Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  November 2014

 EDINYENE NNEME YE MBỌHỌIDỤN̄

Ini Ewe ke Obio Ubọn̄ Abasi Ọkọtọn̄ọ Ndikara? (Ọyọhọ Ikpehe Iba)

Ini Ewe ke Obio Ubọn̄ Abasi Ọkọtọn̄ọ Ndikara? (Ọyọhọ Ikpehe Iba)

Mbiet nneme emi ke Mme Ntiense Jehovah ẹsineme ye mbọhọidụn̄ mmọ. Ẹyak ida ke Ntiense emi ekerede Caleb afiak aka ufọk mme John.

NDAP NEBUCHADNEZZAR—SE IMA IKENENEME

Caleb: John, esịt enem mi ndifiak ndisobo ye afo. Mmesima nte isitiede ntre ikpep Bible. * Idem-e?

John: Eyeneka mi, idem do.

Caleb: Enem mi ndikop oro. Isan̄ oko, ima ineme ntak emi Mme Ntiense Jehovah ẹdọhọde ke Obio Ubọn̄ Abasi ọkọtọn̄ọ ndikara ke 1914. * Nte iketịn̄de, enyene se ikụtde ke Daniel ibuot 4 emi owụtde ke Obio Ubọn̄ ọkọtọn̄ọ ndikara isua oro. Emeti se itie oro etịn̄de?

John: Etịn̄ aban̄a ndap oro Edidem Nebuchadnezzar akadabade aban̄a akamba eto.

Caleb: Ntre ke edi. Ke ndap oro, Nebuchadnezzar ama okụt akamba eto emi ọniọn̄de esịm ikpaenyọn̄. Ekem enye ama okop isụn̄utom Abasi ọdọhọde ẹkek eto oro ẹduọk, edi yak ẹyak etak esie osụk odu ke isọn̄. Abasi ama ọdọhọ n̄ko ke eto emi edifiak ikọri ke “ini itiaba” ama ekebe. * Ima ineme n̄ko ntak emi idọhọde ke prọfesi emi okosu ikaba. Ndi emeti owo emi prọfesi emi ekebemde iso osu enye ke idem?

John: N̄kọ okosu Nebuchadnezzar ke idem? Enye ikọdiọn̄ọke idem aba ke isua itiaba.

Caleb: Emenen. Nebuchadnezzar ikọdiọn̄ọke idem aba, ntre ukara esie ama etre kan̄a. Ke ini prọfesi emi akafiakde osu, eketie nte n̄kpọ eke ukara Abasi etrede kan̄a ke ini itiaba. Nte ima ikokụt, ini itiaba oro ọkọtọn̄ọ ke ini emi ẹkesobode Jerusalem ke isua 607 mbemiso Christ. Ọtọn̄ọde ke ini oro, edidem ndomokiet ke isọn̄ ikakarake ikọt Jehovah Abasi aba inọ Enye. Edi ke ini emi ini itiaba oro esịmde utịt, akana Abasi emek owo en̄wen emi edikarade ikọt Esie. Isan̄ emi enye ekemek owo ke heaven. Ke nditịn̄ ke usụn̄ en̄wen, Obio Ubọn̄ Abasi ekenyene nditọn̄ọ n̄kara ke heaven ke ini emi ini itiaba emi etrede. Ima ineneme ini emi ini itiaba emi ọkọtọn̄ọde. Ntre, edieke idiọn̄ọde ini emi ini itiaba oro eketrede, iyọdiọn̄ọ ini emi Obio Ubọn̄ Abasi ọkọtọn̄ọde ndikara. Mmekere ke se ntịn̄de emi an̄wan̄a fi.

John: An̄wan̄a mi. Mbọk amanam nte etide mi se ikenemede isan̄ oko.

Caleb: Ọfọn, yak ineme ndien nte ini itiaba emi ọniọn̄de eketre. Ibịghike n̄kokot mban̄a n̄kpọ emi. Yak nse m̀mê nyekeme nditi.

John: Idiọk idụhe.

INI ITIABA ETRE—MME AKPATRE USEN ẸTỌN̄Ọ

Caleb: Ke akpa ini emi prọfesi emi okosude, oro edi, ke ini enye okosude Nebuchadnezzar ke idem, ini itiaba emi ekedi ata isua itiaba. Edi ke ini enye akafiakde osu, enye ekenyene n̄kpọ  ndinam ye Obio Ubọn̄ Abasi, ndien ini itiaba emi ikedịghe isua itiaba kpọt; ama enen̄ede ọniọn̄ akan oro.

John: Ntak ọdọhọde ntre?

Caleb: Akpa kan̄a, kûfre ke ini itiaba oro ọkọtọn̄ọ ke ini ẹkesobode Jerusalem ke isua 607 mbemiso Christ. Ndien edieke itọn̄ọde ke isua 607 ibat, isua itiaba editre ke isua 600 mbemiso Christ. Edi inyeneke akpan n̄kpọ ndomokiet aban̄ade ukara Abasi emi eketịbede isua oro. N̄ko, nte ikokụtde isan̄ oko, ke Jesus ama ekedi isọn̄ ke ata ediwak isua ama ekebe, enye ama owụt ke ini itiaba oro iketreke kan̄a.

John: Ntre ke edi. Mmeti ndien.

Caleb: Ntre, ini itiaba oro idaha iban̄a ata isua itiaba, edi enen̄ede ọniọn̄ akan oro.

John: Ọniọn̄ adan̄a didie?

Caleb: N̄wed Ediyarade, emi esịnede ndusụk n̄kpọ emi ẹwetde ke n̄wed Daniel, anam ifiọk m̀mê ini itiaba oro ebịghi adan̄a didie. Enye ọdọhọ ke ini ita ye ubak edi usen 1,260. * Edieke ini ita ye ubak edide usen 1,260, ọwọrọ ini itiaba (oro edi, ini ita ye ubak dian ini ita ye ubak) edidi usen 1,260 dian usen 1,260. Se inyenede edi usen 2,520. Ndi omokụt ntre?

John: Mmokụt, edi nsụk n̄kwe nte emi owụtde ke Obio Ubọn̄ Abasi ọkọtọn̄ọ ndikara ke 1914.

Caleb: Ọfọn, yak itịm ise n̄kpọ emi ise. Ndusụk ini, usen esida aban̄a isua ke prọfesi Bible. * Edieke idade usen kiet ke isua kiet, ọwọrọ ini itiaba oro edidi isua 2,520. Ndien edieke itọn̄ọde ke isua 607 mbemiso Christ ibat, isua 2,520 ediduọ ke 1914. * Nte isan̄ade inyene 1914 edi oro. Isua emi ke ini itiaba eketre, isua emi ke Jesus okonyụn̄ ọtọn̄ọ ndikara nte Edidem Obio Ubọn̄ Abasi. Ndien ọtọn̄ọde ke 1914, mme n̄kpọ oro Bible ọkọdọhọde ke ẹyetịbe ke ererimbot ke mme akpatre usen ẹnen̄ede ẹtịbe.

John: Nte nso?

Caleb: Ke Matthew 24:7, Jesus ama etịn̄ se iditịbede ke ini imọ iditọn̄ọde ndikara ke heaven: “Idụt ayadaha an̄wana ye idụt, obio ubọn̄ kiet oyonyụn̄ adaha an̄wana ye obio ubọn̄ en̄wen, ndien akan̄ ye unyekisọn̄ ẹyedu ke nsio nsio ebiet.” Omokụt do ke Jesus ọkọdọhọ ke akan̄ ye unyekisọn̄ ẹyedu ke ini emi. Udia anana etieti ọtọn̄ọde ke 1914, unyekisọn̄ onyụn̄ etịbe ke nsio nsio ebiet. Ndi ukwe ntre?

John: Ntre ke edi.

Caleb: Ke ufan̄ikọ emi, Jesus ama ọdọhọ n̄ko ke ekọn̄ ayan̄wana ke ini emi imọ iditọn̄ọde ndikara nte Edidem Obio Ubọn̄ Abasi. Ndien n̄wed Ediyarade ama etetịn̄ aban̄a ekọn̄ emi. Ekọn̄ emi idịghe enye emi ẹn̄wanade ke obio kiet, edi edi enye emi ọnọmọde ofụri ererimbot. * Ndi emeti isua emi akpa ekọn̄ ererimbot ọkọtọn̄ọde?

John: Ọkọtọn̄ọ ke 1914, kpa isua oro afo ọdọhọde ke enye ke Jesus ọkọtọn̄ọ ndikara. Akanam n̄kereke n̄kpọ n̄ka ntem.

Caleb: Ke ini itiede ikere kpukpru emi—oro edi, prọfesi emi aban̄ade ini itiaba ye mme prọfesi eken emi ẹban̄ade mme akpatre usen—iyenen̄ede ikụt ke emi edi akpanikọ. Mme Ntiense  Jehovah ẹnịm ke Jesus ọkọtọn̄ọ ndikara nte Edidem ke Obio Ubọn̄ Abasi ke 1914 ẹnyụn̄ ẹnịm ke mme akpatre usen ẹketọn̄ọ kpa isua oro. *

John: Ke n̄n̄wana ndise nte n̄kpọ emi ekpenen̄erede an̄wan̄a mi.

Caleb: Mfịna idụhe. Nte mma n̄ketetịn̄, ama ada ini mbemiso n̄kpọ emi enen̄erede an̄wan̄a mi. Edi mmekere ke okposụkedi emi owo mîsiakke isua 1914 ke Bible, ke omokụt ke Bible owụt ke se Mme Ntiense Jehovah ẹtịn̄de ẹban̄a isua emi edi akpanikọ.

John: Se nsimade mbufo edi emi—ẹmesida Bible ẹwụt ke se mbufo ẹtịn̄de idịghe ikọ idem mbufo, ke edi ata ofụri akpanikọ. Edi nsụk n̄kekere ntak emi Abasi anamde n̄kpọ emi ọsọn̄ ntem. Ntak emi Abasi mîketịn̄ke nnennen nnennen ke Bible ite ke Jesus editọn̄ọ ndikara ke heaven ke 1914?

Caleb: Ata eti mbụme ke obụp oro. Se idude edi ke idịghe kpukpru n̄kpọ ke Bible etịn̄ in̄wan̄-in̄wan̄ ọnọ nnyịn. Ntre, ana owo esesịn ukeme mbemiso se enye okotde an̄wan̄a enye. Ntak emi Abasi akanamde ẹwet Bible ke utọ usụn̄ emi? Iyọbọrọ mbụme emi isan̄ en̄wen.

John: Ọkpọfọn ntre.

Ndi enyene n̄kpọ emi mîn̄wan̄ake fi ke Bible? Ndi emenen̄ede oyom ndifiọk se Mme Ntiense Jehovah ẹkpepde m̀mê mme edinam ido ukpono mmọ? Ke edide ntre, bụp mmọ ke ini osobode ye mmọ. Mmọ ẹyema ndineme n̄kpọ emi ye afo.

^ ikp. eki. 5 Mme Ntiense Jehovah ẹsikpep mme owo Bible ke mfọn; ke ukpepn̄kpọ emi ke nnyịn isineme nsio nsio ibuotikọ ke adiana ke adiana.

^ ikp. eki. 24 Se chart oro “Ndap Emi Nebuchadnezzar Akadabade Aban̄a Eto.”

^ ikp. eki. 30 Mbọk kot ibuot 9 ke n̄wed Mme Ntiense Jehovah emi Nso ke Bible Enen̄ede Ekpep? N̄wed emi odu n̄ko ke www.jw.org/efi.

Kpep N̄kpọ En̄wen

Nso ke Bible Enen̄ede Ekpep?

Nte Nnyịn Idu Uwem ke “Mme Akpatre Usen”?