Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME JANUARY 2014

Mme Akpan̄kpa Ẹyeset

Mme Akpan̄kpa Ẹyeset

Ndi afo emenịm se Bible etịn̄de nte ke mme akpan̄kpa ẹyeset? * Enem nnyịn ndifiọk ke iyafiak ikụt mbon nnyịn oro ẹkpan̄ade. Edi ndi emi eyetịbe ke akpanikọ? Man ibọrọ mbụme emi, yak ise m̀mê mme apostle Jesus Christ ẹma ẹnịm ke mme akpan̄kpa ẹyeset.

Mme apostle Jesus ẹma ẹnịm ke mme akpan̄kpa ẹyeset. Nso ikanam mmọ ẹnịm? Yak isiak n̄kpọ iba kpọt. Ata akpan n̄kpọ oro akanamde mmọ ẹnịm edi nte ke Jesus ke idemesie ama eset ke n̄kpa. Mme apostle ye mme mbet eken emi ẹwakde ẹbe owo 500 ẹma ẹkụt Jesus ke enye ama ekeset. (1 Corinth 15:6) Ke adianade do, Matthew, Mark, Luke, ye John ẹdọhọ ke ata ediwak owo ẹma ẹnịm ke Jesus eset ẹnyụn̄ ẹtetịn̄ ẹnọ mbon en̄wen.—Matthew 27:62–28:20; Mark 16:1-8; Luke 24:1-53; John 20:1–21:25.

Ọyọhọ ntak iba edi ke mme apostle ẹma ẹkụt Jesus anamde n̄kpọ nte owo ita ẹset—akpa ke Nain, ọyọhọ iba ke Capernaum, ọyọhọ ita ke Bethany. (Luke 7:11-17; 8:49-56; John 11:1-44) Ima itetịn̄ iban̄a ọyọhọ owo ita emi ke magazine emi. Jesus ama ama ufọk mmọ etieti. Ẹyak ifiak ise se iketịbede.

“AMI NDI EDISET”

N̄kọ emeti se Jesus ọkọdọhọde Martha usen inan̄ ke Lazarus eyeneka esie ama akakpa? Jesus ọkọdọhọ enye ete: “Eyeneka fo eyeset ke n̄kpa.” Ikọ Jesus ikọsọpke in̄wan̄a Martha. Emi akanam enye ọbọrọ Jesus ete: “Mmọfiọk ke enye ẹyeset.” Enye ekekere ke Lazarus ediset ke akpatre usen. Edi Jesus ama ọdọhọ enye ke imọ idi “ediset ye uwem,” ekem anam eyeneka esie eset. Kere nte esịt ekenemde Martha!—John 11:23-25.

M̀mọ̀n̄ ke Lazarus okodu ofụri usen inan̄ oro? Lazarus iketịn̄de n̄kpọ ndomokiet emi akpanamde owo ekere ke enye ama aka ebiet. Lazarus ikenyeneke ukpọn̄ emi mîkemeke ndikpa, emi ọkọwọrọde aka heaven. Ke ini Jesus akanamde Lazarus eset, enye ikokotke enye isio ke heaven emi enye ekpetiede ekpere Abasi okop inemesịt. Ntre, m̀mọ̀n̄ ke Lazarus okodu ofụri usen inan̄ oro? Enye ekesịne ke udi, ikaha ebiet!—Ecclesiastes 9:5, 10.

Kûfre ete ke Jesus ekemen n̄kpa odomo ye idap. Jesus ọdọhọ ete: “‘Lazarus ufan nnyịn aka ndiduọk odudu, edi ami mmọn̄ n̄ka do man n̄kedemede enye ke idap.’ Ntre mme mbet ẹdọhọ enye ẹte: ‘Ọbọn̄, edieke  edide enye aka ndiduọk odudu, enye oyokop nsọn̄idem.’ Nte ededi, Jesus eketịn̄ aban̄a n̄kpa esie. Edi mmọ ẹkere ke enye eketịn̄ aban̄a ndide idap nduọk odudu. Adan̄aoro, Jesus ọdọhọ mmọ in̄wan̄-in̄wan̄ ete: “Lazarus akpa.’” (John 11:11-14) Jesus ama anam Lazarus eset afiak edidu ye nditọeka esie. Nso akwa n̄kpọ ke Jesus akanam ntem ọnọ mmọ!

Jesus ndikanam mme akpan̄kpa ẹset okowụt se enye edinamde ke ini iso nte Edidem Obio Ubọn̄ Abasi. * Ke ini enye edikarade isọn̄ emi, Jesus eyetie ke heaven anam mme akpan̄kpa ẹset. Ntak edi oro enye ọkọdọhọde ete: “Ami ndi ediset.” Kere nte esịt edinemde fi ndifiak n̄kụt mbon mbufo emi ẹkekpan̄ade! Kere n̄ko nte esịt edinemde mmọ ndikụt fi nde!—Luke 8:56.

Kere nte esịt edinemde fi ndifiak n̄kụt mbon mbufo emi ẹkekpan̄ade!

NYENE MBUỌTIDEM MAN ODU UWEM KE NSINSI

Jesus ọkọdọhọ Martha ete: “Owo eke ọbuọtde idem ye ami, idem ọkpọkọm enye akpakpa, oyodu uwem; ndien kpukpru owo eke ẹdude uwem ẹnyụn̄ ẹbuọtde idem ye ami idikpaha tutu amama.” (John 11:25, 26) Mbon emi Jesus edinamde ẹset ke ini emi enye edikarade ke tọsịn isua ẹyedu uwem ke nsinsi nsinsi edieke mmọ ẹbuọtde idem ke enye.

“Owo eke ọbuọtde idem ye ami, idem ọkpọkọm enye akpakpa, oyodu uwem.”—John 11:25

Ke Jesus ama eketịn̄ aban̄a ediset ke n̄kpa, enye ama obụp Martha ete: “‘Nte afo emenịm emi ke akpanikọ?’ Enye ọbọrọ enye ete: ‘Ih, Ọbọn̄; mmenịm nte afo edi Christ Eyen Abasi?’” (John 11:26, 27) Afo ndien-e? Ndi akpama ndinyene utọ mbuọtidem oro Martha ekenyenede? Akpa n̄kpọ emi enyenede ndinam edi ndikpep se Abasi oyomde nnyịn inam. (John 17:3; 1 Timothy 2:4) Eyenyene utọ mbuọtidem emi edieke ọdiọn̄ọde se Abasi oyomde fi anam. Mbọk dọhọ Mme Ntiense Jehovah ẹwụt fi se Bible ekpepde aban̄a emi. Mmọ ẹyema ndineme n̄kpọ aban̄ade ediset ke n̄kpa ye afo.

^ ikp. eki. 2 Mbọk kot ibuotikọ emi, “Owo Ama Akpa, Esie Ikụreke!” ke page 6 ke magazine emi.

^ ikp. eki. 9 Edieke oyomde ndifiọk n̄kpọ en̄wen mban̄a se Bible etịn̄de aban̄a ediset ke n̄kpa, mbọk kot ibuot 7 ke n̄wed Mme Ntiense Jehovah emi, Nso ke Bible Enen̄ede Ekpep? N̄wed emi odu n̄ko ke ikpehe Intanet emi, www.jw.org/efi.