Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME DECEMBER 2014

 IBUOTIKỌ IKPAEDEM | AFO EMEKEME NDIKPERE ABASI

Ndi Ọmọfiọk Enyịn̄ Abasi Esinyụn̄ Okot Enye?

Ndi Ọmọfiọk Enyịn̄ Abasi Esinyụn̄ Okot Enye?

Ndi enyene ufan fo emi mûdiọn̄ọke enyịn̄ esie? Itiehe nte odu. Mma kiet ke Bulgaria emi ekerede Irina ọkọdọhọ ke “owo ikemeke ndikpere Abasi edieke enye mîdiọn̄ọke enyịn̄ esie.” Se enye etịn̄de emi edi akpanikọ. Nte ima iketetịn̄ ke akpa ibuotikọ, Abasi oyom fi asan̄a ekpere imọ. Ntre, enye ada Bible anam fi ọdiọn̄ọ owo emi imọ idide. Se se enye ọdọhọde mi: “Ami ndi Jehovah. Enyịn̄ mi edi oro.”—Isaiah 42:8.

Abasi ada Bible anam fi ọdiọn̄ọ owo emi imọ idide. Se se enye ọdọhọde mi: “Ami ndi Jehovah. Enyịn̄ mi edi oro.”—Isaiah 42:8

Ndi Jehovah enen̄ede oyom ọdiọn̄ọ enyịn̄ imọ esinyụn̄ okot imọ ke enyịn̄? Kere ise: Enyịn̄ Abasi (emi edide abisi inan̄ ke akpasarade usem Hebrew) odu n̄kpọ nte itie 7,000 ke N̄wed Abasi Usem Hebrew. Idụhe enyịn̄ en̄wen emi ẹsiakde awak ntem ke Bible. Emi owụt ke Jehovah oyom nnyịn idiọn̄ọ enyịn̄ imọ isinyụn̄ ikot imọ ke enyịn̄. *

Owo iba emi ẹyomde ndidi ufan ẹsibem iso ẹsiak enyịn̄ mmọ ẹnọ kiet eken. Ndi afo ọmọfiọk enyịn̄ Abasi?

Edi ndusụk owo ẹkeme ndikere ke sia Jehovah edide edisana ye Ata Ọkpọsọn̄ Abasi, ke edi usọn̄enyịn ndikot enye ke enyịn̄. Edi akpanikọ ke ifọnke ndida enyịn̄ Abasi nnam ndisịme, kpa nte mûkpadaha enyịn̄ ufan fo unam ebiọ. Edi Jehovah oyom mbon oro ẹmade enye ẹkpono enyịn̄ esie ẹnyụn̄ ẹnam mme owo ẹfiọk enyịn̄ emi. (Psalm 69:30, 31; 96:2, 8) N̄kọ emeti ke Jesus ekekpep mbet esie ndibọn̄ akam ntem: “Ete nnyịn emi odude ke heaven, yak ẹnam enyịn̄ fo asana.” Nnyịn imekeme nditiene nnam enyịn̄ Abasi asana edieke inamde mme owo ẹdiọn̄ọ enyịn̄ emi. Emi ayanam inen̄ede ikpere Abasi.—Matthew 6:9.

Bible ọdọhọ ke Abasi esikpan̄ utọn̄ ọnọ “mbon oro ẹkerede ẹban̄a enyịn̄ esie.” (Malachi 3:16) Kop se Jehovah ọdọhọde mi aban̄a utọ owo oro: “Ami nyekpeme enye koro enye ọfiọkde enyịn̄ mi. Enye eyeseme okot mi, ndien ami nyeyere enye. Nyodu ye enye ke ini nnanenyịn.” (Psalm 91:14, 15) Edieke iyomde ndidi ufan Abasi, ana ifiọk enyịn̄ esie isinyụn̄ ikot enye.

^ ikp. eki. 4 Okposụkedi emi enyịn̄ Abasi odude ediwak itie ntem ke N̄wed Abasi Usem Hebrew emi ẹsikotde Akani Testament, ẹsion̄o enyịn̄ Abasi ẹfep ke ediwak Bible, ẹkabade ẹmen “Ọbọn̄” m̀mê “Abasi” ẹdọn̄ ke mme itie emi Jehovah okodude. Edieke oyomde ndifiọk n̄kpọ en̄wen mban̄a emi, mbọk kot n̄wed Mme Ntiense Jehovah emi Nso ke Bible Enen̄ede Ekpep? pages 195 esịm 197.