Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JULY 2014

 BIBLE OKPỤHỌDE MME OWO

N̄kesikakama Ikan̄ Nsan̄a

N̄kesikakama Ikan̄ Nsan̄a
  • ISUA AKAMANADE: 1958

  • EBIET OTODE: ITALY

  • SE ENYE EKEDIDE: OWO N̄KA AFAI

NTE UWEM MI EKETIEDE:

N̄kamana ke esịt obio kiet ke Rome, n̄konyụn̄ n̄kpon do. Mbon edem nnyịn ikenyeneke n̄kpọ. Uwem ama ọsọn̄ etieti. N̄kọdiọn̄ọke eka mi n̄konyụn̄ n̄kpereke ete mi. N̄kesidụk ndụk ye nditọ inọ.

Ntisesịm isua duop, mma ntọn̄ọ ndiyịp inọ. N̄kedi isua 12 akpa ini emi mfehede n̄kpọn̄ ufọk. Ke nteti mme ini emi ete mi ekedide ibuot itieutom mme bodisi edimen mi ọnyọn̄ ufọk. Mma nsitọhọ utọk nnyụn̄ nduọ obom. N̄kesiyayat esịt ye kpukpru owo. Mma n̄kpọn̄ ufọk ndien ofụri ofụri ke ini n̄kedide isua 14. Mma ntọn̄ọ ndida n̄kpọsọn̄ ibọk nnyụn̄ nyo ntre nsan̄a ke efak. Sia mmen̄kenyeneke ebiet eke nnade, mma nsibom moto owo ndụk nna tutu eyo ekpere ndisiere. Ekem nyoyom mmọn̄ nyet iso.

Mma nsiyịp inọ etieti—nsibọ owo ekpat mfehe nsinyụn̄ n̄ka inọ okoneyo ke ufọk mme owo. Etop idiọk mi ama ọwọrọ tutu mbon idiọk n̄ka kiet ẹdọhọ ndidụk n̄ka mmimọ. Do ke n̄kekpep ndika inọ ke ban̄k. Sia n̄kesinamde n̄kpọ afai afai, mbon n̄ka oro ẹma ẹsọsọp ẹma mi. N̄kesikakama ikan̄ nsan̄a; idem ke ini ndede idap, mma nsisịn enye ke idak udotibuot. Ẹkediọn̄ọ mi nte inọ, owo afai, oburobụt owo, owo idiọk ikọ inua, ye ada n̄kpọsọn̄ ibọk. Mme bodisi ẹkesiyoyom mi kpukpru ini. Ẹma ẹmụm mi ediwak ini. Ke ediwak isua, ekesidi ẹma ẹsana mi ẹyak, mfiak nnam n̄kpọ ndien ẹfiak ẹmụm mi.

NTE BIBLE OKOKPỤHỌREDE UWEM MI:

Isan̄ kiet emi ẹkesiode mi ke ufọk-n̄kpọkọbi, mma ndọhọ yak n̄ka n̄kese eyeneka eka mi. N̄kọfiọkke ke enye ye nditọ esie ẹma ẹkabade ẹdi Mme Ntiense Jehovah. Mmọ ẹma ẹdọhọ ntiene mmimọ n̄ka mbono esop mmimọ. Mma ndọhọ yak nnyụn̄ ntiene n̄kese se mmọ ẹsinamde do. Ke ini  ikesịmde Ufọkmbono Obio Ubọn̄ mmọ, mma ndọhọ ke nyom nditie n̄kpere enyịnusụn̄ man n̄kụt mbon oro ẹdụkde ẹnyụn̄ ẹwọrọde. Nte ido mi edide, n̄kakakama ikan̄ n̄ka.

Mbono esop oro ama okpụhọde uwem mi. Eketie mi nte ndụhe ke ererimbot emi. Kpukpru owo ẹkekama iso imam imam. Mmọ ẹma ẹdikọm mi ẹnyụn̄ ẹneme nneme ye ami. Nsụk nteti nte Mme Ntiense oro ẹkefọnde ido; mma n̄kụt ke mmọ ẹdi mbon akpanikọ. Eketie mi nte ndu ke ererimbot en̄wen!

Mma ntọn̄ọ ndikpep Bible ye Mme Ntiense Jehovah. Nte n̄kosụk n̄kpepde Bible, mma ndikụt ke ana n̄kpụhọde nte ndude uwem. Mma nnam item emi odude ke Mme N̄ke 13:20, emi ọdọhọde ete: “Owo eke asan̄ade ye mbon ọniọn̄ eyenyene ọniọn̄, edi ọyọdiọk ye owo eke odụkde nsan̄a ye mme ndisịme.” Mma ndikụt ke ana n̄wọrọ ke idiọk n̄ka oro n̄kodụkde nnyụn̄ ndian̄ade n̄kpọn̄ mmọ. Ikememke utom, edi Jehovah ama an̄wam mi.

Mma ntọn̄ọ ndien ndikpekpeme se nnamde

Mma ndomo ofụri ukeme ntre mme ndedehe n̄kpọ oro n̄kesinamde, utọ nte ndin̄wọn̄ sika ye ndida n̄kpọsọn̄ ibọk. Mma mfat anyan idet mi, ntre ndisịne n̄kpanuen utọn̄, nnyụn̄ ntre idiọk ikọ inua. Mma ntọn̄ọ ndien ndikpekpeme se nnamde.

N̄kamaha ukot n̄wed, ntre ikedịghe ekpri n̄kpọ ndisụhọde ntie n̄kpep Bible. Nte n̄kan̄wanade ndinam emi, mma ntọn̄ọ ndima Jehovah, edi esịt ama ọtọn̄ọ ndimia mi ufen. Eketie mi nte Jehovah ikemeke ndifen nnọ mi ke kpukpru idiọkn̄kpọ oro n̄kanamde. Se n̄kesidade nsọn̄ idem esịt edi nte Jehovah ekefende ọnọ Edidem David ke enye ama akanam ikpọ idiọkn̄kpọ. Ndikot mbụk emi ama esinen̄ede an̄wam mi.—2 Samuel 11:1–12:13.

N̄kpọ en̄wen oro ọkọsọn̄de mi ekedi ndisan̄a ke ufọk ke ufọk n̄kwọrọ ikọ. (Matthew 28:19, 20) Idem ama esinyek mi ke mmekeme ndika n̄kosobo owo emi n̄kabakde ibak m̀mê emi n̄keduede. Edi nte ini akakade, idem ikenyekke mi aba. Ama ọtọn̄ọ ndinem mi ndin̄wam mbon en̄wen ẹkpep n̄kpọ ẹban̄a edima Ete nnyịn eke heaven, emi esinen̄erede efen ọnọ owo.

UFỌN ORO MBỌDE:

Ndikpep mban̄a Jehovah enịm mi uwem emi. Ediwak n̄kani ufan mi ẹkpan̄a mîdịghe ẹdu ke ufọk-n̄kpọkọbi. Edi ami ke n̄kop inem uwem, mmonyụn̄ nnyene idotenyịn ke Obio Ubọn̄ Abasi. Mmekpep ndisụhọde idem, n̄kop item, nnyụn̄ mmụm idem n̄kama ke ini n̄kpọ ayatde mi. Emi anam ediwak owo ẹma mi. Mmokop inem ndọ mi ye ediye an̄wan mi emi ekerede Carmen. Isisan̄a ntre in̄wam mme owo ẹkpep Bible.

Mmenyene eti utom idahaemi, ndien ndusụk ini, utom osụk adada mi aka ban̄k. Edi nsikaha ndiyịp n̄kpọ, nsika ndinam enye asan̄a.

Kpep N̄kpọ En̄wen

Nso Idi Ukpepn̄kpọ Bible

Kot ibọrọ ediwak mbụme emi ẹsibụpde ẹban̄a ndutịm ukpep Bible nnyịn.