Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  February 2014

Ndi Ama Ọfiọk?

Ndi Ama Ọfiọk?

Ẹkesida aloe emi ẹtịn̄de ẹban̄a ke Bible ke m̀mọ̀n̄?

Ẹkesida eto Agarwood ẹnam aloe

Bible ọdọhọ ke ẹkesiduọk aloe ke ọfọn̄ ye bed man enem utebe. (Psalm 45:8; Mme N̄ke 7:17; Ikwọ Solomon 4:14) Etie nte ẹkesida eto Agarwood ẹnam aloe. Ekesidi eto emi ama adiahade, enye osio ata edinem ufuọn̄. Ke eto emi ama akasat, ẹyekọk enye akabade aloe ẹmen ẹkenyam.

Bible ọdọhọ ke tent nditọ Israel eketie “nte eto aloe oro Jehovah ọtọde.” (Numbers 24:5, 6) Ekeme ndidi itie Bible emi etịn̄ aban̄a nte eto Agarwood okokponde. Enye ama esiniọn̄ n̄kpọ nte ikpat 100 onyụn̄ enen̄ede atara. Kpa ye oro eto emi mîdụhe aba ke Israel, n̄wed kiet ọdọhọ ke ‘idịghe oro akpanam ẹdọhọ ke eto emi m̀mê eto en̄wen emi mbon edem oro mîdiọn̄ọke ikodụhe.’—A Dictionary of the Bible.

Nso utọ unam ke ẹkenyịme ẹda ẹdiwa ke temple Jerusalem?

N̄kpọ emi ẹkesikọn̄de ke uwa ke temple Jerusalem. edi n̄kpọ nte isua 2,000

Ibet Abasi ọkọdọhọ ẹda mfọnn̄kan unam ẹdiwa ke temple. Abasi ikoyomke unam emi obiomode ndo. (Exodus 23:19; Leviticus 22:21-24) Philo eyen Jew emi ekesiwetde n̄wed ke eyo mme apostle ọkọdọhọ ke mme oku ẹma ẹsinen̄ede ẹse unam oro ẹmende ẹdi ndiwa “ọtọn̄ọde ke ibuot esịm ikpat” man ẹkụt ke “inyeneke ndo.”

Ata ekpep n̄kpọ mban̄a Bible emi ekerede E. P. Sanders ọdọhọ ke etie nte mme anamutom temple “ẹkesiyak mbon oro ẹnyamde unam ye mme inuen ke temple ẹnyam se mme oku ẹma ẹkesese ẹnyụn̄ ẹkụt ke ọfọn. Ntre, andinyam ama esinọ andidep n̄kpọ ndiwụt ke unam emi enye edepde inyeneke ndo.”

Ke isua 2011, mme ọdọkisọn̄ nyom n̄kpọeset ẹma ẹkụt n̄kpọ emi ẹkesinọde owo emi edepde unam m̀mê inuen ke temple. N̄kpọ emi etie nte ekpri okụk. Ẹkekama enye mbemiso Christ amanade tutu esịm isua 70. Usem Aramaic emi ẹwetde ke idem n̄kpọ emi ọwọrọ: “Asana ekem se ẹnọde Abasi.” Etie nte mme anamutom ke temple ẹkesikọn̄ enye ke unam m̀mê ke inuen ekededi oro ẹyomde ndiwa.”