Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME AUGUST 2014

 IBUOTIKỌ IKPAEDEM | NDI ABASI EKERE ABAN̄A FI?

Abasi Oyom Edi Ufan Imọ

Abasi Oyom Edi Ufan Imọ

“Baba owo kiet ikemeke nditiene mi ibọhọke Ete, emi ọkọdọn̄de mi, odụri enye edi.”—JOHN 6:44.

NTAK EMI ỌSỌN̄DE NDUSỤK OWO NDINỊM: Ediwak mbon oro ẹnịmde ke Abasi do ikpereke enye. Ke uwụtn̄kpọ, Christina emi otode Ireland ekesika ufọkabasi kpukpru urua, edi enye ọdọhọ ete: “N̄kada enye nte Abasi emi okobotde kpukpru n̄kpọ, edi n̄kọdiọn̄ọke enye n̄konyụn̄ n̄kpereke enye.”

SE BIBLE ỌDỌHỌDE: Ke ini isopde usụn̄, Jehovah esiyom nnyịn okụt. Jesus ama etịn̄ nte Abasi esinamde emi ete: “Edieke owo kiet enyenede erọn̄ ikie ndien kiet ke otu mmọ osop usụn̄, nte enye idikpọn̄ke anan̄ ye efịtenan̄ ke enyọn̄ obot inyụn̄ idaha ikoyom kiet emi osopde usụn̄ do? . . . Kpasụk ntre Ete mi emi odude ke heaven iyomke kiet ke otu n̄kpri owo emi atak.”—Matthew 18:12-14.

Idụhe owo ndomokiet “ke otu n̄kpri owo emi,” oro Abasi mîdaha ke n̄kpọ. Didie ke enye ‘esiyom mbon emi ẹsopde’? Itien̄wed oro ikadade itọn̄ọ ibuotikọ emi ọdọhọ ke Abasi esinam emi ke ndidụri mmọ nda.

Mmanie isisan̄a ikwọrọ Ikọ Abasi inọ mme owo ke ufọk mmọ ye ke ebiet ekededi emi mme owo ẹdude?

Yak ineme nte Abasi okodụride ndusụk owo ada. Ke eyo mme apostle, Abasi ama ọdọhọ Philip emi ekedide anditiene Christ okosobo ye owo Ethiopia man anam prọfesi emi enye okokotde an̄wan̄a enye. (Utom 8:26-39) Nte ini akakade, Abasi ama ọdọhọ apostle Peter aka edem Cornelius, akwa owoekọn̄ Rome, emi okosụk ọbọn̄de akam ọnọ Abasi onyụn̄ an̄wanade ndikpono enye. (Utom 10:1-48) Abasi ama onyụn̄ anam apostle Paul ye mme nsan̄a esie ẹka mbeninyan̄ kiet emi ekperede Philippi. Do ke mmọ ẹkesobo mma kiet emi ekerede Lydia, emi okonyụn̄ “edide andituak ibuot nnọ Abasi.” Abasi ama anam mma emi okop ukwọrọikọ Paul.—Utom 16:9-15.

Owo mmọ kiet kiet ama oyom Jehovah, ndien Enye ama anam kpukpru mmọ ẹnyene ifet ndidiọn̄ọ Enye. Mmanie isisan̄a ikwọrọ Ikọ Abasi inọ mme owo ke ufọk mmọ ye ke ebiet ekededi emi mme owo ẹdude? Ediwak owo ẹdidọhọ, “Mme Ntiense Jehovah.” Kere ise, Okûdi Abasi ada mmọ okot fi ete edidi ufan imọ? Nnyịn idọhọ ọbọn̄ akam ọnọ Abasi man enye an̄wam fi enyịme ndisan̄a n̄kpere imọ. *

^ ikp. eki. 8 Edieke oyomde ndifiọk n̄kpọ en̄wen mban̄a emi, mbọk se vidio emi Ntak Emi Ekpekpepde Bible? ke www.jw.org/efi.

Kpep N̄kpọ En̄wen

Ntak Emi Ekpekpepde Bible?

Bible anam ediwak miliọn owo ke ofụri ererimbot ẹfiọk ibọrọ mbụme emi afịnade ata ediwak owo. Ndi akpama nditiene mfiọk?

Didie ke Afo Ekeme Ndisan̄a N̄kpere Abasi?

Se ise m̀mê Abasi esikop kpukpru akam, nte ikpọbọn̄de akam, ye n̄kpọ en̄wen emi ikpanamde man isan̄a ikpere Abasi.