Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME MARCH 2014

 MBỤK EYOUWEM

Mmokop Odudu Kpa ye Mmemidem

Mmokop Odudu Kpa ye Mmemidem

Idụhe owo emi okpokụtde nte ntiede ke n̄kpọitie mbon n̄kpọnnam ekere ke mmenyene odudu. Ntịn̄ emi sia ndi kilogram 29 kpọt. Kpa ye emi mferede ntem, ke nnyenyene odudu ke esịtidem. Se inịmde mi uwem edi oro. Mmọn̄ ntịn̄ se iwọrọde mi ye nte odudu emi n̄kopde ke esịtidem an̄wamde mi.

Ini n̄kedide isua inan̄

Uwem ama enem etieti ini ndide eyenọwọn̄. Ikodụn̄ ke ekpri ufọk ke obio-in̄wan̄ kiet ke France. Ke nteti n̄kpọmbre emi ete mi akanamde ọnọ mi, ye nte n̄kesifehede n̄kanade in̄wan̄esa nnyịn. Ke 1966, Mme Ntiense Jehovah ẹma ẹdi ufọk nnyịn ẹdikwọrọ ikọ ẹnọ ete mi. Mmọ ẹma ẹtie ẹbịghi. Ke ọfiọn̄ itiaba ama ekebe, ete mi ama akabade edi Ntiense. Eka mi ama etiene edi Ntiense n̄ko. Utọ ufọk emi ke n̄kokpon.

Ima inyọn̄ ika Spain sia ete ye eka mi ẹto do. Do ke mfịna mi ọkọtọn̄ọ. Ubọk ye itọn̄ukot ẹma ẹtọn̄ọ ndibiak mi. Eketie nte ẹkama ikwa ẹkịm mi. Ke mma n̄kaka mbịne nsio nsio mbiausọbọ ke isua iba, ima idikụt abiausọbọ ewan̄kọ. Ete oro ama ese mi onyụn̄ ọdọhọ ete, “ọdiọk enyịn-o.” Eka mi ama ọtọn̄ọ eyet. Okposụkedi emi n̄kedide eyen isua duop kpọt, utọ ikpọ Ikọmbakara * emi abiausọbọ ekesemde ke ubet oro n̄kodude ama anam mfiọk ke ọdiọk udep.

Abiausọbọ oro ama ọdọhọ ẹmen mi ẹka itie usọbọ nditọwọn̄. N̄kamaha se n̄kokụtde do. Ẹkenam n̄kpọ nte ẹdu ke an̄waekọn̄. Nditọiban Catholic emi ẹkedude do ẹma ẹfat mi idet ẹnyụn̄ ẹsịne mi ọfọn̄ emi eketiede nte ọfọn mbon n̄kpọkọbi. Mma n̄kere m̀mê ndinanam didie ke utọ itie emi. Mmọn̄eyet ama asiaha mi ke enyịn.

JEHOVAH ANYAN̄A MI

N̄ketieneke nnam se mbon Catholic ẹkesinamde do sia ete ye eka mi ẹkekpep mi ndinam n̄kpọ Jehovah. Ikan̄wan̄ake mmọ ntak emi mmen̄ketieneke nnam. Mma n̄kpe Jehovah ubọk nte okûkpọn̄ mi, enye ikonyụn̄ ikpọn̄ke mi. Eketie nte n̄kpọ eke edima ete afatde eyen esie akama.

Ẹma ẹyak ete ye eka mi ẹsidi ẹdise mi kpukpru Saturday. Edi owo ikesiyakke mmọ ẹtie ẹbịghi. Mmọ ẹma ẹsida mme n̄wed Bible ẹsọk mi n̄kot man n̄ka iso nnam n̄kpọ Abasi. Owo ikesiyakke nditọwọn̄ ẹnyene n̄wed, edi nditọiban Catholic  oro ẹma ẹyak mi nnyene n̄wed ye Bible. N̄kesikot mmọ kpukpru usen. Mma nsitịn̄ nnọ nditọiban eken nte ke usen kiet isọn̄ emi ayakabade edi Paradise ndien ke owo ndomokiet ididọn̄ọke aba. (Ediyarade 21:3, 4) Okposụkedi emi n̄kesifụhọde ndusụk ini, onyụn̄ etiede nte ke nnyeneke owo, n̄kosụk mbọbuọt idem ke Jehovah.

Ke ọfiọn̄ itiokiet ama ekebe, mbiausọbọ ẹma ẹsio mi unyọn̄. Ama enem mi ndinyọn̄ mbịne ete ye eka mi kpa ye emi idem mîkosụk isọn̄ke mi. Ekedi eyo esiere, idem ọdọdiọn̄ ọdiọk mi, ubiak ikonyụn̄ idịghe ekpri. Kpa ye oro, mma nna baptism ke mma n̄kesịm isua 14 nnyụn̄ mbiere ndinam n̄kpọ nnọ Abasi adan̄a nte n̄kekeme. Edi ndusụk ini mma nsiyat esịt ye Abasi. Mma nsibọn̄ akam mbụp enye nte: “Ntak emi ayakde utọ n̄kpọ emi anam mi? Mbọk nam idem ọsọn̄ mi ndien. Ukwe nte mbọde ufen?”

Ikememke utom inọ mi ke ini n̄kedide n̄kaiferi. Mma ndọdiọn̄ọ ke idem idisọn̄ke mi ikan emi. Edi ke ini n̄kụtde nte idem ọsọn̄de mme ufan mi ye nte mmọ ẹkopde inemesịt, ama esidọn̄ mi nditie nte mmọ. Bụt ama esinam mi tutu mmaha ndidian idem ye mme owo. Mme ufan mi ye mbonufọk nnyịn ẹma ẹn̄wam mi. Ndifreke ufan mi kiet emi ẹkerede Alicia. Enye ọsọn̄ọ mi isua 20. Enye ekekpep mi nditre ndiseme idem onyụn̄ ekpep mi ndikere mban̄a mbon en̄wen.

SE NNAMDE MAN N̄KOP IDEM INEM

Ke ini n̄kedide isua 18, mma ndọn̄ọ tutu idem mbono esop ekesikakak mi mma nnyọn̄ ndi. Edi mma nsida ini emi ndude ikpọn̄ n̄kpep Bible. N̄wed Job ye Psalm ẹma ẹnam n̄kụt ke idịghe kpukpru mfịna nnyịn ke Jehovah Abasi edimen efep idahaemi edi ke enye ayan̄wam nnyịn isọn̄ọ ida inam n̄kpọ esie. Akam emi mbọn̄de ke ubọk ke ubọk anam mi nnyene “odudu eke ebede ukeme owo” ye “emem Abasi emi akande kpukpru ekikere.”—2 Corinth 4:7; Philippi 4:6, 7.

Ke ini n̄kedide isua 22, ama ọdiọk tutu nditie ke n̄kpọitie mbon n̄kpọnnam. Ikenemke mi sia n̄kekere ke mme owo ẹdida mi nte mbụn̄ọ. Edi mma ndikụt ke ndusụk idiọkn̄kpọ idịghe idiọk. N̄kpọitie mbon n̄kpọnnam emi akakam an̄wan̄wam mi n̄keme ndinam ndusụk n̄kpọ ke idem mi. Ufan mi kiet emi ekerede Isabel ama ọdọhọ ntiene imọ n̄kwọrọ ikọ hour 60 ọfiọn̄ kiet.

N̄kasasak enye ke ini enye etịn̄de ikọ emi. Edi mma ndọhọ Jehovah an̄wam mi. Mme ufan ye mbonufọk nnyịn n̄ko ẹma ẹn̄wam mi, ntre mma n̄kwọrọ ikọ hour 60 ọfiọn̄ oro. Emi ikayakke ndịk ye bụt anam mi aba nte ekesinamde. Ama enem mi etieti, ndien ke 1996 mma mbiere ndidi asiakusụn̄ ofụri ini. Mme asiakusụn̄ ofụri ini ẹkesikwọrọ ikọ hour 90 kpukpru ọfiọn̄ ini oro. Kiet ke otu nti ubiere emi nnamde ke uwem mi edi emi. Utom emi ọnọ mi odudu, anam mi nnen̄ede n̄kpere Abasi, mmonyụn̄ n̄n̄wam ediwak owo ẹfiọk Abasi.

JEHOVAH IKPỌN̄KE MI

Moto ama obụn̄ mi ukot mbiba ke ndaeyo 2001. Nte nnade ke bed ufọkibọk n̄kpa ubiak, mma mbọn̄ akam ke esịt nte: “Jehovah, kûkpọn̄ mi mbọk!” Kpa idaha oro, mma kiet emi akanade ekpere mi ama obụp mi ete, “Ndi afo edi Ntiense Jehovah?” Mma ntop ibuot sia mmen̄kekemeke ndisioro uyo. Mma oro ama ọdọhọ ete: “Mmọdiọn̄ọ mbufo! Mmesikot mme magazine mbufo.” Ikọ mma emi ama ọsọn̄ọ mi idem. Ọwọrọ kpa ye ofụri ukụt mi emi, ke nnọnọ Jehovah ubọn̄. Ama enem mi etieti!

Ke idem ama ọkọtọn̄ọ ndisọn̄ mi, mma mbiere ndinam mbon en̄wen ke ufọkibọk oro ẹdiọn̄ọ Jehovah. Ẹma ẹbọp mi ukot mbiba ndien eka mi ewere mi asan̄a ke ufọkibọk. Kpukpru usen, ima isika ikese ndusụk mbon udọn̄ọ, ibụp mmọ nte idem mmọ etiede inyụn̄ inọ mmọ mme n̄wed Ikọ Abasi. Ama esikak mi edi Jehovah ama ọnọ mi odudu nnam.

Ami ye ete ye eka mi ke 2003

Ke isua ifan̄ emi ebede, ewan̄kọ emi abiak mi akan nte ekedide. Ke n̄n̄wan̄wana ndiyọ emi, ete mi edikpa. Edi nyakke kpukpru emi ọdiọk mi  esịt. Ini eke n̄kekeme, mmesitie ye mbonufọk nnyịn ye mme ufan mi nneme nneme man mfre mfịna mi. Mma ndu ikpọn̄, mmesikot n̄wed, n̄kpep Bible, mîdịghe n̄kwọrọ ikọ nnọ mme owo ke fon.

Mmesitie n̄kere nte uwem editiede ke Obio Ubọn̄ Abasi

Ofụm Abasi ama otụk mi mîdịghe n̄kop inem ufuọn̄ flawa, esinem mi. Mmesikọm Abasi ke mme n̄kpọ ntem. Mbubru esin̄wam n̄ko. Usen kiet, ufan mi ama ewere mi ke n̄kpọitie mbon n̄kpọnnam aka ukwọrọikọ. Ke ini enye akatuakde ada ete iwet n̄kpọ, n̄kpọitie oro ama ewere emen mi ọkọtọ ke moto kiet emi akanade ke mbenusụn̄. Idem ama enyek nnyịn mbiba, edi imam ama ọbọhọ nnyịn ke ini ikokụtde ke n̄kpọ inamke mi.

Enyene ediwak n̄kpọ emi mmen̄kemeke ndinam idahaemi. Edi mma ntie n̄kere nte uwem editiede ke Obio Ubọn̄ Abasi, mmesidọhọ, Yak usụn̄ esịne ke urụn̄ ebet esen. (2 Peter 3:13) Mmesikụt nte ndahade nsan̄a ke idem mi, nte idem ọsọn̄de mi, ye nte n̄kopde inem uwem. Nsida ikọ Edidem David ke Psalm 27:14 ndọn̄ idem esịt. Itien̄wed oro ọdọhọ ete: “Dori enyịn ke Jehovah; nyene uko nyụn̄ sọn̄ esịt.” Okposụkedi emi idem ọdiọn̄de-diọn̄ ọdiọk mi, Jehovah ke ọsọn̄ọ mi idem. Ke nnyenyene odudu kpa ye udọn̄ọ.

^ ikp. eki. 6 Ikpọ Ikọmbakara emi enye okokopde ọkọwọrọ ke enye ọdọn̄ọ ewan̄kọ nditọwọn̄ sia editịbe emi akpakam an̄wanade-n̄wana ye ndiọi udọn̄ọ ke idem esie akakam ababiat n̄kpọ.