Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

ENYỌN̄-UKPEME JULY 2014

 IBUOTIKỌ IKPAEDEM | NTAK EMI N̄KPỌ ESINAMDE NTI OWO?

Ntak Emi N̄kpọ Esinamde Nti Owo?

Ntak Emi N̄kpọ Esinamde Nti Owo?

Sia Jehovah * edide Ata Ọkpọsọn̄ Abasi ye Andibot kpukpru n̄kpọ, ediwak owo ẹkeme ndikere ke enye edi ntak kpukpru se itịbede ke ererimbot, edide eti m̀mê idiọk. Edi yak ineme se Bible etịn̄de aban̄a ata Abasi:

  • “Jehovah enen ke kpukpru usụn̄ esie.”—Psalm 145:17.

  • ‘Kpukpru usụn̄ Abasi ẹnen. Abasi akpanikọ, emi mîkpehe ukwan̄ikpe. Enye edi eti ye edinen.’—Deuteronomy 32:4.

  • “Jehovah enen̄ede enyene esịt ima onyụn̄ atua owo mbọm.”—James 5:11.

Idịghe Abasi esinam ndiọi n̄kpọ ẹtịbe. Edi ndi enye esinam mme owo ẹnam ibak? Ihih, sia Bible ọdọhọ ete: “Ke ini idomo esịmde owo, yak enye okûdọhọ ete: ‘Abasi odomo mi.’” Ntak-a? “Koro owo ikemeke ndida idiọkn̄kpọ ndomo Abasi, enye ke idemesie inyụn̄ idomoke owo ekededi.” (James 1:13) Abasi isidomoke owo idomo inam enye anam idiọkn̄kpọ. Idịghe Abasi onyụn̄ edi ntak ndiọi n̄kpọ emi ẹtịbede inyụn̄ idịghe enye esinam mme owo ẹnam idiọkn̄kpọ. Anie ndien idi ntak emi ndiọi n̄kpọ ẹsitibede, mîdịghe nso idi ntak?

NDIDU KE EBIET EMI N̄KPỌ ETỊBEDE

Bible etịn̄ ntak kiet emi mme owo ẹsibọde ufen. Enye ọdọhọ ete: “Ini ye n̄kpọntịbe unana idotenyịn [ẹsịm] mmọ kpukpru.” (Ecclesiastes 9:11) Ke ini n̄kpọ etịbede, mbon oro ẹdude ke ebiet oro ke n̄kpọ esinam, idịghe mbon oro mîdụhe do. Ke n̄kpọ nte isua 2,000 emi ẹkebede, Jesus Christ ama etịn̄ nte tọwa ọkọduọde ọtọ owo 18 owot. (Luke 13:1-5) Idịghe idiọkn̄kpọ mmọ akanam mmọ ẹkpan̄a; mmọ ndikodu ke idak tọwa oro ke ini enye ọkọduọde akanam. Ndien ke ndondo emi, ke January 2010, ata idiọk unyekisọn̄ ama etịbe ke Haiti; ukara Haiti ẹdọhọ ke se ibede owo 300,000 ẹma ẹkpan̄a. Kpukpru mmọ ẹma ẹkpan̄a, inamke n̄kpọ m̀mê mmọ ẹkedi mmanie. Udọn̄ọ n̄ko ekeme ndinam owo ini kiet ekededi.

Ntak emi Abasi ayakde afanikọn̄ esịm nti owo?

Ndusụk owo ẹkeme ndibụp ẹte: ‘Ntak emi Abasi esiyakde utọ n̄kpọ emi ọwọrọ mme owo? Ndi enye ikemeke ndikpeme nti owo?’ Abasi ndinam emi ọkpọwọrọ ke enye esibem iso ọfiọk ndiọi n̄kpọ oro ẹditịbede. Okposụkedi emi enye ekemede ndinam emi, se akpanade ifiọk edi m̀mê Abasi esikam oyom ndidiọn̄ọ kpukpru se iditịbede.—Isaiah 42:9.

Bible ọdọhọ ete: “Abasi nnyịn odu ke mme heaven; enye amanam kpukpru n̄kpọ oro enye amade ndinam.” (Psalm 115:3) Jehovah isinamke kpukpru se enye ekemede ndinam, edi esinam se enye okụtde ke ọfọn inam. Ntem ke  enye esinyụn̄ anam ye mme n̄kpọ oro ẹditịbede; idịghe kpukpru n̄kpọ ke enye esiyom ndifiọk. Ke uwụtn̄kpọ, ke idiọkn̄kpọ ama okokpon ebe nde ke Sodom ye Gomorrah, Abasi ama ọdọhọ Abraham ete: “Mmọn̄ nsụhọde n̄kese man mfiọk m̀mê mmọ ẹnam kpa nte uyo mfiori emi esịmde mi, ndien mîdịghe ntre nyọfiọk.” (Genesis 18:20, 21) Ke nsonso oro, Jehovah ikoyomke ndifiọk adan̄a nte ẹnamde idiọkn̄kpọ ke mme obio oro. Emi ọwọrọ ke idịghe kpukpru n̄kpọ ke Jehovah esiyom ndibem iso mfiọk. (Genesis 22:12) Edi emi iwọrọke ke enye ifọnke ima m̀mê ke enyene n̄kpọ emi enye mîkemeke ndinam. Bible ọdọhọ ke “utom esie ọfọn ama.” Idịghe kpukpru n̄kpọ ke enye esiyom ndibem iso mfiọk. Enye esimek ndibem iso mfiọk mme n̄kpọ emi ẹban̄ade uduak esie; isinyụn̄ inyịkke-nyịk mme owo ẹnam se mmọ mîyomke ndinam. * (Deuteronomy 32:4) Nso ke kpukpru emi owụt? Ke nditịn̄ ibio ibio, owụt ke Abasi esimemek se enye oyomde ndifiọk. Idịghe kpukpru ini ke enye esimek ndifiọk se iditịbede.

Ntak emi Abasi mîsikpemeke nti owo mbak mme idiọkowo idinam mmọ n̄kpọ?

NDI MME OWO ẸDI NTAK?

Mme owo ẹtiene ẹnam idiọkido odu ke isọn̄. Bible etịn̄ se isinamde owo anam idiọk. Enye ọdọhọ ete: “Idomo esịm owo kiet kiet ke ini udọn̄ idemesie odụride onyụn̄ atapde enye. Ekem ke ini udọn̄ emi oyomode, aman idiọkn̄kpọ; ndien ke ini idiọkn̄kpọ oro okụrede utom esie, ada n̄kpa edi.” (James 1:14, 15) Ke ini mme owo ẹnamde idiọkn̄kpọ oro ọdọn̄de mmọ, idụhe nte mmọ mîdibọhọ ufen. (Rome 7:21-23) Toto ke eset, mme owo ẹnam ibak ndien emi anam mme owo ẹnen̄ede ẹbọ ufen. Ndiọi owo ẹnyụn̄ ẹnam mbon en̄wen ẹtiene ẹdiọk. Se inamde idiọkn̄kpọ etetịm okpon edi oro.—Mme N̄ke 1:10-16.

Toto ke eset, mme owo ẹnam ibak ndien emi anam mme owo ẹnen̄ede ẹbọ ufen

Ndi akpana Abasi etre mme owo ndinam ndiọi n̄kpọ? Kere ban̄a nte ẹkebotde owo. Bible ọdọhọ ke Abasi okobot owo ke mbiet esiemmọ. Ntem, mme owo ẹkeme ndikpebe mme edu Abasi. (Genesis 1:26) Abasi ọnọ mme owo ifụre ndimek se mmọ ẹyomde ndinam, ndien mmọ ẹkeme ndimek m̀mê iyama Abasi inyụn̄ ika iso inam se inende ke enyịn esie. (Deuteronomy 30:19, 20) Edieke Abasi ekpenyịkde-nyịk mme owo ẹnam n̄kpọ, ndi oro ikpowụtke ke enye ọbọ mmọ ifụre oro enye ọkọnọde mmọ? Emi akpanam mme owo ẹtie nte ukwakutom emi anamde sụk se ẹkebotde enye ẹnọ. Ukem oro ke ekpedi edieke kpukpru se itịbede ẹdide uduak Abasi m̀mê se ẹma ẹkebebiere ẹnịm. Esịt enen̄ede enem nnyịn nte Abasi ayakde imek se  iyomde ndinam. Edi emi iwọrọke ke ufen emi ibọde mi ke ntak idiọkn̄kpọ ye ndiọi ubiere emi mme owo ẹnamde edidi ke nsinsi.

NDI IDIỌKN̄KPỌ EMANA OKO EDI NTAK?

Edieke obụpde ndusụk owo mbụme emi odude ke ikpaedem magazine emi, mmọ ẹdidọhọ ke idiọkn̄kpọ oro mme owo ẹkenamde ke emana oko anam mmọ ẹbọ ufen. Ẹsidọhọ ke idiọkn̄kpọ owo oyom owo okụt. *

Ọkpọfọn ifiọk se Bible etịn̄de aban̄a n̄kpa man ifiọk m̀mê mme owo ẹsibọ ufen idiọkn̄kpọ oro mmọ ẹkenamde ke emana oko nte ndusụk owo ẹdọhọde. Ke ini Abasi okobotde Adam esịn ke In̄wan̄ Eden, enye ama ọdọhọ enye ete: “Dia kpukpru mfri eto in̄wan̄ yụhọ. Edi amaedi mfri eto ifiọk eti ye idiọk, kûdia, koro ke usen eke afo adiade afo ayakpa n̄kpa.” (Genesis 2:16, 17) Edieke Adam mîkpakanamke idiọkn̄kpọ, enye okpokodu ke nsinsi. Idiọkn̄kpọ akada n̄kpa edi. Ndien ke ini Adam ekenyenede nditọ, n̄kpa ama ebe esịm kpukpru owo. (Rome 5:12) Ntem, ẹkeme ndidọhọ ke “n̄kpọ eyenutom idiọkn̄kpọ edi n̄kpa.” (Rome 6:23) Bible ọdọhọ n̄ko ke “ikpe idiọkn̄kpọ etebe owo emi ama akakpa.” (Rome 6:7) Ke nditịn̄ ke usụn̄ en̄wen, mme owo isikaha iso ibọ ufen idiọkn̄kpọ mmọ ke ẹma ẹkekpa.

Ata ediwak owo ẹnịm ke idiọkn̄kpọ oro owo akanamde ke emana oko esinam enye ọbọ ufen. Mbon emi ẹnịmde utọ n̄kpọ emi isinen̄ekede ifịna idem ke ini mmọ m̀mê mbon en̄wen ẹbọde ufen. Edi utọ ukpepn̄kpọ emi inọhọ mme owo idotenyịn ke ndiọi n̄kpọ ẹyetre ke isọn̄. Ẹdọhọ ke n̄kukụre se owo ekemede ndinam man enye okûfiak amana edibọ ufen edi enye ndidu ata eti uwem nnyụn̄ nnyene san̄asan̄a ifiọk. Edi idịghe se Bible ekpepde edi oro. *

AKPAN OWO EMI EDIDE NTAK!

Ndi ama ọfiọk ke Satan, emi edide “andikara ererimbot emi,” edi akpan ntak emi ibọde ufen—John 14:30

Idịghe mme owo ẹdi akpan ntak emi idiọkido odude ke isọn̄ emi. Satan kpa Devil, emi ekedide eti angel Abasi ke ini ẹkebotde enye, ‘ikọsọn̄ọke ida ke akpanikọ’; enye okonyụn̄ emen idiọkn̄kpọ edi ererimbot. (John 8:44) Enye akanam Adam ye Eve ẹsọn̄ ibuot ye Abasi. (Genesis 3:1-5) Jesus Christ okokot enye “andidiọk” ye “andikara ererimbot emi.” (Matthew 6:13; John 14:30) Ata ediwak owo ke ererimbot emi ẹtiene Satan, imaha ndinam se Jehovah ọdọhọde. (1 John 2:15, 16) Akpa John 5:19 ọdọhọ ke “ofụri ererimbot esịne ke idak odudu andidiọk.” Mme angel en̄wen ẹma ẹdiọk ẹnyụn̄ ẹkabade ẹtiene Satan. Bible ọdọhọ ke Satan ye mme demon esie ‘ẹda kpukpru mme andidụn̄ isọn̄ ẹtụn usụn̄’; enye edi ntak ofụri afanikọn̄ emi ke isọn̄. (Ediyarade 12:9, 12) Ntem, akpan owo emi edide ntak mfịna ererimbot emi edi Satan.

Omokụt do ke idịghe Abasi edi ntak ndiọi n̄kpọ oro ẹsitịbede ọnọ mme owo; idịghe enye esinam mmọ ẹbọ ufen. Enye akam ọn̄wọn̄ọ ke iyosio idiọkido ifep ke ererimbot emi. Se idinemede ke ibuotikọ oro etienede edi oro.

^ ikp. eki. 3 Bible ọdọhọ ke Abasi ekere Jehovah.

^ ikp. eki. 11 Edieke oyomde ndifiọk ntak emi Abasi ayakde idiọkido aka iso, mbọk kot ibuot 11 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.

^ ikp. eki. 16 Ẹkot ukpepn̄kpọ emi Karma. Edieke oyomde ndifiọk nte ukpepn̄kpọ emi ọkọtọn̄ọde, mbọk kot ekpri n̄wed Mme Ntiense Jehovah emi Nso Itịbe inọ Nnyịn ke Ini Nnyịn Ikpade? page 8-12.

^ ikp. eki. 18 Edieke oyomde ndifiọk se Bible ekpepde aban̄a se isitịbede inọ mme akpan̄kpa ye idotenyịn emi inyenede ndifiak n̄kụt mmọ, mbọk kot ibuot 6 ye 7 ke n̄wed Nso ke Bible Enen̄ede Ekpep?

Kpep N̄kpọ En̄wen

ETI MBỤK EMI OTODE ABASI!

Ntak Emi Abasi Ayakde Idiọkn̄kpọ ye Ufen Ẹdu?

Didie ke idiọkn̄kpọ ọkọtọn̄ọ, ndien ntak emi Abasi ayakde idiọkn̄kpọ aka iso? Ndi ufen eyetre tutu amama?