Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  February 2014

 BIBLE OKPỤHỌDE MME OWO

‘Ndikop ke Isọn̄ Emi Edidi Paradise Ama Okpụhọde Uwem Mi’

‘Ndikop ke Isọn̄ Emi Edidi Paradise Ama Okpụhọde Uwem Mi’
  • ISUA AKAMANADE: 1974

  • EBIET OTODE: LATVIA

  • SE ENYE EKEDIDE: EBRE MBUBA

NTE UWEM MI EKETIEDE:

N̄kamana ke Riga emi edide ibuot obio Latvia. Eka mi ọkọbọk mi ye adiahaeka mi ikpọn̄. Okposụkedi emi enye edide owo Catholic, ikesika ufọkabasi n̄kukụre ke usen Easter ye Christmas. Mma ndiọn̄ọ ke Abasi do ke ini n̄kedide akparawa, edi n̄kenyeneke ini nnọ enye.

Nte n̄kosụk n̄kponde, eka mi ama okụt ke mmesima ndikpọk se n̄kokụt nsuan nnyụn̄ mfiak ndiọn̄. Ntre enye ikesimaha ndiyak mi ndu ikpọn̄ ke ufọk mbak ndibiat n̄kpọ. Enye ama edep n̄kpọmbre ọnọ mi man nsikama n̄kpọk nte mmama. Mma nsima ndiwat moto-saikle n̄ko. Eka mi ama emen mi ekesịn ke mbuba uwat moto-saikle. N̄kọtọn̄ọ ke ekpri moto-saikle, ekem mbe ndụk akamba.

Sia n̄keferede ibuot, mma nsọsọp ndiọn̄ọ uwat. Edi mbuba emi ekedi edue-ukot-akpa-itọn̄. Mma n̄kan ke mbuba idụt nnyịn ikata nnyụn̄ n̄kan eke Baltic States ikaba.

NTE BIBLE OKOKPỤHỌREDE UWEM MI:

Ini n̄kosụk n̄wọrọde etop ke Evija ufan mi an̄wan ekenyene nneme ye Mme Ntiense Jehovah. Enye okokot n̄wed mmọ okokụt ebiet emi ẹdọhọde edieke owo oyomde ẹdikpep imọ Bible yak enye esịn ubọk do. Enye ama anam ntre. Ibịghike-bịghi, Mme Ntiense iba ẹma ẹdi ẹditọn̄ọ ndikpep enye Bible. N̄kafịnake enye, edi n̄kenyeneke ini nnọ Ikọ Abasi. Nte ini akade, mma ndọ Evija.

Usen kiet, ke ini Mme Ntiense ẹkedide ndikpep Evija an̄wan mi Bible, mmọ ẹma ẹdọhọ ntiene ntie. Mma nsụhọde ntetie. Se n̄kokopde ama enem mi. Se ikenemde mi ikan ekedi ndikop ke isọn̄ emi edidi Paradise. Ẹma ẹwụt mi Psalm 37:10, 11, emi ọdọhọde ete: “Ayak esisịt, idiọkowo ididụhe aba; afo oyonyụn̄ etịn̄ enyịn ke ebiet esie,  ndien enye ididụhe. Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.” Emi ama enem mi etieti.

Mma ntọn̄ọ ndima Ikọ Abasi ndien. Mma ndikụt ke ata ediwak n̄kpọ emi ẹkpepde ke ufọkabasi ẹdi nsu, edi se Bible ekpepde enem onyụn̄ an̄wan̄a owo.

Ini emi ke n̄kedi ndifiọk ke uwem edi enọ Abasi, ye nte ke Jehovah idaha uwem ke ekpri n̄kpọ. (Psalm 36:9) Emi ama anam mbiere ndikpọn̄ mbuba uwat moto-saikle, koro mbuba emi ekeme ndida owo ibuot. Mma mbiere ndikam nda uwem mi nnam n̄kpọ Jehovah. Tọn̄ọ oro, etop oro n̄kọwọrọde ke ntak mbuba emi ikọwọrọke n̄kpọ ndomokiet inọ mi aba.

Mma mfiọk ke Abasi emi ọkọnọde mi uwem iyomke nda enye mbre mbre

Ke I996, mma ndụk mbono ofụri ererimbot emi Mme Ntiense Jehovah ẹkenịmde ẹkpere ebiet oro ikesibrede mbuba ke Tallinn ke Estonia. Ama enem mi ndikụt nte mbon emi ẹtode nsio nsio idụt ẹbonode ọtọkiet ke emem. Ekpatubọk mma kiet ama osop ke itie mbono oro. Mma ndọhọ ke enye oro atak enye, ke enye idikwe ekpat oro aba. Edi ikebịghike Ntiense en̄wen ama emen ekpat oro ọsọk enye ye kpukpru n̄kpọ ke esịt. Idem ama akpa mi etieti! Usen oro ke n̄kenịm ke Mme Ntiense Jehovah ẹnam se Bible ekpepde. Ami ye n̄wan mi ima ika iso ikpep Bible ndien ke 1997, ima ina baptism inyụn̄ ikabade idi Mme Ntiense Jehovah.

UFỌN ORO MBỌDE:

Mbuba uwat moto-saikle owot ediwak ufan mi. Se n̄kekpepde ke Bible ama anam mfiọk ke Jehovah emi ọkọnọde mi uwem iyomke nda enye mbre mbre, edi oyom nda enye n̄kpono imọ. N̄kere ke se inịmde mi uwem edi oro.

Ami ye n̄wan mi ima inam utom isua inan̄ ke ofis Mme Ntiense Jehovah ke Riga. Idahaemi idise adiaha nnyịn Alise enyịn, ke inyụn̄ ikpep enye ndima Jehovah. Mmesika itie ukabade n̄wed Mme Ntiense Jehovah ini kiet ke urua n̄kọdiọn̄ moto ye mme n̄kpọ en̄wen. Enem mi etieti ndisụk n̄keme ndida se n̄kekpepde ke ini eyenọwọn̄ ndiọn̄ n̄kpọ! Omokụt do, ke n̄kpọkpọk n̄kpọ nsuan nnyụn̄ mfiak ndiọn̄.

Esinen̄ede enem mi ndisan̄a ye n̄wan mi ye adiaha mi n̄kwọrọ ikọ nnyụn̄ nnam mme owo ẹfiọk ata Abasi. Omokụt nte ndikop ke isọn̄ emi edidi Paradise okpụhọrede uwem mi!