenerọn̄. N̄wed emi ẹkotde All Things in the Bible ọdọhọ ke mme ekpemerọn̄ ẹma ẹsinyụn̄ ẹbahade erọn̄ ye ebot ke ini mmọ “ẹyomde ndiman nditọ, ke ini ẹyomde ndisio mmọ mmọn̄eba, ye ke ini ẹyomde ndifat mmọ idet.” Sia ediwak owo ke Israel ẹkedide mme ekpemerọn̄, uwụtn̄kpọ erọn̄ ye ebot oro Jesus ọkọnọde mi ama etịm an̄wan̄a mbon oro ẹkekpan̄de utọn̄ ẹnọ enye.