Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME DECEMBER 2013

 MBỤK EYOUWEM

Utom Mi Edi Ndinam N̄kpọ Jehovah

Utom Mi Edi Ndinam N̄kpọ Jehovah

Nto America. Ke mma n̄kokụre ufọkn̄wed sekọndri ke January 1937, mma ndụk Ufọkn̄wed Ntaifiọk Iowa ke edem nnyịn. Ekedi n̄ka n̄wed nnam utom, ndien emi ikayakke nnyene ini nnam n̄kpọ en̄wen. Toto ke ini eyenọwọn̄, n̄koyom ndikpep n̄kpọ mban̄a ikpọ ufọkenyọn̄ ye ebọp.

America ẹkesụk ẹben̄e idem ndin̄wana ọyọhọ ekọn̄ ererimbot iba ke ntọn̄ọ ntọn̄ọ 1942. Mma n̄kpere ndikụre ufọkn̄wed ntaifiọk ini oro. N̄kodụn̄ ke ufọkenyọn̄ ye nditọ ufọkn̄wed nnyịn iba. Owo mmọ kiet ama ọdọhọ nsụhọde n̄kokụt akparawa kiet emi okosụk enemede nneme ye nditọ ufọkn̄wed eken ke isọn̄. Mma nsụhọde n̄kokụt enye. Enye ekekere John O. Brehmer, emi ẹsiwakde ndikot Johnny, okonyụn̄ edi Ntiense Jehovah. Idem ama akpa mi ndikụt nte enye adade Bible ọbọrọ se ededi oro ẹbụpde enye. Emi akanam ndọhọ enye ekpep mi Bible. Ekem mma ntọn̄ọ ndisan̄a ye enye n̄kwọrọ ikọ ini ekededi emi n̄kemede.

Ete Johnny ekekere Otto, enye ama akabade edi Ntiense ke ini edide akwa owo ke ban̄k ke Iowa. Enye ama ọkpọn̄ akamba itie oro man ekeme ndida n̄kpọ nte hour 100 n̄kwọrọ ikọ kpukpru ọfiọn̄. Se enye ye ikọtufọk esie ẹkenamde ama anam mbiere ndinam utom Abasi utu ke utom idem mi.

MMEBIERE SE NDINAMDE

Usen kiet, akamba etubom nnyịn ama ọdọhọ ke ndiọn̄ọke n̄kpọ aba nte n̄kesidiọn̄ọde, ye nte ke ndibehe n̄wed edieke mmensịnke idem n̄kpep n̄kpọ. Mma mbọn̄ akam ke ofụri esịt nnọ Jehovah Abasi nte enye an̄wam mi. Ikebịghike, prọfesọ nnyịn ama ọdọhọ ndikụt imọ. Enye ọkọdọhọ ke ẹma ẹyom ọbọpufọk, ndien ke imọ ima idọhọ mmọ ke ami nyenyịme ndinam utom oro. Mma n̄kọm enye nnyụn̄ nnam enye ọdiọn̄ọ se inamde mbiere ndinam n̄kpọ Jehovah utu ke utom idem mi. Mma nna baptism ke June 17, 1942, nnyụn̄ ntọn̄ọ ndisikwọrọ ikọ hour 100 kpukpru ọfiọn̄.

Kpa isua oro, ẹma ẹnọ mi n̄wed ẹte ndidụk ekọn̄, ẹnyụn̄ ẹda mi ẹka iso ikpọ mbonekọn̄. Mma ndọhọ mmọ ke esịt ayamia mi ufen edieke ndụkde ekọn̄. Mma n̄wụt mmọ n̄wed emi mme prọfesọ ẹkewetde ẹte ke ami ndi eti owo ye nte ke ndi ata eti ọbọpufọk. Kpa ye kpukpru emi, ẹma ẹbiere isop ₦1,550,000 ẹnọ mi ẹnyụn̄ ẹnọ mi n̄ka n̄kpọkọbi isua ition ke ufọk-n̄kpọkọbi America emi odude ke Leavenworth ke Kansas.

NTE N̄KPỌ EKETIEDE KE UFỌK-N̄KPỌKỌBI

Ẹkenọ nnyịn owo 230 ika ufọk-n̄kpọkọbi emi ke Leavenworth ke America

Mme Ntiense emi ẹkenọde ẹka ufọk-n̄kpọkọbi Leavenworth ẹma ẹbe 230. Ẹma ẹsision̄o mbon n̄kpọkọbi mi ẹkenam utom ke in̄wan̄ Leavenworth. Mme ekpeme ufọk-n̄kpọkọbi ẹma ẹsida ẹkpeme nnyịn nte isụk inamde utom ke in̄wan̄ oro. Ndusụk mmọ ẹma ẹdiọn̄ọ ke nnyịn  mme Christian isin̄wanake ekọn̄ ẹnyụn̄ ẹma nte nnyịn ikodude uwem.

Ndusụk mme ekpeme ufọk-n̄kpọkọbi ẹma ẹsiyak nnyịn Mme Ntiense itie ọtọkiet ikpep Bible. Mmọ ẹma ẹsin̄wam nnyịn ẹtan̄ mme n̄wed Bible ẹsọk nnyịn ke esịt ufọk-n̄kpọkọbi. Ekpeme ufọk-n̄kpọkọbi kiet ama esitobo Consolation emi ẹkotde Ẹdemede! idahaemi.

ẸSANA MI ẸYAK NDIEN N̄KỌKWỌRỌ IKỌ

Utu ke ndidu ke ufọk-n̄kpọkọbi ofụri isua ition, n̄kodu isua ita kpọt. Ẹma ẹsana mi ẹyak ke February 16, 1946, ọfiọn̄ ifan̄ ke ekọn̄ ererimbot ama okokụre. Ndondo oro ẹsanade mi ẹyak mma mfiak ntọn̄ọ ndikwọrọ ikọ ofuri ini. Ẹkedọhọ n̄kọkwọrọ ikọ kpa ke Leavenworth ke Kansas oro ẹkekọbide mi. Ikenemke mi ndifiak ndi Leavenworth sia ẹma ẹnen̄ede ẹsua Mme Ntiense Jehovah ke obio emi. Ikememke ndikụt utom nnam nse mban̄a idemmi, owo itịn̄ke-tịn̄ iban̄a ndinyene ufọkidụn̄.

Ke nteti nte ete kiet akaduatde mi ke ufọk esie ete nsọsọp n̄wọn̄ọde iso nnyọn̄! Ke ini n̄kokụtde eto emi enye akakamade, mma nsọsọp n̄wọn̄ọde iso nnyọn̄. Ke ufọk en̄wen, mma kiet ama ọdọhọ mi mbet ke imọ ke idi, onyụn̄ eberi usụn̄. Nte n̄kosụk ndade do mbet, enye ama akada ke window ufọkenyọn̄ an̄wan̄a mbat mmọn̄ ofụk mi. Kpa ye kpukpru emi, Jehovah okosụk ọdọdiọn̄ utom ukwọrọikọ mi. Mma ndikop ke ndusụk mbon oro n̄kọnọde n̄wed nnyịn ẹma ẹdidi Mme Ntiense Jehovah.

Mme Ntiense Jehovah ẹma ẹtọn̄ọ obufa ufọkn̄wed ke New York ke 1943 ndida n̄kpep mbon oro ẹdikade idụt en̄wen ikọkwọrọ ikọ. Ẹma ẹkot mi ndidụk ufọkn̄wed oro, ndien n̄kokụre ufọkn̄wed emi ke February 8, 1948. Ẹkekot ufọkn̄wed oro Ufọkn̄wed Enyọn̄-Ukpeme Ukpep Bible Eke Gilead, ndien mi ke ẹsikpep mme owo ndika n̄kọkwọrọ ikọ ke idụt en̄wen. Ke mma n̄kokụre ufọkn̄wed emi, ẹma ẹnọ mi n̄kanam utom Abasi ke Gold Coast emi ẹkotde Ghana idahaemi.

Ke ini n̄kesịmde Gold Coast, utom mi ekedi ndikwọrọ ikọ nnọ ikpọ owo ukara ye mfia owo. Ke mme utịturua, mma nsitiene Mme Ntiense eken n̄kwọrọ ikọ ke ufọk ke ufọk. Mma nsika mme ebiet emi esop Mme Ntiense Jehovah mîdụhe n̄kekpep Mme Ntiense emi ẹdude do nte ẹkpekwọrọde ikọ. Mma nsinyụn̄ nsan̄a nse esop Mme Ntiense Jehovah ke Ivory Coast emi ẹkotde Côte d’Ivoire idahaemi.

Ke ini n̄kodude ke Gold Coast, mma n̄kpep ndidu uwem nte mbon Africa. Mma nsina ke  ufọk ntan, nda ubọk ndia udia, nnyụn̄ nsọsọrọ nnam ndek nte nditọ Israel ẹkesinamde ke wilderness. (Deuteronomy 23:12-14) Emi ama anam mme owo ẹma nnyịn emi ikotode-to idi. Ndusụk iban ikpọ owo ukara ẹma ẹtọn̄ọ nditiene n̄kpep Bible ye nnyịn. Ntre, ke ini mme asua ẹkedọhọde ikpọ owo ukara ẹbịn nnyịn, iban mmọ ẹma ẹkpe mme ebe mmọ ubọk ẹte ẹkûbịn!

Se isiwọrọde ediwak mbon emi ẹtode obio mbakara ẹdi Africa ama ọwọrọ mi n̄ko: utoenyịn ama omụm mi! Utoenyịn ama odụk mi ibuot onyụn̄ esịn mi idiọk ufiopidem ye n̄kunya. Mban̄ ama enyek mi tutu edidi se ndade-da ubọk mmụm. Edi ukwọrọikọ ama esinam n̄kop inemesịt.

Mma n̄kụt Eva Hallquist ke America mbemiso ndi Africa. Mma nsiwet enye leta ke akpa isua inan̄ oro n̄kodude ke Africa, enye onyụn̄ ewet mi. Mma ndiọn̄ọ ke enye edikụre Ufọkn̄wed Gilead ke July 19, 1953, ke mbono Mme Ntiense Jehovah ke Yankee Stadium ke New York. Mma n̄kpe etubom nsụn̄ikan̄ kiet nte enye enyịme nnam utom ke nsụn̄ikan̄ esie man enye ekpemen mi ekesịm America.

Ke ima ikawat urua ita ke akpa, mma n̄kesịm America nnyụn̄ nsọsọp n̄ka mbịne Eva ke Brooklyn emi ibuot itieutom Mme Ntiense Jehovah odude. Mma mbụp enye ndọ do ke ufọkenyọn̄ emi ẹdade ẹkụt ata ediye mbenesụk New York. Nte ini akakade, ima idọ ndọ ndien Eva ama ọwọn̄ọde edi Gold Coast editiene mi anam utom ukwọrọikọ.

NDISE MBAN̄A ETE YE EKA MI

Ke ami ye Eva n̄wan mi ima ikanam utom isua ifan̄ ke Africa, eka mi ama ewet nnyịn ete ke kansa ọmọn̄ owot ete mi. Ẹma ẹyak ikese enye ke America. Idem esie ama enen̄ede ọdiọk. Ikebịghike, ete mi ama akpa.

Ima ifiak idi Ghana idinam utom ke n̄kpọ nte isua inan̄, ekem ẹwet nnyịn ke idem ẹka mi ọdiọk etieti. Ndusụk ufan nnyịn ẹma ẹdọhọ mi ye n̄wan mi ẹte inyọn̄ idise enye enyịn. Ikememke utom ndibiere ndinam emi. Ke mma n̄kọkwọrọ ikọ ke obio owo ke isua 15, n̄wan mi onyụn̄ etiene mi ọkwọrọ ke isua 11, ima ifiak inyọn̄ America.

Ami ye ọbọn̄ obio kiet ke Gold Coast, emi ẹkotde Ghana idahaemi

Ami ye n̄wan mi ima ise eka mi enyịn ke ediwak isua, in̄wam enye aka mbono esop ke ini enye ekemede. Enye akakpa ke January 17, 1976, ke ini edide isua 86. Edi se ikabiakde mi ikan eketịbe ke 1985, ke ini ẹkedọhọde ke Eva n̄wan mi ọdọn̄ọ kansa. Ima idomo ndin̄wam enye ke kpukpru usụn̄ edi udọn̄ọ emi ama osụk ada enye ibuot ke June 4, 1985, ke ini enye edide isua 70.

N̄KPỌNTỊBE EN̄WEN KE UWEM MI

Ke Mme Ntiense Jehovah ẹma ẹkebọp obufa itieutom en̄wen ke Ghana, ẹma ẹkot mi ndidụk edinam ediyak itie emi nnọ Abasi ke 1988. Ndifreke edinam emi tutu amama! Ke ini n̄kokụrede ufọkn̄wed Gilead isua 40 ke edem nnyụn̄ ndi Ghana, Mme Ntiense mi ẹkedi n̄kpọ nte owo tọsịn kiet. Edi ke 1988, mmọ ẹma ẹwak ẹbe owo 34,000, ndien idahaemi mmọ ẹkpere ndisịm 114,000!

Ke August 6, 1990, mma ndọ ufan Eva kiet emi ekekerede Betty Miller. Nnyịn mbiba ke ika iso inam n̄kpọ Jehovah Abasi nnyịn. Nnyịn ke itie ibet ini emi idifiakde ikụt mme ete ye eka ye ete ete ye eka eka nnyịn ye Eva ke Paradise.—Utom 24:15.

Esịt esinem mi etieti ke ini ntiede n̄kere ofụri se Jehovah adade mi anam ke isua 70 emi ẹbede. Mmesikọm Jehovah ke ndin̄wam mi nnam utom esie tutu esịm emi. Kpa ye oro edide mmebe isua 90, Jehovah Abasi ke ọnọ mi odudu ndika iso nnam n̄kpọ esie.