Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME DECEMBER 2014

 MME ANDIKOT N̄WED NNYỊN ẸBỤP ẸTE . . .

Nso ke Ikpọfiọk Iban̄a Christmas?

Nso ke Ikpọfiọk Iban̄a Christmas?

Enyene nsio nsio ntak emi ata ediwak owo ke ofụri ererimbot ẹsidiade Christmas. Ndusụk owo ẹsida ini emi ẹtie ye mme ufan ye ubon mmọ ẹdia usọrọ. Mbon en̄wen ẹda ini emi ẹkere ẹban̄a Abasi mîdịghe ẹn̄wam mme ubuene. Idịghe nte ọdọdiọk ndinam mme n̄kpọ emi. Edi edieke ọdiọn̄ọde nte Christmas ọkọtọn̄ọde, ayafiak ekere m̀mê osụk ọfọn esinam mme n̄kpọ emi ke ini Christmas.

Akpa kan̄a, ediwak mbon emi ẹsidiade Christmas ẹkere ke Christmas edi usọrọ usen emana Jesus. Edi mme ewet mbụkeset ke nsio nsio itie ẹnyịme ke owo idiọn̄ọke usen emi Jesus akamanade. N̄wed emi ẹkotde The Christian Book of Why ọdọhọ ke “akpa mme Christian ikamaha ndisio usen nnịm nte usen emana Jesus” sia mmọ “ikoyomke nditiene nnam se mme okpono ndem ẹsinamde.” Inyụn̄ idụhe itie ndomokiet ke Bible emi ọdọhọde ke Jesus ama anam usọrọ usen emana esie m̀mê eke owo en̄wen. Jesus akakam ọdọhọ mme mbet esie ẹsiti n̄kpa imọ.—Luke 22:19.

Ọyọhọ iba, ediwak nta mme anam-ndụn̄ọde ẹdọhọ ke mbon oro mîdịghe Christian m̀mê mme okpono ndem ẹketọn̄ọ ata ediwak n̄kpọ emi ẹsinamde ke ini Christmas. Emi esịne Santa Claus emi ediwak owo ẹkotde Father Christmas; esịne n̄ko ndinyene eto Christmas, ndinọ nnyụn̄ mbọ enọ, ndifọp tiande, ndikọn̄ m̀mê ndinịm flawa Christmas ke ufọk, ndinyụn̄ n̄kwọ ikwọ Christmas. Kop se n̄wed emi ẹkotde The Externals of the Catholic Church etịn̄de mi aban̄a mme n̄kpọ emi: “Ke ini inọde m̀mê ibọde owo n̄kpọ ke ini Christmas inyụn̄ ikọn̄de ndiye flawa ke ufọk nnyịn ye ke ufọkabasi, owo ifan̄ isidiọn̄ọ ke inam se mme okpono ndem ẹkesinamde?”

“Ke ini inọde m̀mê ibọde owo n̄kpọ ke usen Christmas inyụn̄ ikọn̄de ndiye flawa ke ufọk nnyịn ye ke ufọkabasi, owo ifan̄ isidiọn̄ọ ke inam se mme okpono ndem ẹkesinamde?” —The Externals of the Catholic Church

Edi afo emekeme ndikere m̀mê nso idiọk ke ndinyụn̄ ntiene nnam n̄kpri n̄kpọ ntem. Ọyọhọ n̄kpọ ita emi iyomde ndineme mi ayan̄wam fi. Abasi iyomke nnyịn inam se mme okpono ndem ẹsinamde ke ini ikponode Enye. Jehovah Abasi ama ọdọn̄ Amos, emi ekedide prọfet esie, ọkọdọhọ nditọ Israel emi mîkamaha ndikpono enye nte enye oyomde, ete: “Mmasua mmonyụn̄ nsịn mme usọrọ mbufo . . . Men uyom ikwọ fo kpọn̄ mi.”—Amos 5:21, 23.

Nso ikanam Abasi ayat esịt ntem ye mmọ? Yak ise nte nditọ Israel emi ẹkedude ke obio ubọn̄ edem edere ẹkenamde n̄kpọ. Jeroboam emi ekedide akpa edidem mmọ ama ada gold anam nditọ enan̄ iba, enịm kiet ke Bethel onyụn̄ enịm enye eken ke Dan. Enye ama anam mme owo ẹtuak ibuot ẹnọ eyen enan̄ oro utu ke ndiyak mmọ ẹka Jerusalem ẹketuak ibuot ẹnọ Jehovah Abasi ke temple. Edidem emi ama ẹsinịm mme usọrọ onyụn̄ emek mme oku emi ẹdin̄wamde mme owo ke ini usọrọ emi.—1 Ndidem 12:26-33.

Se nditọ Israel ẹkenamde emi ikọdiọkke mmọ ke enyịn. Mmọ ẹkekere ke Abasi ke mmimọ ikpono oro, ke enye eyenem esịt ke se mmimọ inamde. Edi se Abasi ọkọdọhọde Amos ye mme prọfet eken ẹtịn̄ ye mmọ owụt ke Abasi ikamaha se mmọ ẹkenamde oro. Ndien Abasi ọdọhọ ke Malachi 3:6 ete: “Ami ndi Jehovah; ami n̄kpụhọkede.” Ekere ke Abasi ese didie ofụri se mme owo ẹsinamde mfịn ke ini Christmas?

Ke ata ediwak owo ẹma ẹkekere ẹban̄a se inemede emi, mmọ ẹbiere ke mmimọ ididiaha Christmas. Mmọ ẹnen̄ede ẹkop inemesịt ndisitie ye mme ufan ye ubon mmọ nnyụn̄ n̄n̄wam mme ubuene ini ekededi emi mmọ ẹmade ke isua.

 

Kpep N̄kpọ En̄wen

Ntak Emi Mme Ntiense Jehovah Mîsidiaha Christmas?

Ediwak owo ẹsidia Christmas kpa ye oro ẹfiọkde nte enye ọkọtọn̄ọde. Yom ntak emi Mme Ntiense Jehovah mîsidiaha.