Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME APRIL 2014

 BIBLE OKPỤHỌDE MME OWO

Mmọ Ẹkeda Bible Ẹbọrọ Kpukpru Se N̄kobụpde!

Mmọ Ẹkeda Bible Ẹbọrọ Kpukpru Se N̄kobụpde!
  • ISUA AKAMANADE 1950

  • EBIET OTODE: SPAIN

  • SE ENYE EKEDIDE: NUN UFỌKABASI CATHOLIC

NTE UWEM MI EKETIEDE:

N̄kamana ndikụt ete ye eka mi ẹdụn̄de ke Galicia ke Spain ẹnyụn̄ ẹnyenede in̄wan̄ do. Ikedi nditọ itiaita ndien ami n̄kedi ọyọhọ eyen inan̄. Ufọk nnyịn ama esinem etieti. Ini oro ke Spain, iwakke ufọk emi mîkesinọhọ nditọ mmọ ẹka ufọkn̄wed mme oku mîdịghe ẹnọ ẹkedi nun, ọkpọkọm eyen kiet kpọt. Owo ita ke ufọk nnyịn ẹkeka.

Ke ini n̄kedide isua 13, mma ntiene eyeneka emi n̄kodụn̄ ke ufọk mme nun ke Madrid. Uwem ama enyene nte etiede do. Owo ikayakke ẹnyene ufan m̀mê ẹbre mbre. Kpukpru n̄kpọ ẹkedi mbet mbet, akam akam, owo iyakke owo okop inem uwem. Ima isinịm akam kpukpru usenubọk edi esịt mi ikodụhe do. Ekem iyọkwọ ikwọ inyụn̄ inịm Mass ke Latin. N̄kpọ ndomokiet ikan̄wan̄ake mi, ntre n̄kekere ke ndikemeke ndisan̄a n̄kpere Abasi. N̄ketie ntre, ntịn̄ke ikọ ye owo ndomokiet. N̄kpokụt eyeneka mi ke usụn̄, n̄kukụre se iditịn̄de edi, “Kọm edisana Mary!” Mme nun ẹkesiyak ineme nneme ke minit 30 kpọt ke ima ikụre udia. Mma nsitua eyet ediwak ini mma nteti nte ufọk nnyịn ekenemde. Eketie mi nte nnyeneke owo.

Kpa ye emi mmen̄kekpereke Abasi ke usụn̄ ndomokiet, mma nta un̄wọn̄ọ mme nun ke mma n̄kesịm isua 17. N̄kanam se ẹkedọhọde nnam, idịghe nte n̄kamama se n̄kanamde. Edi ikebịghike, mma ntọn̄ọ ndibụp idem mi m̀mê se Abasi oyomde nnam edi emi. Mme nun ẹkesidọhọ ke owo ekededi emi ekerede n̄kpọ ntre editak ke ikan̄ hell! Kpa ye oro, okosụk etie mi ntre ke idem. Mma ndiọn̄ọ ke Jesus Christ ikesidụhe utọ uwem emi, edi ke enye ama esiwọrọ ekekpep mme owo n̄kpọ onyụn̄ an̄wam mmọ. (Matthew 4:23-25) Ke mma n̄kesịm isua 20, iketiehe mi ke idem nte nyekeme ndidi nun. Akwa owo nnyịn ama ọdọhọ ke ọkpọfọn nsọsọp nnyọn̄ edieke osụk etiede nte ndikemeke. N̄kere ke enye okoyom nnyọn̄ man nditịmede iban eken. Ntre mma nnyọn̄.

 Ke ini n̄kesịmde ufọk, ete ye eka mi ikayatke esịt ye ami. Edi mma n̄kpọn̄ Spain n̄ka Germany sia utom mîkodụhe ke obio nnyịn. Eyeneka mi erenowo emi etienede mi ke edem ama ododu do. Enye ekedi owo n̄ka mbon Spain emi ẹyomde ẹnam n̄kpọ ye kpukpru owo ukem ukem. Mma mma nte mmọ ẹkenamde n̄kpọ man ẹtre ndifịk iban ye mme anamutom. Ke ntak emi, mma ntiene ndụk n̄ka oro nnyụn̄ ndọ owo n̄ka oro. Mma nsitiene nnọ mme owo n̄wed n̄ka nnyịn. Ke ini mbon n̄ka nnyịn ẹwọn̄ọde ẹsan̄a ke udịm ẹdọhọ ẹtre ufịk, mma nsitiene nsan̄a. N̄kekere ke eti n̄kpọ ke nnam oro.

Edi nte ini akade, n̄ka emi ikenemke mi aba. N̄kekere ke mbon n̄ka nnyịn ikesiwakke ndinam se mmọ ẹtịn̄de. Ama etetịm ọdiọk ke 1971 ke ini emi mbon n̄ka nnyịn ẹkefọpde ufọkutom ukara Spain emi odude ke Frankfurt. Mmọ ẹkenam oro ndiwụt ke mmimọ imaha nte ukara Spain ẹkefịkde mme owo. N̄kekereke ke se mmọ ẹkenamde emi ama ọfọn!

Ke mma n̄kaman akpan mi, mma ndọhọ ebe mi ke ndikaha aba mbono n̄ka oro. N̄kani ufan mi ndomokiet ikedịghe idise mi ye eyen mi ntre eketie mi nte nnyeneke owo aba. Mma n̄kere m̀mê nso idi ufọn uwem emi. Ndi kpukpru se n̄kanamde man n̄n̄wam mme owo ama enyene ufọn?

NTE BIBLE OKOKPỤHỌREDE UWEM MI:

Ke 1976, Mme Ntiense iba emi ẹdide mbon Spain ẹma ẹdi ufọk mi ẹdinọ mi mme n̄wed Ikọ Abasi mmọ. Ke ini mmọ ẹkefiakde ẹdi, mma mfak mmọ mbụme mban̄a se idide ntak ufen, utụk, ye ufịk. Ama akpa mi idem nte mmọ ẹkedade Bible ẹbọrọ kpukpru se n̄kobụpde! Ntre mma nnyịme mmọ ẹkpep mi Bible.

Ke nsonso oro n̄kekpep n̄kpọ ye mmọ nte owo ekpep n̄wed. Edi ke ini ami ye ebe mi ikakade Ufọkmbono Obio Ubọn̄ Mme Ntiense Jehovah ikokop se mmọ ẹkpepde, n̄kanamke ntre aba. Ini emi mma nnyene nditọ iba. Mme Ntiense ẹma ẹsidi ẹdimen nnyịn ẹka mbono esop ẹnyụn̄ ẹtiene nnyịn ẹse nditọ nnyịn enyịn ke ini mbono esop. Mma ntọn̄ọ ndima Mme Ntiense ndien.

Kpa ye oro, okosụk ọsọsọn̄ mi ndisịn esịt ke n̄kpọ Abasi. Mma mbiere ndika Spain n̄kese mbonubon nnyịn. Eyeneka ete mi emi edide oku ama ọdọhọ mi ntre ndikpep Bible. Edi Mme Ntiense ke Spain ẹma ẹn̄wam mi. Mmọ ẹma ẹda Bible ẹbọrọ se n̄kobụpde, nte Mme Ntiense ke Germany ẹkenamde. Mma mbiere ke mma nnyọn̄ n̄ka Germany ke nyafiak ntọn̄ọ ndikpep Bible. Kpa ye emi ebe mi mîkamaha ndikpep Bible aba, mma n̄ka iso n̄kpep. Ke 1978, mma nna baptism nnyụn̄ ndi Ntiense Jehovah.

UFỌN ORO MBỌDE:

Se n̄kpepde ke Bible anam mi mfiọk nte n̄kpodude uwem ye se n̄kpadade uwem mi nnam. Ke uwụtn̄kpọ, 1 Peter 3:1-4 ọdọhọ iban “ẹsụk ibuot” ẹnọ mme ebe, ẹnen̄ede ẹkpono mmọ ẹnyụn̄ ẹnyene “ifụre ifụre edu, emi enen̄erede ọsọn̄ urua ke enyịn Abasi.” Utọ item emi ẹn̄wam mi ndi eti an̄wan ye eti eka.

Isua 35 ẹdi emi tọn̄ọ n̄kedi Ntiense. Enem mi nditiene nsịne ke otu mbon emi ẹnamde n̄kpọ Abasi, onyụn̄ enem mi n̄ko nte inan̄ ke otu nditọ mi ition ẹtienede ẹdi Mme Ntiense.