Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME MARCH 2014

 IBUOTIKỌ IKPAEDEM | SE ABASI ANAMDE ỌNỌ FI

Se Abasi Anamde Ọnọ Fi

Se Abasi Anamde Ọnọ Fi

“Koro Abasi akamama ererimbot ntem, tutu Enye osio ikpọn̄-ikpọn̄ Eyen emi Enye obonde ọnọ, man owo ekededi eke ọbuọtde idem ye Enye okûtak, edi enyene nsinsi uwem.”—John 3:16, Edisana Ŋwed Abasi Ibom.

Ke ofụri Bible, itie emi ke mme owo ẹfiọk ẹkan. Ẹdọhọ ke idụhe ufan̄ikọ efen ke Bible emi “etịn̄de nte Abasi amade owo ye nte enye asan̄ade anyan̄a nnyịn.” Ke ediwak idụt, ẹsiwet ikọ itien̄wed emi ke nsio nsio itie edinam, ndusụk owo ẹwet ke moto, ke ibibene, ye mme itie ntre, mîdịghe ẹwet “John 3:16” kpọt.

Mbon emi ẹnamde emi ẹnịm ke Abasi ayanyan̄a mmimọ sia enye ama mmimọ. Afo ekere didie? Ese didie ima oro Abasi amade fi? Nso ke Abasi anam ndiwụt ke imama fi?

“KORO ABASI AKAMAMA ERERIMBOT NTEM”

Ediwak owo ẹnyịme ke Abasi okobot ekondo ye kpukpru se ikụtde, ke enye okonyụn̄ obot owo. Nte ẹkebotde n̄kpọ ye nte mme n̄kpọ ẹtiede ẹwụt ke owo emi ọfiọkde n̄kpọ etieti akanam mme n̄kpọ emi. Kpukpru usen, ediwak owo ẹsikọm Abasi ke ndinọ mmimọ uwem. Mmọ ẹdiọn̄ọ ke mîkpedịghe Abasi ọnọ mmimọ ofụm, mmọn̄, udia, eyo, edịm, ye mme n̄kpọ eken, ke mmimọ ikpodụhe uwem.

Ọfọn ikọm Abasi ke mme n̄kpọ emi koro enye okobot kpukpru n̄kpọ, enye onyụn̄ enịm nnyịn uwem. (Psalm 104:10-28; 145:15, 16; Utom 4:24) Ima itie ikere kpukpru emi, iyọfiọk adan̄a nte Abasi amade nnyịn. Apostle Paul ọdọhọ ete: “[Abasi] ọnọ kpukpru owo uwem ye ibifịk ye kpukpru n̄kpọ. Koro ebe ke enye  ke nnyịn inyene uwem inyụn̄ isan̄a inyụn̄ idu uwem.”—Utom 17:25, 28.

Idịghe emi kpọt ke Abasi ada owụt nte imade nnyịn. Nte enye okobotde nnyịn owụt n̄ko ke enye enen̄ede ama nnyịn. Nnyịn itiehe nte unam, edi imọdiọn̄ọ idem, imonyụn̄ ikeme ndikpono Abasi. Abasi n̄ko owụt nnyịn nte ikpokponode imọ. (Matthew 5:3) Mbon emi ẹkopde uyo Abasi ẹdidi “nditọ” esie.—Rome 8:19-21.

John 3:16 etịn̄ n̄ko ete ke ima emi Abasi amade nnyịn akanam enye ọdọn̄ Eyen esie Jesus edi isọn̄ edinam nnyịn ifiọk imọ onyụn̄ akpa ke ibuot nnyịn. Edi ediwak owo isụk idiọn̄ọke ntak emi Jesus akakpade, ye nte n̄kpa Jesus owụtde ke Abasi ama nnyịn. Yak Bible etịn̄ ntak ọnọ nnyịn ye ufọn n̄kpa esie.

‘ENYE ỌKỌNỌ NNYỊN IKPỌN̄-IKPỌN̄ EYEN ESIE’

Idụhe eke ekemede ndifehe mbọhọ udọn̄ọ, usọn̄ ye n̄kpa. Edi idịghe se Jehovah akaduakde ọnọ owo ke editọn̄ọ edi oro. Enye ọkọdọhọ Adam ye Eve ke mmọ ẹyedu uwem ke nsinsi ke Paradise ke isọn̄ edieke mmọ ẹkopde uyo imọ. Edi edieke mmọ ẹsọn̄de ibuot, ke mmọ ẹyekpa. (Genesis 2:17) Adam ama ọsọn̄ ibuot ye Abasi, ntre enye okowot idem ye nditọ esie. Apostle Paul etịn̄ aban̄a emi ke Rome 5:12 ete: “Mmọdo, nte idiọkn̄kpọ okotode owo kiet odụk ererimbot, n̄kpa onyụn̄ otode ke idiọkn̄kpọ oro odụk, ndien n̄kpa atara esịm kpukpru owo koro kpukpru mmọ ẹma ẹnam idiọkn̄kpọ.”

Edi Jehovah edi Abasi emi “amade unenikpe.” (Psalm 37:28) Okposụkedi emi Abasi akayakde Adam akpa ke ndikokoi nsọn̄ ibuot ye imọ, enye ikọdọhọke ke ana kpukpru nditọ esie ẹbọ ufen ke nsinsi ekem ẹkpa ẹtak ke ntak nsọn̄ibuot owo kiet emi. Utu ke oro, enye ama ebiere ndinọ “ukpọn̄ ke ukpọn̄,” oro edi, ndinọ Eyen esie ke ibuot nnyịn man owo ekededi emi okopde item esie afiak enyene se Adam ye Eve ẹketopde ẹduọk. (Exodus 21:23) Edi idisan̄a didie ifiak ikenyene mfọnmma uwem emi Adam ekenyenede? Akana owo emi enyenede ukem mfọnmma uwem emi Abasi ọkọnọde Adam ọkpọn̄ uwem esie ọnọ nnyịn.

Jesus ama enyịme ndidi ndikpa man anyan̄a nnyịn osio ke idiọkn̄kpọ ye n̄kpa

Idụhe owo ndomokiet ke isọn̄ emi ekekemede ndinam emi sia mîdụhe eyen Adam ndomokiet emi ọfọnde ama, edi Jesus ama ekeme. (Psalm 49:6-9) Jesus ekedi mfọnmma owo nte Adam ekedide ke editọn̄ọ koro enye ikadaha idiọkn̄kpọ imana. Enye akakpa man okposio nnyịn ke ufụn idiọkn̄kpọ. Emi anam nditọ Adam ẹnyene idotenyịn ndifiak ndu utọ uwem emi Abasi ọkọnọde Adam ye Eve ke editọn̄ọ. (Rome 3:23, 24; 6:23) Nso ke ikpanam man ikpetiene idia akwa mfọn ima Abasi emi?

 “OWO EKEDEDI EKE ỌBUỌTDE IDEM YE ENYE”

N̄kọ emeti ke John 3:16 oro iketịn̄de iban̄a ọkọdọhọ ke ‘owo ekededi emi ọbuọtde idem ye Jesus iditakke, edi eyenyene nsinsi uwem.’ Emi ọwọrọ ke enyene se anade owo anam man “enyene nsinsi uwem.” Ana enye ọbuọt idem ye Jesus onyụn̄ okop uyo esie.

Afo emekeme ndibụp m̀mê n̄kopuyo asan̄a nso ye mbuọtidem. Jesus ọkọdọhọ ke ‘owo ekededi eke ọbuọtde idem ye imọ’ eyenyene nsinsi uwem. Ntre ana owo emi oyomde nsinsi uwem ọbuọt idem ke Jesus. Edi Bible owụt ke utọ mbuọtidem emi ikụreke ke ndinịm ke Jesus do. Owo emi oyomde Abasi anyan̄a imọ ana anam n̄kpọ akan oro. Ana enye odomo ndinam se Jesus ekekpepde. Edieke enye mînamke, nditetịn̄ ke inua nte ke imọbuọt idem ke Christ ọkpọwọrọ ikpîkpu. Bible ọdọhọ ke “mbuọtidem eke mîsan̄ake ye utom akpa.” (James 2:26) Ikọ ọwọrọ ke ana owo emi ọdọhọde ke imọbuọt idem ke Jesus odu uwem nte Jesus ọkọdọhọde ẹdu.

Paul esịn kpa ke uyo oro ete: “Ima Christ onụk nnyịn, koro ibiere ntem ite, owo kiet [Jesus] akakpa aban̄a kpukpru owo . . . Enye akakpa ọnọ kpukpru owo man mbon oro ẹdude uwem ẹkûdu aba ẹnọ idemmọ, edi ẹdu ẹnọ enye emi akakpade ọnọ mmọ onyụn̄ esetde.” (2 Corinth 5:14, 15) Edieke inen̄erede ima nte Jesus akakpade ke ibuot nnyịn, iyanam ukpụhọde ke uwem nnyịn. Nnyịn ididụhe aba uwem nte nnyịn imade, edi ididu nte Jesus emi akakpade ọnọ nnyịn amade. Oro ọwọrọ ke se idinen̄erede ibehe nnyịn edi ndidu uwem nte Jesus ekekpepde. Nte idude uwem, se ibierede ndinam, ye kpukpru se inamde ẹdidi kpa nte Jesus etemede. Se ndibuọt idem ke Jesus ọwọrọde edi oro. Edi nso ke Abasi edinọ mbon emi ẹbuọtde idem ke Jesus ntem?

‘MMỌ IDITAKKE, EDI EYENYENE NSINSI UWEM’

Akpatre ikọ ke John 3:16 owụt se Abasi edinamde inọ mbon emi ẹbuọtde idem ke Jesus ẹnyụn̄ ẹdade Ikọ Abasi ẹdu uwem. Ikọ Abasi ọdọhọ ke mmọ ‘iditakke, edi ẹyenyene nsinsi uwem.’ Abasi edinọ ndusụk mmọ nsinsi uwem ke heaven, ọnọ ndusụk ke isọn̄.

Jesus ọkọdọhọ ndusụk mbet esie ete ke mmọ ẹdidu nsinsi uwem ke heaven. Enye ọkọdọhọ mmọ ke imọn̄ ika iketịm itie inọ mmọ man mmọ ẹkpetiene imọ ẹkara. (John 14:2, 3; Philippi 3:20, 21) Abasi ayanam mmọ ẹset ke n̄kpa ẹka heaven ẹkedi “mme oku Abasi ye Christ, [ẹnyụn̄] ẹkara nte ndidem ye enye ke isua tọsịn kiet.”—Ediyarade 20:6.

Mme mbet Jesus emi ẹdikade heaven iwakke. Jesus ọkọdọhọ ete: “Ẹkûfehe ndịk, ekpri otuerọn̄, koro Ete mbufo emenyịme ndida obio ubọn̄ oro nnọ mbufo.” (Luke 12:32) “Ekpri otuerọn̄” oro ẹdidi owo ifan̄? Ediyarade 14:1, 4 ọdọhọ ete: “Ekem n̄kụt, ndien, sese! Eyenerọn̄ [Jesus emi ama ekeset ke n̄kpa] adada ke Obot Zion [oro edi, heaven], owo tọsịn ikie ye aba ye inan̄ ẹnyụn̄ ẹda ye enye, kpa mmọ emi ẹwetde enyịn̄ esie ye enyịn̄ Ete esie ke ọkpọiso mmọ. . . . Ẹkedep mmọ ẹsio ke otu ubonowo nte akpa mbun̄wụm ẹnọ Abasi ye Eyenerọn̄.” Owo 144,000 iwakke ke ẹmende ẹdomo ye ediwak biliọn owo oro ẹdude uwem ke isọn̄ emi. Ntak edi oro Jesus okotde mmọ “ekpri otuerọn̄.” Bible ọdọhọ ke mmọ ẹdidi ndidem. Mmanie ndien ke mmọ ẹdikara?

Jesus ama etịn̄ n̄ko aban̄a nti owo emi ẹditienede idia ufọn Obio Ubọn̄ heaven emi. Enye ọkọdọhọ ke John 10:16 ete: “Mmonyụn̄ nnyene mme erọn̄ en̄wen, emi mîtoho ke ufọkerọn̄ emi; ana nda mmọ oro n̄ko ndi, ndien mmọ ẹyekop uyo mi, mmọ ẹyenyụn̄ ẹkabade ẹdi otuerọn̄ kiet, ekpemerọn̄ kiet oyonyụn̄ odu.” Mbon emi ẹdidu uwem ke nsinsi ke isọn̄ nte  Abasi okoyomde Adam ye Eve ẹdu toto ke editọn̄ọ. Isan̄a didie ifiọk ke mmọ ẹdidu uwem ke isọn̄ emi?

Bible etịn̄ ediwak itie aban̄a nte uwem editiede ke Paradise ke isọn̄. Kot mme itie N̄wed Abasi emi ke Bible fo man okụt ke idemfo: Psalm 37:9-11; 46:8, 9; 72:7, 8, 16; Isaiah 35:5, 6; 65:21-23; Matthew 5:5; John 5:28, 29; Ediyarade 21:4. Mme itien̄wed oro ẹdọhọ ke ekọn̄, akan̄, udọn̄ọ, ye n̄kpa ididụhe. Ẹdọhọ n̄ko ke nti owo ẹyebọp ufọk mmọ ẹdụn̄, ẹtọ in̄wan̄ mmọ, ẹnyụn̄ ẹbon nditọ ke itie emi afanikọn̄ mîdụhe. * Ndi utọ n̄kpọ oro inemke fi? Imenịm ke Abasi ọmọn̄ ananam se enye ọn̄wọn̄ọde emi ke Bible.

ABASI ANAM ETIETI

Edieke etiede ekere kpukpru se Abasi anamde ọnọ fi ye mbon en̄wen, oyokụt ke enye anam etieti. Sese uwem emi enye ọnọde nnyịn, nnyịn itiehe nte unam, edi imọdiọn̄ọ idem, idem onyụn̄ eye nnyịn. Abasi ọnọ nnyịn kpukpru se iyomde man ika iso idu uwem. Akakan enọ emi Abasi ọnọde nnyịn edi Jesus Eyen esie emi enye ọkọnọde ete edikpa akpa afak nnyịn. John 3:16 owụt ke n̄kpa Jesus anam inyene idotenyịn nsinsi uwem.

Eyenem etieti ndidu nsinsi uwem ke ebiet emi emem odude, ebiet emi eyede, owo idọn̄ọke, owo in̄wanake ekọn̄, akan̄ idụhe, owo inyụn̄ ikpaha aba. M̀mê afo oyodu do m̀mê ududụhe esịne fi ke ubọk. Ke ama okokụt kpukpru se Abasi anamde ọnọ fi, nso ke afo anam ọnọ Abasi?

^ ikp. eki. 24 Edieke oyomde ndifiọk n̄kpọ en̄wen mban̄a emi, mbọk kot ibuot 3 ke n̄wed Mme Ntiense Jehovah emi, Nso ke Bible Enen̄ede Ekpep?

Kpep N̄kpọ En̄wen

Nso ke Abasi Oyom Nnam?

Ndi oyom ẹwụt fi san̄asan̄a idiọn̄ọ m̀mê n̄kukụt mbemiso ọfiọkde se Abasi oyomde anam? Fiọk se Bible ọdọhọde.