Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  December 2013

 SAN̄A KPERE ABASI

“Sese! Mmanam Kpukpru N̄kpọ Ẹdi Mbufa”

“Sese! Mmanam Kpukpru N̄kpọ Ẹdi Mbufa”

Ndi akpama ndidu uwem ye ikọtufọk fo mbịghi unyụn̄ udọn̄ọke? Ndi akpama ndidu uwem ke ererimbot emi ubiak, ufen ye n̄kpa mîdidụhe aba? Kûyak emi etie fi nte ndap koro Abasi aduak ndinam ererimbot emi ọfọn. Ediyarade 21:3-5 etịn̄ nte n̄kpọ editiede ke obufa ererimbot oro.—Kot.

“[Abasi] ọyọkwọhọde kpukpru mmọn̄eyet ke enyịn mmọ efep.” (Ediyarade 21:4) Nso utọ mmọn̄eyet ke enye edikwọhọde ifep? Enye edikwọhọde kpukpru mmọn̄eyet emi ukụt ye ufen adade edi, idịghe mmọn̄eyet idatesịt, m̀mê enye emi esiyetde nnyịn enyịn. Abasi edinam emi ke nditre kpukpru ukụt ye ufen ke isọn̄ emi.

“N̄kpa idinyụn̄ idụhe aba.” (Ediyarade 21:4) Iwakke se isinamde owo atua nte n̄kpa. Idiọkn̄kpọ emi ikadade ke Adam imana anam emi. Ntre, Jehovah oyosio n̄kpa ke ererimbot emi ke ndinam nnyịn ibọhọ idiọkn̄kpọ emi ikadade ke Adam imana. (Rome 5:12) Ekem, Jehovah ayanam mbon oro ẹkopde item esie ẹfọn ẹma sia Jesus ama akakpa afak mmọ. * Omokụt do nte Abasi edisobode akpatre asua owo efep ke nsinsi. (1 Corinth 15:26) Ini oro ndien ke nti owo ẹdidu uwem ke nsinsi nte Abasi okoyomde, idọn̄ọke aba.

“Ubiak idinyụn̄ idụhe aba.” (Ediyarade 21:4) Nso utọ ubiak mîdidụhe aba? Kpukpru ubiak emi mme owo ẹkopde ke ntak nsio nsio n̄kpọ.

Se isụk inemede emi ọmọn̄ etetịbe. Edi emekeme ndibụp m̀mê m̀mọ̀n̄ ke emi editịbe. Ididịghe ke heaven. Yak ise se inamde idọhọ ntem. Akpa, ti ke itien̄wed emi ọtọn̄ọ ke ndidọhọ ke “ebietidụn̄ Abasi omodu ye owo,” mbemiso asiakde mme n̄kpọ oro Abasi edisiode ifep. Mme owo ẹdụn̄ ke m̀mọ̀n̄? Ndi idịghe ke isọn̄ emi? (Ediyarade 21:3) Ọyọhọ iba, itien̄wed emi ọdọhọ ke “n̄kpa idinyụn̄ idụhe aba.” Akananam owo ikpaha ke heaven, ẹsụk ẹkpa ke isọn̄ emi. Omokụt do, ke isọn̄ emi ke Abasi oyom ndisio ubiak ye n̄kpa mfep.

Abasi edikwọhọde kpukpru mmọn̄eyet emi ukụt ye ufen adade edi

Jehovah ọmọn̄ adada obufa ererimbot emi edi ndien enye oyom nnyịn inịm emi ke akpanikọ. Ke Abasi ama eketịn̄ kpukpru se imọ iyomde ndinam ke isọn̄ emi, enye ọn̄wọn̄ọ ete: “Sese! Mmanam kpukpru n̄kpọ ẹdi mbufa.” Enye ọdọhọ n̄ko ete: “Ikọ emi edi akpanikọ ye se ẹkemede ndibuọt idem.” (Ediyarade 21:5) Ikpama fi ekpep se afo ye mbon fo ẹkpenamde man ẹtiene ẹsịne ke otu ndinen owo oro ẹdidude ke ini Abasi edinamde kpukpru se itịn̄de emi.

^ ikp. eki. 5 Edieke oyomde ndifiọk n̄kpọ efen mban̄a nte Jesus akakpade afak nnyịn, mbọk kot ibuot 5 ke n̄wed Nso ke Bible Enen̄ede Ekpep? emi Mme Ntiense Jehovah ẹsiode.