Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  May 2014

Ndi Ama Ọfiọk?

Ndi Ama Ọfiọk?

Ntak emi ẹkebụn̄de ukot mme abiatibet emi ẹkọn̄de ke eto?

Bible etịn̄ nte ẹkewotde Jesus ye abiatibet iba ke eto ete: “Mme Jew ẹben̄e Pilate ẹte ẹbụn̄ mmọ ukot ẹnyụn̄ ẹkọn̄ọde mme okpo oro ẹfep.”—John 19:31.

Ibet mme Jew ọkọdọhọ ẹkûyak okpo abiatibet emi ẹkekọn̄de ke eto ọkọn̄ọ ofụri okoneyo. (Deuteronomy 21:22, 23) Etie nte mme Jew ẹkesinam ntre n̄ko ye mbon emi mbon Rome ẹkekọn̄de ke eto ẹwot. Ndibụn̄ mme abiatibet ukot ama esinam mmọ ẹsọp ẹkpa man ẹbụk mmọ mbemiso Sabbath ọtọn̄ọ mbubreyo usen oro.

Ini ekededi emi ẹyomde ndiwot owo ntem, ẹma ẹsimen okpukwak ẹkọn̄ enye ubọk ye ukot ẹdian ke eto. Ke ini ẹmenerede eto oro ẹwụk, owo oro ọyọkọn̄ọ do akpa ubiak sia okpukwak kpọt omụm enye akama. Enye ama oyom ndikot ibifịk, ana enye oyom usụn̄ okot idem ada kpa ye emi okpukwak owụhọde enye ke ukot. Edi edieke ẹbụn̄de enye ukot, enye idikemeke ndinam emi. Enye ọyọsọp akpa sia mîkemeke ndikot ibifịk mîdịghe ke ntak emi iyịp ọwọrọde enye ke idem.

Didie ke ẹkesida ikan̄ ọkpọ ẹn̄wana ekọn̄ ke eset?

David akada se itiede nte ikan̄ ọkpọ owot Goliath. Etie nte David ọkọtọn̄ọ ke ini eyenọwọn̄ emi enye ekesibọkde ufene ekpep nditịgha ikan̄ ọkpọ.—1 Samuel 17:40-50.

Ndise emi owụt nte owo Assyria adade ikan̄ ọkpọ eset atịgha obio mme Jew

Ikan̄ ọkpọ do ke ndise eyo Bible emi nditọ Egypt ye mbon Assyria ẹkewetde. Ikan̄ ọkpọ eyo oro ekedisi ekpri efọk emi ẹdade ikpa m̀mê ọfọn̄ ẹnam ẹnyụn̄ ẹyịri urụk iba. Anditịgha eyesịn ekpri ndọdọnọ itiat ke efọk oro. Enye oyofụn̄ ikan̄ ọkpọ emi ke enyọn̄ ekem asana urụk kiet ayak. Itiat ọwọrọ ata usọp usọp ọkọtọ se enye okoyomde nditịgha.

Ntaifiọk ẹsion̄o ata ediwak ikan̄ ọkpọ oro ẹkesidade ẹn̄wana ekọn̄ ke eset ke isọn̄ ke obio mfia ke Ufọt Ufọt Edem Usiahautịn. Etie nte nta mbonekọn̄ ẹma ẹsitịgha ikan̄ ọkpọ ọsọp akan ata ediwak moto idahaemi. Ntaifiọk ẹdọhọ ke mmimọ ikereke ke ikan̄ ọkpọ ama esika anyan nte idan̄, edi se idiọn̄ọde edi ke enye ama esiwot owo n̄ko.—Judges 20:16.