Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME FEBRUARY 2014

 Mme Andikot N̄wed Nnyịn Ẹbụp Ẹte . . .

Ntak Emi Abasi Esiyakde Mme Owo Ẹfịk Owo?

Ntak Emi Abasi Esiyakde Mme Owo Ẹfịk Owo?

Imesikot ke Bible nte mme owo ẹfịkde owo. Uwụtn̄kpọ kiet edi se iketịbede inọ Naboth. * Ahab emi ekedide edidem ke Israel ke n̄kpọ nte isua 3,000 emi ẹkebede ama ayak Jezebel an̄wan esie owot Naboth ye nditọ esie man enye akada in̄wan̄ vine Naboth enyene. (1 Ndidem 21:1-16; 2 Ndidem 9:26) Ntak emi Abasi akayakde Jezebel anam utọ n̄kpọ oro?

‘Abasi ikemeke ndisu nsu.’—Titus 1:2

Titus 1:2 etịn̄ akpan ntak kiet emi akanamde Abasi ayak emi etịbe. Itie oro ọdọhọ ke Abasi ikemeke ndisu nsu. Edi oro asan̄a nso ye ufịk? Ke Abasi ama okobot owo, enye ọkọdọhọ ke edieke mmọ esọn̄de ibuot ye imọ ke mmọ ẹyekpa. Se iwọrọde owo tọn̄ọ Adam ye Eve ẹkesọn̄ ibuot onyụn̄ edi se Abasi eketịn̄de. Abel edi akpa owo emi akakpade. Cain eyeneka esie okowot enye.—Genesis 2:16, 17; 4:8.

Ikọ Abasi ọdọhọ ke tọn̄ọ oro, ke ‘owo akara owo tutu ọnọ enye unan.’ (Ecclesiastes 8:9) Ndi ukwe ntre? Jehovah ama ọdọhọ nditọ Israel ke ndidem mmọ ẹyefịk mmọ tutu mmọ ẹseme ẹnọ imọ. (1 Samuel 8:11-18) Tax emi Edidem Solomon emi akakam edide owo ọniọn̄ ekefịkde ikọt esie ọbọ ama okpon etieti. (1 Ndidem 11:43; 12:3, 4) Ndiọi ndidem, utọ nte Ahab, ẹma ẹnam se ikande oro. Kere ise, ekpedi Abasi ikayakke emi etịbe, ndi oro ikpọwọrọke ke enye okosu nsu?

‘Owo akara owo tutu ọnọ enye unan.’—Ecclesiastes 8:9

Ti n̄ko ke Satan ọdọhọ ke nnyịn inam n̄kpọ Abasi ke ntak ufọn emi idiade. (Job 1:9, 10; 2:4) Ekpedi Abasi iyakke ikọt esie ẹbọ ufen ndomo esisịt, ndi oro ikpowụtke ke Satan etịn̄ akpanikọ? Edieke Abasi mîkpayakke ẹfịk owo ndomokiet, ndi oro ikpetiehe nte ke mme owo ẹkeme ndikara idem mmọ, ke ufọn Abasi idụhe? Bible ọdọhọ ke owo ikemeke-keme ndikara idem esie. (Jeremiah 10:23) Obio Ubọn̄ Abasi ke edi; enye kpọt ekeme nditre kpukpru ufịk emi.

Edi ndi ikọ ọwọrọ ke Abasi awawan̄ ubọk ese nte ẹfịkde owo? Iwọrọke. Enyene n̄kpọ iba emi Abasi anamde. Akpa kan̄a, enye anam mme owo ẹdiọn̄ọ ke ufịk ọdiọk etieti. Ke uwụtn̄kpọ, Bible etịn̄ kpukpru se Jezebel akanamde ye Naboth, idịpke n̄kpọ ndomokiet. Bible etịn̄ owo emi edịbede ọdọk kpukpru ubi emi—ọbọn̄ ibak emi mîyomke mme owo ẹdiọn̄ọ ke imọ isịn kpukpru emi. (John 14:30; 2 Corinth 11:14) Bible ayarade enye. Enye edi Satan kpa Devil. Nte ẹyararede mme abak ibak emi ye eteufọk mmọ owụt ke Abasi iyomke nnyịn itiene mmọ ibak ibak man ikpodu uwem ke nsinsi.

Ọyọhọ n̄kpọ iba emi Abasi anamde edi ndinam nnyịn idiọn̄ọ ke kpukpru ufịk emi ẹyetre usen kiet. Nte Abasi akayararede Ahab, Jezebel, ye mbon en̄wen emi ẹkefịkde mme owo onyụn̄ amiade mmọ ufen anam inịm ke usen kiet usen kiet, enye ayamia ndiọi owo ufen. (Psalm 52:1-5) Abasi ọn̄wọn̄ọ ke iyetre kpukpru ufịk emi ẹfịkde ikọt imọ, ndien imọfiọk ke Abasi isisụhu nsu. * Naboth ye nditọ esie ẹyeset ẹdidu ke nsinsi ke Paradise ke isọn̄ emi ufịk mîdidụhe aba.—Psalm 37:34.

^ ikp. eki. 3 Se ibuotikọ emi, “Kpebe Mbuọtidem Mmọ” ke page 12.

^ ikp. eki. 8 Mbọk kot ibuot 11 ke n̄wed Mme Ntiense Jehovah emi, Nso ke Bible Enen̄ede Ekpep?