Nte oyomde okụbọde

Mek usem

Be ka udiana n̄kpọ

Be ka se isịnede

Be ka se isịnede

Mme Ntiense Jehovah

Efịk

ENYỌN̄-UKPEME OCTOBER 2013

 IBUOTIKỌ IKPAEDEM | NSO ISỊNE KE BIBLE?

“Nnyịn Imokụt Messiah”!

“Nnyịn Imokụt Messiah”!

Ke n̄kpọ nte isua ikie inan̄ ama ekebe tọn̄ọ ẹkewet n̄wed Malachi, se Micah eketịn̄de aban̄a Messiah ama osu: Jesus ama amana ke Bethlehem. Ke n̄kpọ nte isua 30 ama ekebe, oro edi, ke isua 29 E.N., akpa n̄kpọ oro prọfet Daniel eketịn̄de aban̄a Messiah ama osu. Jesus ama ana baptism, Abasi onyụn̄ ada edisana spirit eyet enye aran. Mfri, oro edi, Messiah oro ikọt Abasi ẹketiede ẹbet ke anyan ini ama edi ndien ke nnennen ini kpa nte mme prọfet ẹkedọhọde!

Jesus ama ọtọn̄ọ utom esie inikiet inikiet, “atan̄a eti mbụk obio ubọn̄ Abasi.” (Luke 8:1) Kpa nte mme prọfet ẹketịn̄de, Jesus ama ọfọn ido, etie sụn̄sụn̄, onyụn̄ enen̄ede ama mme owo. Ukpepn̄kpọ esie ama ọfọn ye mme owo onyụn̄ owụt nte enye amade mmọ. Enye ama onyụn̄ ọkọk mme owo “kpukpru orụk udọn̄ọ” ndiwụt ke Abasi do ye imọ. (Matthew 4:23) N̄kpri ye ikpọ ẹma ẹsika ẹbịne enye ẹnyụn̄ ẹdọhọ ẹte: “Nnyịn imokụt Messiah”!—John 1:41.

Jesus ama ọdọhọ ke mbemiso Obio Ubọn̄ ọtọn̄ọde ndikara isọn̄ emi, ke ekọn̄, unyekisọn̄, ye ediwak mfịna eken ẹyedu ke isọn̄. Ntre enye ama ọdọhọ kpukpru owo ete “ẹdu ke ukpeme.”—Mark 13:37.

Jesus ama ọfọn ama onyụn̄ anam kpukpru se Abasi ọkọdọhọde enye anam. Edi mme asua esie ẹma ẹmụm enye ẹwot. N̄kpa esie anam inyene idotenyịn ndidu uwem ke nsinsi ke Paradise emi Adam ye Eve mîkekemeke ndidu ke ntak ntụtutọn̄.

Mme prọfet ẹma ẹdọdọhọ ke Jesus ayakpa, ndien ke Abasi ayanam enye eset akabade edi owo eke spirit ke usen ita ebede. Se ikonyụn̄ itịbede edi oro. Ke Jesus ama ekeset ke n̄kpa, enye ama owụt mbet emi ẹwakde ebe owo 500 idem. Mbemiso Jesus ọnyọn̄de aka heaven, enye ama ọdọhọ mme mbet esie ẹmen eti mbụk Obio Ubọn̄ Abasi ẹka ẹkekwọrọ ẹnọ “mme owo ke kpukpru idụt,” ẹnyụn̄ ẹnam mme owo ẹfiọk imọ. (Matthew 28:19) Mmọ ẹkenam utom emi didie?

Ẹda ẹto Matthew, Mark, Luke, John, 1 Corinth.