Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME NOVEMBER 2014

 IBUOTIKỌ IKPAEDEM | NDI SATAN ODU?

Ndi Akpana Ifehe Satan?

Ndi Akpana Ifehe Satan?

Carbon monoxide ekeme ndinam fi n̄kpọ kpa ye oro mûkemeke ndikụt enye—Satan etie ntre n̄ko

Enyene idiọk ofụm emi ẹkotde carbon monoxide. Sia enye mînyeneke utebe, ọsọsọn̄ ndifiọk ebiet emi enye odude. Ntem, ofụm emi esiwot mme owo idiọk idiọk. Edieke ẹbaharede kpukpru mbon emi idiọk ofụm owotde ke itie iba, carbon monoxide owot itie kiet. Edi kûyak idem enyek fi. Enyene n̄kpọ emi mme owo ẹsisịnde ke ufọk, ndien edieke carbon monoxide okponde ke ufọk oro, n̄kpọ oro ayanam mmọ ẹdiọn̄ọ.

Satan etie nte idiọk ofụm emi. Owo ikemeke ndida ata enyịn n̄kụt enye. Edi Abasi enyịme ndin̄wam nnyịn. Edieke afo anamde se Abasi ọdọhọde onyụn̄ ọbọde ufọn oto mme n̄kpọ emi enye ọnọde fi, udufeheke Satan. Se ndusụk se Abasi anamde ọnọ fi mi:

Abasi ọnọ fi ifụre ndimek se edinamde. James 4:7 ọdọhọ nnyịn ete: “Ẹbiọn̄ọ Devil, ndien enye eyefehe ọkpọn̄ mbufo.” Okposụkedi emi Satan enen̄erede enyene odudu, enye ikemeke ndinyịk fi anam se mûyomke ndinam. Abasi ọnọ fi ifụre ndimek se edinamde. Akpa Peter 5:9 ọdọhọ ete: “Ẹsọn̄ọ ẹda ke mbuọtidem, ẹn̄wana ye enye [Devil].” Ti ke Satan ama adaha ọkpọn̄ Jesus ke Jesus ama ekebe idomo esie ikata. (Matthew 4: 11) Afo n̄ko emekeme ndibe mme idomo esie edieke emekde.

Abasi ọdọhọ edi ufan imọ. James 4:8 ọdọhọ ‘isan̄a ikpere Abasi.’ Ọwọrọ Jehovah ọdọhọ fi edi ufan imọ. Didie ke afo ekeme ndinam emi? Tọn̄ọ ke ndikpep n̄kpọ mban̄a enye ke Bible. Mfọnn̄kan usụn̄ edi emi. (John 17:3) Se afo edikpepde iban̄a Jehovah ayanam ama enye, ndien ima emi ayanam enịm mme ewụhọ esie. (1 John 5:3) Nte afo asan̄ade ekpere Ete fo eke heaven, Bible ọdọhọ ke enye “ayasan̄a ekpere” fi n̄ko.

Jehovah anam ediwak n̄kpọ ọnọ fi man ekpeme fi

Abasi ọdọhọ ke iyekpeme fi. Mme N̄ke 18:10 ọdọhọ ete: “Enyịn̄ Jehovah edi ọkpọsọn̄ tọwa. Edinen owo efehe odụk ke esịt ndien ẹkpeme enye.” Emi iwọrọke ke enyịn̄ Abasi etie nte n̄kpọ n̄kpemeidem, edi ọwọrọ ke mbon oro ẹnen̄erede ẹkpono enyịn̄ Abasi ẹkeme ndiseme n̄kot Abasi ini ekededi nnyụn̄ ndọhọ enye ekpeme mmimọ.

Abasi anam inyene eti uwụtn̄kpọ. Utom 19:19 etịn̄ se mbon oro ẹkekabarede ẹdi Christian ẹkenamde ke Ephesus. Itie oro ọdọhọ ete: “Ediwak mmọ emi ẹkesibrede mfọni ẹtan̄ n̄wed mmọ ẹbon ọtọkiet ẹnyụn̄ ẹfọp mmọ ke iso kpukpru owo. Ndien mmọ ẹbat ekọmurua mmọ ẹnyụn̄ ẹkụt ke  ẹdi mbak silver tọsịn aba ye duop.” * Mme Christian emi ẹma ẹfọp kpukpu n̄kpọ ibọk mmọ, ikereke m̀mê edi okụk ifan̄. Ata eti uwụtn̄kpọ ke mmọ ẹkenịm oro ẹnọ nnyịn. Ẹkọk ibọk etieti ke ererimbot emi ẹnyụn̄ ẹbụp ekpo. Ndinyene n̄kpri n̄kpri n̄kpọ ibọk m̀mê nditiene nnam n̄kpri n̄kpri n̄kpọ emi mbon ibọk ẹsinamde ekeme ndinam mme demon ẹdifịna nnyịn. Ntre, sion̄o idem kpọn̄ utọ n̄kpọ oro ọkpọkọm edikpa fi nso!—Deuteronomy 18:10-12.

Rogelio oro iketịn̄de iban̄a ke akpa ibuotikọ ke Enyọn̄-Ukpeme emi ikenịmke ke Satan odu tutu enye esịm isua 50. Edi enye ama afiak etie ekere n̄kpọ emi. Ntak-a? Rogelio ọdọhọ ete: “Akpa ini ekedi emi ami ndinyene Bible. Se n̄kekpepde ke N̄wed Abasi ama anam nnịm ke Devil do. Kpa emi onyụn̄ anam ndiọn̄ọ nte ndude uwem mbak Satan edida mi anam se enye amama.”

“Se n̄kekpepde ke N̄wed Abasi ama anam nnịm ke Devil do. Kpa emi onyụn̄ anam ndiọn̄ọ nte ndude uwem mbak Satan edida mi anam se enye amama”

Afo emekeme ndidu uwem n̄kụt ini emi Satan mîdidụhe aba. Bible ọdọhọ ke ini ke edi emi ẹditopde Devil emi otụnde ediwak owo usụn̄ ẹsịn ke “n̄kpọdiọhọ ikan̄ eke asakde ye sulphur.” (Ediyarade 20:10) N̄kọ ọmọfiọk ke ata ikan̄ ikemeke ndita owo emi edide spirit. Ntem, n̄kpọdiọhọ ikan̄ oro ada aban̄a nsinsi nsobo. Satan ididụhe aba ke nsinsi. Nso n̄kpọ idara ke emi edidi ntem ọnọ ikọt Abasi!

Kan̄a ke emi, ka iso kpep ofụri se ekekeme ban̄a Jehovah ye usụn̄ esie. * Kere nte editiede fi ke idem ndidu uwem ke ini emi Satan mîdidụhe aba!

^ ikp. eki. 8 Edieke silver emi ẹtịn̄de mi ekedide denarius mbon Rome, ọwọrọ okụk emi ama awak ekem ndikpe owo 50,000 okụkutom usen kiet.

^ ikp. eki. 11 Edieke oyomde ndifiọk n̄kpọ en̄wen mban̄a Satan ye nte Abasi esede ubụpekpo, mbọk kot ibuot 10 ke n̄wed emi Nso ke Bible Enen̄ede Ekpep? Dọhọ owo ekededi ke otu Mme Ntiense Jehovah ọnọ fi n̄wed emi mîdịghe kot enye ke ikpehe Intanet emi www.jw.org/efi.

Kpep N̄kpọ En̄wen

Ntak Emi Abasi Okobotde Isọn̄ Emi?

Bible etịn̄ ntak emi Abasi okobotde isọn̄ emi, ini emi ufen editrede, ye nte isọn̄ emi editiede ke ini iso ye mbon oro ẹdidun̄de ke isọn̄ ini oro.