Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JANUARY 2014

 IBUOTIKỌ IKPAEDEM | NDI OWO AMA AKPA, ESIE OKỤRE?

Owo Ama Akpa, Esie Ikụreke!

Owo Ama Akpa, Esie Ikụreke!

Ekpri obio kiet emi ekerede Bethany okodu n̄kpọ nte kilomita ita ekpere Jerusalem. (John 11:18) N̄kpọ mmọn̄eyet ama etịbe ke obio emi urua ifan̄ mbemiso Jesus akpa. Ufan Jesus kiet emi ekekerede Lazarus ama ọdọn̄ọ etieti ekem akpa.

Ke ini Jesus okokopde n̄kpọ emi, enye ama ọdọhọ mme mbet esie ete ke Lazarus edede, ke imọ imọn̄ ikedemede enye. (John 11:11) Edi sia ikọ Jesus mîkan̄wan̄ake mmọ, enye ama ọdọhọ mmọ ndien ete ke “Lazarus akpa.”—John 11:14.

Jesus edisịm Bethany ke usen inan̄ ama ekebe man ọdọn̄ Martha esịt. Martha ọdọhọ enye ete: “Edieke afo okpokodude mi eyeneka mi ikpakakpaha.” (John 11:17, 21) Jesus ọdọhọ enye ete: “Ami ndi ediset ye uwem. Owo eke ọbuọtde idem ye ami, idem ọkpọkọm enye akpakpa, oyodu uwem.”—John 11:25.

“Lazarus, wọrọ di!”

Jesus ama anam n̄kpọ ndiwụt ke se imọ iketịn̄de edi akpanikọ. Enye ama aka udi Lazarus okofiori ete: “Lazarus, wọrọ di!” (John 11:43) Idem ama akpa mme owo ndikụt Lazarus ọwọrọde ke udi edi.

Jesus ama ananam owo iba ẹset. Kiet ekedi ekpri eyenan̄wan Jairus. Jesus okonyụn̄ ọdọhọ ke enye edede mbemiso anamde enye eset.—Luke 8:52.

N̄kọ omokụt ke Jesus ọkọdọhọ ke Lazarus ye eyen Jairus ẹdede ke ini edide mmọ ẹma ẹkpa. Ntak emi Jesus ọkọdọhọde ke mmọ ẹdede? Sia n̄kpa onyụn̄ etie nte idap, owo ama ede, ifiọkke se ikade iso. Kpasụk ntre owo ama akpa, ifiọkke baba n̄kpọ kiet, ibọhọ ufen, inyụn̄ ikopke ubiak ndomokiet. (Ecclesiastes 9:5; se ekebe oro,  “N̄kpa Onyụn̄ Etie Nte Idap.”) Mme mbet Jesus ẹma ẹnen̄ede ẹdiọn̄ọ ke owo ama akpa, ikemeke  ndinam baba n̄kpọ kiet. N̄wed kiet ọdọhọ ete: “Mme anditiene Jesus ẹkeda n̄kpa nte idap, ẹda udi nte itie emi . . . ikọt Abasi emi ẹkpan̄ade ẹduọkde odudu.”—Encyclopedia of Religion and Ethics.

Ndidiọn̄ọ ke owo ama akpa, edede, ibọhọ ufen iyakke nnyịn ifịna idem ọkpọsọn̄ iban̄a n̄kpa. Sia ima ikọfiọk emi, n̄kpa inamke nnyịn ndịk aba.

“EDIEKE OWO AKPADE NTE ENYE EKEME NDIFIAK NDU UWEM?”

Kpa ye oro idap esinemde, idụhe eke akpamade ndide ke nsinsi. Nnyịn isan̄a didie ifiọk ke mme akpan̄kpa ẹyeset kpa nte Lazarus ye eyen Jairus ẹkesetde?

Job ama obụp mbiet mbụme oro ke ini eketiede nte n̄kpa ọmọn̄ ada enye. Enye ọkọdọhọ ete: “Edieke owo akpade nte enye ekeme ndifiak ndu uwem?”—Job 14:14.

Job ama ọbọrọ mbụme esie ke ndidọhọ Abasi ete: “Afo oyokot, ndien ami nyeyere fi. Koro utom ubọk fo ọyọdọn̄ fi.” (Job 14:15) Job ama ọfiọk ke enen̄ede ọdọn̄ Jehovah ndinam ikọt Esie ẹset. Ndi Job okodori enyịn ke n̄kpọ emi mîkemeke nditịbe? Ihih.

Jesus ndikanam mme owo ẹset owụt ke Abasi ọnọ enye odudu ndinam mme akpan̄kpa ẹset. Bible ọdọhọ ke Jesus akama “ukpọhọde n̄kpa.” (Ediyarade 1:18) Ntre, kpa nte enye ọkọdọhọde ẹkpat itiat ẹsio ke udi Lazarus, enye ayada ukpọhọde n̄kpa ọkpọhọde udi onyụn̄ anam mme akpan̄kpa ẹset.

Bible etịn̄ n̄kpọ ediwak ini aban̄a ediset ke n̄kpa. Angel Abasi ọkọdọhọ Daniel ete: “Afo ọyọduọk odudu, edi afo ayadaha ada ọbọ udeme fo ke utịt mme usen.” (Daniel 12:13) Jesus ọkọdọhọ mme Sadducee emi mîkenịmke ke mme akpan̄kpa ẹyeset ete: “Mbufo ẹmenam ndudue, koro mbufo mîfiọkke N̄wed Abasi m̀mê odudu Abasi.” (Matthew 22:23, 29) Apostle Paul ọkọdọhọ esie ete: “Mmenyene idotenyịn ke Abasi . . . nte ke ndinen owo ye mme anam ukwan̄n̄kpọ ẹyeset ke n̄kpa.”—Utom 24:15.

INI EWE KE MME AKPAN̄KPA ẸDISET?

Ini ewe ke ẹdinam ndinen owo ye mme anam ukwan̄n̄kpọ ẹset? N̄kọ emeti ke angel ọkọdọhọ Daniel ke enye “ayadaha ada . . . ke utịt mme usen.” Martha okonyụn̄ ọdọhọ ke Lazarus eyeneka imọ “eyeset ke ini ediset ke n̄kpa ke akpatre usen.”—John 11:24.

Bible ọdọhọ ke Christ ọtọn̄ọ ukara ke mme “akpatre usen” emi. Paul ekewet ete: “Koro ana [Christ] akara nte edidem tutu Abasi ada kpukpru mme asua esie esịn enye ke idak ikpat. Ẹyesobo n̄kpa ẹfep nte akpatre asua.” (1 Corinth 15:25, 26) Emi edi ata akpan ntak emi ikpọbọn̄ke akam ite Obio Ubọn̄ Abasi edi man ẹnam uduak Abasi ke isọn̄. *

Job ama ọfiọk ke Abasi aduak ndinam mme akpan̄kpa ẹset. N̄kpa ididaha owo ndomokiet aba ke emi ama etịbe. Owo iditịn̄ke aba ikọ iban̄a n̄kpa tutu amama.

^ ikp. eki. 18 Edieke oyomde ndifiọk n̄kpọ efen mban̄a Obio Ubọn̄ Abasi, mbọk kot ibuot 8 ke n̄wed Mme Ntiense Jehovah emi, Nso ke Bible Enen̄ede Ekpep?