Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME AUGUST 2014

 BIBLE OKPỤHỌDE MME OWO

N̄kan̄wana Nyom Ẹtre Utụk ye Afai

N̄kan̄wana Nyom Ẹtre Utụk ye Afai
  • ISUA AKAMANADE: 1960

  • EBIET OTODE: LEBANON

  • SE ENYE EKEDIDE: OWO KARET

NTE UWEM MI EKETIEDE:

N̄kokpon ke Rmaysh, obio emi ekperede adan̄a Lebanon ye Israel. Ekọn̄ ke okosụk an̄wana. Nsụk nteti nte bọm oro ẹkesibụkde ke isọn̄ ọkọnọmọde ediwak owo—esịbe ndusụk owo ubọk, esịbe ndusụk ukot. N̄kpọ ama ọsọn̄ etieti, ubiatibet ye afai onyụn̄ odu ke kpukpru ebiet.

Ikedi owo 12 ke ubon nnyịn ndien ikesika ufọkabasi Catholic. Ete mi ama esisịn idem anam utom man inyene se idiade, ndien eka mi ama esikụt ete ke kpukpru nnyịn imaka ufọkabasi. Nte ini akade, mma ndikụt ke ufọkabasi in̄wamke mme ubuene kpa nte ukara mîn̄wamke.

N̄kọtọn̄ọ ndima karet ini ndide akparawa. Mma n̄kpep nnyụn̄ nnen̄ede mfiọk nte ẹn̄wanade karet; mma mfiọk n̄ko ndikama mme n̄kpọ en̄wan karet n̄n̄wana en̄wan. Mma ndọhọ ke sia mmen̄kemeke nditre ekọn̄, ke mmosụk n̄keme nditre afai. Ke ini n̄kụtde owo iba ẹn̄wanade, mma nsimụm mmọ. Mma n̄kpon esịt etieti, ntre ekpri n̄kpọ ekesiyat mi. Ke kpukpru ebiet ke n̄kan̄ usụk usụk Lebanon, mme owo ẹkefefehe mi sia n̄kan̄wanade nyom ẹtre utụk ye afai.

Ke 1980, mma ndụk n̄ka mme an̄wana karet ke Beirut. Ẹma ẹsitop bọm, ọtọmbe, ye mme n̄kpọ ntre ntịme ntịme, edi n̄kosụk n̄kaka n̄kekpep karet. N̄kukụre se n̄kesinamde ekedi ndidia udia, nde idap, nnyụn̄ nnam n̄kpọ nte Bruce Lee, eyen America emi ete esie okotode China. Enye ekedi àtá an̄wana karet. N̄kesifat idet nte enye, nsan̄a nte enye esisan̄ade, nnyụn̄ mfiori n̄kpo nte enye ke ini n̄n̄wanade karet. N̄kesisakke imam.

NTE BIBLE OKOKPỤHỌREDE UWEM MI:

N̄koyom ndidi àtá an̄wana karet ke China. Mbubreyo usen kiet, nte n̄kosụk nsịnde idem n̄kpep karet man n̄ka China, mma n̄kop ẹkọn̄de usụn̄ ufọk nnyịn. Ufan mi akasan̄a ye iren iba emi ẹdide Mme Ntiense edi. N̄kesịne obubịt ọfọn̄ emi ẹsisịnede ẹn̄wana karet, ndien ibibiak ama ofụk mi idem. Mma ndọhọ mmọ ke mfiọkke n̄kpọ ndomokiet mban̄a  Bible. Edi n̄kọdiọn̄ọke ke ọtọn̄ọde ke ini oro, ke uwem mi ọmọn̄ okpụhọde.

Mme Ntiense oro ẹma ẹda Bible ẹwụt mi ntak emi mme owo mîkemeke nditre utụk ye afai. Mmọ ẹma ẹdọhọ ke Satan edi ntak. (Ediyarade 12:12) Mma mma nte Mme Ntiense oro ẹketiede emem emem ẹnyụn̄ ẹtịn̄de ikọ uko uko. Mmọ ẹma ẹtịn̄ ke Abasi enyene enyịn̄ ndien emi ama otụk mi etieti. (Psalm 83:18) Mmọ ẹma ẹkot 1 Timothy 4:8 ẹnọ mi. Itien̄wed oro ọdọhọ ete: “Edisịn̄ede idem enyene esisịt ufọn; edi uten̄e Abasi enyene ufọn ke kpukpru n̄kpọ, koro enye akamade un̄wọn̄ọ uwem idahaemi ye eke uwem oro edidide.” Itien̄wed oro ama enen̄ede otụk mi, ndien nte ini akade ama okpụhọde uwem mi.

Mbonubon nnyịn ẹma ẹdọhọ Mme Ntiense oro ẹkûdi ufọk nnyịn aba, ntre n̄kekwe mmọ aba. Kpa ye oro, mma mbiere nditre karet, nnyụn̄ ntọn̄ọ ndikpep Bible. Nditọeka mi ikamaha se n̄koyomde ndinam oro, edi mma mbiere ndifiak nyom Mme Ntiense Jehovah nnyụn̄ ndọhọ mmọ ẹkpep mi Bible.

Mma n̄ka iso ndiyom Mme Ntiense oro edi n̄kekwe mmọ. Ini oro ke ete mi akakpa. N̄kpa esie ye mme afanikọn̄ eken oro ẹketịbede ke ubon nnyịn ẹma ẹnen̄ede abiak mi. Mma ntọn̄ọ ndinam utom ke kọmpeni emi ẹsibọpde n̄kpọ. Usen kiet, eyen itieutom nnyịn emi ekerede Adel ama obụp mi m̀mê nso inam ntiede mfụhọ mfụhọ. Ekem enye ama anam mi mfiọk ke Bible ọdọhọ ke Abasi ayanam mme owo ẹset. Ke ọfiọn̄ usụkkiet oro eketienede, enye ama enyene ime ekpep mi Bible onyụn̄ ama mi.

Nte n̄kosụk n̄kpepde Bible, mma ndikụt ke ana n̄kpụhọde edu mi. Ikememke utom sia mma nsikpon esịt etieti. Se n̄kekpepde ke Bible ama an̄wam mi ndisimụm idem n̄kama ke ini n̄kpọ abiakde mi. Ke uwụtn̄kpọ, Jesus ọkọdọhọ ke Matthew 5:44 ete: “Ẹka iso ẹma mme asua mbufo ẹnyụn̄ ẹbọn̄ akam ẹyom ufọn mmọ eke ẹkọbọde mbufo.” Rome 12:19 ọdọhọ ete: “Ẹkûsio usiene ẹnọ idem mbufo . . . koro ẹwet ẹte: ‘Jehovah ọdọhọ ete, usiene enyene mi; ami nyosio usiene.’” Mme itien̄wed emi ye mme itien̄wed en̄wen ẹma ẹnam ndi owo emem.

UFỌN ORO MBỌDE:

Ke nsonso oro, ubon nnyịn ikamaha n̄kpep Bible ye Mme Ntiense Jehovah. Edi idahaemi mmọ ẹkpono Mme Ntiense Jehovah etieti. Eyeneka mi kiet akam etiene mi okpono Jehovah, ndien eka mi ama esitịn̄ nti n̄kpọ aban̄a Mme Ntiense tutu n̄kpa ada enye.

Abasi ọdiọn̄ mi etieti onyụn̄ ọnọ mi ata eti an̄wan. Enye ekere Anita, ndien nnyịn mbiba idi mme ọkwọrọikọ ofụri ini. Tọn̄ọ ke isua 2000, ami ye n̄wan mi idụn̄ ke Eskilstuna ke Sweden, ikwọrọ ikọ inọ mbon emi ẹsemde usem Arabic.

Mbon oro ẹbọde ufen ke ntak afai ẹsụk ẹnanam mi mbọm. Edi ndifiọk ntak emi mme owo ẹbọde ufen ye nte ke Abasi ọyọsọp etre ufen anam nnen̄ede n̄kop idatesịt nnyụn̄ nnyene emem.—Psalm 37:29.

Ami ye n̄wan mi imokop inem ukwọrọikọ etieti. Esinenem nnyịn ndikpep mme owo n̄kpọ mban̄a Jehovah

Kpep N̄kpọ En̄wen

Ntak Emi Abasi Ayakde Idiọkn̄kpọ ye Ufen Ẹdu?

Didie ke idiọkn̄kpọ ọkọtọn̄ọ, ndien ntak emi Abasi ayakde idiọkn̄kpọ aka iso? Ndi ufen eyetre tutu amama?