Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JANUARY 2015

Mme Ebe—Ẹnam Ufọk Mbufo Enem

Mme Ebe—Ẹnam Ufọk Mbufo Enem

NSO ke ebe akpanam man n̄wan esie okop inemesịt? Ediwak owo ẹkpokpon ẹdikop ẹdọhọde ke ata akpan n̄kpọ emi ebe akpanamde ọnọ ubon esie edi ndinọ mmọ okụk. Edi ndusụk iban emi ẹnyenede ediwak inyene isụk ikopke inemesịt, ndusụk ẹsikam ẹkop ndịk. Ke uwụtn̄kpọ, Rosa emi otode Spain etịn̄ ntem aban̄a ebe emi enye ọkọdọde: “Ke an̄wa, mme owo ẹma ẹsima enye ntem, edi ke ufọk, enye ama ọsọn̄ ido etieti.” Joy emi otode Nigeria ọdọhọ ete: “Ekesidi mmenyịmeke se ebe mi etịn̄de, enye ọdọhọ ete: ‘Nam se ndọhọde, ami ndi uberi.’”

Didie ke ebe akpanam n̄kpọ ye n̄wan esie ke usụn̄ emi owụtde ke enye ama enye? Nso ke ebe akpanam man ufọk esie enem onyụn̄ edi “ebiet nduọkodudu” ọnọ n̄wan esie?—Ruth 1:9.

SE BIBLE ETỊN̄DE ABAN̄A ODUDU EMI ABASI ỌNỌDE MME EBE

Imọdiọn̄ọ ke Abasi ada n̄wan ye ebe ukem ukem, edi Bible owụt ke utom emi Abasi ọnọde ebe okpụhọde ye eke n̄wan. Rome 7:2 ọdọhọ ke n̄wan odu ke idak “ibet ebe esie.” Ukem nte ediwak itieutom ẹsimekde owo emi edidide ibuot man enye ekpese aban̄a se ẹnamde ke itieutom oro, kpasụk ntre, Abasi ọdọhọ ebe edi ibuot ọnọ n̄wan esie. (1 Corinth 11:3) Ntem, mme ebe ẹkpenyene ndise enyịn ke se ẹnamde ke ufọk mmọ.

Mme ebe, didie ke ẹkpeda odudu emi Abasi ọnọde mbufo mi ẹnam n̄kpọ? Bible ọdọhọ “ẹka iso ẹma iban mbufo, kpa nte Christ n̄ko akamade esop.” (Ephesus 5:25) Okposụkedi emi Jesus Christ mîkọdọhọ ndọ, uwụtn̄kpọ esie ekeme ndin̄wam mbufo ẹdi nti ebe. Ẹyak ise nte emi edide ntre.

ETI UWỤTN̄KPỌ EMI JESUS EKENỊMDE ỌNỌ MME EBE

Jesus ama esidọn̄ mme owo esịt onyụn̄ an̄wam mmọ. Jesus ama ọdọhọ kpukpru mbon oro mfịna uwem efịkde mmọ ete: “Ẹtiene mi, . . . ndien nyọnọ mbufo nduọkodudu.” (Matthew 11:28, 29) Enye ama esikọk mme owo udọn̄ọ onyụn̄ an̄wam mmọ ẹkpere Jehovah. Imosụk ise ediwak owo ẹkesikade ẹbịne Jesus sia mmọ ẹma ẹnịm ke enye ayanam mbiomo mmimọ efere.

Nte mme ebe ẹkpekpebede Jesus. Yom usụn̄ nam mbiomo efere n̄wan fo. Mma kiet emi ekerede Rosa ama eseme  idem ete: “N̄ketie nte ofụn nnọ ebe mi.” Nte onyụn̄ etiede ediwak iban edi emi. Edi ete kiet emi ekerede Kweku, emi okopde inem ndọ esie, ọdọhọ ete: “Mmesiwak ndibụp n̄wan mi se n̄kpanamde man mbiomo esie afiak efere. Mmama enye, ntre mmesitiene nnam utom esịtufọk, mbetke-bet enye ọdọhọ n̄n̄wam imọ.”

Jesus ama esikere aban̄a mme owo onyụn̄ atua mmọ mbọm. Mma kiet ama ọdọn̄ọ ata idiọk udọn̄ọ ke isua 12. Ke ini enye okopde ke Jesus enyene odudu ndinam udọn̄ọ okụre owo, enye ama ọdọhọ ete: “Mma n̄kam ntotụk ekpedi ewụra esie nyokop nsọn̄idem.” Se ikonyụn̄ itịbede edi oro. Enye ama aka okotụk nyeriye ewụra Jesus, idem onyụn̄ ọsọn̄ enye. Okposụkedi emi etiede nte ndusụk mbon oro ẹkedude do ẹma ẹkere ke ikpanaha mma oro anam utọ n̄kpọ oro, Jesus ama okụt ke enyịn akanan enye. * Jesus ama ọdọhọ enye ete: “Eyenan̄wan, . . . bọhọ idiọk udọn̄ọ fo nyụn̄ kop nsọn̄idem.” Jesus ikasuaha inọ enye ikonyụn̄ isueneke enye, edi ama ọdiọn̄ọ ke udọn̄ọ  akanam enye anam se enye akanamde oro. Emi owụt ke Jesus ama esitua owo mbọm.—Mark 5:25-34.

Nte mme ebe ẹkpekpebede Jesus. Edieke idem mînemke n̄wan fo, nyene ime ye enye nyụn̄ wụt ke emenen̄ede ekere aban̄a enye. N̄wana ndifiọk nte etiede enye ke idem ye se inamde enye anam n̄kpọ nte enye anamde oro. Ke uwụtn̄kpọ, Ricardo ọdọhọ ete: “Ke ini n̄kụtde ke etie nte kpukpru n̄kpọ ayayat n̄wan mi, mmesinam ofụri se n̄kekeme man n̄kûtịn̄ se ididiọn̄de-diọn̄ iyat enye.”

Jesus ama esineme nneme ye mme mbet esie. Jesus ama esinen̄ede eneme nneme ye mme ufan esie. Enye ọkọdọhọ ete: “Kpukpru n̄kpọ oro n̄kopde nto Ete mi mmanam mbufo ẹfiọk.” (John 15:15) Imọfiọk ke ndusụk ini Jesus ama esiyom ndidu ikpọn̄ n̄kere n̄kpọ nnyụn̄ mbọn̄ akam. Edi enye ama esitịn̄ nte etiede enye ke idem ọnọ mme mbet esie. Ke uwụtn̄kpọ, ke okoneyo oro ekesierede usen oro ẹkewotde Jesus nte ẹsiwotde mme abiatibet, enye ama ọdọhọ mmọ ke imọ ‘imofụhọ etieti.’ (Matthew 26:38) Idem ke ini mmọ ẹkenamde se mînemke enye, enye ikodopke mme ufan esie uyo.—Matthew 26:40, 41.

Nditie n̄kere uwụtn̄kpọ Jesus ekeme ndinam owo edi eti ebe ye eti ete

Nte mme ebe ẹkpekpebede Jesus. Sitịn̄ se afo ekerede ye nte etiede fi ke idem nọ n̄wan fo. Ndusụk iban ẹkeme ndidọhọ ke ebe mmimọ ẹsineme nneme ye mme owo ke an̄wa, edi inemeke ke ufọk. Mma kiet emi ekerede Ana ọdọhọ ke esinem imọ ke ini ebe imọ etịn̄de se enye ekerede ye nte etiede enye ke idem ọnọ imọ. Enye ọdọhọ ete: “Mmesida emi mfiọk ke enye enen̄ede ama mi, ndien emi esinam nnen̄ede n̄kpere enye.”

Kûdop n̄wan fo uyo man abiak enye. Mma kiet ọdọhọ ete: “Ke ini ebe mi ayatde esịt ye ami, enye isisioroke mi uyo ke ediwak usen. Emi esinam esịt amia mi ufen, onyụn̄ anam etie nte ndịghe n̄kpọ ndomokiet.” Edi Edwin esidomo ndikpebe Jesus. Enye ọdọhọ ete: “Nsinemeke n̄kpọ ye n̄wan mi ke ini esịt ayatde mi. Mmesibet tutu esịt osụhọ mi ndien nnyịn itie ntre ineme n̄kpọ oro.”

Joy oro iketịn̄de iban̄a ke ntọn̄ọ okụt ke ebe esie okpụhọde tọn̄ọ enye ọkọtọn̄ọ ndikpep Bible ye Mme Ntiense Jehovah. Joy ọdọhọ ete, “Enye okpụhọde, ke onyụn̄ an̄wana ndikpebe Jesus nnyụn̄ ndi eti ebe.” Ata ediwak mme ọdọ ndọ ke ẹkpep Bible ye Mme Ntiense Jehovah. Ndi afo akpama nditiene n̄kpep? Emekeme ndidọhọ Mme Ntiense Jehovah ke imoyom ndikpep Bible.

^ ikp. eki. 10 Ke Ibet Moses, owo emi ọdọn̄ọde utọ udọn̄ọ emi ama edehe, ndien owo ekededi emi enye otụkde ama edehe n̄ko.—Leviticus 15:19, 25.

Kpep N̄kpọ En̄wen

Nso Idi Ukpepn̄kpọ Bible

Kot ibọrọ ediwak mbụme emi ẹsibụpde ẹban̄a ndutịm ukpep Bible nnyịn.

Nso ke Akpanam man Ubon Fo Ẹkop Inemesịt?

Jehovah, emi edide Abasi inemesịt oyom mme ubon ẹkop inemesịt. Se nti item emi Bible ọnọde mme ebe, ibanndọ, mme ete ye eka, ye nditọ.