Be ka se isịnede

Be ka udiana n̄kpọ

Be ka se isịnede

Mme Ntiense Jehovah

Efịk

Enyọn̄-Ukpeme  |  October 2013

 SAN̄A KPERE ABASI

‘Jehovah Esifen Ọnọ Owo ke Ofụri Esịt’

‘Jehovah Esifen Ọnọ Owo ke Ofụri Esịt’

Owo isiwakke ndifen nnọ owo emi mîsifenke inọ owo. Emi owụt ke akpana isifen inọ owo sia idụhe owo emi ọfọnde ama, oro mîsiduehe owo. (Matthew 7:12) Edi odu ata akpan ntak en̄wen emi akpanamde isifen inọ owo. Apostle Paul etịn̄ ntak emi ke Colossae 3:13.—Kot.

Nnyịn imesidue mme owo sia nnyịn mîfọnke ima, mmọ ẹsinyụn̄ ẹdue nnyịn. (Rome 3:23) Nso ke ikpanam man idu ke emem ye mme owo nte nnyịn emi mînyụn̄ ifọnke ima? Spirit Abasi ama anam Paul ọdọhọ nnyịn isiyọ inyụn̄ ifen kiet eken. Item emi ke enyenyene odudu nte ekenyenede ke ini ẹkewetde enye n̄kpọ nte isua tọsịn iba emi ẹkebede. Yak itịm ise ikọ Paul emi ise.

“Ẹka iso ẹyọ kiet eken ẹnyụn̄ ẹfen kiet eken.” N̄wed ndụn̄ọde kiet ọdọhọ ke Christian oro anamde se itie Bible emi etịn̄de “esinyịme ndiyọ mbon oro ẹdude uwem oro enye mîmaha.” Ikọ oro “ẹyọ kiet eken” onyụn̄ etie nte Ikọ Efịk emi ọdọhọde “ubọk otụk edem, edem otụk ubọk.” Emi ọwọrọ ke edieke isinamde n̄kpọ emi mbon en̄wen mîmaha edi mmọ ẹyọ nnyịn, ana nnyịn inyụn̄ iyọ mmọ edieke mmọ ẹnyụn̄ ẹnamde se nnyịn mîmaha. Edi nso ke ikpanam edieke owo eduede nnyịn?

“Ẹka iso . . . ẹfen kiet eken ke ofụri esịt.” Ete kiet emi esikpepde n̄kpọ aban̄a Bible ọdọhọ ke ikọ Greek oro ẹkabarede “fen ke ofụri esịt” ‘idịghe ikpîkpu edifen nnọ owo, edi ọwọrọ ndifen nnọ owo ofụri ofụri inamke n̄kpọ m̀mê owo oro akanam fi nso.’ N̄wed kiet ọdọhọ ke ikọ emi ọwọrọ n̄ko “ndifọn ido ye owo.” Nnyịn iwụt ke imọfọn ido ke ndinyịme ndifen nnọ owo idem edieke inyenede “ntak nditọhọ ye owo.” Ntak emi ikpefende inọ owo emi eduede nnyịn-e? Sia nnyịn n̄ko imekeme ndidue enye inyụn̄ iyom enye efen ọnọ nnyịn.

“Kpa nte Jehovah ekefende mbufo ke ofụri esịt, ẹfen mbon en̄wen kpasụk ntre.” Akakan ntak emi akpanade ifen inọ mme owo edi nte ke Jehovah Abasi esifen ọnọ nnyịn ke ofụri esịt. (Micah 7:18) Tie kere adan̄a nte Jehovah ọfọnde ido ye mme anamidiọk oro ẹkabarede esịt. Jehovah itiehe nte nnyịn, enye isiduehe owo. Kpa ye oro, enye enyịme ndifen anamidiọk oro akabarede esịt okposụkedi emi enye ọdiọn̄ọde ke tutu amama, ke inyeneke se imọ idinamde emi ediyomde anamidiọk oro efen ọnọ imọ. Ke akpanikọ, idụhe owo emi efende ọnọ owo ke ofụri esịt nte Jehovah.

Idụhe owo emi efende ọnọ owo ke ofụri esịt nte Jehovah!

Nte Jehovah atuade owo mbọm anam nnyịn ima enye inyụn̄ ikpebe enye. (Ephesus 4:32–5:1) Ntre, akpana kpukpru nnyịn ibụp idem nnyịn ite, ‘Ke mma n̄ketie n̄kere nte Jehovah efende ọnọ mi ke ofụri esịt, ndi enyene se owo akpanamde mi ndien ntre ndifen nnọ enye ke enye ama ekenen̄ede akabade esịt?’—Luke 17:3, 4.