Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JANUARY 2014

Ndi Ama Ọfiọk?

Ndi Ama Ọfiọk?

Ẹkesitịp okụk didie ke eyo Jesus?

Ufọk unịm okụk ekesidu ke Okụre Iban. N̄wed kiet ọdọhọ ete: “Anyan etehe ama odu akanade okụre iban, ndien ẹkesibon n̄kpọ usịn okụk duopeta ke etehe emi ẹkpere ibibene man mme owo ẹkpetịp okụk mi.”—The Temple—Its Ministry and Services.

N̄kpọ usịn okụk emi eketie nte obukpon̄. Ẹma ẹsiwet nsio nsio enyịn̄ etịbe ẹdian, ẹnyụn̄ ẹsio okụk do ẹnam se akpanade ẹnam. Ke Okụre Iban emi ke Jesus okokụt nte ubuene ebeakpa ye mme owo eken ẹsịnde etịbe mmọ.—Luke 21:1, 2.

Ẹkesisịn okụk tax temple obufa isua ke akpa n̄kpọ usịn okụk, ẹsịn eke akani isua ke ọyọhọ iba. Ẹsịn okụk mbomon̄kuku ke ọyọhọ ita, ẹsịn okụk ibiom ke ọyọhọ inan̄, okụk ifia ke ọyọhọ ition, okụk incense ke ọyọhọ itiokiet, okụk n̄kpọ gold ke ọyọhọ itiaba. Ẹsịn nyọhọ nsụhọ okụk uwa idiọkn̄kpọ ke ọyọhọ itiaita. Nyọhọ nsụhọ okụk uwa ubiomikpe ke ọyọhọ usụkkiet, nyọhọ nsụhọ okụk uwa inuen ke ọyọhọ duop, nyọhọ nsụhọ okụk mme Nazarite ke 11, nyọhọ nsụhọ okụk mbon akpamfia ke ọyọhọ 12, ẹsịn enọ imaesịt ke ọyọhọ 13.

Ndi se Luke ekewetde ama enen?

Luke ekewet n̄wed Luke ye n̄wed Utom Mme Apostle. Enye ọdọhọ ke imọ ikewet ‘kpukpru n̄kpọ nnennen nnennen,’ edi ndusụk mme ekpepn̄kpọ mban̄a Bible ẹdọhọ ke idịghe ntre. (Luke 1:3) Ndi se enye ekewetde ama enen?

Se Luke ekewetde enen. Ke uwụtn̄kpọ, enye ama asiak udorienyịn̄ ikpọ mbon Rome emi ndusụk owo mîtịmke idiọn̄ọ, nte “mme ekpeikpe obio,” “mme andikara obio,” ye “mme esenyịn.” (Utom 16:20; 17:6; 19:31) Luke okokot Herod Antipas “andikara n̄kann̄kụk,” okot Sergio Paulus “andikara” Cyprus.—Utom 13:1, 7.

Emi ama enen sia ẹkesinọ andikara obio kiet kiet ke Rome enyịn̄ ẹtiene obio emi enye akarade. Edieke enye akarade akamba obio, ẹnọ enye akamba udorienyịn̄, edieke enye akarade ekpri obio, ẹnọ enye ekpri udorienyịn̄. Bruce Metzger emi esikpepde n̄kpọ aban̄a Bible ọdọhọ ke ‘nsio nsio udorienyịn̄ emi Luke asiakde ke n̄wed Utom Mme Apostle ama odot ye obio kiet kiet ye ini emi owo oro ẹtịn̄de ẹban̄a akakarade.’ William Ramsay emi esinyụn̄ ekpepde n̄kpọ aban̄a Bible ọdọhọ ke Luke ekedi “ata eti ewetmbụk.”