Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME FEBRUARY 2014

 IBUOTIKỌ IKPAEDEM | EKỌN̄ EMI OKOKPỤHỌREDE ERERIMBOT

Owo Emi Edide Ntak Ekọn̄ ye Ufen

Owo Emi Edide Ntak Ekọn̄ ye Ufen

Akpa ekọn̄ ererimbot okokụre ke November 11, 1918. Mme owo ẹma ẹkpọn̄ mbubehe mmọ usen oro ẹwọrọ ẹketuak unek ke efak. Edi n̄kpọ efen emi akakam owotde mme owo akan akpa ekọn̄ ererimbot oro ikayakke idara emi ebịghi.

Nso ikedi oro? Udọn̄ọ efiomnsa. Udọn̄ọ emi ama owot ediwak mbonekọn̄ ke France ke June 1918. Efiomnsa ekedi udọn̄ọ ada owo ibuot. Ke ufan̄ ọfiọn̄ ifan̄ kpọt, ibat mbonekọn̄ America oro udọn̄ọ emi okowotde ke France ama akan se mme asua ẹkewotde. Mbonekọn̄ eken ẹma ẹda udọn̄ọ emi ẹnyọn̄ọ ke ekọn̄ ama okokụre. Nte udọn̄ọ emi akasan̄ade asuana ke ererimbot edi oro.

Biọn̄ ye nsọn̄ọn̄kpọ ikedịghe se ẹtịn̄de ẹnọ owo. Ke ekọn̄ ama okokụre ke 1918, ediwak owo ke obio mbakara ikekwe udia idia. Etisịm 1923, okụk mbon Germany ikọwọrọke n̄kpọ aba. Ke 1929, n̄kpọ ama ọsọn̄ etieti ke ofụri ererimbot. Ekem ekọn̄ ererimbot ọyọhọ iba ama ọtọn̄ọ ke 1939 ndiwụt ke nsụn̄ikan̄ akpa ekọn̄ ererimbot ikenịmeke ima. Nso ikada ofụri afanikọn̄ emi idi?

IDIỌN̄Ọ AKPATRE USEN

Bible anam nnyịn ifiọk ntak emi n̄kpọ etiede ntem ke ererimbot ye ntak emi ẹken̄wanade akpa ekọn̄ ererimbot. Jesus Christ ama etetịn̄ ke “idụt  ayadaha an̄wana ye idụt,” akan̄ ye ndiọi udọn̄ọ ẹyenyụn̄ ẹdu ke ofụri ererimbot. (Matthew 24:3, 7; Luke 21:10, 11) Enye ọkọdọhọ mbet esie ke mme n̄kpọ emi ẹdidi idiọn̄ọ akpatre usen. N̄wed Ediyarade owụt ke Satan emi ẹkesiode ẹduọk ke isọn̄ ke ini ekọn̄ akasiahade ke heaven ekesịn kpukpru emi ke isọn̄.—Se ekebe emi odude ke page 5,  “Ekọn̄ ke Isọn̄ ye ke Heaven.”

N̄wed Ediyarade n̄ko etịn̄ aban̄a mme awat enan̄-mbakara inan̄. Ita ke otu emi ẹda ẹban̄a ekọn̄, akan̄, ye ndiọi udọn̄ọ emi Jesus eketịn̄de aban̄a. (Se ekebe emi odude ke idak,  “Ndi Mme Awat Enan̄-Mbakara Inan̄ Emi Ẹtọn̄ọ Uwat?”) Afanikọn̄ emi akpa ekọn̄ ererimbot akadade edi ikụreke. Bible ọdọhọ ke Satan ọkọtọn̄ọ kpukpru emi. (1 John 5:19) Ndi Satan edisụk aka iso otụhọde mme owo ntem ke nsinsi?

N̄wed Ediyarade anam idiọn̄ọ ke ‘ini Satan edi ibio.’ (Ediyarade 12:12) Emi ayat Satan esịt anam enye otụhọde mme owo ntem ke ererimbot. Edi mme afanikọn̄ ererimbot emi ẹwụt ke Satan anam unyọn̄.

 ẸMỌN̄ ẸBIAT UTOM DEVIL

Akpa ekọn̄ ererimbot ama enen̄ede okpụhọde n̄kpọ ke ererimbot. Enye ọkọtọn̄ọ ediwak ekọn̄ emi ikụtde mi. Enye edi ntak nsio nsio ukara emi ẹyọhọde idahaemi, ye ntak emi mme owo mînịmke mme andikara aba ke akpanikọ. Ekọn̄ emi enen̄ede owụt ke ẹma ẹsio Satan ke heaven ẹduọk ke isọn̄. (Ediyarade 12:9) Enye esịn Satan ọdọk ofụri ubi emi nte idiọk andikara emi anamde unyọn̄. Ini esie ama ekem, kpukpru afanikọn̄ emi ọkọtọn̄ọde ke akpa ekọn̄ ererimbot ẹyebe ẹfep.

Sia ama okokụt nte ikọ Bible osude, ndi oro inamke fi enịm ke Jesus Christ emi edide Edidem nnyịn ke heaven, ọmọn̄ ‘ababiat utom Devil’? (1 John 3:8) Ata ediwak owo ke ẹbọn̄ akam ẹte Obio Ubọn̄ Abasi edi. Ndi emesitiene ọbọn̄? Obio Ubọn̄ oro ama edi, nti owo ẹyekụt nte ẹnamde uduak Abasi ke isọn̄ emi. (Matthew 6:9, 10) Ekọn̄ ndomokiet ididụhe aba ini oro! (Psalm 46:9) Kpep n̄kpọ ban̄a Obio Ubọn̄ emi man ekpetiene odu uwem ke ererimbot emi editiede emem emem!—Isaiah 9:6, 7.

^ ikp. eki. 20 Mbọk kot ibuot 8 ke n̄wed Mme Ntiense Jehovah emi, Nso ke Bible Enen̄ede Ekpep?